“Bisan ug Wala Gayod Ninyo Siya Makita, Kamo Nahigugma Kaniya”
“Bisan ug wala gayod ninyo siya makita, kamo nahigugma kaniya. Bisan ug wala kamo magatan-aw kaniya karon, apan kamo nagapasundayag ug pagtuo kaniya ug nagamaya pag-ayo.”—1 PEDRO 1:8.
1. Bisag walay usa sa yuta karon ang nakakita kang Jesus, sa unsang paagi naningkamot ang ubang relihiyosong mga tawo sa pagpakitag debosyon kaniya?
WALAY buhi karon sa yuta sukad ang nakakita kang Jesu-Kristo. Bisan pa niana, milyonmilyong tawo ang nag-angkong nahigugma kaniya. Tuigtuig sa Enero 9, sa Manila, sa Pilipinas, usa ka samag-tawong gidak-on nga rebulto ni Jesu-Kristo nga nagpas-an ug krus ginaguyod sa kadalanan nianang gihubit ingon nga ang labing dako, labing talagsaong pagpasundayag sa popular nga relihiyon sa nasod. Ang nangaukyab nga panon sa mga tawo nagdinutdotay ug nagtinuloray; tungtongan pa gani sa mga tawo ang usag usa sa pagpaningkamot ug maayo nga makahikap sa imahen. Daghan niadtong nangadto sa pagtan-aw niini nadani ilabina sa sadya nga prosesyon. Bisan pa niana, dayag nga ang pipila kanila maoy mga tawo nga mibating tim-os nga nadani kang Jesus. Ingong pamatuod niana, sila lagmit nagsul-ob ug krusipiho o mahimong regular nga mosimba. Apan, ang mao ba nga pagsimbag diyosdiyos maisip ingong matuod nga pagsimba?
2, 3. (a) Kinsa taliwala sa mga sumusunod ni Jesus ang nakakita ug nakadungog mismo kaniya? (b) Kinsa pa sa unang siglo ang nahigugma kang Jesus ug nagtuo kaniya, bisag wala gayod sila makakita mismo kaniya?
2 Sa unang siglo, mga libolibo diha sa Romanhong mga lalawigan sa Judea, Samaria, Peria, ug Galilea ang mismong nakakita ug nakadungog kang Jesu-Kristo. Sila namati samtang iyang gisaysay ang makapalipayng mga kamatuoran bahin sa Gingharian sa Diyos. Sila maoy mga saksing-nakakita sa mga milagro nga iyang gihimo. Ang pipila kanila nangahimong iyang debotadong mga tinun-an, nga nakombinsir nga siya mao “ang Kristo, ang Anak sa buhi nga Diyos.” (Mateo 16:16) Ugaling, kadtong gisulatan ni apostol Pedro sa iyang unang dinasig nga sulat dili lakip kanila.
3 Kadtong gisulatan ni Pedro nahimutang sa Romanhong mga lalawigan sa Pontus, Galacia, Capadocia, Asia, ug Bitinia—ang tanan anaa sa modernong-adlawng Turkey. Ngadto kanila si Pedro nagsulat: “Bisan ug wala gayod ninyo siya makita, kamo nahigugma kaniya. Bisan ug wala kamo magatan-aw kaniya karon, apan kamo nagapasundayag ug pagtuo kaniya ug nagamaya pag-ayo uban ang dili-maasoy ug hinimayang kangaya.” (1 Pedro 1:1, 8) Sa unsang paagi sila nakahibalo kang Jesu-Kristo hangtod sa punto sa paghigugma kaniya ug sa pagpasundayag ug pagtuo kaniya?
4, 5. Sa unsang paagi kadtong mga tawhana nga wala gayod makakita kang Jesus nakabaton ug igong kahibalo bahin kaniya sa paghigugma ug pagtuo kaniya?
4 Dayag, ang pipila atua niadto sa Jerusalem sa dihang nagsangyaw si apostol Pedro sa panon sa mga tawo nga mitambong sa pista sa Pentekostes sa 33 K.P. Human sa pista daghang tinun-an ang nagpabilin sa Jerusalem aron sa pagdawat ug dugang instruksiyon gikan sa mga apostoles. (Buhat 2:9, 41, 42; itandi ang 1 Pedro 1:1.) Sa sunodsunod nga misyonaryong mga panaw, gipadayon ni apostol Pablo ang madasigong ministeryo usab taliwala sa mga tawo nga nagpuyo sa lugar nga gisulatan ni Pedro sa unang Biblikanhong sulat nga nagdala sa iyang ngalan.—Buhat 18:23; 19:10; Galacia 1:1, 2.
5 Nganong kadtong mga tawhana, nga wala gayod makakita kang Jesus, nadani pag-ayo kaniya? Sa atong adlaw, nganong minilyon pa, sa tibuok globo, ang nahigugma pag-ayo kaniya?
Ang mga Butang nga Ilang Nadungog
6. (a) Kon ikaw nakadungog pa sa pagsangyaw ni Pedro bahin kang Jesus sa Pentekostes 33 K.P., unsa unta ang imong nakat-onan? (b) Sa unsang paagi nakaapekto kini sa duolan sa 3,000 kinsa presente niadto?
6 Kon ikaw atua pa niadto sa Jerusalem sa dihang nagpakigpulong si Pedro niadtong panon sa mga tawo nga nangadto sa pista sa 33 K.P., unsa kahay imong nakat-onan bahin kang Jesus? Sa walay duhaduha ang mga milagro nga iyang gihimo nagpakita nga siya gipadala sa Diyos. Nga, bisan ug makasasalang mga tawo ang nagpapatay kang Jesus, siya wala na didto sa lubnganan apan nabanhaw ug dayon gibayaw ngadto sa langit diha sa tuong kamot sa Diyos. Nga si Jesus mao, sa pagkamatuod, ang Kristo, ang Mesiyas nga bahin kaniya ang mga manalagna nagsulat. Nga pinaagi kang Jesu-Kristo, ang balaang espiritu nabubo diha sa iyang mga sumusunod aron nga sila makasangyaw dayon sa mga tawo gikan sa daghang kanasoran bahin sa talagsaong mga butang nga gihimo sa Diyos pinaagi sa iyang Anak. Ang mga kasingkasing sa daghan nga nakadungog kang Pedro niadtong okasyona natandog pag-ayo, ug duolan sa 3,000 ang gibawtismohan ingong Kristohanong mga tinun-an. (Buhat 2:14-42) Kon ikaw atua pa didto, mihimo ka kaha ug ingon niana nga positibong aksiyon?
7. (a) Kon ikaw didto pa sa Antioquia sa dihang nagwali si apostol Pablo didto, unsa unta ang imong nakat-onan? (b) Nganong ang pipila sa panon sa katawhan nahimong mga magtutuo ug nakigbahin sa maayong balita ngadto sa uban?
7 Kon ikaw usa pa niadtong atua didto sa dihang nanudlo si apostol Pablo sa Antioquia sa Romanhong lalawigan sa Galacia, unsa pa kahay imong nakat-onan bahin kang Jesus? Ikaw nakadungog unta kang Pablo nga nagpatin-aw nga ang pagkahinukman ni Jesus sa kamatayon sa mga magmamando sa Jerusalem gitagna na sa mga manalagna. Ikaw usab nakadungog unta bahin sa pamatuod sa saksing-nakakita sa pagkabanhaw ni Jesus. Dayag nga napukaw ka unta sa pagsaysay ni Pablo nga pinaagi sa pagbanhaw kang Jesus gikan sa mga patay, gipamatud-an ni Jehova nga kining usa sa pagkamatuod mao ang Anak sa Diyos. Ug dili ba kaha ang imong kasingkasing malipay sa dihang imong nakat-onan nga ang kapasayloan sa mga sala nga gipaposible pinaagi sa pagtuo kang Jesus motultol sa kinabuhing walay kataposan? (Buhat 13:16-41, 46, 47; Roma 1:4) Sanglit nakasabot sa kahulogan sa ilang nadungog, ang pipila sa Antioquia nahimong mga tinun-an, nga aktibong nagpakigbahin sa maayong balita ngadto sa uban, bisan pag ang pagbuhat niini nagpasabot nga ilang atubangon ang grabeng paglutos.—Buhat 13:42, 43, 48-52; 14:1-7, 21-23.
8. Kon atua ka pa sa tigom sa kongregasyon sa Efeso sa dihang nadawat ang sulat ni Pablo kanila, unsa untay imong nakat-onan?
8 Komosta kon ikaw nahimong sakop sa Kristohanong kongregasyon sa Efeso, diha sa Romanhong lalawigan sa Asia, sa dihang ang dinasig nga sulat ni Pablo ngadto sa mga tinun-an nadawat? Unsa kahay imong nakat-onan gikan niana bahin sa papel ni Jesus diha sa katuyoan sa Diyos? Diha nianang sulata gibatbat ni Pablo nga pinaagi kang Kristo ang tanang butang sa langit ug sa yuta ipahiangay ug balik uban sa Diyos, nga ang gasa sa Diyos pinaagi kang Kristo gipaabot ngadto sa katawhan sa tanang kanasoran, nga ang mga tawong patay sa panan-aw sa Diyos tungod sa ilang mga kalapasan gihimong buhi pinaagi sa pagtuo kang Kristo, ug nga ingong resulta niini nga tagana, posible na usab nga ang mga tawo mahimong pinalanggang mga anak sa Diyos.—Efeso 1:1, 5-10; 2:4, 5, 11-13.
9. (a) Unsay makatabang kanimo sa pagsabot kon ikaw ba nakasabot mismo sa gisulat ni Pablo ngadto sa mga taga-Efeso? (b) Sa unsang paagi ang mga igsoon sa mga lalawigan sa Roma nga gihisgotan ni Pedro naapektohan sa ilang nakat-onan bahin kang Jesus?
9 Ang pagpabili ba niining tanan nagpalalom sa imong gugma sa Anak sa Diyos? Kana ba nga gugma nakaimpluwensiya sa imong adlaw-adlawng kinabuhi, ingon sa gidasig ni apostol Pablo diha sa mga kapitulo 4 hangtod 6 sa Efeso? Ang mao bang pagpabili nakapukaw kanimo sa mainampingong pagsusi sa mga butang nga imong angay nga pagaunahon sa kinabuhi? Tungod sa gugma sa Diyos ug pagkamapasalamaton ngadto sa iyang Anak, gihimo mo kaha ang gikinahanglang mga kausaban aron ang pagbuhat sa kabubut-on sa Diyos mahimong sentro gayod sa imong kinabuhi? (Efeso 5:15-17) Mahitungod sa paagi nga naapektohan ang mga Kristohanon sa Asia, Galacia, ug ubang Romanhong mga lalawigan sa ilang nakat-onan, si apostol Pedro nagsulat kanila: “Bisan ug wala gayod ninyo [si Jesu-Kristo] makita, kamo nahigugma kaniya. . . . Kamo nagapasundayag ug pagtuo kaniya ug nagamaya pag-ayo uban ang dili-maasoy ug hinimayang kangaya.”—1 Pedro 1:8.
10. (a) Unsa sa walay duhaduha ang nakadugang sa gugma sa unang mga Kristohanon kang Jesus? (b) Sa unsang paagi kita usab makapahimulos?
10 Dihay laing butang nga tinong nakadugang sa gugma alang sa Anak sa Diyos nga gibati niadtong unang mga Kristohanon nga gisulatan ni Pedro. Unsa man kadto? Sa panahon nga gisulat ni Pedro ang iyang unang sulat, labing menos duha sa mga Ebanghelyo—Mateo ug Lucas—naapod-apod na. Ang unang-siglong mga Kristohanon nga wala gayod nakakita kang Jesus mahimo nga nakabasa niining maong mga asoy sa Ebanghelyo. Kita usab mahimong makabasa niini. Ang mga Ebanghelyo dili mga minugna lamang nga mga asoy; kini adunay tanang timaan sa labing kasaligang kasaysayan. Diha niadtong dinasig nga mga rekord, kita daghag makita nga magpalalom sa atong gugma sa Anak sa Diyos.
Ang Espiritu nga Iyang Gipakita
11, 12. Unsay anaa labot sa espiritu nga gipakita ni Jesus ngadto sa ubang mga tawo ang nakapukaw kanimo sa paghigugma kaniya?
11 Diha sa nasulat nga rekord sa kinabuhi ni Jesus, atong nahibaloan kon giunsa niya pagtratar ang ubang mga tawo. Ang espiritu nga iyang gipakita nagtandog sa kasingkasing sa mga tawo bisan karon, nga kapin na sa 1,960 ka tuig human nga siya namatay. Ang tanan nga buhi nabug-atan sa mga epekto sa sala. Daghang minilyon nangahimong mga biktima sa inhustisya, nakigbisog sa sakit, o tungod sa ubang mga hinungdan mibatig grabeng kahigawad. Ngadto sa tanan nga sama kanila, si Jesus nag-ingon: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.”—Mateo 11:28-30.
12 Si Jesus nagpakita ug mabinationg kabalaka sa kabos, sa gigutom, ug sa nangasubo. Sa dihang gikinahanglan sa panahon, iyang gipakaon pa gani ang dakong panon sa katawhan sa milagrosong paagi. (Lucas 9:12-17) Iyang gipahigawas sila gikan sa nagapaulipon nga mga tradisyon. Iyang gilig-on usab ang ilang pagtuo diha sa tagana sa Diyos sa pagtapos sa politikanhon ug ekonomikanhong kalisod. Wala dugmoka ni Jesus ang espiritu niadtong dinaogdaog na. Uban ang pagkamaluloton ug gugma, maabtik niyang gituboy ang mga maaghop. Iyang gipabaskog kadtong nahisama sa nabaling mga tangbo nga nangapiko ug kadtong nahisama sa nag-awop-awop nga pabilong lino nga hapit nang mapalong. Hangtod karon sa presenteng panahon, ang iyang ngalan nagpadasig ug paglaom, bisan sa mga kasingkasing niadtong wala gayod makakita kaniya.—Mateo 12:15-21; 15:3-10.
13. Nganong ang paagi sa pagtratar ni Jesus sa mga makasasala nakadani sa mga tawo?
13 Si Jesus supak sa pagbuhat ug daotan, bisan pa niana siya nagpakitag pagsabot sa mga tawo nga nakahimog kasaypanan sa kinabuhi apan kinsa nagpakitag paghinulsol ug nagpakitabang kaniya. (Lucas 7:36-50) Siya milingkod ug nakigsalo sa pangaon uban sa mga tawong tinamay sa komunidad kon sa iyang pagtuo mahimo kining higayon sa pagtabang kanila sa espirituwal nga paagi. (Mateo 9:9-13) Ingong resulta sa espiritu nga iyang gipasundayag, minilyong katawhan sa susamang mga kahimtang nga wala gayod makakita kang Jesus napukaw sa pagkuhag kahibalo bahin kaniya ug mituo kaniya.
14. Unsay nakadani kanimo bahin sa paagi sa pagtabang ni Jesus sa mga tawong masakiton, baldado, o nagbangotan?
14 Ang paagi sa pagtratar ni Jesus sa mga tawong masakiton o baldado nagpamatuod sa iyang gugma ug kahangawa maingon man sa iyang katakos sa paghatag kanila ug kahupayan. Busa, sa dihang ang usa ka masakitong tawo nga napuno sa sanla miduol kaniya ug nagpakitabang, si Jesus wala mosibog sa talan-awong nakita. Ug wala niya sultihi ang tawo nga, bisag mibati siya ug kaluoy kaniya, ang sanla grabe na kaayo ug wala nay mahimo pa sa pagtabang. Ang tawo nangaliyupo: “Ginoo, kon buot mo lamang, mapahinlo mo ako.” Sa walay pagpanuko, gituy-od ni Jesus ang iyang kamot ug gitandog ang tawong sanlahon, nga nag-ingon: “Buot ko. Mamahinlo ka.” (Mateo 8:2, 3) Sa laing higayon usa ka babaye nagtinguha nga mamaayo sa sakit pinaagi sa paghikap sa tago sa sidsid sa iyang sapot. Gitratar siya ni Jesus sa maluloton ug masaligong paagi. (Lucas 8:43-48) Ug sa dihang nakasugat siya ug prosesyon sa paglubong, siya giabot ug kaluoy sa nagbangotan nga babayeng balo kansang bugtong anak namatay. Bisan pag midumili si Jesus sa paggamit sa iyang hinatag-sa-Diyos nga gahom sa milagrosong paagi aron katagan-an niyag pagkaon ang iyang kaugalingon, mainandamong gigamit niya kini sa pagbanhaw sa patayng tawo ug gihatag siya ug balik ngadto sa iyang inahan.—Lucas 4:2-4; 7:11-16.
15. Sa unsang paagi ang pagbasa sa mga asoy bahin kang Jesus ug sa pagpalandong niana nakaapektar kanimo?
15 Sa magbasa kita niining mga asoya ug magpalandong sa espiritu nga gipasundayag ni Jesus, ang atong gugma mas molalom pa alang niining usa nga mihalad sa iyang tawhanong kinabuhi aron kita mahimong mabuhi sa walay kataposan. Bisag wala gayod kita makakita kaniya, kita mibati nga nasuod kaniya, ug kita buot nga mosunod sa iyang mga tunob.—1 Pedro 2:21.
Ang Iyang Mapainubsanong Pagsalig sa Diyos
16. Ngadto kang kinsa gisentro ni Jesus ang pagtagad, ug unsay iyang gidasig kanato nga buhaton?
16 Labaw sa tanan, si Jesus nagsentro sa iyang pagtagad ug sa atoa ngadto sa iyang langitnong Amahan, si Jehova nga Diyos. Iyang gipaila ang kinadak-ang sugo sa Kasugoan, nga nag-ingon: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:36, 37) Iyang gitambagan ang iyang mga tinun-an: “Pagbaton ug pagtuo sa Diyos.” (Marcos 11:22) Sa dihang giatubang nila ang grabeng pagsulay sa ilang pagtuo, iyang giawhag sila: “Pag-ampo nga mapadayonon.”—Mateo 26:41.
17, 18. (a) Sa unsang paagi gipasundayag ni Jesus ang iyang mapainubsanong pagsalig sa iyang Amahan? (b) Nganong hinungdanon kaayo kanato ang iyang gihimo?
17 Si Jesus mismo nagpakita ug panig-ingnan. Ang pag-ampo maoy usa ka hinungdanong bahin sa iyang kinabuhi. (Mateo 14:23; Lucas 9:28; 18:1) Sa miabot ang panahon nga siya magpilig iyang mga apostoles, si Jesus wala gayod mosalig sa iyang kaugalingong paghukom, bisan pag sa miagi ang tanang manulonda sa langit ilalom sa iyang pagdumala. Mapainubsanong migugol siya ug tibuok gabii sa pag-ampo ngadto sa iyang Amahan. (Lucas 6:12, 13) Sa dihang dakponon na siya ug nag-atubang sa masakit nga kamatayon, si Jesus midangop na usab sa iyang Amahan, nga kinasingkasing nga nag-ampo. Siya wala niana nga panglantaw nga siya nakaila pag-ayo kang Satanas ug makadumala sa bisan unsang laraw nga mahimong himoon sa usa nga daotan. Si Jesus nahibalo kon unsa ka hinungdanon nga siya dili mapakyas. Pagkadakong makauulaw nga kapakyasan unta kadto alang sa iyang Amahan! Ug pagkadakong kapildihan alang sa katawhan, kansang mga palaaboton sa kinabuhi nagadepende sa halad nga gitanyag ni Jesus!
18 Si Jesus masubsob nga nag-ampo—sa dihang kauban niya ang iyang mga apostoles sa itaas nga lawak sa Jerusalem ug mas masubsob pa diha sa tanaman sa Getsemane. (Mateo 26:36-44; Juan 17:1-26; Hebreohanon 5:7) Sa nag-antos diha sa kahoyng sakitanan, wala siya mosultig pasipala sa mga tawong nanamastamas kaniya. Hinunoa, siya miampo alang sa mga tawo kinsa milihok gumikan sa pagkawalay-kahibalo: “Amahan, pasayloa sila, kay sila wala mahibalo sa ilang ginabuhat.” (Lucas 23:34) Padayon niyang gisentro ang iyang hunahuna diha sa iyang Amahan, ‘nagpiyal sa iyang kaugalingon ngadto sa usa nga nagahukom sa pagkamatarong.’ Ang kataposang mga pulong nga iyang gibungat diha sa kahoyng sakitanan maoy pag-ampo ngadto sa iyang Amahan. (1 Pedro 2:23; Lucas 23:46) Pagkamapasalamaton nato nga, uban sa bug-os nga pagsalig kang Jehova, matinumanong gitapos ni Jesus ang buluhaton nga gisalig kaniya sa iyang Amahan! Bisag kita wala gayod makakita kang Jesu-Kristo, pagkadako gayod sa atong gugma kaniya tungod sa iyang gihimo!
Pagpasundayag sa Atong Gugma Kaniya
19. Sa pagpasundayag sa gugma alang kang Jesus, unsang mga buhat ang angay natong pagalikayan ingong dili gayod angay?
19 Sa unsang paagi kapamatud-an nato nga ang gugma nga atong ginaangkon maoy labaw pa kay sa mga pulong lamang? Sanglit gidili sa iyang Amahan, nga gihigugma ni Jesus, ang paghimog mga larawan ug unya himoon kini ingong mga tumong sa pagsimba, kita dili gayod makahatag ug pagpasidungog kang Jesus pinaagi sa pagsul-ob ug ingon niana nga mga larawan diha sa kulentas sa atong liog o sa pagdala ug usa niana diha sa kadalanan. (Exodo 20:4, 5; Juan 4:24) Dili pagpasidungog kang Jesus kon kita motambong sa relihiyosong mga serbisyo, nga nagahimo pa niini sa daghang beses sa semana, kon kita dili magkinabuhi sumala sa iyang mga pagtulon-an sa nahibiling bahin sa semana. Si Jesus miingon: “Siya nga nagabaton sa akong mga sugo ug nagasunod niini, kana siya mao ang nahigugma kanako. Sa ingon usab siya nga nahigugma kanako higugmaon sa akong Amahan.”—Juan 14:21, 23; 15:10.
20. Unsa ang pipila ka butang nga magpakita kon kita tinuod ba gayod nga nahigugma kang Jesus?
20 Unsang mga kasugoan ang iyang gihatag kanato? Panguna, ang pagsimba sa matuod nga Diyos, si Jehova, ug siya lamang. (Mateo 4:10; Juan 17:3) Tungod sa iyang papel sa katuyoan sa Diyos, si Jesus usab nagtudlo nga kita kinahanglang magpasundayag ug pagtuo kaniya ingong Anak sa Diyos ug nga kinahanglang atong ipakita kana pinaagi sa pagpalayo sa daotang mga buhat ug pinaagi sa paglakaw diha sa kahayag. (Juan 3:16-21) Kita iyang gitambagan sa pagpangita pag-una sa Gingharian sa Diyos ug sa iyang pagkamatarong, unahon kini kay sa atong pagkabalaka sa pisikal nga mga panginahanglan. (Mateo 6:31-33) Siya nagsugo nga atong higugmaon ang usag usa sama sa iyang paghigugma kanato. (Juan 13:34; 1 Pedro 1:22) Ug kita iyang gisugo nga mahimong mga saksi mahitungod sa katuyoan sa Diyos, sama kaniya. (Mateo 24:14; 28:19, 20; Pinadayag 3:14) Bisag sila wala gayod makakita kang Jesus, ang duolan sa lima ka milyong Saksi ni Jehova karong adlawa napukaw sa tinuod nga gugma alang kaniya sa pagsunod niadtong maong mga kasugoan. Ang ilang wala-pagkakita sa personal kang Jesus wala magpaluya sa ilang determinasyon nga magmasinugtanon. Ilang hinumdoman kon unsay giingon sa ilang Ginoo ngadto kang apostol Tomas: “Tungod ba kay imo akong nakita ikaw mituo? Malipayon kadtong kinsa wala makakita apan nagatuo.”—Juan 20:29.
21. Sa unsang paagi makabenepisyo kita sa pagtambong sa Memoryal sa kamatayon ni Kristo, nga pagahimoon niining tuiga sa Dominggo, Marso 23?
21 Gilaoman nga ikaw mahimong usa sa mga tawo sa tibuok-kalibotan nga magtigom sa mga Kingdom Hall sa mga Saksi ni Jehova human sa pagsalop sa adlaw sa Dominggo, Marso 23, 1997, sa paghinumdom sa labing dakong pagpasundayag sa gugma sa Diyos sa katawhan ug sa pagsaulog sa kamatayon sa iyang maunongong Anak, si Jesu-Kristo. Kon unsay isulti ug buhaton nianang okasyona angay magpalalom sa gugma alang kang Jehova ug sa iyang Anak ug busa magpadako sa tinguha sa pagbantay sa mga kasugoan sa Diyos.—1 Juan 5:3.
Unsaon Nimo Pagtubag?
◻ Sa unsang paagi kadtong gisulatan sa unang basahon ni Pedro nakaila ug nahigugma kang Jesus?
◻ Unsa ang pipila ka butang nga nadunggan sa unang mga Kristohanon ang nakapukaw kanimo?
◻ Unsay anaa sa espiritu nga gipakita ni Jesus nga nagpalalom sa imong gugma kaniya?
◻ Nganong ang mapainubsanong pagsalig ni Jesus sa Diyos hinungdanon kaayo kanato?
◻ Sa unsang paagi ikapasundayag nato ang atong gugma alang kang Jesu-Kristo?
[Hulaway sa panid 16]
Kita nadani kang Jesus tungod sa espiritu nga iyang gipakita