Pag-abot sa Tanang Matang sa mga Tawo sa Modernong-Adlawng Atenas
SA DIHANG giduaw ni apostol Pablo ang Atenas sa mga 50 K.P., ang siyudad usa gihapon ka hinungdanong sentro sa komersiyo, bisag wala na tagamtama niini ang himaya sa klasikal nga nangagi niini. Usa ka basahon sa kasaysayan nag-ingon: “[Ang Atenas] nagpadayon nga mao ang kaulohan sa espirituwal ug arte sa Gresya, ingon man ang ginapangandoyng lugar nga bisitahanan sa mga edukado ug sa mga gamhanan sa maong panahon.”
Samtang atua didto, si Pablo lagmit may higayon sa pagsangyaw sa mga Hudiyo, paganong mga taga-Atenas, ug sa nagkalainlaing mga tawo gikan sa daghang dapit. Sanglit usa siya ka alisto ug hanas nga magtutudlo, siya miingon sa usa ka pakigpulong nga ang Diyos naghatag sa “tanan nga mga persona ug kinabuhi ug gininhawa,” nga iyang “gihimo gikan sa usa ka tawo ang tanang nasod sa katawhan,” ug nga “silang tanan sa bisan diin angay managhinulsol” tungod kay Iyang hukman “ang gipuy-ang yuta.”—Buhat 17:25-31.
Usa ka Nagkadaiya nga Teritoryo
Sa dili pa dugayng mga dekada ang Atenas nahimo na usab nga usa ka siyudad nga nakadani sa mga tawo bisan diin. Ang mga diplomata ug mga kawani sa militar miabot ingong bahin sa langyawng mga misyon. Ang mga batan-on gikan sa Aprika ug sa Tungang Sidlakan namuyo didto ingong mga estudyante sa unibersidad. Ang lalin nga mga trabahante gikan sa Aprika, Asya, ug sa mga nasod sa Sidlakang Uropa nanghugop. Adunay daghang Pilipino ug uban pa gikan sa Habagatagan-sidlakang Asya, nga nangabot sa pagpangitag trabaho ingong mga katabang sa balay. Ug ang mga kagiw kanunayng nangabot gikan sa silingang mga nasod ug sa gubot nga mga lugar sa tibuok kalibotan.
Kining situwasyona naghatag ug hagit sa lokal nga mga magsasangyaw sa maayong balita sa Gingharian. Ang kadaghanan sa temporaryong mga molupyo Iningles ug sinultihan, apan ang uban nagsulti lamang sa ilang lumad nga pinulongan. Kining mga tawhana naghawas sa daghang nagkalainlaing mga kagikan sa kultura ug relihiyon. Taliwala sa mga bisita, mahimamat nimo ang nag-angkong mga Kristohanon, Muslim, Hindu, Budhista, magsisimbag mananap, agnostiko, ug mga ateyista. Ang mga Saksi ni Jehova kinahanglang magtuon sa pagpasibo sa ilang mga presentasyon aron mohaom sa nagkadaiyang mga kagikan niining mga tawhana.
Sanglit daghan niining mga bag-ong abot nakaagig mga kalisod, sila sagad may mga pangutana bahin sa kahulogan sa kinabuhi ug sa mga palaaboton sa umaabot. Ang uban dako kaayog pagtamod sa Bibliya ug dili malisdan sa pagdawat sa gipamulong niini. Ang kinabag-an niining nagkadaiyang teritoryo maoy mga mapainubsanon, maaghop, ug gutom sa kamatuoran. Mibati sila nga mas may kagawasan sa pagpangita sa kamatuoran tungod kay sila halayo gikan sa ilang pamilya ug sa palibot sa balay.
Ang unang Ingles nga kongregasyon naorganisar sa Atenas niadtong 1986 aron makobrehan kini nga teritoryo. Ang pag-uswag dako gayod. Sa miaging lima ka tuig, duolan sa 80 ka bag-ohan ang nabawtismohan. Ang resulta mao nga usa ka kongregasyon nga Arabiko, usa ka kongregasyon nga Polako, ug sa usa ka panahon, usa ka grupong Pranses ang gitukod sa Atenas. Ang pipila gikan sa Ingles nga kongregasyon mibalhin sa pagtabang sa uban niining mga kongregasyona ug sa mga grupo sa Tesalonica sa amihanan, sa Heraklion, Creta, ug sa Piraeus, ang dunggoanan sa Atenas. Buot ba nimong mahimamat ang pipila sa mga langyaw nga nakakat-on sa kamatuoran sa Atenas?
Nagapangabot ang Tilinguhaong mga Tawo sa mga Nasod
Si Thomas natawo sa Asmara, Eritrea, ug nagdako nga debotadong Katoliko. Sa edad 15, misulod siya sa monasteryo. Iyang gipangutana ang usa sa mga dakodako sa monasteryo: “Sa unsang paagi nga ang usa ka Diyos maoy tulo ka Diyos?” Ang dakodako sa monasteryo mitubag: “Tungod kay gidawat nato ang giingon sa papa bahin sa espirituwal nga mga butang. Labaw sa tanan, kini usa ka misteryo, ug bata ka pa kaayo nga makasabot niana.” Human sa lima ka tuig diha sa monasteryo, mibiya si Thomas, nga naglibog ug nahigawad sa paggawi ug sa mga doktrina sa simbahan. Apan, wala siya mohunong sa iyang pagpangita sa matuod nga Diyos.
Usa ka adlaw wala magdugay human siya mibalhin sa Atenas, nakita niya sa iyang pultahan ang usa ka kopya sa Ang Bantayanang Torre, nga may tema sa hapin nga “Kahimsog ug Kalipay Mamaimo.” Iyang gibasa kini sa makadaghan. Diha sa samang magasin, iyang nabasa nga kinahanglan natong pangitaon pag-una ang Gingharian sa Diyos ug iyang pagkamatarong. (Mateo 6:33) Si Thomas miluhod ug mihangyo sa Diyos nga ipakita kaniya kon unsaon kini pagbuhat, nga nagsaad: “Kon ipakita nimo kanako kon unsaon pagpangita sa imong Gingharian, igugol ko ang unom ka bulan sa akong kinabuhi sa pagtuon kon unsaon sa pag-alagad kanimo.” Sa ikaupat nga semana human niadto, duha ka mga Saksi ang nanuktok sa iyang pultahan. Dihadiha gidawat ni Thomas ang pagtuon sa Bibliya, ug napulo ka bulan sa ulahi siya gibawtismohan. Siya miingon: “Gitubag gayod ni Jehova ang akong pag-ampo, ug gihatagan niya akog higayon nga mahimong usa sa iyang mga Saksi. Karon ang iyang gugma nagpalihok kanako sa pagpangita pag-una sa iyang Gingharian ug pagkamatarong diha sa akong kinabuhi.”
Samtang nagsangyaw gikan sa balay ug balay, duha ka laing mga Saksi nakakitag langyawng ngalan duol sa dorbel.
“Unsay imong tuyo?” miingon ang tingog sa usa ka babaye diha sa intercom.
Usa sa mga Saksi miingon nga sila naningkamot sa pagpangitag mga tawo nga Ingles ug sinultihan nga interesado sa Bibliya.
“Unsay inyong relihiyon?” nangutana ang babaye.
“Kami mga Saksi ni Jehova.”
“Oy, maayo! Dayon sa kinaibabwan nga andana.”
Midayon sila ug, sa mibukas ang pultahan sa elebitor, usa ka dakong tawo nga may pagkanegatibog tinamdan nagtindog didto. Apan ang babaye misultig kusog gikan sa sulod.
“Pasudla sila. Buot ko nga makigsulti kanila.”
Gisultihan sa babaye ang mga Saksi nga siya nagabiyahe sa kalibotan uban sa tem sa esport sa iyang bana, ug sa miaging adlaw pa lamang, siya miampo nga makakitag mga Saksi ni Jehova. Busa usa ka pagtuon ang gisugdan dihadiha. Sanglit limitado lamang ang ilang panahon sa pag-estar sa Gresya, tulo ka pagtuon sa usa ka semana ang gihikay, ang librong Mabuhing Walay Kataposan natapos sulod sa napulo ka semana lamang.
Ang sunod nga panahong tingdula nagpabalik kanila sa Gresya. Gipadayon pag-usab sa asawa ang iyang pagtuon ug nakahimog maayo nga pag-uswag. Human sa duha ka bulan, siya miuban sa mga Saksi sa buluhatong pagsangyaw ingong usa ka di-bawtismadong magmamantala ug dali dayong nakasugod sa iyang unang pagtuon sa Bibliya. Uban ni kinsa? Sa iyang bana, nga nakadayeg kaayo sa mga Saksi ug sa mga kausaban sa iyang asawa.
Si Allan, ang anak nga lalaki sa usa ka pastor nga Protestante, nagdako sa Habagatang Aprika. Sa bata pa kaayo, siya nakombinsir nga ang Bibliya mao ang dinasig nga kapadayagan gikan sa Diyos. Wala matagbaw sa iyang relihiyon, siya miliso sa pilosopiya ug politika, apan kini naghatag kaniyag pagbati nga labi pang haw-ang. Human siya mibalhin sa Gresya, misamot ang iyang gibating kahaw-ang. Gibati niya nga ang iyang kinabuhi walay katuyoan, nga siya anaa sa dalan nga walay kapaingnan.
Usa ka gabii dihay nahitabo. “Ako miluhod ug gibuksan ko ang akong kasingkasing ngadto sa Diyos,” miasoy si Allan. “Uban ang mga luha sa kasubo sa akong dalan sa kinabuhi, ako naghangyo sa Diyos sa pagtultol kanako ngadto sa iyang matuod nga mga sumusunod. Ako misaad nga molakaw diha sa kahayag sa iyang paggiya.” Sulod sa semana, diha siya sa usa ka tindahan ug nakighinabi sa tag-iya, usa ka babaye, nga usa diay ka Saksi. Ang kabildohay nahimong usa ka hinungdanong bahin sa kinabuhi ni Allan. “Sa nagsunod nga mga adlaw, nabungkag ang akong gipakahamiling mga doktrina: Trinidad, impiyerno, kalag nga dili mamatay—ang tanan tin-awng dili mga pagtulon-an sa Bibliya.” Sa Kingdom Hall, gitanyagan siya sa usa ka magtiayong Saksi ug pagtuon sa Bibliya. Siya midawat ug nakahimog kusog nga pag-uswag. “Ang kamatuoran nagpahilak kanako sa kalipay,” nahinumdom si Allan, “ug kini nagpahigawas kanako.” Sa milabay ang usa ka tuig siya nabawtismohan. Karon siya malipayon sa pag-alagad ingong usa ka ministeryal nga alagad diha sa lokal nga kongregasyon.
Si Elizabeth maoy gikan sa Nigeria, diin siya nagpangita sa Diyos diha sa nagkalainlaing mga simbahan apan napakyas. Ang nakapalisang kaniya pag-ayo mao ang doktrinang walay kataposang pagsakit sa impiyerno. Sa miabot siya sa Atenas uban sa iyang pamilya, duha ka mga Saksi ang miabot diha sa iyang pultahan, ug nasugdan ang pagtuon sa Bibliya. Nalipay si Elizabeth sa pagkahibalo nga ang Diyos dili mosakit ug mga tawo, apan siya nagtaganag paglaom alang sa walay kataposang kinabuhi diha sa usa ka paraisong yuta. Siya mabdos sa iyang ikaupat nga anak, nga buot niyang ipahulog. Dayon iyang nakat-onan gikan sa Bibliya ang hunahuna ni Jehova bahin sa pagkabalaan sa kinabuhi. Karon siya may matahom nga anak nga batang babaye. Kusog kaayo ang pag-uswag ni Elizabeth ug wala magdugay siya nabawtismohan. Bisag siya may upat ka anak ug usa ka bug-os panahong trabaho, siya nakahimo sa pag-oksilyare payunir halos kada bulan. Siya gipanalanginan sa pagkakita sa iyang bana nga nagsugod sa pagtuon sa Bibliya. Siya miingon: “Sa kataposan akong nakaplagan ang matuod nga Diyos ug matuod nga pagsimba, salamat kang Jehova ug sa iyang mahigugmaong organisasyon.”
Daghan sa katawhan niining nagkadaiyang teritoryo ang nakontak diha sa pagsangyaw sa kadalanan, apan nagkinahanglag pagkamapinadayonon aron maugmad ang ilang interes. Kini mao ang kahimtang sa usa ka dalaga nga ginganlag Sallay, nga gikan sa Sierra Leone. Gihatagan siya sa usa ka Saksi ug tract, gikuha ang iyang adres, ug gihikay nga duawon siya. Si Sallay interesado ug gidawat ang pagtuon sa Bibliya, apan tungod sa pagpit-os sa trabaho ug ubang mga kalisod, kini wala mahimo sa regular. Dayon siya kalit nga mibalhin nga walay gihatag nga bag-ong adres. Ang Saksi nagpadayon sa pagduaw sa daang adres, ug sa kataposan si Sallay nagpadalag mensahe alang sa Saksi sa pagduaw kaniya sa iyang bag-ong pinuy-anan.
Ang pagtuon karon mas regular na bisag si Sallay anaa na sa kataposang mga bulan sa iyang pagmabdos. Human nanganak, si Sallay nahimong di-bawtismadong magmamantala. Daw sayon kining pamation, apan dili. Sa alas 6:30 s.b., kinahanglang mangandam siya alang sa tunga sa oras nga biyahe sa bus sa paghatod sa iyang anak ngadto sa nursery school, nga sundan ug laing usa ka oras nga biyahe sa bus paingon sa trabaho. Human sa iyang trabaho nga paglimpiyo, siya mobiyahe ug balik ngadto sa iyang balay. Sa mga gabii sa tigom, o sa dihang siya mogula sa pagsangyaw, siya mobiyahe ug laing usa ka oras sa bus idabuwelta, bisan pa sa pagsupak sa iyang bana. Samtang nagpakita kaniyag gugma ug pailob, siya miuswag ngadto sa punto sa pagpahinungod ug bawtismo. Komosta ang iyang bana? Siya mitambong sa Memoryal sa kamatayon ni Kristo ug misugot sa pagtuon sa Bibliya.
Gipanalanginan ug Maayong mga Resulta
Alang sa kadaghanan niining mga tawhana, ang ilang pag-estar sa Atenas maoy temporaryo. Daghan ang namalik sa ilang nasod nga gigikanan aron ipaambit ang maayong balita uban sa mga paryente ug mga higala. Ang uban mibalhin ngadto sa lainlaing mga nasod sa Kasadpan ug nagpadayon sa pag-alagad kang Jehova. Kadtong kinsa nagpabilin sa Gresya nakatagamtam ug maayong mga resulta sa pagsangyaw sa ilang kataginasod nga milalin usab didto. Sa ubang mga kahimtang ang mga binhi sa kamatuoran namunga lamang human ang mga bisita namalhin ngadto sa laing nasod ug nakontak sa mga Saksi.
Kining tanan nagpamatuod nga si Jehova dili mapihigon. Iyang gidawat ang mga tawo gikan sa tanang nasod nga nahadlok kaniya ug nahigugma sa pagkamatarong. (Buhat 10:34, 35) Alang sa maong karnerohong mga tawo, ang ilang pagbalhin ngadto sa laing nasod alang sa materyal nga mga bentaha miresulta ug mas dagko pang mga panalangin kay sa ilang gidahom—kahibalo sa matuod nga Diyos, si Jehova, ug sa iyang saad sa kinabuhing walay kataposan diha sa usa ka matarong bag-ong kalibotan. Oo, si Jehova tinuod nga dagayang nagpanalangin sa mga paningkamot sa pag-abot sa mga tawong langyaw ug sinultihan sa modernong-adlawng Atenas!
[Hulagway sa panid 16]
Ang mga tawo gikan sa daghang kayutaan nakadungog sa maayong balita sa Atenas