“Kini Maoy Buhat ni Jehova”

Mao kana ang ulohan sa usa ka artikulo diha sa El Norte, usa ka peryodiko sa Siyudad sa Monterrey, Mexico. Ang artikulo maoy bahin sa usa ka bag-ong Assembly Hall sa mga Saksi ni Jehova.

Ang Monterrey maoy usa ka siyudad nga may populasyon nga 2,300,000 (lakip na ang mga kanait) sa amihanang bahin sa Mexico, ug kini may 19,200 ka magmamantala sa Gingharian. Sulod sa duolan sa usa ka tuig ug tunga, gihiusa sa mga Saksi ang ilang mga paningkamot sa pagtukod ug usa ka matahom ug praktikal nga Assembly Hall nga may 3,000 ka komportableng mga lingkoranan ug air condition. Ang lokal nga mga Saksi nalipay sa dihang ang usa ka membro sa Nagamandong Lawas sa mga Saksi ni Jehova mao ang naghatag sa pakigpulong sa pagpahinungod. Ang programa naglakip sa usa ka mubong kasaysayan sa buluhaton sa Monterrey, ug dihay mga interbiyo niadtong nakigbahin sa konstruksiyon. Dayon ang 4,500 ka nanambong sa tigom nalipay sa pakigpulong sa pagpahinungod.

Ikatulo kini sa dili pa dugayng gitukod nga mga Assembly Hall sa Mexico diha sa gihubit nga usa ka kampanya alang sa “Dugang, Mas Dako, ug Mas Maayong mga Kingdom Hall ug mga Assembly Hall.”

Uban sa kapin sa 443,000 ka magmamantala sa Mexico, ug sa tumatambong nga 1,492,500 sa Memoryal sa 1995, ang bag-ong mga Assembly Hall, sama sa usa diha sa Monterrey, dayag nga magsilbi sa katuyoan sa Diyos.