Gipadali sa Matinumanong mga Panimalay ang Pagpauswag sa Sri Lanka

NAILHAN ingong Ceylon hangtod sa 1972, ang Sri Lanka maoy usa ka matahom nga isla nga may mga lapyahan nga nalinyahan sa mga kahoyng palma, kabukiran, ug gagmayng mga disyerto. Sa kabukiran, ang Adam’s Peak, nga 2,243 metros, maoy usa ka lugar nga sagrado alang sa upat ka dagkong relihiyon.a Sa duol mao ang World’s End, usa ka pangpang diin ang batoong kimba titip kaayo nga may kapin sa 1,500 metros. Ang lugar maoy usa sa labing matahom nga mga talan-awon sa Sri Lanka.

Ang 18 ka milyong molupyo sa Sri Lanka nag-ambitay sa makaiikag nga kagikan. Sukad sa ikalimang siglo W.K.P., ang mga tawo nga Indo-Uropanhon ug kaliwat gikan sa amihanang India maoy nagpuyo sa isla. Sila mao ang mga Sinhalese, nga karon naglangkob sa mga 75 porsiento sa populasyon. Dayon, sa mga ika-12ng siglo, miabot ang panon sa mga Tamil gikan sa habagatang India; ang kadaghanan kanila karon nagpuyo sa amihanan ug sidlakan sa isla. Ang mga Portuges, Olandes, ug Britaniko usab nagbilin ug ilang mga tunob gikan sa kolonyal nga panahon. Dugang pa, ang sakayanong mga negosyante gikan sa mga peninsula sa Arabia ug Malaya namuyo uban sa lokal nga mga tawo. May mga pundok usab sa mga molupyong mga Uropanhon, Parsis, Insik, ug uban pa.

Gawas pa sa panagsagol sa rasa, ang pinulongan ug relihiyon sa Sri Lanka nagpabanaag sa nagkadaiya nga kagikan niini. Ang pangunang mga pinulongan sa isla mao ang Sinhalese, Tamil, ug Ingles. Daghang taga-Sri Lanka makasultig labing menos duha sa tulo. Ang etnikong mga kagikan usab adunay dakong papel sa relihiyon sa katawhan. Ang kadaghanang Sinhalese maoy mga Budhista, samtang ang kadaghanang Tamil maoy mga Hindu. Kadtong Arabo ug Malay nga kaliwat sagad nagpabilin sa Islam, ug kadtong Uropanhon ug kagikan kadaghanan maoy mga membro sa mga relihiyon sa Kakristiyanohan, Katoliko ug Protestante.

Pag-atubang sa Hagit

Kining tanan nagtanyag ug dakong hagit alang sa mga Saksi ni Jehova sa Sri Lanka. Kini nagpalisod sa pagtuman sa sugo ni Jesus: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran.” (Mateo 24:14) Gawas pa nga sagubangon ang daghang pinulongan, ang mga magmamantala sa maayong balita makigsulti sa mga Budhista, mga Hindu, mga membro sa mga relihiyon sa Kakristiyanohan, ingon man sa mga ateyista​—sulod lang sa pipila ka oras sa pagsangyaw.

Aron mahimong epektibo sa ilang ministeryo, ang mga magmamantala kinahanglang magdalag mga magasing Bantayanang Torre ug Pagmata! ug ubang literatura sa Bibliya sa Tamil, Sinhalese, ug Ingles. Kadtong may pagkakusgan sa pagdala niini magdala pag Bibliya nianang mga pinulongana. Ang mga magmamantala sa dili pa dugay nalipay kaayo sa dihang ang brosyur nga Tinuod Bang May Pagtagad ang Diyos Kanato? ug Our Problems​—Who Will Help Us Solve Them? ug ang tract nga Kini Bang Kalibotana Molungtad? dungang giluwat diha sa tulo ka pinulongan. Kini nagpasabot ug dugang galamiton alang sa buluhaton.

Ang mga Saksi nagkugi nag maayo sukad pa sa 1912, sa dihang si Charles Taze Russell, nga maoy presidente niadto sa International Bible Students Association, miduaw makadiyot sa Ceylon. Ang talagsaong pag-uswag, hinunoa, nahimo sa pag-abot sa mga graduwado sa Watchtower Bible School of Gilead sa 1947. Sukad niadto, ang mga magmamantala sa Sri Lanka nakatagamtam ug maayong mga resulta gikan sa ilang pagsangyaw nga buluhaton. Niadtong 1994 ang 1,866 ka magmamantala sa Gingharian nagdumala, sa aberids, ug 2,551 ka pagtuon sa Bibliya sa balay matag bulan. Ug ang mitambong sa Memoryal nga 6,930 maoy halos upat ka pilo sa gidaghanon sa mga magmamantala sa tanang kongregasyon. Pagkadako nga panalangin!

Kon itandi sa pipila sa ubang kayutaan, ang pag-uswag sa Sri Lanka daw mahinay. Ang usa sa mga hinungdan mopatim-awng mao ang malig-ong mga relasyon sa pamilya. Apan, sa ubang paagi kini adunay bentaha. Sa dihang ang Romanhong sundalo nga si Cornelio mibarog alang sa kamatuoran, ang iyang tibuok panimalay mibarog uban kaniya. (Buhat 10:1, 2, 24, 44) Ang basahon sa Mga Buhat naghisgot usab sa ubang malig-ong Kristohanong mga panimalay, lakip niadtong kang Lydia, Crispo, ug sa tigbilanggo ni Pablo ug Silas.​—Buhat 16:14, 15, 32-34; 18:8.

Sa pagkatinuod, ang malig-ong mga relasyon sa pamilya may bentaha kon adunay maayong organisasyon ug matinumanong paglahutay. Nahinumdom sa mga pulong sa Isaias 60:22, ang dugay nang misyonaryo nga si Ray Matthews miingon: “Karon mopatim-awng gipadali ni Jehova ang mga butang diha sa hustong panahon, dili lamang pinaagi sa mga indibiduwal kondili usab pinaagi sa mga panimalay.”

Organisadong Pamilya Nakahatag ug Pagdayeg

Dayag nga adunay ingon nianang matinumanong mga panimalay sa Sri Lanka karon. Pananglitan, anaa ang organisado-kaayong pamilyang Sinnappa nga nagpuyo sa Kotahena, usa ka rehiyon sa Colombo, ang kaulohang siyudad sa Sri Lanka. Bisag ang ulo sa pamilya, si Marian, namatay dili pa dugay, ang iyang asawa, si Annamma, ug ang 12 sa ilang 15 ka anak, nga nag-edad ug 13 ngadto sa 33, nagpadayon sa pag-alagad kang Jehova ingong usa ka panimalay. Sa pagkakaron, walo sa mga anak bawtismado na, ug tulo kanila anaa sa bug-os panahong pag-alagad, nga nag-alagad ingong mga regular payunir. Ang laing tulo pa nagpatala sa oksilyare payunir nga pag-alagad sa matag karon ug unya. Taliwala sa mga gagmay diha sa panimalay upat maoy dili bawtismadong mga magmamantala. Dugang pa, ang upat ka apo, bisag mga bata pa kaayo, nagtuon sa Bibliya ug nagtambongan sa Kristohanong mga tigom sa North Congregation sa mga Saksi ni Jehova sa Colombo.

Niadtong 1978 nga si Annamma unang nakadungog sa maayong balita sa Gingharian sa dihang gidawat niya ang usa ka kopya sa Ang Bantayanang Torre. Gisugdan ang pagtuon sa Bibliya, ug human matapos ang giya sa pagtuon sa Bibliya nga Ang Kamatuoran nga Motultol sa Kinabuhing Dayon, gipahinungod ni Annamma ang iyang kinabuhi kang Jehova nga Diyos ug nabawtismohan, busa nagpakitag unang panig-ingnan alang sa daghan pa sa iyang panimalay.

Sama sa sundalo nga si Cornelio, si Annamma organisado kaayo sa iyang panimalay. “Planohon namo ang Kristohanong mga tigom ug mga asembliya​—wala pay labot sa tunghaan,” nahinumdom si Annamma. “Ang sinina usa ka problema, apan uban sa panalangin ni Jehova kami nakatahig pipila ka bag-ong mga sinina matag asembliya. Ang tanan sa pamilya manambong nga maayog pamiste ug maayog kaon​—ug may dakong pahiyom usab.”

Nahinumdom ang mga bata sa ilang organisasyon sa panimalay nga mahinamon. Sa pagtabang sa tibuok pamilya aron makatambong sa Kristohanong mga tigom, ang mga gulanggulang ang sagad hatagan ug linaing mga kaakohan. Pananglitan, si Mangala maoy manglaba, ug si Winnifreda ang mangutaw. Si Winnifreda, kinsa mitabang usab sa pag-ilis sa mga manghod, miingon: “Ang tanan posturawo gayod iniggawas nila sa balay.”

Ang espirituwal nga mga tagana maayong pagkaorganisar usab. Ang anak nga babayeng si Pushpam, karon usa ka regular payunir, nahinumdom: “Matag adlaw, gikalipayan sa among pamilya ang dungan nga pagbasa sa Bibliya ug sa pagrepaso sa inadlaw nga teksto sa Bibliya.” Si Annamma midugang: “Ang matag bata adunay kaugalingong kopya sa Bibliya, Ang Bantayanang Torre, ug ubang mga publikasyon. Ako mamati pag-ayo sa tanan nilang mga komento sa mga tigom. Kon gikinahanglan, ipadayon nako sa balay ang pagdasig ug pagtul-id. Sa gabii kami mag-usa sa pagtapos sa adlaw pinaagi sa among pag-ampo sa pamilya.”

Ang gulanggulang nga mga anak dako kaayog tabang kang Annamma sa pagtaganag maayong Kristohanong edukasyon alang sa tanan diha sa pamilya. Ang puno nga iskedyul, hinunoa, wala makababag sa ilang tinguha sa pagpaambit sa maayong balita sa gawas sa balay. Tanantanan, ang nagkalainlaing membro sa pamilya nagdumalag 57 ka pagtuon sa Bibliya sa balay uban sa mga tawo sa ilang kasilinganan. Ang umagad-nga-lalaki nga si Rajan miingon: “Ang pamilya nagdumalag mauswagong mga pagtuon sa Bibliya. Ang akong asawa, si Pushpam, nakapribilehiyo na sa pagkakita sa usa sa iyang mga estudyante nga nagpahinungod sa iyang kinabuhi kang Jehova.”

Naukay gayod ang Kotahena sa dihang gibiyaan niining dakong pamilya ang Iglesya Romana Katolika. Bisag ang pari mismo wala gayod miduaw sa pamilya sa pagtino kon nganong sila mibiya, hinuon iyang gihangyo ang laykong mga membro sa iglesya sa pag-usisa. Daghang panaghisgot ang misunod, ang kadaghanan bahin sa doktrina sa Trinidad. Si Annamma kanunayng misalig kang Jehova ug sa Bibliya sa pagdepensa sa iyang pagtuo. Ang iyang paboritong teksto niini nga mga panaghisgot mao ang Juan 17:3.

Tin-awng ginapasundayag sa panimalayng Sinnappa nga ang maayong organisasyon ug padayong paningkamot makadalag makatagbawng mga sangpotanan. Tungod sa ilang masibotong mga paningkamot, usa ka bag-ong kaliwatan sa mga magmamantala sa Gingharian ang nagtubo, tanan alang sa kadayeganan ni Jehova.

Pagsupak Nagpahiusa sa Pamilya sa Matuod nga Pagsimba

Ang panimalayng Ratnam nahimutang sa pipila ka kilometros ang kalay-on gikan sa mga Sinnappa, sa Narhenpitya, laing rehiyon sa Colombo. Sila usab maoy mga Romano Katoliko niadto. Niadtong 1982, nakontak sa mga Saksi nga nakigbahin sa balay-ug-balay nga ministeryo si Balendran, bana sa kinamagulangang anak nga babaye, si Fatima. Gisugdan ang pagtuon sa Bibliya uban sa tibuok pamilya. Dayon nangutana ang ilang tulo ka anak kang Lola Ignasiamal bahin sa ngalan sa Diyos. Sa dihang gitubag sa mga bata nga “Jehova,” napukaw nila ang interes ni Lola, ug usa ka pagtuon sa Bibliya ang gisugdan uban kaniya. Sa ulahi, duha sa iyang anak nga babaye, si Jeevakala ug Stella, miduyog sa pagtuon, ug niadtong 1988 ang tulo gibawtismohan.

Kasamtangan, si Balendran ug Fatima nagpaambit sa kamatuoran uban sa laing manghod nga babaye ni Fatima, si Mallika, ug sa iyang bana, si Yoganathan. Sa pagka-1987 kining magtiayona nabawtismohan, ug gipatisok nila diha sa ilang duha ka anak ang nagtubong gugma alang kang Jehova. Si Pushpa, laing igsoong babaye ni Fatima, misunod. Siya nagpahinungod ug nabawtismohan niadtong 1990. Samtang didto sa Tokyo, ang iyang bana, si Eka, nag-alagad uban sa Ingles nga kongregasyon, ug gitabangan ni Pushpa ang ilang batang anak nga lalaki, si Alfred, nga mamatuto diha sa dalan ni Jehova.

Busa sa pagkakaron, upat sa napulo ka anak sa panimalayng Ratnam mibarog sa matuod nga pagsimba. Makapalipay, tulo pa ang naghimog maayong pag-uswag sa ilang kaugalingong mga pagtuon sa Bibliya. Lakip sa 11 ka apo, usa ka batang babaye, si Pradeepa, bawtismado na. Pito pa sa mga batan-on regular nga ginatudloan pinaagi sa ilang mga pagtuon sa Bibliya sa pamilya. Dugang pa, ang total nga 24 ka pagtuon sa Bibliya sa balay ang ginadumala uban sa mga tawong interesado diha sa kasilinganan.

Kining tanan wala mahitabo sa masayon. Sa sinugdan, dihay pagsupak sa pamilya. Ang amahan, si Muthupillai, ug ang magulang nga mga lalaki supak kaayo kang bisan kinsa sa ilang pamilya sa pagtambong sa mga tigom sa Kingdom Hall o sa pagpakigbahin sa pagsangyaw nga buluhaton sa publiko. Samtang ang pipila niini nga pagsupak nalangkit sa kaugalingong kahilwasan, si Muthupillai midugang: “Ako debotado kaayo sa ‘mga santo’ ug supak nga biyaan sa akong pamilya ang Iglesya Katolika.” Karon, hinunoa, siya nagtuo nga sila nagsimba sa matuod nga Diyos tungod kay iyang nakita ang mga kaayohan nga nahatag kanila sa ilang pagtuo.

Pananglitan, kas-a misulay ang ilang Budhista nga tag-iya sa yuta sa pagpahawa kanila gikan sa iyang propiedad pinaagi sa paggamit kanila ug barang. Siya miabot usa ka gabii ug gilibotan ang balay ug mga suwa nga may “pangbarang.” Nahadlok ang matuotuohon nga mga silingan, ang tanan nagdahom nga may mahitabong pila ka kadaot sa panimalayng Ratnam. Apan, sa dihang nakita kini ni Ignasiamal, gikuha lamang niya ug sa mga bata ang mga suwa nga walay kokahadlok​—ug walay kadaot ang nahitabo kanila. Ang ilang walay kahadlok nga lihok nahimong usa ka maayong pamatuod sa dapit, nga nakadanig dakong pagtahod sa mga tawo kanila. Si Stella nakasugod ug duha ka pagtuon sa Bibliya sa balay sa duol nga mga panimalay. Nadasig niini, ang umagad-nga-babaye nga si Nazeera midawat usab ug pagtuon sa Bibliya.

Sa pagtan-aw ug balik sa daghang panalangin nga miabot sa iyang pamilya, si Ignasiamal miingon: “Ako nalipay kaayo nga makita ang espirituwal nga pag-uswag sulod sa pamilya. Kami gipanalanginan ni Jehova tungod kay nagkawala na ang pagsupak, ug miuswag ang panaghiusa sa among pamilya.”

Pagkadakong panalangin niining dagkong mga panimalay. Sila miduyog sa ilang mga tingog uban niadtong mas gagmayng mga pamilya, mga pamilya nga usa ray ginikanan, ug sa nag-inusarang mga Kristohanon nga naningkamot pag-ayo sa pagpadali sa pagmantala sa maayong balita sa Gingharian diha sa “magilakon nga yuta,” nga maoy kahulogan sa ngalang Sri Lanka. Uban sa ilang isigka-Kristohanon sa tibuok yuta, ang mga Saksi sa Sri Lanka nagpaabot sa pagpasig-uli sa Paraiso, diin atong mapalandong bisan karon samtang atong makita ang mga lapyahan ug kabukiran sa matahom nga Sri Lanka.

[Footnote]

[Hulagway sa panid 24, 25]

Daghan sa Sri Lanka ang nagasanong sa Kristohanong pagsangyaw ug pagpanudlo