Mga Pangutana Gikan sa mga Magbabasa

Sumala pa sa mga taho sa balita, human mahimugso ang bata, kuhaon sa pipila ka ospital ang inunlan ug pusod aron kuhaan ug mga elemento ang dugo niini. Angay bang kabalak-an kini sa usa ka Kristohanon?

Sa kadaghanang dapit, walay gihimo nga ingon niana, busa dili angayng mabalaka ang mga Kristohanon. Kon aduna gayoy lig-ong basehanan nga ginahimo kana sa ospital diin adto manganak ang usa ka Kristohanon, tukma nga sultihan lamang ang doktor nga ang inunlan ug ang pusod kinahanglang ilabay, dili gamiton sa bisan unsang paagi.

Daghang produktong medikal ang ginakuha gikan sa biolohikal nga mga tinubdan, mahimong sa mananap o sa tawo. Pananglitan, ang pipila ka hormone ginasala gikan sa ihi sa mabdos nga mga kabayo. Ang dugo sa kabayo nahimong tinubdan sa tetanus serum, ug ang gamma globulin sa pagpakig-away sa sakit dugay nang gikuha gikan sa dugo sa mga inunlan sa tawo. Ang mga inunlan gikuha ug gipayelo sa pipila ka ospital ug sa ulahi ginakolekta sa usa ka laboratoryo sa ospital aron ang dugo nga tugob sa antibodies mahimong prosesohon aron makakuha ug gamma globulin.

Mas bag-o pa, ang mga tigdukiduki nangangkon nga milampos sa paggamit ug dugo gikan sa inunlan aron tambalan ang usa ka matang sa leukemya, ug gihunahuna nga ang maong dugo mahimong magamit sa pipila ka sakit sa sistema-sa-imyunidad o kapuli sa mga bone- marrow transplant. Busa, may mga balita bahin sa mga ginikanan nga mitugot nga ang inunlan kuhaan ug dugo, payelohon, ug ipondo en kasog magamit kini sa pagtambal sa ilang anak sa katuigang umaabot.

Ang maong pagnegosyo sa dugo sa inunlan dili gayod makadani sa matuod nga mga Kristohanon, kinsa naggiya sa ilang panghunahuna sa hingpit nga balaod sa Diyos. Gilantaw sa atong Maglalalang ang dugo ingon nga sagrado, naghawas sa hinatag-sa-Diyos nga kinabuhi. Ang bugtong gamit sa dugo nga gitugot maoy diha sa halaran, maylabot sa mga halad. (Levitico 17:​10-​12; itandi ang Roma 3:​25; 5:​8; Efeso 1:7.) Kon dili gani, ang dugo nga makuha gikan sa usa ka linalang ibubo sa yuta, ilabay.​—Levitico 17:​13; Deuteronomio 12:​15, 16.

Sa dihang ang mga Kristohanon mangayam o mag-ihaw ug manok o baboy, ilang ibubo ang dugo ug ilabay kana. Dili kinahanglang literal nilang ibubo kini sa yuta, ang punto mao nga ilang ilabay ang dugo inay kay gamiton kana sa bisan unsang paagi.

Ang mga Kristohanon nga naospital nakasabot nga ang biolohikal nga mga produkto nga gikuha gikan kanila ilabay, kaha ang mga produkto maoy hugaw sa lawas, daot nga tisyu, o dugo. Tugotan ta, ang doktor tingali buot nga mohimo una ug pipila ka mga pagsulay, sama sa pagsusi sa ihi, usa ka patolohikal nga eksaminasyon sa tisyu nga may tumor, o mga pagsusi sa dugo. Apan human niana, ang mga produkto ilabay uyon sa lokal nga balaod. Ang pasyente sa ospital dili na kinahanglang maghimo ug linaing mga hangyo kabahin niini sanglit makataronganon kini ug maalamon sa medikal nga paagi nga ilabay ang maong biolohikal nga mga produkto. Kon ang pasyente adunay lig-ong katarongan sa pagduda nga ang maong normal nga paagi dili sundon, mahimong sultihan niya ang nalangkit nga doktor, ingnon nga tungod sa relihiyosong mga hinungdan buot niyang ilabay kanang tanan nga mga produkto.

Bisan pa niana, ingon sa nahisgotan, tagsaon ra nga kabalak-an kini sa kasagarang pasyente tungod kay sa daghang dapit ang pagtipig ug paggamit pag-usab sa inunlan o ubang biolohikal nga mga produkto wala gani hisgoti, ni maoy naandang kalihokan.

Ang artikulong “Atong Kasilagan Kon Unsa ang Tuman-Kadaotan,” nga makita sa “Ang Bantayanang Torre” sa Enero 1, 1997, maorag nagtumong sa pedophilia. Unsaon paghubad kining buhata?

Ang Webster’s Ninth New Collegiate Dictionary naghubad sa “pedophilia” ingong “seksuwal nga kahilayan nga niana ang kabataan mao ang gipalabi ingong seksuwal nga kasangkapan.” Ang mga kinaiyahan niining buhata gikondenar sa Deuteronomio 23:17, 18. Didto ang Diyos misulti batok sa pagkahimong pampam sa templo (“o, ‘usa ka katamita,’ batang lalaki nga gihuptan alang sa mga katuyoan sa seksuwal nga kahilayan,” potnot). Kining mga bersikuloha nagdili usab ni bisan kinsa sa pagdala ngadto “sa balay ni Jehova” sa suhol sa “usa ka iro” (“lagmit usa ka pederast; usa kinsa nagahimog pagpakigsiping pinaagi sa lubot, ilabina kauban sa usa ka batang lalaki,” potnot). Kining Kasulatanhon ug ­sekular nga mga reperensiya nagpamatuod nga ang gihisgotan sa Ang Bantayanang Torre mao ang paghimo sa usa ka bata ingon nga kasangkapan sa pag-abuso sa sekso, lakip na ang pag-ugay-ugay, pinaagi sa usa ka hamtong.