Maayong Balita Bahin sa Paraiso sa Tahiti
TAHITI! Ang ngalan morag nagdala ug talagsaong pagkamadanihon. Gihimo kining popular sa mga pintor ug mga manunulat sama nila Paul Gauguin, Robert Louis Stevenson, ug Herman Melville, kansang mga paghulagway sa tropikanhong katahom ug kalinaw sa mga Isla sa Habagatang Dagat nagbihag sa handurawan sa kadaghanan.
Ang Tahiti mao ang kinadak-an sa kapin sa 120 ka isla sa French Polynesia, nga nahimutang sa Habagatang Pasipiko. Bisan pag kining islaha sa Habagatang Dagat halos maora nag paraiso diha sa mga hunahuna sa kadaghanang tawo, ang katawhan sa Tahiti kinahanglan pa gihapong makadungog bahin sa laing paraiso nga hapit nang moabot. (Lucas 23:43) Ang mga Saksi ni Jehova, nga dunay gidaghanong 1,918 sa Tahiti karon, puliking nagsulti sa 220,000 ka tawo bahin sa maayong balita nga ang Gingharian sa Diyos sa dili madugay magpahinabo ug tinuod nga paraisonhong mga kahimtang dili lamang sa Tahiti apan sa tibuok yuta usab.—Mateo 24:14; Pinadayag 21:3, 4.
Sa daghang katuigan ang pagsangyaw nga buluhaton sa Tahiti gidumala sa sangang buhatan sa Watch Tower Society sa Fiji, mga 3,500 kilometros ang gilay-on. Ang dako kaayong distansiya nga nalambigit nagpalisod sa mga kahimtang, ug hinay ang pag-uswag. Busa, niadtong Abril 1, 1975, usa ka sangang buhatan ang giestablisar sa Tahiti, ug kana nagtimaan sa usa ka higayon sa dakong kausaban sa kalihokan sa matuod nga mga Kristohanon niining teritoryoha. Unsay nagpahinabo niini nga kausaban, ug sa unsang paagi misugod ang pagsangyawng buluhaton sa Tahiti?
Usa ka Gamayng Sinugdanan
Ang maayong balita sa Gingharian unang nadunggan sa Tahiti niadtong katuigan sa 1930, ug daghan sa mga tagaisla, nga dunay dakong pagtahod sa Bibliya, misanong uban ang dakong interes. Apan, ingong resulta sa pagdili sa kagamhanan ug ubang mga pagpig-ot, wala pa gihapoy mga Saksi sa isla sa hinapos sa katuigang 1950. Niadtong panahona, si Agnès Schenck, usa ka lumad sa Tahiti nga nagpuyo sa Tinipong Bansa, mihukom nga mopauli sa Tahiti uban sa iyang bana ug anak lalaki. Iyang giasoy kon sa unsang paagi kini nahitabo.
“Sa 1957 nga distritong kombensiyon sa Los Angeles, si Brader Knorr [niadtong tungora maoy presidente sa Watch Tower Society] mipatin-aw nga dunay dakong panginahanglan alang sa mga magmamantala sa Gingharian sa Tahiti. Usa ka tuig na akong nabawtismohan niadtong tungora, ug ako mipatugbaw, ‘Nan mangadto ta sa Tahiti!’ Duha ka pamilya, ang mga Neill ug ang mga Carano, nga among suod nga mga higala, nakadungog nako. Ila kaming gisultihan nga gusto nilang mokuyog namo, apan gamay ra ang among kuwarta. Dugayng nagdaot ang akong bana, ug gamay pa ang akong anak. Busa lisod alang kanamo ang pagbiya. Ang mga higala sa silingang mga kongregasyon nakadungog sa among tumong, ug gipadal-an kami nila ug kuwarta ug mga gamit sa panimalay. Unya niadtong Mayo 1958 kami milawig paingon sa Tahiti nga nagdalag 36 ka habol ug hapin sa higdaan, gawas sa uban pang mga butang!
“Pag-abot namo sa Tahiti, mibati ko nga morag estranyo tungod kay 20 ka tuig na akong nawala sa isla. Misugod kami sa pagsangyaw, apan kinahanglan kaming mag-amping tungod kay gidili ang among Kristohanong buluhaton. Kinahanglang among tagoan ang mga magasin, ug Bibliya lamang ang among gigamit. Sa sinugdanan misangyaw lamang kami sa mga tawo nga daan nang dunay mga suskrisyon sa Bantayanang Torre ug Pagmata! nga mga magasin.
“Si Clyde Neill ug David Carano, uban sa ilang mga pamilya, miapas kanamo human sa internasyonal nga kombensiyon sa Siyudad sa New York niadtong 1958. Magkauban kaming nagsangyaw ug nagdapit sa mga tawo nga motambong ug maminaw sa mga pakigpulong nga gihimo diha sa mga balay sa mga igsoon. Anam-anam nga naorganisar ang mga butang, ug gisugdan namo ang usa ka grupo sa pagtuon sa Bibliya uban sa 15 ka tawo. Pagkahuman sa tulo ka bulan ang mga Neill ug ang mga Carano kinahanglang mopauli tungod kay natapos na ang ilang bisa. Busa ang mga ansiyano nakahukom nga sa dili pa mamauli kining mga pamilyaha, ilang bawtismohan ang tanang interesado nga mikuwalipikar. Nakapribilehiyo ako nga mahimong maghuhubad sa unang pakigpulong sa bawtismo. Niining higayona walo ka tumindok nga mga tagaisla ang mipasimbolo sa ilang pagpahinungod kang Jehova pinaagig bawtismo. Human niana ang mga Neill ug ang mga Carano namalik sa Tinipong Bansa.
“Nagpadayon ang pagsangyawng buluhaton. Giorganisar namo ang among kaugalingon ngadto sa gagmayng mga grupo ug naghimog mga pagsangyaw magabii. Ang mga panaghisgot uban sa mga interesado kasagarang nagpadayon hangtod tungang-gabii. Usahay bisan ang mga ministro sa Protestante miapil sa mga panaghisgot. Pagka-1959 naporma ang unang kongregasyon. Unya, sa among dakong kalipay, niadtong 1960 ang kagamhanan opisyal nga nag-ila sa asosasyon sa mga Saksi ni Jehova. Kadtong sayong katuigan napuno sa kangaya ug dagkong espirituwal nga mga panghitabo. Gipanalanginan gayod ni Jehova ang among desisyon nga mobalhin kon diin dako ang panginahanglan.” Si Sister Schenck 87 anyos na karon, ug padayon gihapon siyang nag-alagad nga matinumanon kang Jehova diha sa iyang kongregasyon.
Nag-uswag ang Buluhaton
Niadtong 1969 duha ka Saksi gikan sa Pransiya, si Jacques ug Paulette Inaudi, giasayn ingong mga espesyal payunir sa Tahiti. Nahinumdom si Jacques: “Pag-abot namo sa Tahiti, 124 lamang ang mga magmamantala, usa ka kongregasyon sa Papeete, ug duha ka espesyal payunir sa Vairao, sa peninsula.” Ang peninsula nadugtong sa Tahiti pinaagig hiktin nga yuta. Hapit nang himoon ang “Kalinaw sa Yuta” Internasyonal nga Asembliya. “Mao kadto ang akong unang kasinatian sa pag-organisar ug kombensiyon,” nagpadayon si Jacques. “Kinahanglan kaming magplano ug Iningles nga programa alang sa mga bisita, mag-organisar ug orkestra alang sa mga awit sa Gingharian, ug mag-ensayo ug duha ka drama. Kining tanan nga trabaho nahimo uban sa 126 lamang ka magmamantala. Ako nakaseguro nga si Jehova ang naghimo sa kinadak-ang bahin niini.” Ang 488 nga nanambong nakapaukyab sa mga tagaisla. Alang sa kadaghanan kanila, mao kadto ang unang higayon nga makahimamat ug mga isigka-Saksi gikan sa laing kayutaan.
Wala madugay, si Jacques Inaudi giasayn ingong nagapanawng magtatan-aw. Samtang siya nagduaw sa nagkadaiyang mga isla, iyang nakita nga dunay dakong interes apan pipila lamang ang mga magmamantala sa Gingharian nga mougmad niini. “Kana ang hinungdan nga akong gidasig ang daghang pamilya nga mobalhin niining mga islaha aron moalagad kon diin mas dako ang panginahanglan,” nagpatin-aw si Jacques. “Busa sa tinagidyot, ang maayong balita napakaylap sa maong mga kapupud-an.” Si Brader Inaudi nag-alagad ingong nagapanawng magtatan-aw gikan sa 1969 hangtod 1974, ug usa siya karon ka ansiyano sa usa sa mga kongregasyon sa Tahiti.
Usa niadtong misanong sa pagdasig ni Brader Inaudi mao si Auguste Temanaha, nga usa sa walo nga nabawtismohan niadtong 1958. Siya nagbatbat sa nahitabo. “Sa 1972 ang magtatan-aw sa sirkito, si Jacques Inaudi, midasig kanamo nga tulotimbangon ang pagbalhin aron moalagad sa Huahine, usa sa Kaislahang Leeward sa grupo sa Society nga Kaislahan. Nag-ukon-ukon ako tungod kay pagbasa lamang sa Bibliya ang akong mga bahin sa kongregasyon ug mibati nga dili kuwalipikado nga piyalan sa maong kaakohan. Bisan pa niana, si Brader Inaudi nagpadayon pagsulti kanako, ‘Ayawg kabalaka, mahimo nimo kana!’ Wala madugay nakadesisyon kami. Busa, niadtong 1973 among gibaligya ang tanan ug mibalhin sa Huahine uban ang tulo namo ka gagmayng kabataan.
“Sa among pag-abot, akong nakaplagan nga kinahanglan nakong sugdan ang tanan—ang Pagtuon sa Bantayanang Torre, ang Tunghaan sa Teokratikanhong Ministeryo, ug uban pa. Dili kadto sayon, apan among nasinati ang panalipod ug tabang ni Jehova. Sa daghang higayon siya mitabang kanamo nga makakaplag ug mapuy-an. Unya, sa dihang usa ka grupo sa mga magsusupak nagtinguha nga papahawaon sa isla ang mga Saksi, usa ka lokal nga politiko ang maisogong mibarog sa pagdepensa kanamo. Sa pagkamatuod, gibantayan gayod kami ni Jehova nianang mga panahona.” Karon, dunay duha ka kongregasyon sa Huahine—usa ka Pranses nga kongregasyon nga dunay 23 ka magmamantala ug usa ka Tahisyano nga 55 ang magmamantala.
Sa 1969, si Hélène Mapu giasayn ingong espesyal payunir sa peninsula. “Dunay dako gayod nga interes sa peninsula, ug sulod sa mubong panahon, nakasugod akog daghang pagtuon sa Bibliya,” nag-ingon si Hélène. Wala magdugay usa ka gamayng kongregasyon ang naporma sa Vairao, apan dunay panginahanglan sa mga ansiyano. Sa paglabay sa panahon, si Colson Deane, nga nagpuyo sa Papara nga dunay gilay-ong 35 kilometros, nakataganag tabang. “Kinahanglang organisado kami pag-ayo aron makaalagad sa Vairao,” nagsugilon si Brader Deane. “Nagtrabaho ako sa Faaa, 70 kilometros gikan sa Vairao sa pikas nga bahin sa isla. Human sa trabaho, kinahanglan akong magdalidalig pauli, kuhaon ang akong pamilya, ug dayon moadto sa Vairao. Sa ulahi kinahanglan kaming mobalhin sa Faaa tungod sa akong trabaho. Amo pa ba gihapong mapaluyohan ang Kongregasyon sa Vairao? Buot gayod namong tabangan ang kaigsoonan didto, busa nakahukom kaming magpadayon. Sa mga gabii sa panagkatigom talagsa ra kaming makapauli nga dili pa tungang gabii tungod kay kinahanglan kaming mobiyaheg makadaghan aron ihatod pauli kadtong walay mga sakyanan. Gihimo namo kini sulod sa lima ka tuig. Usa na karon ka dakong kalipay nga makita ang upat ka kongregasyon niini nga bahin sa isla, ug kami dunay malipayong mga handomanan sa maong mga panahon.”
Ang Tahiti Nahimong Sangang Buhatan
Pagka-1974 ang gidaghanon sa mga magmamantala sa Gingharian sa Tahiti miuswag ngadto sa 199. Pagkasunod tuig sa dihang si N. H. Knorr ug F. W. Franz, nga niadtong tungora maoy presidente ug bise presidente sa Watch Tower Society, miduaw sa French Polynesia, ilang nakita nga mas praktikal nga ang buluhatong pagsangyaw sa French Polynesia dumalahon, dili gikan sa Fiji nga kapin sa 3,500 kilometros ang gilay-on, kondili gikan sa Tahiti. Busa, niadtong Abril 1, 1975, ang sangang buhatan sa Tahiti gipundar, ug ang magtatan-aw sa sirkito, si Alain Jamet, maoy gitudlo ingong magtatan-aw sa sanga.
Sa milabayng duha ka tuig, si Brader Jamet nakasugilon sa makapahibulong nga mga panalangin gikan kang Jehova. “Sukad sa 1975 dakong paningkamot ang gihimo sa paghatod sa maayong balita ngadto sa tanang isla ug mga kapupud-an sa among teritoryo, nga nagkobre sa luna nga sama ka dako sa Kasadpang Uropa. Makapalipay ang mga resulta. Pagka-1983 ang gidaghanon sa mga magmamantala mikabat ug 538. Nianang tuiga gitukod ang usa ka sangang opisina ug Balayng Bethel sa Paea. Karon, aduna nay mga 1,900 ka magmamantala nga nakatag taliwala sa 30 ka kongregasyon sa Society nga Kaislahan, usa ka kongregasyon ug usa ka nahilaing grupo sa Austral nga Kaislahan, usa ka kongregasyon ug duha ka nahilaing grupo sa Marquesas, ug daghang nahilaing grupo sa Tuamotu ug Gambier nga Kaislahan. Daghang bag-ong Kingdom Hall ang ginatukod—tulo sa Marquesas ug pito sa Tahiti—aron atimanon ang kanunay nagauswag nga gidaghanon sa mga bag-ohan nga nagtambong sa mga tigom. Sa milabayng 20 ka tuig, gipanalanginan gayod ni Jehova ang among mga paningkamot nga ugmaron ang kanataran sa Tahiti.”
Daghan pa ang Buhatonon
Maayo kaayo ang purohan alang sa pag-uswag sa French Polynesia. Sa Marso 23, 1997, mga 5,376 ka tawo ang nagtipon kauban sa mga Saksi ni Jehova sa tibuok nga French Polynesia alang sa Memoryal sa kamatayon ni Jesu-Kristo. Sa pagtagbaw sa espirituwal nga mga panginahanglan niining interesadong katawhan, ang atong mga publikasyon sa Bibliya mabatonan sa pipila ka lokal nga mga pinulongan. Dugang pa sa Tahisyano, ang literatura giandam sa Paumotu, nga maoy sinultihan sa Tuamotu nga Kapupud-an ug sa Amihanan ug Habagatang Marquesas.
Ang makanunayong pagtubo ug ang maayong mga kasinatian nakatabang sa mga magmamantala sa Gingharian sa Tahiti nga mas bug-os pang pabilhan ang gugma ug pailob ni Jehova, “kansang kabubut-on mao nga ang tanang matang sa mga tawo maluwas ug makadangat sa tukmang kahibalo sa kamatuoran,” bisan sa halayong mga isla sa Habagatang Dagat. (1 Timoteo 2:4) Ang mga Saksi ni Jehova sa Tahiti ug sa ubang mga isla sa French Polynesia dunay bug-os nga pagtuo sa saad ni Jehova: “Ang kapupud-an magahulat kanako, ug sa akong bukton sila magasalig.”—Isaias 51:5.
[Mapa sa panid 26]
Ang sangang buhatan sa Tahiti nag-atiman sa mga panginahanglan sa French Polynesia
AUSTRALIA
[Hulagway sa panid 25]
Gikan sa wala patuo: Alain Jamet, Mary-Ann Jamet, Agnès Schenck, Paulette Inaudi, ug Jacques Inaudi
[Kapsiyon sa panid 27]
Sangang buhatan sa Tahiti