Usa ka Kaminyoon nga Ulay?

SA PAGSULAY nga mapahiuyon ang giingong mahangtorong pagkaulay ni Maria sa iyang kaminyoon kang Jose, daghang pintor ug mga eskultor ang naglarawan kang Jose ingong tigulang nga tawo. Sila nangatarongan nga si Jose labaw nga samag magbalantay ni Maria kay sa iyang bana. Apan si Papa Juan Paulo II niining bag-o pa nagpasiugda ug laing panglantaw sa maong butang. Siya nagsugyot nga si Jose “dili tigulang nga tawo niadtong panahona.” Sa sukwahi, “ang iyang pagkahingpit sa kahiladman, nga gasa gikan sa Diyos, nag-impluwensiya sa iyang kaminyoon kang Maria sa pagmahal kaniya nga dili inubanan sa seksuwal nga kasuod.”

Kon tuyo ni Maria nga magpabiling ulay hangtod sa hangtod, ngano mang nakigsaad siya sa kaminyoon? “Mahimo tingali,” nagtubag ang papa, “nga niadtong panahon sa ilang sayod sa kasal dunay panagsabot tali ni Jose ug Maria kabahin sa plano nga magkinabuhing ulay.”

Apan, ang Bibliya nagpresentar sa maong butang sa lahing paagi. Ang asoy ni Mateo nag-ingon nga si Jose “wala makigdulog kaniya hangtod nga nahimugso kaniya ang usa ka anak nga lalaki.” (Mateo 1:​25, Katolikong New American Bible, italiko amoa.) Human mahimugso si Jesus, ang kaminyoon ni Jose ug Maria dili na ulay. Usa ka pamatuod niini mao nga sa asoy sa Ebanghelyo sa ulahi, gipakita si Jesus nga dunay mga igsoong lalaki ug mga babaye.​—Mateo 13:​55, 56.

Busa, samtang ang Bibliya nagpahayag nga ulay si Maria sa dihang siya nanganak kang Jesus, walay pasukaranan ang pag-ingon nga siya nagkinabuhing ulay sa nabiling bahin sa iyang kinabuhi uban kang Jose.