Ang mga Karnero ni Jehova Nagkinahanglag Mahigugmaong Pag-atiman

“Ilha nga si Jehova mao ang Diyos. . . . Kita mao ang iyang katawhan ug ang mga karnero sa iyang sibsibanan.”​—SALMO 100:3.

1. Unsay pagtratar ni Jehova sa iyang mga alagad?

SI Jehova mao ang Dakong Magbalantay. Kon kita iyang mga alagad, iyang lantawon kita ingong iyang mga karnero ug naghatag kanatog mahigugmaong pag-atiman. Ang atong langitnong Amahan nagahupay ug nagapalagsik kanato ug nagatultol kanato “sa mga dalan sa pagkamatarong tungod sa iyang ngalan.” (Salmo 23:1-4) Ang Maayong Magbalantay, si Jesu-Kristo, nahigugma kaayo kanato nga iyang gitugyan ang iyang kalag alang kanato.​—Juan 10:7-15.

2. Diha sa unsang kahimtang nakita sa katawhan sa Diyos ang ilang kaugalingon?

² Ingong mga dumadawat sa mahigugmaong pag-atiman, kita makaingon uban sa salmista: “Alagara si Jehova nga may kalipay. Dumuol sa atubangan niya uban sa malipayong pagsinggit. Ilha nga si Jehova mao ang Diyos. Siya mao ang nagbuhat kanato, ug dili kita sa atong kaugalingon. Kita mao ang iyang katawhan ug ang mga karnero sa iyang sibsibanan.” (Salmo 100:2, 3) Oo, kita malipayon ug may kasegurohan. Ingon sa daw kita luwas gikan sa daotang mga manunukob diha sa toril nga may malig-ong paril nga bato.​—Numeros 32:16; 1 Samuel 24:3; Sofonias 2:6.

Andam nga mga Magbalantay sa Panon

3. Sa unsang paagi tratahon sa tinudlong Kristohanong mga ansiano ang panon sa Diyos?

³ Walay duhaduha nga kita malipayon ingong mga karnero sa Diyos! Ang tinudlong mga ansiano maoy nagapanguna taliwala kanato. Wala sila “molihok isip prinsipe,” nga nagharihari ibabaw kanato, o naningkamot nga mahimong mga agalon sa atong pagtuo. (Numeros 16:13; Mateo 20:25-28; 2 Corinto 1:24; Hebreohanon 13:7) Hinunoa, sila maoy mahigugmaong mga magbalantay nga nagpadapat sa tambag ni apostol Pedro: “Magpastol kamo sa panon sa Diyos nga anaa sa inyong pag-atiman, dili sa pinugos, apan sa kinabubut-on; ni tungod sa gugma sa limbong nga kinitaan, kundili sa pagkamaikagon; ni ingong nagahinawod ibabaw kanilang kinsa panulundon sa Diyos, kundili mangahimong panig-ingnan nganha sa panon.” (1 Pedro 5:2, 3) Gisultihan ni apostol Pablo ang kaubang mga ansiano: “Tagda ang inyong kaugalingon ug ang tanan nga panon, nga diha niana kamo gikatudlo sa balaang espiritu nga mga magtatan-aw, aron magpastol sa kongregasyon sa Diyos, nga iyang gipalit pinaagi sa dugo sa iyang kaugalingon nga Anak.” Ug pagkamapasalamaton gayod sa mga karnero nga kining mga lalaki nga tinudlo sa balaang espiritu ‘nagatratar sa panon uban ang kalumo’!​—Buhat 20:28-30.

4. Unsang matanga sa relasyon uban sa panon nga naila si Charles T. Russell?

⁴ Gihatagan ni Jesus ang kongregasyon ug “mga gasa nga mga tawo,” ang uban ingong “mga pastor,” o mga magbalantay, nga nagtratar sa panon ni Jehova sa mahigugmaon nga paagi. (Efeso 4:8, 11; King James Version) Ang usa niini nga mga lalaki mao si Charles T. Russell, ang unang presidente sa Watch Tower Society. Siya gitawag ug Pastor Russell tungod sa iyang mahigugmaon ug mahangawaong mga kalihokan sa pagbantay sa panon ubos sa Pangulong Magbalantay, si Jesu-Kristo. Karong adlawa, ang Kristohanong mga ansiano ginatudlo sa Nagamandong Lawas sa mga Saksi ni Jehova, ug kinahanglang magbantay sa dili paggamit sa mga termino nga “pastor,” “ansiano,” o “magtutudlo” ingong mga titulo. (Mateo 23:8-12) Bisan pa, ang presenteng-adlaw nga mga ansiano nagabuhat sa buluhaton isip pastor, o magbalantay, alang sa kaayohan sa mga karnero sa sibsibanan ni Jehova.

5. Nganong angayng masinati sa mga bag-ohan ang tinudlong mga ansiano diha sa Kristohanong kongregasyon?

⁵ Ingong mga magbalantay, ang mga ansiano adunay dakong bahin sa espirituwal nga pag-uswag sa mga bag-ohan. Busa, ang bag-ong librong Kahibalo nga Motultol sa Kinabuhing Walay Kataposan nag-ingon diha sa panid 168: “Ilha ang tinudlong mga ansiano diha sa kongregasyon. Sila may dakong kasinatian sa pagpadapat sa kahibalo sa Diyos, kay sila nakakab-ot sa mga kuwalipikasyon alang sa pagkamagtatan-aw nga gilatid diha sa Bibliya. (1 Timoteo 3:1-7; Tito 1:5-9) Ayaw pagpanuko sa pagduol sa usa kanila kon gikinahanglan nimo ang espirituwal nga tabang sa pagbuntog sa usa ka batasan o kinaiya nga dili uyon sa mga kinahanglanon sa Diyos. Imong makaplagan nga ang mga ansiano nagsunod sa tambag ni Pablo: ‘Pamulong nga mahupayon sa magul-anong mga kalag, buligi ang mga maluya, magmataas-ug-pailob sa tanan.’​—1 Tesalonica 2:7, 8; 5:14.”

Sa Dihang ang mga Bag-ohan Buot nga Mosangyaw

6. Unsang paagi ang pagasundon kon ang usa ka estudyante sa Bibliya buot nga mahimong usa ka magmamantala sa Gingharian?

⁶ Human nga ang estudyante sa Bibliya nakabatog kahibalo ug taodtaod nang nakatambong sa mga tigom, basin buot na niyang mahimong usa ka magmamantala sa Gingharian, usa ka magsasangyaw sa maayong balita. (Marcos 13:10) Kon mao, ang Saksi nga nagdumala sa pagtuon sa Bibliya kaniya kinahanglang makigsulti sa nagadumalang magtatan-aw, nga maghikay ug usa sa mga ansiano nga kauban sa Komite sa Pag-alagad sa Kongregasyon ug laing ansiano sa pagpakigkita sa estudyante sa Bibliya ug sa iyang magtutudlo. Ang panaghisgot ipasukad diha sa librong Organisado sa Pagtuman sa Atong Ministeryo, sa mga panid 98 ug 99. Kon makita niining duha ka ansiano nga ang bag-ohan nagtuo sa pangunang mga pagtulon-an sa Bibliya ug nagpahiuyon sa mga prinsipyo sa Diyos, siya sultihan nga siya kuwalipikado sa pagpakig-ambit sa publikong ministeryo.a Sa dihang itaho niya ang iyang ministeryo pinaagi sa paghatag ug taho sa pag-alagad sa kanataran, kini itala diha sa Congregation’s Publisher Record card nga gihimo alang sa iyang ngalan. Ang bag-ohan karon makataho na sa iyang kalihokan sa pagsangyaw duyog sa milyonmilyong uban pa nga malipayong ‘nagamantala sa pulong sa Diyos.’ (Buhat 13:5) Usa ka pahibalo ang himoon nga siya usa na ka di-bawtismadong magmamantala sa kongregasyon.

7, 8. Sa unsang mga paagi matabangan ang di-bawtismadong magmamantala diha sa ministeryo?

⁷ Ang di-bawtismadong magmamantala nagkinahanglan sa tabang sa mga ansiano ug sa ubang hamtong nga mga Kristohanon. Pananglitan, ang iyang espirituwal nga pag-uswag kinahanglang hatagan ug pagtagad sa konduktor sa Pagtuon sa Kongregasyon sa Libro nga iyang ginatambongan. Basin ang bag-ong magmamantala naglisod sa pagsulti nga epektibo sa balay-ug-balay nga buluhaton. (Buhat 20:20) Busa siya lagmit malipay nga tabangan, ilabina gikan sa usa nga nagdumala ug pagtuon sa Bibliya uban kaniya sa librong Kahibalo. Angay ang maong mapuslanong tabang, kay giandam ni Jesu-Kristo ang iyang mga tinun-an alang sa ministeryo.​—Marcos 6:7-13; Lucas 10:1-22.

⁸ Aron ang atong ministeryo mahimong epektibo, kinahanglan ang maayong abante nga pagpangandam. Busa, ang duha ka magmamantala mahimong mag-uban una sa pagpraktis sa mga presentasyong gisugyot diha sa binulang mga isyu sa Atong Ministeryo sa Gingharian. Inigsugod na nila sa ilang pag-alagad sa kanataran, ang mas eksperyensiyado ang makigsulti pag-una sa una o ikaduhang pultahan. Human sa mahigalaong introduksiyon, ang duha ka magmamantala mahimong mag-ambitay sa paghatag ug pamatuod. Ang pagbuhat nga magkauban diha sa ministeryo sa pipila ka semana mahimong mosangpot ug maayong mga pagbalik-duaw ug bisan usa ka pagtuon sa Bibliya sa balay sa librong Kahibalo nga Motultol sa Kinabuhing Walay Kataposan. Ang mas eksperyensiyadong magmamantala mahimong mao ang modumala sa pagtuon sa makadiyut ug dayon iintrigar kini sa bag-ong magwawali sa Gingharian. Pagkadako nga kalipay unya sa duha ka magmamantala kon ang estudyante sa Bibliya magpakitag pagpabili sa kahibalo sa Diyos!

9. Unsang mga kahikayan ang himoon kon buot nang magpabawtismo ang usa ka magmamantala?

⁹ Samtang nagauswag sa espirituwal ang usa ka di-bawtismadong magmamantala, siya mahimong magpahinungod sa Diyos diha sa pag-ampo ug buot nga magpabawtismo. (Itandi ang Marcos 1:9-11.) Kinahanglang iyang ipahibalo ang iyang tinguha nga magpabawtismo sa nagadumalang magtatan-aw sa kongregasyon, nga maoy mohikay alang sa mga ansiano sa pagrepaso uban sa magmamantala sa mga pangutana diha sa mga panid 175 ngadto sa 218 sa Organisado sa Pagtuman sa Atong Ministeryo. Ang upat ka bahin nga niana ang mga pangutana gibahin mahimong kobrehan sa tulo ka sesyon pinaagi sa tulo ka nagkalainlaing mga ansiano kon mahimo. Kon sila mouyon nga ang di-bawtismadong magmamantala may igong pagsabot sa mga pagtulon-an sa Bibliya ug kuwalipikado sa ubang mga paagi, ilang sultihan siya nga siya mahimo nang magpabawtismo. Ingong resulta sa iyang pagpahinungod ug bawtismo, siya ‘namarkahan’ alang sa kaluwasan.​—Ezekiel 9:4-6.

Pagtagana sa Linaing mga Panginahanglan

10. Human makompleto ang iyang pagtuon sa librong Kahibalo ug nabawtismohan, sa unsang paagi ang usa ka tawo makapauswag sa iyang kahibalo sa Kasulatan?

¹⁰ Human nga natapos sa usa ka indibiduwal ang iyang pagtuon sa Bibliya sa librong Kahibalo ug bawtismado na, dili na kinahanglang dumalahan pa siya ug pormal nga pagtuon sa ikaduhang libro, sama sa Nahiusa sa Pagsimba sa Bugtong Matuod nga Diyos.b Siyempre, ang tawo nga bag-o pang nabawtismohan daghag makat-onan samtang siya magapangandam alang sa Kristohanong mga tigom ug motambong niini nga regular. Siya makabaton usab ug dugang kahibalo samtang ang iyang kauhaw sa kamatuoran magtukmod kaniya sa personal nga pagbasa ug pagtuon sa Kristohanong mga publikasyon ug sa pagpakighisgot sa Kasulatanhong mga butang uban sa kaubang mga magtutuo. Apan komosta kon motungha ang linaing mga panginahanglan?

11. (a) Sa unsang paagi gitabangan ni Priscila ug Aquila si Apollos? (b) Unsang tabang ang ikahatag sa bag-ong nabawtismohang batan-ong hamtong nga naghunahunang magminyo?

¹¹ Bisan si Apollos, kinsa “sinati kaayo sa mga Kasulatan” ug natudloan sa husto bahin kang Jesus, nakabatog kaayohan sa dihang ang may kasinatian nga mga Kristohanong si Priscila ug Aquila ‘nagdala kaniya ngadto sa ila ug gipatin-aw kaniya ang dalan sa Diyos nga labi pang husto.’ (Buhat 18:24-26; itandi ang Buhat 19:1-7.) Busa, ingnon ta nga ang bag-o pang nabawtismohan nga batan-ong hamtong naghunahuna nga mangulitawo ug magminyo. Mahimong tabangan siya sa mas eksperyensiyadong Kristohanon sa pagpangita sa impormasyon niining mga ulohana diha sa mga publikasyon sa Watch Tower. Pananglitan, ang makatabang nga materyal niining bahina makita diha sa librong Mga Pangutanang Gisukna sa mga Batan-on​—Mga Tubag nga Mosaler, sa Seksiyon 7.c Ang magmamantala nga nagdumala sa pagtuon sa Bibliya kaniya mahimong maghisgot niining materyala uban sa bag-ohan, bisag dili na kinahanglan ang regular nga pagtuon.

12. Unsang tabang ang mahimong ikahatag alang sa bag-ong nabawtismohang mga kapikas sa kaminyoon nga may mga suliran?

¹² Tagda ang laing pananglitan. Tingali ang bag-ong nabawtismohang mga kapikas sa kaminyoon naglisod sa pagpadapat sa diyosnong mga prinsipyo. Sila tingali moduol sa usa ka ansiano, nga mogahig pipila ka gabii sa pagpakighisgot sa Kasulatan uban kanila ug ipatumong ang ilang pagtagad sa impormasyon nga makita diha sa mga publikasyon sa Watch Tower. Bisan pa niana, dili dumalahan pag-usab sa ansiano ug regular nga pagtuon sa Bibliya ang magtiayon.

Kon Nakasala ang Bag-ohan

13. Nganong ang mga ansiano sa kongregasyon angayng magpakitag kaluoy sa usa ka bag-ong nabawtismohang tawo nga nakasala apan naghinulsol?

¹³ Sundogon sa mga ansiano ang Dakong Magbalantay, si Jehova, kinsa nag-ingon: “Ako mismo magapakaon sa akong mga karnero, . . . ang nabalian akong bugkosan ug ang masakiton akong palig-onon.” (Ezekiel 34:15, 16; Efeso 5:1) Uyon niana nga espiritu, ang tinun-ang si Judas nag-awhag nga pakitaan ug kaluoy ang dinihogang mga Kristohanon nga may mga pagduhaduha o nahulog sa sala. (Judas 22, 23) Sanglit husto nga maglaom kita ug dako sa mas eksperyensiyadong mga Kristohanon, siyempre angay pakitaan ug kaluoy ang bag-ong nabawtismohan​—usa ka nating karnero lamang​—nga nakasala apan naghinulsol. (Lucas 12:48; 15:1-7) Busa, ang mga ansiano, nga ‘nagahukom alang kang Jehova,’ maghatag niini nga mga karnero ug mahigugmaong pag-atiman ug ipasibo sila pag-usab diha sa espiritu sa kalumo.​—2 Cronicas 19:6; Buhat 20:28, 29; Galacia 6:1.d

14. Unsay angayng pagahimoon kon ang bag-ong nabawtismohang magmamantala nakahimog grabeng sala, ug sa unsang paagi siya matabangan?

¹⁴ Nan, kon pananglit ang bag-o pang nabawtismohang magmamantala may problema niadto sa pag-inom ug nahulog pag-usab sa pagpatuyag inom sa usa o duha ka okasyon. O tingali nabuntog na niya ang dugay na kaayong batasan sa pagtabako apan nadala sa tentasyon sa pagtabako sa tago sa usa ka higayon o duha. Bisan pag ang atong bag-ong igsoon nag-ampo sa Diyos nga pasayloon, angay nga mangayo siyag tabang sa usa ka ansiano aron ang sala dili mahimong batasan. (Salmo 32:1-5; Santiago 5:14, 15) Sa dihang iyang itug-an ang iyang sala ngadto sa usa sa mga ansiano, ang maong ansiano angayng maningkamot nga mapasibo pag-usab ang bag-ohan sa maluloy-ong paagi. (Salmo 130:3) Ang tambag sa Kasulatan tingali igo na sa pagtabang kaniya sa pagtul-id sa mga dalan alang sa iyang mga tiil human niana. (Hebreohanon 12:12, 13) Kini nga ansiano mohisgot sa mga sirkumstansiya uban sa nagadumalang magtatan-aw sa kongregasyon aron matino kon unsang dugang nga tabang ang kinahanglang ihatag.

15. Sa ubang mga kaso, unsa tingali ang gikinahanglan kon ang bag-ong nabawtismohang tawo nakasala?

¹⁵ Sa ubang mga kaso labaw pa tingali ang gikinahanglan. Kon nabantog ang sala, nameligro ang panon, o ang ubang grabeng mga suliran nalangkit, ang lawas sa mga ansiano magtudlog duha ka ansiano sa pagsusi sa kaso. Kon nakita niini nga mga ansiano nga seryoso ang kaso nga gikinahanglan ang usa ka hudisyal nga komite, kinahanglang itaho nila kini ngadto sa lawas sa mga ansiano. Unya ang lawas sa mga ansiano magtudlog usa ka hudisyal nga komite sa pagtabang sa nakasala. Ang hudisyal nga komite angayng makiglabot kaniya sa mahigugmaong paagi. Angayng maningkamot sila sa pagpasibo kaniya pinaagi sa Kasulatan. Kon maayo ang pagsanong niya sa malulotong mga paningkamot sa hudisyal nga komite, nan tinoon nila kon aduna bay kaayohan ang dili paghatag kaniyag mga bahin diha sa plataporma sa mga tigom sa Kingdom Hall o kon siya ba tugotan sa pagkomento sa mga tigom.

16. Unsay mahimo sa mga ansiano sa pagtabang sa nakasala?

¹⁶ Kon mosanong ang nakasala, ang usa o duha ka ansiano sa hudisyal nga komite mahimong maghikay sa pagduaw isip magbalantay nga ang tuyo mao ang pagpalig-on sa iyang pagtuo ug pagtukod sa iyang pagpabili sa matarong nga mga sukdanan sa Diyos. Ang matag usa kanila mahimong makig-uban kaniya diha sa pag-alagad sa kanataran sa matag karon ug unya. Tingali maghimo sila ug pipila ka panaghisgot sa Kasulatan uban kaniya, seguro mogamit ug nahiangay nga mga artikulo sa Bantayanang Torre ug Pagmata! apan dili magdumalag usa ka regular nga pagtuon sa Bibliya. Pinaagi sa maong mahigugmaong pag-atiman, ang nakasala mahimong mapalig-on sa pagsukol sa mga kahuyangan sa unod sa umaabot pang mga adlaw.

17. Unsang mga lakang ang pagahimoon kon ang bawtismado nga nakasala dili maghinulsol ug mobiya sa iyang makasasalang dalan?

¹⁷ Siyempre, ang pagkabag-o pang nabawtismohan dili katarongan sa dili mahinulsolong pagbuhat ug sala. (Hebreohanon 10:26, 27; Judas 4) Kon adunay bawtismado nga nakasala nga dili maghinulsol ug motalikod sa iyang makasasalang dalan, siya ipalagpot gikan sa kongregasyon. (1 Corinto 5:6, 11-13; 2 Tesalonica 2:11, 12; 2 Juan 9-11) Kon kini nga aksiyon daw gikinahanglan, ang lawas sa mga ansiano mopilig usa ka hudisyal nga komite. Kon mahitabo ang pagpalagpot, kining mubong pahibalo pagahimoon: “Si . . . gipalagpot.”e

Tabangi Sila nga “Manag-uswag Ngadto sa Pagkahamtong”

18. Nganong kita makaseguro nga ang bag-ong nabawtismohang mga Kristohanon ug ang uban kanunay nga daghan pag pagakat-onan bahin kang Jehova ug sa iyang kabubut-on?

¹⁸ Ang kadaghanan sa mga alagad sa Diyos magpabilin diha sa panon. Makalilipay, usab, ang matag usa kanato makahimo sa pagpasuod pa gayod sa atong langitnong Amahan tungod kay kita makahimo kanunay sa pagkakat-on ug dugang pa bahin kaniya ug sa iyang kabubut-on. (Ecclesiastes 3:11; Santiago 4:8) Ang linibo nga nabawtismohan sa Pentekostes 33 K.P. tino nga daghan pang pagakat-onan. (Buhat 2:5, 37-41; 4:4) Ingon man ang mga Hentil, nga kulag kahibalo sa Kasulatan. Pananglitan, tinuod kini niadtong nabawtismohan human sa pakigpulong ni Pablo sa Areopago sa Atenas. (Buhat 17:33, 34) Karong adlawa, usab, ang bag-ong mga bawtismado daghan pa ug pagakat-onan ug nagkinahanglag panahon ug tabang sa pagpalig-on sa ilang tinguha sa pagpadayon sa pagbuhat kon unsa ang matarong sa panan-aw sa Diyos.​—Galacia 6:9; 2 Tesalonica 3:13.

19. Sa unsang paagi matabangan kadtong nagpabawtismo nga “manag-uswag ngadto sa pagkahamtong”?

¹⁹ Matag tuig libolibo ang nagpabawtismo ug nagkinahanglan ug tabang aron nga sila “manag-uswag ngadto sa pagkahamtong.” (Hebreohanon 6:1-3) Pinaagi sa pulong, panig-ingnan, ug mapuslanong tabang diha sa ministeryo, makatabang ka sa uban sa pagsul-ob sa bag-ong personalidad ug ‘magapadayon sa paglakaw diha sa kamatuoran.’ (3 Juan 4; Colosas 3:9, 10) Kon ikaw usa na ka eksperyensiyadong magmamantala, basin dapiton ka sa mga ansiano sa pagtabang sa usa ka bag-ong isigkamagtutuo diha sa pag-alagad sa kanataran o sa paghisgot sa pipila ka hinungdanong Kasulatanhong mga punto uban kaniya sulod sa pipila ka semana aron sa paglig-on sa iyang pagtuo sa Diyos, sa iyang pagpabili sa Kristohanong mga tigom, ug uban pa. Ang relasyon sa mga magbalantay ngadto sa panon maoy sama nianang sa usa ka amahan sa pagtambag ug sa usa ka inahan sa kalumo. (1 Tesalonica 2:7, 8, 11) Bisan pa niana, ang pipila ka ansiano ug ministeryal nga mga alagad dili makaatiman sa tanang panginahanglan sa kongregasyon. Kitang tanan sama sa usa ka pamilya kansang mga membro nagtinabangay sa usag usa. Ang matag usa kanato makahimog usa ka butang sa pagtabang sa atong isigkamagsisimba. Ikaw mismo makahimo sa pagtanyag ug pagdasig, paghupay sa nagmasulob-on, pagpaluyo sa nagmaluyahon.​—1 Tesalonica 5:14, 15.

20. Unsay imong mahimo sa pagpakaylap sa kahibalo sa Diyos ug sa pagtaganag mahigugmaong pag-atiman sa mga karnero sa sibsibanan ni Jehova?

²⁰ Ang katawhan nagkinahanglan sa kahibalo sa Diyos, ug ingong usa ka Saksi ni Jehova, ikaw adunay malipayong bahin sa pagpakaylap niana. Ang mga karnero ni Jehova nagkinahanglag mahigugmaong pag-atiman, ug ikaw makadulag mahigugmaong papel sa pagtabang sa pagtagana niini. Hinaot nga panalanginan ni Jehova ang imong ministeryo, ug hinaot nga gantihan ka niya sa imong kinasingkasing nga mga paningkamot sa pagtabang sa mga karnero sa iyang sibsibanan.

[Mga footnote]

Unsay Imong Tubag?

◻ Unsay pagtratar ni Jehova sa iyang mga karnero?

◻ Unsay buhaton kon ang mga bag-ohan buot nga mosangyaw?

◻ Sa unsang paagi ang mga isigkamagtutuo makatabang sa mga bag-ohan mga adunay linaing mga panginahanglan?

◻ Unsang tabang ang ikahatag sa mga ansiano niadtong nakasala apan naghinulsol?

◻ Sa unsang paagi ikaw makatabang sa bag-ong nabawtismohan nga “manag-uswag ngadto sa pagkahamtong”?

[Hulagway sa panid 16]

Si Charles T. Russell nailhan ingong usa ka mahigugmaong magbalantay sa panon

[Hulagway sa panid 18]

Ang mahangawaong mga magbalantay magatratar sa panon sa Diyos

nga may kalumo