Makahimo Ka ba Gayod sa Paghigugma sa Diyos?
“WALAY tawo ang makakita kanako ug mabuhi,” nag-ingon ang Diyos. (Exodo 33:20) Dugang pa, sukad sa panahon sa Bibliya walay ebidensiya nga may tawo nga direktang nakapakigsulti kaniya. Dili ba daw malisod—gani imposible—ang pag-ugmad ug halalom nga pagmahal sa usa nga wala gayod nimo aktuwal nga nakita o nadungog? Posible ba gayod nga makabaton ug usa ka mahigugmaong relasyon sa Maglalalang sa uniberso?
Walay duhaduha nga posible ang pag-ugmad ug usa ka mainit personal nga relasyon sa Diyos. Sa Deuteronomio 65, atong mabasa nga ang nasod sa Israel gisugo: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kusog.” Gipamatud-an pag-usab sa ulahi ni Jesu-Kristo kining kasugoana ngadto sa iyang mga sumusunod ug midugang: “Kini ang kinadak-an ug unang sugo.” (Mateo 22:37, 38) Motambag kaha ang Bibliya kanato sa paghigugma sa Diyos kon dili makab-ot ang maong relasyon?
Apan nagdahom ba si Jehova kanato nga higugmaon siya tungod lamang kay siya nagsugo niana? Wala. Gilalang sa Diyos ang unang tawhanong paris nga may katakos sa paghigugma kaniya. Wala pugsa si Adan ug Eva nga magbatog usa ka mahigugmaong relasyon sa ilang Maglalalang. Hinunoa, gipalibotan sila sa Diyos ug maayo kaayong mga kahimtang aron makaugmad ug halalom nga pagmahal kaniya. Anaa kanila ang pagpili—makigsuod sa Diyos o magpalayo gikan kaniya.
Gipili ni Adan ug Eva ang pagrebelde. (Genesis 2:16, 17; 3:6, 7) Ang ilang mga kaliwatan, hinunoa, may katakos sa pag-ugmad ug usa ka mahigugmaong relasyon sa Maglalalang.
Paglakaw Uban sa Matuod nga Diyos
Pananglitan, sa Bibliya, si Abraham gihisgotan ingong “higala” sa Diyos. (Santiago 2:23) Apan dili si Abraham lamang ang nakapahimulos ug suod nga relasyon uban sa Diyos. Ang Bibliya naghisgot ug daghan pang ubang dili-hingpit nga mga tawo nga nagpakitag tinuod nga pagmahal kang Jehova ug “milakaw uban sa matuod nga Diyos.”—Genesis 5:24; 6:9; Job 29:4; Salmo 25:14; Proverbio 3:32.
Ang mga alagad sa Diyos kanhi wala matawo nga may gugma ug pagmahal sa Diyos. Kinahanglang ugmaron nila kana. Sa unsang paagi? Pinaagi sa pagkaila kaniya sa iyang personal nga ngalan, Jehova. (Exodo 3:13-15; 6:2, 3) Pinaagi sa pagkasayod sa iyang paglungtad ug pagka-Diyos. (Hebreohanon 11:6) Pinaagi sa kanunayng pagpamalandong sa iyang mahigugmaong mga buhat. (Salmo 63:6) Pinaagi sa pagpahayag diha sa pag-ampo ngadto sa Diyos sa ilang kinailadmang mga hunahuna. (Salmo 39:12) Pinaagi sa pagkakat-on sa iyang pagkamaayo. (Zacarias 9:17) Pinaagi sa pag-ugmad ug maayong kahadlok nga makapasuko kaniya.—Proverbio 16:6.
Mahimo ka bang higala sa Diyos ug magalakaw uban kaniya? Tinuod, dili nimo makita ang Diyos o madungog ang iyang tingog. Bisan pa niana, si Jehova nagdapit kanimo nga mahimong ‘bisita sa iyang tolda,’ iyang higala. (Salmo 15:1-5) Busa, posible alang kanimo ang paghigugma sa Diyos. Apan sa unsang paagi makaugmad ka ug suod ug mabinationg relasyon kaniya?