Naluwas Ka na Ba?
SI Johnny nag-edad ug diyes anyos sa dihang usa ka tawo ang mipahunong kaniya diha sa usa ka perya ug nangutana: “Dong, gidawat mo ba si Jesu-Kristo ingong imong Ginoo ug Manluluwas?” Daw talagsaon kadtong pangutanaha alang kang Johnny, sanglit kanunay siyang nagtuo kang Jesus. Busa siya mitubag, “Siyempre gidawat ko.” “Dayega ang Ginoo!” misinggit ang tawo aron madunggan sa tanan. “Laing kalag ang naluwas alang kang Kristo!”
Ang kaluwasan ba ingon gayod niana ka yano? Si Johnny “naluwas” ba sukad sa maong yugto nga gipamulong niya kadtong mga pulonga, bisan kon unsay buhaton niya sa nahibiling bahin sa iyang kinabuhi? Daghang sinserong mga tawo ang motubag ug oo. Ang pipila ka relihiyosong mga tract nag-ingon nga isulat ang petsa nga ikaw “naluwas” aron imong mahinumdoman kana.
Usa ka klerigo misulat nga “sa yugto nga yanong mituo ka kang Kristo . . . ang dulnganan sa usa natino na sa dayon.” Siya miangkon nga ang Bibliya nag-ingon nga ang kaluwasan nagdepende sa usa, usa-ka-panahon nga “buhat sa pagtuo, dili sa pagkamapinadayonon sa pagtuo.” Ang laing magsusulat sa relihiyon misulat: “Kini maoy usa ka natapos nga buluhaton. Nakab-ot na kini alang kanimo . . . Ang imong ‘pakiggubat natapos na.’ Ang imong ‘sala gipapas na.’” Apan bisan ang mga tawo nga lig-ong nakombinsir nga kini tinuod makakita tingalig suliran dinhi. Dayag nga daghang tawo nga giingnan nga sila “naluwas” wala magkinabuhi sa paagi nga giingon sa Bibliya nga angay nilang buhaton. Usa ka komon nga katin-awan mao nga lagmit wala gayod nila “dawata” si Kristo.
Busa, unsa gayod ang kahulogan sa “pagdawat” kang Jesus? Kini ba maoy usa-ka-panahon nga buhat sa pagtuo, o kini ba usa ka mapinadayonong paagi sa pagkinabuhi? Ang ato bang pagtuo may igong kalig-on nga mopalihok kanato? Madawat ba gayod nato ang mga kaayohan sa halad ni Jesus nga walay responsabilidad sa pagsunod kaniya?
Daghang tawo ang buot sa mga panalangin apan dili sa responsabilidad sa pagsunod ug pagsugot kang Jesus. Sa pagkatinuod, ang pulong nga “pagsugot” subsob nga naghasol kanila. Bisan pa niana si Jesus miingon: “Umari magmahimong akong sumusunod.” (Lucas 1818-23) Ug miingon ang Bibliya: “Kadtong wala mosunod sa maayong balita bahin sa atong Ginoong Jesus . . . makaagom mismo sa hudisyal nga silot sa kalaglagang walay-kataposan.”—2 Tesalonica 18, 9; Mateo 10:38; 16:24.
Ang Bibliya nagsulti ug daghang butang nga nagpatunghag ugdang nga mga pangutana bahin sa kon unsay gitudlo mahitungod sa kaluwasan. Kon buot nimong susihon kon unsa gayod ang giingon sa Bibliya bahin niining maong ulohan, makaplagan nimong ilabinang makaiikag ang mosunod nga mga panid. Paklia ang imong Bibliya, ug basaha ang gisitar nga mga teksto sa pagsusi kon unsay gitudlo ni Jesus ug sa iyang mga apostol mahitungod niining hinungdanong butang.