Nagtinguha Ka ba sa Pag-alagad nga Mas Bug-os?

“AKO nasuko kang Jehova,” matod ni Laura. “Ako nag-ampo kanunay nga siya motabang kanamo sa pagsulbad sa among pinansiyal nga mga problema aron ako makapadayon sa pagpayunir​—apan walay kapuslanan. Ako sa kataposan kinahanglang moundang sa pagpayunir. Kinahanglang dawaton ko usab nga ako nasina niadtong kinsa nakapadayon.”

Tagda, usab, ang kahimtang ni Michael, usa ka ministeryal nga alagad sa kongregasyon sa mga Saksi ni Jehova. Siya nagapangab-ot sa katungdanan sa pagkamagtatan-aw. (1 Timoteo 3:1) Sa dihang ang iyang tinguha wala matuman sulod sa daghang tuig, siya nahigawad gayod nga dili na siya gustong tagdon pa alang sa pribilehiyo. “Dili ko maantos ang kasakit nga mahigawad pag-usab,” matod niya.

May ingon ka ba niana nga kasinatian? Nakaagi ka na ba nga kinahanglan ihiklin ang gipakahamiling teokratikanhong pribilehiyo? Pananglitan, nakaagi ka na ba nga moundang sa pag-alagad ingong payunir, usa ka bug-os panahong magmamantala sa Gingharian? O nagtinguha ka ba sa pipila ka mga responsabilidad sa kongregasyon nga gisalig sa uban? Tingali nagtinguha ka pa sa pag-alagad sa Bethel o ingong misyonaryo, apan dili motugot niini ang imong mga sirkumstansiya.

“Ang pangandoy nga malangan nagapasakit sa kasingkasing,” nag-ingon ang basahon sa Proverbio. (Proverbio 13:12) Kini ilabinang tinuod tingali kon madawat sa uban ang mismong pribilehiyo nga imong ginalaoman. Ang Pulong sa Diyos ba nagtaganag pagsabot, paglipay, ug paglaom alang kang bisan kinsa nga nakasinati sa maong mga kahigawad? Oo, kini nagtagana. Sa pagkatinuod, ang ika-84ng Salmo nagpahayag sa mga pagbati sa usa ka alagad ni Jehova nga may susamang wala-matumang mga tinguha mahitungod sa pag-alagad kang Jehova.

Pagpabili sa Usa ka Levihanon

Ang mga manunulat sa ika-84ng Salmo mao ang mga anak ni Kore, mga Levihanon nga nag-alagad sa templo ni Jehova ug nagpabili pag-ayo sa ilang mga pribilehiyo sa pag-alagad. “Pagkatahom gayod sa imong dakong tabernakulo, Oh Jehova sa mga panon!” usa kanila mipatugbaw. “Ang akong kalag gihidlaw ug nangandoy pa sa mga sawang ni Jehova. Ang akong kasingkasing ug ang akong unod nanagsinggit nga malipayon ngadto sa Diyos nga buhi.”​—Salmo 84:​1, 2.

Kadtong maong Levihanon may ingon niana nga pangandoy sa pag-alagad sa templo ni Jehova nga bisan ang ordinaryong talan-awon diha sa dalan paingon sa Jerusalem daw madanihon alang kaniya. “Sa nagalakaw latas sa ubos nga kapatagan sa kabugangan,” siya nag-ingon, “gihimo nila kining usa ka tuboran.” (Salmo 84:6) Oo, ang kasagarang uga nga dapit nahisamag daghag-tubig nga rehiyon.

Tungod kay ang salmista dili usa ka saserdoteng Levihanon, siya makaalagad sa templo sulod lamang sa usa ka semana sa matag unom ka bulan. (1 Cronicas 24:​1-​19; 2 Cronicas 23:​8; Lucas 1:​5, 8, 9) Ang uban niyang panahon gigugol sa balay diha sa usa sa Levihanong mga siyudad. Busa siya miawit: “Bisan ang langgam nakakaplag ug batoganan, ug ang sayaw nakakaplag ug salag alang sa iyang kaugalingong, diin didto iyang ibutang ang iyang mga kuyabog​—ang imong dakong halaran, Oh Jehova sa mga panon, akong Hari ug akong Diyos!” (Salmo 84:3) Pagkamalipayon gayod unta sa Levihanon kon siya sama pa sa mga langgam nga may permanenteng puy-anang dapit diha sa templo!

Sayon ra unta alang sa Levihanon nga magpadala sa kayugot tungod kay siya dili makaalagad nga subsob sa templo. Ugaling, siya nalipay sa pag-alagad kutob sa iyang mahimo, ug siya nakaamgo gayod nga ang tibuok kasingkasing nga debosyon kang Jehova takos sa paningkamot. Unsay nakatabang niining matinumanong Levihanon nga magpabiling kontento sa iyang mga pribilehiyo sa pag-alagad?

Pagkakat-on nga Magmakontento

“Ang usa ka adlaw diha sa imong mga sawang labi pang maayo kay sa usa ka libo sa laing dapit,” nag-ingon ang Levihanon. “Gipili ko ang pagtindog sa pultahan sa balay sa akong Diyos inay sa paglibotlibot sa mga balongbalong sa tuman-kadaotan.” (Salmo 84:10) Iyang giapresyar nga ang paggugol bisan usa ka adlaw diha sa balay ni Jehova maoy usa ka bililhon kaayong pribilehiyo. Ug ang Levihanon adunay kapin sa usa ka adlaw sa pag-alagad sa templo. Ang iyang pagkakontento sa iyang mga pribilehiyo nagpaawit kaniya sa kalipay.

Komosta ba kita? Ginaihap ba nato ang atong mga panalangin, o kiling ba kita sa pagkalimot sa atong nabatonan diha sa pag-alagad kang Jehova? Tungod sa ilang debosyon ngadto kaniya, gitugyanan ni Jehova ang iyang katawhan ug daghang nagkalainlaing mga pribilehiyo ug mga katungdanan. Kini naglakip sa mas mabug-at nga mga responsabilidad sa pagdumala, pagkamagbalantay, pagtudlo, ug nagkadaiyang mga bahin sa bug-os panahong pag-alagad. Apan nalangkit usab kini sa ubang bililhong mga butang may kalabotan sa pagsimba kang Jehova.

Pananglitan, palandonga ang Kristohanong ministeryo. Gipakasama ni apostol Pablo ang atong pribilehiyo sa pagsangyaw sa maayong balita sa atong pagpakabaton ug “bahandi diha sa mga kulonong sudlanan.” (2 Corinto 4:7) Gilantaw ba nimo kana nga pag-alagad ingong usa ka bililhong bahandi? Si Jesu-Kristo, nga maoy nanguna sa buluhatong pagsangyaw sa Gingharian, naglantaw niini sa ingon niana nga paagi, nga naghatag ug sumbanan. (Mateo 4:17) “Sanglit kami aduna niini nga ministeryo . . . , kami wala moangka,” miingon si Pablo.​—2 Corinto 4:1.

Ang Kristohanong mga tigom maoy usa usab ka sagradong tagana nga dili pagaisipon nga dili hinungdanon. Diha sa atong mga tigom, atong madawat ang hinungdanong instruksiyon ug makapahimulos sa gikinahanglang panag-ubanay. Diha sa mga tigom kita makapahayag usab sa atong pagtuo ug paglaom diha sa publiko pinaagi sa pagkomento nga regular ug pinaagi sa pagpakig-ambit sa programa sa ubang mga paagi. (Hebreohanon 10:​23-​25) Ang atong mga tigom sa pagkatinuod maoy usa ka tagana nga pagapabilhan!

Si Michael, nga gihisgotan sa sinugdan, nagpabili gayod niini nga mga panalangin ug dulot nga miapresyar niini. Apan ang iyang kahigawad nga wala makaalagad ingong ansiyano temporaryong nakawala sa iyang pagpabili niini. Pinaagi sa paghatag ug pagtagad niini pag-usab, siya nakahimo sa pagbaton pag-usab sa iyang pagkatimbang ug mapailobong naghulat kang Jehova.

Imbes nga mobating dili kontento tungod kay wala makabaton sa usa ka pribilehiyo, maayong atong susihon pag-usab ang mga paagi nga si Jehova nagpanalangin kanato, sama sa gibuhat sa salmista.a Kon wala kaayo kitay makita, kinahanglan natong motan-aw pag-usab, nga maghangyo kang Jehova nga buksan ang atong mga mata aron makita ang atong mga pribilehiyo ug ang mga paagi nga siya nagpanalangin kanato ug nagagamit kanato sa pagdayeg kaniya.​—Proverbio 10:22.

Hinungdanon usab ang pagkaamgo nga ang linaing mga pribilehiyo, sama sa katungdanan sa pagkamagtatan-aw, nagkinahanglan ug espesipikong mga kuwalipikasyon. (1 Timoteo 3:​1-7; Tito 1:​5-9) Busa kinahanglang susihon nato ang atong kaugalingon, nga mangita sa mga dapit nga nagkinahanglan ug pag-uswag ug dayon maghimog tim-os nga mga paningkamot sa pag-uswag.​—1 Timoteo 4:​12-​15.

Ayaw Pagkaluya

Kon dili nato madawat ang usa ka pribilehiyo sa pag-alagad, dili kita angayng mohinapos nga si Jehova mas nahigugma niadtong nakatagamtam niini o nga siya naghikaw sa maayo gikan kanato. Sa pagkatinuod, kita sa pagkamasinahon dili angayng maghunahuna nga kining uban sa pagkadili-takos nakabaton sa ilang mga pribilehiyo pinaagi sa tawhanong paboritismo imbes sa teokratikanhong pagkatudlo. Ang paghambin niana nga mga hunahuna motultol sa kasina, panag-away, ug bisan sa atong pag-angka sa bug-os.​—1 Corinto 3:​3; Santiago 3:​14-16.

Si Laura, nga gihisgotan sa sinugdan, wala moangka. Nabuntog ra niya sa ulahi ang iyang mga pagbati sa kasuko ug kasina. Si Laura nagbalikbalik sa pag-ampo sa Diyos alang sa tabang sa pagbuntog sa iyang negatibong reaksiyon sa iyang pagkadili-makapayunir. Siya nangayo usab ug tabang gikan sa kuwalipikadong mga lalaki diha sa kongregasyon ug mibating gipasaligan pag-usab sa gugma sa Diyos. “Gihatagan ako ni Jehova ug kalinaw sa hunahuna,” matod niya. “Bisag kami sa akong bana dili makapayunir karon, kami nagpabili sa panahon nga kami nagpayunir ug nakakuhag kalig-on gikan sa mga kasinatian nga among nabatonan. Kami nagtabang usab sa among hingkod nga anak lalaki sa iyang pagpayunir.” Sa pagkahimong kontento, si Laura nakaarang na karon sa ‘pagmaya uban sa mga tawong nagmaya’ sa ilang payunir nga pag-alagad.​—Roma 12:15.

Paghimog Makab-ot nga mga Tumong

Ang atong pagkakontento sa presenteng mga pribilehiyo sa pag-alagad wala magpasabot nga kita mohunong sa paghimog dugang teokratikanhong mga tumong. Sa paghisgot sa langitnong pagkabanhaw, si Pablo naghisgot sa ‘pagpangab-ot sa mga butang sa unahan.’ Siya usab miingon: “Sa unsa nga gilapdon nga kita nakahimo ug pag-uswag, managlakaw kita nga mahusay sa samang naandan nga paagi.” (Filipos 3:​13-16) Ang teokratikanhong mga tumong makatabang kanato sa pagpangab-ot sa unahan. Ang hagit, hinunoa, mao ang paghupot niini nga realistikanhon.

Ang realistikanhong mga tumong makataronganon ug makab-ot. (Filipos 4:5) Kini wala magpasabot nga ang usa ka tumong nga nagkinahanglan ug daghang tuig sa paghago dili realistikanhon. Ang maong halayog-abot nga tumong mahimong makab-ot nga inanay pinaagi sa paghimog mga serye sa tungatungang mga tumong, o mga lakang. Kini magsilbing tikanganan sa espirituwal nga pag-uswag. Ang pagtapos nga malamposon sa matag lakang mohatag ug pagbati sa pagkatagbaw nga magpadayon imbes nga mahigawad.

Usa ka Maayong Baroganan

Hinungdanon ang pagkaamgo, hinunoa, nga tungod sa atong mga sirkumstansiya ug mga limitasyon, ang pipila ka mga pribilehiyo dili makab-ot. Ang pagbutang niini ingong mga tumong motultol lamang sa kahigawad ug pagkaluya. Ang maong mga tumong ihiklin lang una, labing menos sa pagkakaron. Ang pagbuhat niini dili malisod kon kita mag-ampo alang sa diyosnong pagkakontento ug ang pagbuhat sa kabubut-on ni Jehova himoon nga maoy atong pangunang pagatagdon. Kon kita nagapangab-ot sa mga pribilehiyo, ang himaya ni Jehova​—dili ang pag-ila sa atong personal nga nakab-ot​—ang hinungdanon. (Salmo 16:​5, 6; Mateo 6:33) Ang Bibliya sa tukma nag-ingon kanato: “Itugyan ang imong mga buhat diha kang Jehova mismo ug ang imong mga plano mamalig-on.”​—Proverbio 16:3.

Sa magpalandong sa ika-84ng Salmo, atong makita nga ang salmista nagpasundayag sa maong tinamdan alang sa mga pribilehiyo sa pag-alagad, ug si Jehova nagpanalangin kaniya nga madagayaon. Dugang pa, kini nga salmo padayong nagahatag ug kaayohan sa katawhan ni Jehova hangtod niining adlawa.

Uban ang mainampoong pagsalig kang Jehova, imong matimbangtimbang ang imong pangandoy alang sa dugang nga mga pribilehiyo nga may pagkakontento uban niadtong imong ginatagamtam karon. Ayawg itugot nga ang tinguha sa pagbuhat ug labaw pa maghikaw kanimo sa pagpabili kon unsay imong nabatonan karon ug sa kalipay sa pag-alagad kang Jehova sa walay kataposan. Salig kang Jehova, kay kini moresultag kalipay, ingon sa gipakita sa mga pulong sa Levihanon: “Oh Jehova sa mga panon, malipayon ang tawo nga nagasalig diha kanimo.”​—Salmo 84:12.

[Footnote]

[Kahon sa panid 11]

Mga Tumong Nga Mahimo Natong Himoon

Pagbasa sa Bibliya adlaw-adlaw.​—Josue 1:​8; Mateo 4:4

Pagpauswag sa atong mga gahom sa pagsabot pinaagi sa pagbansay sa Kasulatan.​—Hebreohanon 5:14

Pag-ugmad ug mas suod nga relasyon sa Diyos.​—Salmo 73:28

Pag-ugmad sa matag usa sa mga bunga sa espiritu.​—Galacia 5:​22, 23

Pagpauswag sa kalidad sa atong mga pag-ampo.​—Filipos 4:​6, 7

Pagkahimong mas epektibo diha sa pagsangyaw ug pagpanudlo.​—1 Timoteo 4:​15, 16

Pagbasa ug pagpalandong sa matag isyu sa mga magasing Bantayanang Torre ug Pagmata! —Salmo 49:3

[Hulagway sa panid 9]

Sa paghimog personal nga mga tumong, unaha pagbuhat ang kabubut-on sa Diyos