Usa ka Klima sa Pagtubo sa Equatorial Guinea

LABONG nga katanoman ang unang impresyong makuha sa magbibiyahe inigtugpa sa iyang ayroplano sa internasyonal nga erport sa Equatorial Guinea. Ang landiganan gilibotan sa dagkong mga kahoy, nga nagpagamay tan-awon sa mga tinukod diha sa erport. Ang lanubong nga mga tanom nanubo gikan sa kabaybayonan ngadto sa ibabaw sa kabukiran, nga napakusog sa pagtubo gumikan sa daghang ulan ug tibuok-tuig nga temperatura sa mga 30 grado Celsius.

Ang kusog nga pagtubo nga lain ug matang nagakahitabo usab sa Equatorial Guinea, “ang tinuboan nga gihatag sa Diyos.” (Colosas 2:19) Sama sa Etiopianong opisyal nga nangayog tabang ni Felipe, daghan dinhi ang mabalak-on sa pagsabot sa Kasulatan. (Buhat 8:26-39) Ordinaryo alang sa usa ka tawo ang pagduol sa usa sa mga Saksi ni Jehova diha sa dalan ug mohangyog pagtuon sa Bibliya. Ang duolan sa 325 ka Saksi sa Equatorial Guinea nagdumala ug kapin sa usa ka libong pagtuon sa Bibliya.

Pagsabod sa Binhi sa Unang mga Adlaw

Ang Equatorial Guinea, ang kinagamyang nasod sa Aprika, nahimutang sa habagatan sa Nigeria ug Cameroon. (Tan-awa ang mapa.) Ang maayong balita unang gidala dinhi sa mga Saksi sa Nigeria nga nangabot sa pagpangitag trabaho diha sa mga plantasyon sa kakaw. Bisag daghang Ingles-ug-sinultihang mga kongregasyon ang natukod, kini sa ulahi nabungkag sa dihang kining mga igsoona namauli sa Nigeria. Apan wala magdugay human gihatagag independensiya ang nasod niadtong 1968, tulo ka misyonaryong mga magtiayon sa Watchtower ang giasayn dinhi. Wala sila makaestar ug dugay tungod sa mga problema sa politika, apan ang ilang pagpamatuod nakapamunga ug maayo.

Si Santiago, usa sa mga misyonaryo, nakahibalag kang Buenaventura, usa ka taas, maskuladong lalaki nga nabantog sa mga tawo sa ilang lugar ingong superman. Relihiyoso siya nga tawo nga nagtahod sa Bibliya, apan mapintas siya ug buut. Ang gamay kaayo nga insulto igo na alang kaniya sa pagsumbag ug tawo. Sa dihang nasuko siya diha sa usa ka bar, ang tanan nga anaa nagkatibulaag, mikatkat pa sa mga bentana aron makaeskapo sa iyang mga suntok. Sa pagkatinuod, samtang namati siya kang Santiago, nagplano siya sa pagsuntok kaniya kon dili siya makahatag ug lig-ong pamatuod sa Kasulatan sa iyang gipamulong. ‘Walay makabinuang kang superman,’ matod pa niya sa iyang kaugalingon. Naikag siya sa iyang nadunggan, ilabina bahin sa paglaom sa kinabuhing walay kataposan sa paraisong yuta, busa siya misugot sa usa ka pagtuon sa Bibliya.

Sa miuswag ang pagtuon, ang pangandoy ni Buenaventura nga mabuhing walay kataposan diha sa Paraiso nagkalig-on, ug iyang natun-an nga kinahanglang ipahiuyon niya ang iyang kinabuhi sa mga sukdanan sa Diyos aron maangkon ang maong ganti. Nakaamgo nga ang matuod nga mga Kristohanon kinahanglang dili ‘mobalos ug daotan sa daotan,’ siya misugod sa paghimog kinasingkasing nga paningkamot sa pagpugong sa iyang buut.​—Roma 12:17.

Ang tinuod nga pagsulay miabot usa ka adlaw sa dihang wala-tuyoang nakatumba siya ug baso sa usa ka kustomer diha sa bar. Nasuko ang tawo ug gisuntok siya. Dihadiha, ang uban diha sa bar nagkatibulaag, nagpaabot nga may mahitabong sambunot. Apan mapainubsanong gibayran lamang ni Buenaventura ang nabuak nga baso, gipalitan ang lalaki ug laing ilimnon, ug nangayog pasaylo sa iyang pagkadanghag. Sa dihang nakita sa mga silingan nga ang pagtuon sa Bibliya nakapausab kaniya, daghan ang mainandamong midawat sa pagtuon uban kaniya. Sa panahong gibawtismohan si Buenaventura, siya nagdumala nag lima ka pagtuon sa Bibliya. Siya nag-alagad ingong usa ka ansiyano sulod sa miaging lima ka tuig, ug bisan pag gitawag gihapon siya sa mga tawo ug superman, karon ginatawag siya sa ingon niini sa kinomedyang paagi.

“Mahunahunaon sa Ilang Espirituwal nga Panginahanglan”

Sa mga tuig sa 1970 ang pipila ka lokal nga mga Saksi nagpadayon sa pagsangyaw ug sa dungan nga pakigtigom kutob sa ilang maarangan. Sa ulahi, daghang Katsilang magtiayong misyonaryo ang nangabot sa pagtabang. Si Andrés Botella, nga nakaalagad sa Equatorial Guinea sa 12 ka tuig, nahinumdom nga wala magdugay human nga siya miabot, siya nakadayeg nga ang mga tawo tinuod gayod nga “mahunahunaon sa ilang espirituwal nga panginahanglan.” (Mateo 5:3) “Makapalipay gayod kaayo ang pagtuon sa Bibliya uban sa maong mapabilhong mga tawo,” siya miingon.

Si Mary, usa ka Katsila nga igsoong babaye, nagtuon sa Bibliya uban sa usa ka batan-ong babaye nga ginganlag María kinsa naghisgot nga ang iyang mga ginikanan, si Francisco ug Fausta, interesado usab nga magtuon. Sanglit si Mary may gidumalang 15 ka pagtuon ug ang mga ginikanan ni María nagpuyo sa layo, milabay una ang daghang semana usa pa siya makaduaw kanila.

Sa dihang si Mary ug ang iyang bana, si Serafín, sa kataposan nakigkita sa mga ginikanan, sila may libro na nga Ikaw Mabuhing Walay Kataposan sa Paraiso sa Yutaa ug usa ka Bibliya, ug sila naghinamhinam sa pagsugod sa pagtuon. Busa nagsugod sila dayon. Namatikdan ni Serafín nga sinati na kaayo ang mga ginikanan ni María sa materyal. Mao usay nahitabo sa ikaduhang pagduaw sa dihang ilang gitun-an ang ikaduhang kapitulo. “Halos sama kinig nagtuon sa duha ka bawtismadong mga Saksi,” nahinumdom si Serafín. Sa ikatulong pagduaw, sanglit daw nahibalo na sila pag-ayo sa materyal, gisugyot ni Serafín ang pangutanag-tubag nga sesyon sa pagtino kon pila na gayoy ilang nasabtan. Iyang nakita nga si Francisco ug Fausta nagtuon sa tibuok nga libro sa ilang kaugalingon!

Sa unsang paagi ang ilang bag-ong-napalgang kahibalo nakaapektar kanila? Nahiuyon sa ilang nakat-onan, mihunong na sila sa pagtambong sa mga tigom nga espiritistikanhon ug mibulag sa Iglesya Katolika. Dugang pa, mihunong na si Francisco sa pagtabako, ug wala na sila mokaon ug karne nga dili maayo ang pagkapatulo sa dugo. Kay dayag nga gipadapat na nila ang tanang butang nga ilang nakat-onan, sila gidasig sa pagsugod sa pagpakig-ambit sa ilang kahibalo ngadto sa uban. Dihadiha sila nagsugod sa pagsangyaw sa ilang mga silingan. Sa tulo lamang ka bulan, sila kuwalipikado na nga bawtismohan. Si Francisco karon maoy usa na ka ministeryal nga alagad, ug tungod sa ilang maayong panig-ingnan ug kadasig sa pagsangyaw, tulo sa ilang mga anak nga babaye karon mga Saksi na, duha ka anak nga lalaki tigtambongan sa mga tigom, ug unom pang ubang mga paryente ang nagtuon.

Wala magdugay human nga siya gibawtismohan, nahibalag ni Francisco si Pablo, usa ka debotadong Katoliko nga nag-alagad ingong sakristan sa iyang simbahan. Si Pablo mao ang tighatag ug sermon matag higayong wala ang pari. Kon magsakit ang membro sa simbahan, siya moduaw; kon adunay dili makasimba, moduaw si Pablo sa paghatag ug pagdasig; ug kon may mamatay, himoon niya ang maarangan sa paglipay sa pamilya. Masabot, si Pablo minahal kaayo sa mga sakop sa parokya.

Sanglit dako kaayo ang pagtahod ni Pablo sa Bibliya, midawat dayon siya sa tanyag ni Francisco sa pagtuon uban kaniya. Nasabtan dayon ni Pablo kon unsa ka makataronganon ang mensahe sa Bibliya, ug human sa pipila ka pagtuon, siya mihukom sa paggamit sa pipila ka kasulatan nga iyang nakat-onan sa usa sa iyang “mga pagduaw isip magbalantay” sa usa ka nagmasakitong sakop sa simbahan. Wala magdugay human niadto, sa usa sa iyang mga sermon sa Dominggo, gipatin-aw ni Pablo ang pagkahinungdanon sa paggamit sa ngalan sa Diyos, si Jehova, ug kon nganong kita dili angay mogamit ug mga imahen.

Sanglit gidawat dayon niya ang kamatuoran, nagdahom siya nga ang ubang mga sakop sa iyang simbahan sama usab ug reaksiyon. Apan human sa tulo o upat niining pinasukad-sa-Bibliya nga mga sermon, namatikdan ni Pablo nga ang mga tawo wala malipay sa impormasyon nga iyang gipresentar. Busa siya mihukom sa pagbiya sa simbahan ug sa pagpakig-uban sa regular uban sa mga Saksi ni Jehova. Sa pipila ka bulan, siya kuwalipikado na nga bawtismohan, ug siya karon maoy usa na ka madasigong magwawali sa maayong balita. Bisan tuod dili makasangyaw sa bug-os-panahon, siya karon nagdumala ug napulo ka pagtuon sa Bibliya.

Pagpalambo sa Pagtubo Pinaagi sa Dungang Pagpakigtigom

Ang mga Saksi sa Equatorial Guinea seryosong nagtagad sa sugo sa Bibliya sa dili pagpalta sa dungang pagpakigtigom. (Hebreohanon 10:25) Sukad sa 1994 sa dihang gihatagan pag-usab ug opisyal nga pag-ila sa kagamhanan ang buluhaton, ang mga igsoon naghinamhinam nga makabaton ug maayong mga Kingdom Hall. Sa pagkatinuod, ang kadaghanan sa mga kongregasyon nakatukod ug ilang kaugalingong mga tigomanan o nagpalakaw pa nga makabaton ug tigomanan.

Sa Mongomo, diin ang tumatambong sa mga tigom sa Dominggo sagad moabot ug duha ug tunga ka pilo sa gidaghanon sa mga magmamantala sa Gingharian, ang kongregasyon nagkugi pag-ayo aron makatukod ug dakong tigomanan. Ang ubang mga relihiyon sa Mongomo sagad manuhol ug mga trabahante sa pagtukod sa ilang mga simbahan, busa ang kalihokan sa lokal nga mga Saksi namatikdan. Usa ka adlaw ang pastor sa Iglesia Nueva Apostólica (Bag-ong Apostolikong Iglesya) mihapit sa pagpangutana sa usa sa mga ansiyano kon pilay iyang suhol niining kugihang mga trabahante. Ang pastor miingon nga bisag nanuhol siya ug pipila ka tighan-ayg tisa nga mga sakop sa iyang kaugalingong simbahan, ang trabaho hinay kaayo. Siya nangutana kon mahimo ba niyang suholan sa pagpatrabaho ang mga trabahante nga nagtukod sa Kingdom Hall. Sa dihang gisultihan siya nga ang tanang Saksi nagtrabaho nga walay bayad, siya milakaw nga nakurat.

Ang pagtambong sa mga tigom nagkinahanglan ug igong pagsakripisyo alang niadtong nagpuyo layo sa Kingdom Hall. Ingon niini ang giatubang ni Juan, nga usa ka batan-ong lalaki nga nabawtismohan sa 1994. Siya nakadungog sa kamatuoran sa Gabon, diin didto natun-an niya ang unang katunga sa librong Mabuhing Walay Kataposan. Unya siya mipauli sa Equatorial Guinea, sa iyang kaugalingong baryo nga mga 100 ka kilometros gikan sa Mongomo. Kini nakahatag ug dakong suliran alang kaniya aron makapadayon sa iyang pagtuon. Apan wala kini magpalugda kaniya. Matag bulan, bisikletahon niya ug walo ka oras ang Mongomo, diin dumalahan siya ug pagtuon ni Santiago, usa sa lokal nga mga ansiyano. Moestar siya sa Mongomo ug pipila ka adlaw ug magtuon tulo o upat ka higayon panahon sa pag-estar. Niining paagiha natapos niya ang iyang pagtuon ug nahimong kuwalipikado alang sa bawtismo.

Sa unsang paagi padayong ginapalig-on ni Juan ang iyang espirituwalidad nga wala kaayoy asosasyon sa ubang mga Kristohanon? Labaw sa tanan, pinaagi sa pagkahimong madasigong magwawali sa maayong balita. Iyang nasangyawan na ang tanang tawo sa iyang baryo, ug sa panahon nga siya gibawtismohan, siya nagdumalag 13 ka pagtuon sa Bibliya. Unom sa iyang mga estudyante miuban kaniya sa adlaw sa espesyal nga asembliya sa Mongomo sa pagtan-aw sa iyang pagbawtismo. Siya karon nagadumalag regular nga Pagtuon sa Bantayanang Torre uban sa mga interesado sa iyang dapit, ug kasagaran duolan sa 20 ang tumatambong.

Mapailobong Nagabisbis sa Binhi

Dili tanang espirituwal nga pagtubo kusog. Usahay dakong pailob ang gikinahanglan sa pagtan-aw sa binhi nga mamunga sa kataposan. Tinuod kini sa kaso ni Paca, nga unang nakadungog sa maayong balita balik sa 1984 sa dihang gisangyawan siya ni Edita, usa ka payunir nga igsoong babaye, diha sa tiyanggihan. Sa dihang miduaw si Edita kang Paca sa iyang balay sa pagkasunod semana, si Paca misugot sa pagtuon sa Bibliya. Bisag wala kaayo siyay pag-uswag, nagpadayon si Edita tungod kay nakakita siya ug maayong mga hiyas kang Paca. “Daw karnerohon siya nga tawo,” miingon si Edita, “ug miampo ako kang Jehova nga buksan niya ang iyang kasingkasing.”

Si Paca nagpadayon sa iyang pagtuon nga undang-undang sulod sa upat ug tunga ka tuig apan wala gihapon kaayoy pag-uswag. Busa sa dihang natapos na nila ang librong Mabuhing Walay Kataposan, giprangkahan ni Edita si Paca bahin sa importansiya sa seryosong pagdawat sa kamatuoran. Sa iyang paningkamot nga maabot ang kasingkasing ni Paca, si Edita nakahilak.

“Natandog gayod ako niadtong kinasingkasing nga tambag,” nahinumdom si Paca. “Sukad niadto misugod ako sa paghimog mga kausaban sa akong kinabuhi. Nagpalista ako sa Tunghaan sa Teokratikanhong Ministeryo, ug niana gihapong tuiga nahimo akong usa ka di-bawtismadong magmamantala. Ang adlaw nga ako sa kataposan gibawtismohan mao ang labing malipayong adlaw sa akong kinabuhi!” Ang kaikag karon ni Paca lahi kaayo sa iyang kawalay-pagtagad niadto. Siya karon nagadumalag 13 ka pagtuon sa Bibliya, ug siyempre siya mapailobon uban niadtong hinay kaayo ang pag-uswag.

Nagtabang sa mga Tawo sa Pagpauswag sa Ilang mga Kinabuhi

Pinaagi sa pagkinabuhi sumala sa mga sukdanan sa Bibliya, ang mga Saksi ni Jehova sa Equatorial Guinea nakaanig usa ka dungog sa pagkamatinud-anon ug kaligdong. Usa ka tawo, nga dayag nga nakadayeg sa ilang panggawi, miduol sa usa ka ansiyano sa Bata Congregation ug nangutana: “Kamo ba dunay librong Nangatarongan?b Gikapoy na ako sa pagkahimong tawong kalibotanon. Gusto kong mahimong usa sa mga Saksi ni Jehova!”

Si Antonio, usa ka ministeryal nga alagad sa Malabo Congregation, maoy usa ka kasagarang panig-ingnan sa usa ka tawong kalibotanon nga nahimong Saksi. Sa wala pa siya magtuon sa Bibliya, nagsubay siya ug mahilayon nga kinabuhi. Igasto niya ang kadaghanan sa iyang kuwarta nga iyang nakita ingong relohero sa inom, ug imoral usab ang iyang kinabuhi. Unsay nakatabang kaniya sa pag-usab sa iyang estilo-sa-kinabuhi? Siya naikag kaayo sa mabug-at nga gipamulong diha sa 1 Corinto 6:9, 10: “Ayaw pagpahisalaag. Walay mga makihilawason, . . . ni mga palahubog, . . . ang makapanunod sa gingharian sa Diyos.” Siya nakaamgo nga aron makadawat sa pag-uyon sa Diyos, kinahanglang bag-ohon niya ang iyang paagi sa kinabuhi. Tungod niana siya nagsugod sa pagbantay sa iyang kaubanan. (Proverbio 13:20) Sa dihang miduaw ang mga higala kanhi sa pagdapit kaniya sa pagpanginom, mibalibad siya sa ilang imbitasyon ug iyang gisangyawan hinuon sila. Wala magdugay sila mihunong sa pagpanghilabot kaniya.

Takos ba kining tanan sa paningkamot? “Ako malipayon nga nakabag-o sa akong paagi sa kinabuhi,” miingon si Antonio. “Ang akong panglawas mas maayo na bisan pag 60 na ako karon, samtang ang akong mga higala kanhi nangamatay na o kaha nag-antos sa dili maayong panglawas. Karon ako adunay tinuod nga mga higala imbes niadtong gusto lang makig-uban sa mga tawong andam mobayad sa ilang sunod nga imnon. Labing hinungdanon sa tanan, ako adunay maayong relasyon sa Diyos. Ako karon nag-alagad ingong regular payunir, ug ako adunay pagtuon sa Bibliya uban sa usa ka tawo nga adunay problema usab sa pag-inom, busa magamit ko ang akong kasinatian sa pagtabang kaniya.”

Pagkahimong mga Ulipon sa Diyos

Duolan sa 200 ka tuig kanhi, ang mga tawo sa kabaybayonan sa Equatorial Guinea gipangsikop ug gipadala ngadto sa mga nasod sa Amerika ingong mga ulipon. Karon, daghan ang kinabubut-ong nangahimong mga ulipon​—mga ulipon sa Diyos. Kining matanga sa pagpaulipon nakahatag kanila ug tinuod nga kagawasan, nagpahigawas kanila gikan sa Babilonyanhong mga doktrina ug sa mga espiritistikanhong mga buhat. Kini nagtudlo usab kanila kon unsaon sa pagkinabuhi sa matagbawon ug mabungahong mga kinabuhi. Nasinati nila ang gisaad ni Jesus: “Inyong mahibaloan ang kamatuoran, ug ang kamatuoran magpagawas kaninyo.”​—Juan 8:32.

Uban sa 1,937 ka tumatambong sa 1995 nga pagsaulog sa Memoryal​—halos unom ka pilo sa gidaghanon sa mga magmamantala sa nasod​—adunay maayo kaayong mga palaaboton alang sa dugang espirituwal nga pag-uswag. Samtang ang mga Saksi sa Equatorial Guinea madasigong nagpadayon sa pagpananom ug pagpamisbis sa binhi sa kamatuoran, sila segurado nga ‘padayong patuboon kini sa Diyos.’ (1 Corinto 3:6) Sa walay duhaduha, adunay usa ka maayo kaayong klima sa espirituwal nga pagtubo sa Equatorial Guinea!

[Mga footnote]