Pagdala ug Espirituwal nga Kagawasan Niadtong Anaa sa Prisohan

“KAMI nanagpaabot kaninyo.” “Niining miaging mga gabii, nagdamgo ako sa inyong pag-abot.” “Salamat sa pag-asayn ug tawo nga moduaw kanamo nga regular.” “Buot namong ipahayag ang among pasalamat alang sa matag panalangin nga dili-takos nga nadawat namo gikan kang Jehova ug sa iyang organisasyon ug sa espirituwal nga pagkaon nga gitagana sa tukmang panahon.”

Unsay hinungdan niining maong mga pahayag sa kamapasalamaton? Kini maoy pipila sa mga pahayag gikan sa mga binilanggo sa nagkalainlaing mga prisohan sa Mexico. Ilang giapresyar ang pagtagad nga ilang nadawat gikan sa mga Saksi ni Jehova, nga nagdala kanilag espirituwal nga kagawasan bisag nabilanggo. Sa Mexico adunay 42 ka bilanggoan diin ang mga Saksi ni Jehova regular nga nagaatiman sa espirituwal nga mga panginahanglan sa mga binilanggo. Kining mga dapita gitawag ug Centro Readaptación Social (Social Rehabilitation Center). Sa pipila niini ka prisohan, ang Kristohanong mga tigom ginahimo gani nga regular nga may maayo kaayong mga resulta. Pananglitan, sa usa ka di pa dugayng ihap, mga 380 ka tawo ang nagtambongan sa mga tigom niining mga dapita. Nianang panahona ang aberids nga 350 ka pagtuon sa Bibliya ang ginadumala. Trayentay-siyete ang mikuwalipikar nga mosugod pagsangyaw, ug 32 ang nagpahinungod sa ilang mga kinabuhi ngadto kang Jehova, nga nagsimbolo niini pinaagi sa pagpabawtismo sa tubig.

Kon sa Unsang Paagi Gihimo ang Buluhaton

Sa unsang paagi ginahimo sa mga Saksi ni Jehova ang ilang buluhatong pagsangyaw niining mga dapita? Una moadto sila sa nagadumalang mga opisyal sa pagpangayo ug sinulat nga awtorisasyon nga mosulod sa prisohan, nga nagsaysay sa katuyoan sa mga pagduaw​—pagtudlo sa mga piniriso kon unsaon pagpauswag ang ilang kalidad sa kinabuhi ug pag-alagad sa Diyos sa paagi nga makapahimuot kaniya.

Sa matag usa niining mga kahimtanga ang mga awtoridad mihatag sa ilang pagtugot. Giapresyar niining mga opisyala ang pagtulon-an sa Bibliya nga gitanyag ngadto sa mga binilanggo. Naobserbahan sa mga awtoridad sa prisohan nga ang mga Saksi ni Jehova nagasunod sa mga lagda sa seguridad niining mga dapita. Gitugotan nila kining nagaduaw nga mga ministro nga mogamit sa mga opisina, mga lawak kan-anan, ug mga lawak-buhatan aron ilang mitingan. Sa usa ka prisohan ang mga Saksi gitugotan pa gani sa pagtukod ug gamay nga Kingdom Hall, ingon sa gipakita sa mosunod nga eksperyensiya nga giasoy sa usa ka nagapanawng magtatan-aw sa habagatan-sidlakang Mexico.

“Sayo sa 1991 kami misugod sa pagduaw sa prisohan sa Tehuantepec, Oaxaca, diin nakaplagan namo ang dakong espirituwal nga kagutom. Sa wala madugay nakasugod kami ug 27 ka panagtuon sa Bibliya. Tungod sa kaikag sa mga piniriso, lima ka tigom sa kongregasyon ang gieskedyul. Usa sa mga piniriso, nga nagpakitag dakong gugma alang kang Jehova, mihukom sa pagtukod ug gamayng Kingdom Hall sulod sa prisohan aron may dapit nga katigoman. Miadto siya sa nagadumala sa prisohan ug nangayog permiso, ug ang mga awtoridad nakigkooperar pag-ayo. Sa sinugdanan sa Disyembre 1992, unom ka piniriso ang mikuwalipikar ingong mga magmamantala sa maayong balita. Tungod sa gipakita nga pag-uswag, gihikay nga himoon ang Memoryal sa sulod sa prisohan. Among gihangyo ang pagtugot sa direktor sa prisohan nga magdala ug mga emblema​—ang tinapay ug bino​—ug tapos sa upat-ka-oras nga panaghisgot, gihatag ang pagtugot.

“Nahitabo nga niadtong Abril 3, 1993 (tulo ka adlaw una sa pagsaulog sa Memoryal), pipila ka piniriso ang gibuhian. Sa dihang ang usa kinsa usa ka magmamantala nakadawat sa iyang mga papeles sa pagpagawas, siya mihangyo nga makigsulti sa nagadumala sa prisohan nga mangayog pagtugot nga magpabilin hangtod matapos ang pagsaulog sa Memoryal. Kini nakapatingala gayod sa nagadumala, sanglit dili kini kasagarang hangyo, apan tungod sa dakong tinguha sa piniriso nga motambong sa Memoryal didto sa prisohan, iyang gitugotan ang iyang hangyo. Ang Memoryal gitambongan sa 53 ka tawo, kinsa mipatulo ug mga luha sa kalipay sa kataposan sa programa. Kami nagkauyon nga tawgon kining grupoha nga ‘Kagawasan Cereso,’ tungod kay sila gawasnon sa espirituwal nga diwa.”

Ang buluhaton sa mga Saksi ni Jehova giapresyar pag-ayo niining mga dapita. Sa usa niining maong mga bilanggoan, ang nagadumala dayag nga nagrekomendar sa pagtambong sa mga tigom sa mga Saksi ni Jehova ingong “terapiya” alang sa dali nga kapasig-ulian sa mga binilanggo.

Usa ka Malamposong Programa sa Kapasig-ulian

Ang kalihokan sa mga Saksi ni Jehova miresulta sa kompleto nga kapasig-ulian sa daghang piniriso. Bisan pag tinuod nga kadtong napriso mibalik sa pagkakriminal sa dihang sila mapagawas, kadtong tinuoray nga midawat sa mensahe sa Pulong sa Diyos nausab sa bug-os. Ang ilang kausaban nagpahinumdom kanato sa mga pulong ni apostol Pablo: “Walay mga makihilawason . . . , ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos. Ug gani ingon niana ang pipila kaninyo kaniadto. Apan kamo hinlo nang nahugasan, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”​—1 Corinto 6:9-11.

Ang talagsaong kausaban diha sa ilang personalidad nadayag sa dihang ilang gipahayag ang ilang mga pagbati. Si Miguel, kinsa nabilanggo sa Campeche nga prisohan sa Siyudad sa Campeche, mipahayag niining paagiha: “Karon ako makapamulong uban ang kalipay nga akong giisip ang akong kaugalingon nga nalakip sa ubang mga karnero nga adunay paglaom nga natala sa 2 Pedro 3:13 ug Mateo 5:5.” Si José, nga anaa sa prisohan sa Koben, Campeche, mikomento: “Bisan tuod ako usa ka piniriso ug ang akong sala tingali grabe kaayo, akong nasabtan nga si Jehova maluluy-on kaayo ug mamati sa akong mga pag-ampo ug mga pangaliyupo. Siya makapasaylo sa akong mga kalapasan ug makahatag kanako sa kahigayonan sa paggugol sa nahibiling yugto sa akong kinabuhi sa pagpakig-ambit sa maayong balita mahitungod sa Gingharian sa Diyos. Mapasalamaton kami sa among mga ansiyano tungod sa panahon nga ilang gigugol sa pagduaw kanamo sa bilanggoan aron kami makabenepisyo sa mga saad sa Gingharian sa Diyos. Pagkaanindot nga mga panalangin! Makaingon ba ako nga ako usa ka piniriso? Dili, si Jehova naghatag kanako sa espirituwal nga kagawasan nga akong gikinahanglan.”

Unsay nagtukmod sa mga mamumuno, mga manlulugos, mga arsonista, mga kawatan, ug uban pa nga mag-usab aron mahimong matarong-ug-kinabuhi nga mga Kristohanon? Sumala niining mga tawhana, kana mao ang makapabag-o nga gahom sa Pulong sa Diyos ug ang maayong pakig-ubanay sa tinuod nga debotadong katawhan. Ang kaso ni Tiburcio, nga natanggong sa bilanggoan sa Mazatlán, Sinaloa, nag-ilustrar sa kalamposan niining maong programa sa kapasig-ulian. Siya nakarsel sa Concordia, Sinaloa, diin siya may mga suliran gumikan sa iyang pintas nga kinaiya. Ang iyang asawa maoy usa sa mga Saksi ni Jehova, ug ginamaltratar niya kanhi, bisan sa dihang moduaw siya kaniya sa bilanggoan. Siya mapailobon ug mipadayon sa pagduaw kaniya, busa gihangyo niya siya nga dalhan siya sa librong Ikaw Mabuhing Walay Kataposan sa Paraiso sa Yuta, nga gisugdan niya sa pagtuon nga kinaugalingon.a Dayon mihangyo siya nga may tawong paadtoon sa karsel aron magtuon uban kaniya. Siya misugod pag-uswag sa espirituwal, ug ang iyang relasyon sa uban miarang-arang. Siya gibalhin sa prisohan sa Mazatlán diin adunay grupo sa pagtuon sa Bibliya, ug karon siya usa na ka magmamantala. Siya miingon: “Karon, duyog sa akong asawa ug mga anak ug sa akong mga kaubang binilanggo, ako mapasalamaton kaayo nga nakadungog sa mga kamatuoran sa Bibliya niining dapita, uban sa paglaom nga sa dili madugay, ako pagawason ug makatambong sa tanang asembliya ug mga tigom sa kongregasyon.”

Dugang pa, anaa si Conrado, kinsa mapasalamaton kaayo sa mga kausaban nga iyang nahimo sa iyang kinabuhi. Daghan kaayo ang iyang mga suliran sa kaminyoon nga gibiyaan siya sa iyang asawa. Busa midangop siya sa mga droga. Ngadtongadto nahimo siyang tigbaligyag droga. Siya gidakop ug gihukman nga prisohon tungod sa pagdalag kargamento sa marijuana ug cocaine. Sa prisohan dihay usa ka grupo nga nagtuon sa Bibliya uban sa mga Saksi ni Jehova, ug gidapit siya sa pagtuon uban kanila. Iyang gipahayag ang iyang mga pagbati niining paagiha: “Nadani ako sa kahapsay sa pagdumala sa mga tigom, sa programa sa pagsusi sa Bibliya pinaagi sa mga publikasyon, ug sa kamatuoran nga ang tanan gipasikad sa Bibliya. Dihadiha ako mihangyo nga magtuon sa Bibliya ug misugod pagtambong sa mga tigom.” Kadto maoy sa Enero 1993. Karon si Conrado nakagawas na sa prisohan ug padayong nagauswag diha sa Kristohanong kongregasyon.

Ang Islas Marías

Sa Mexico adunay usa ka gikahadlokang prisohan nga gilangkoban sa upat ka isla nga gitawag ug Islas Marías. Ang mga piniriso makalakawlakaw sa tanang isla nga silotanan diin sila gitanggong. Ang uban nagpuyo didto uban sa ilang mga asawa ug mga anak.

Usa ka gamayng kongregasyon ang natukod. Tulo ka igsoon gikan sa Mazatlán mobiyahe didto kas-a sa usa ka bulan, nga motabang sa pagdumala sa mga tigom, magtaganag literatura, ug mohatag ug pagdasig. Usahay ang magtatan-aw sa sirkito moadto aron sa pagduaw kanila. Ang aberids nga tumatambong maoy tali sa 20 ug 25. Adunay upat ka bawtismado ug duha ka dili-bawtismadong mga magmamantala. Ang nagapanawng magtatan-aw nagtaho nga “ang pipila molakaw ug 17 kilometros [10 milyas] aron sa pagtambong sa mga tigom sa Dominggo ug kinahanglang mobiya dayon human sa tigom aron makapauli alang sa pagtawag sa ilang ngalan. Bisan kon paspas ang paglakaw, dangtag kapin sa duha ka oras aron makabalik.” Usa sa mga igsoon, nga nakakat-on sa kamatuoran sa maong prisohan, di pa dugayng miingon: “Sa una ako interesadong makagula dayon, apan karon kon kanus-a nga kabubut-on ni Jehova, sanglit ako adunay daghang buluhaton dinhi sa sulod.”

Kami nalipay sa pagkakita nga ang kamatuoran naggamit sa gahom niini sa pagpagawas sa sinserong mga tawo kinsa nagapangitag paagi sa pagpahimuot kang Jehova. Kapin sa usa ka dosena niini, nga nakakat-on sa kamatuoran gikan sa bilanggoan, ang napagawas, nabawtismohan, ug karon nagkinabuhing dungganon ingong mga alagad sa Diyos, ang pipila nahimo pa ganing mga ansiyano sa kongregasyon. Ang gahom nga nabatonan sa Bibliya sa pagtul-id sa mga kasingkasing ug pag-usab sa mga tawo napasundayag pag-ayo. Sa dihang kining mga tawhana nga nabilanggo gumikan sa paghimog mga kasal-anan misulod sa dalan sa kahayag sa Pulong sa Diyos, sila nakasinati ug tinuod nga kagawasan nga gisaad ni Jesus sa dihang siya miingon: “Inyong mahibaloan ang kamatuoran, ug ang kamatuoran magpagawas kaninyo.”​—Juan 8:32; Salmo 119:105.

[Footnote]

[Hulagway sa panid 23]

Daghan ang nakabenepisyo sa Kristohanong mga kamatuoran nga ilang nakat-onan sa bilanggoan