Pagpadako ug Matarong-ug-Gawi nga Kabataan—Posible pa ba Kini?

“NAGKINABUHI kita karon sa usa ka komplikado kaayo nga katilingban, usa ka nagkadaiya kaayong kultura, diin walay managsamang kalagdaan sa moralidad,” nagkomento si Robert Glossop sa Vanier Institute for the Family sa Ottawa, Canada. Uban ang unsang resulta? Usa ka taho sa mantalaang The Toronto Star ang nagkanayon: “Ang pagmabdos sa mga tin-edyer, kabangis sa mga batan-on ug paghikog sa mga tin-edyer nagkadaghan.”

Ang suliran nagkaylap saylo pa sa Amerika del Norte. Si Bill Damon, direktor sa Sentro Alang sa Tawhanong Kaugmaran sa Brown University sa Rhode Island, T.B.A., nagtuon niini nga mga suliran sa Britanya ug uban pang mga nasod sa Uropa, maingon man usab sa Australia, Israel, ug Hapon. Iyang gipunting ang pag-us-os sa mga simbahan, mga eskuylahan, ug ubang mga institusyon sa pagtaganag giya alang sa mga batan-on. Ang atong kultura, siya nagtuo, “wala makamatngon kon unsay gikinahanglan sa kabataan aron mapatungha ang maayo nga moral ug katakos.” Nga nagkutlo sa mga eksperto sa pagpadako ug mga bata nga nagtudlo nga “ang pagdisiplina peligroso sa kahimsog ug kaayohan sa mga bata,” si Damon nagtuo nga usa kini ka “pormula sa pagpadako ug gahig ulo, masupilong mga bata.”

Unsa man ang gikinahanglan sa mga batan-on karon? Kanunay silang nagkinahanglan ug mahigugmaong pagbansay nga magtul-id sa hunahuna ug kasingkasing. Ang lainlaing mga batan-on nanginahanglan ug lainlaing matang sa pagdisiplina. Kon tinukmod sa gugma, ang disiplina kasagarang mapasabot pinaagi sa pagpangatarongan. Kana ang hinungdang gisultihan kita sa Proverbio 8:33 nga “maminaw sa disiplina.” Apan, ang uban dili “matul-id sa mga pulong lamang.” Alang kanila, ang nahiangayng pagsilot tungod sa pagkamasupilon, nga himoon sa hustong sukod, mahimong gikinahanglan. (Proverbio 17:10; 23:​13, 14; 29:19) Sa paghimo niini nga rekomendasyon, ang Bibliya wala magpasiugda sa masuk-anong mga paglatigo o grabeng mga pagbunal, nga mahimong mobun-og ug mosamad sa bata. (Proverbio 16:32) Hinunoa, ang bata angayng makasabot kon nganong gitul-id siya ug mobati nga tungod kini kay ang iyang ginikanan nagpaluyo kaniya, nga interesado sa iyang kaayohan.​—Itandi ang Hebreohanon 12:​6, 11.

Ang maong praktikal ug maayong tambag sa Bibliya gipasiugda sa librong Ang Sekreto sa Kalipay sa Pamilya.