Mga Ulipon sa mga Tawo o mga Alagad sa Diyos?

“ANG mga Saksi ni Jehova labing menos angay nga pagadayegon.” Sa ingon mipahayag ang Aleman nga librong Seher, Grübler, Enthusiasten (Mga Bisyonaryo, mga Tigpalandong, mga Mahiligon). Bisan tuod morag hinawayon sa mga Saksi, kini miangkon: “Sa katibuk-an, sila nagkinabuhi nga walay-ikasaway, may estilo-sa-kinabuhi nga susama nianang sa tungatungang hut-ong sa katilingban. Sila kugihan ug mahunahunaon sa ilang trabaho, malinawong mga lungsoranon ug matinud-anong mga tigbayad ug buhis. Sila naglikay sa sobrang pagpangitag mga bahandi. . . . Ang ilang disiplina sa panahon sa mga kombensiyon maoy dalayegon. Ang ilang masakripisyohon-sa-kaugalingong espiritu katumbas sa bisan unsang ubang relihiyosong pundok; mahitungod sa ministeryo sila molabaw sa tanan. Apan ang nagpatuboy kanila ibabaw sa tanang ubang Kristohanong iglesya ug pundok sa atong adlaw mao gayod ang dili-mabungkag nga determinasyon nga niana ang kadaghanan kanila nagmantala sa ilang mga doktrina ubos sa tanang kahimtang ug atubangan sa tanang kapeligrohan.”a

Bisan pa nianang maayong pagtasal, ang ubang mga hunahuna misulay sa pagpresentar sa mga Saksi ni Jehova diha sa lahi kaayong dagway. Sa kadaghanang nasod sa tibuok kalibotan, ang mga Saksi dayag nga nagabuhat sa ilang relihiyosong mga serbisyo sulod sa mga dekada nga walay pagbalda. Milyonmilyon sa katawhan nakaila kanila, nagtahod kanila, ug mouyon nga sila may katungod sa pagtuman sa ilang relihiyon. Nan, nganong adunay pagkawalay-kasegurohan bahin sa kon kinsa ang mga Saksi ni Jehova?

Tingali usa ka katarongan sa pagkawalay-kasegurohan mao nga niining bag-o pa daghang ubang relihiyosong pundok ang nalangkit sa pag-abuso sa bata, dinaghang paghikog, ug mga pag-atake sa terorista. Siyempre, ang mga kalapasan nga sama niini anaa bisan diin, dili lamang taliwala niadtong kinsa mga relihiyoso. Bisan pa niana, kon mahitungod sa relihiyon daghang tawo ang maduhaduhaon, ang uban masinupakon pa.

Mga Kapeligrohan sa Pagsunod sa mga Tawo

Ang “sekta” gibatbat ingong “usa ka grupo nga nagsunod sa usa ka lahing doktrina o sa usa ka pangulo.” Sa susama, kadtong sakop sa usa ka “kulto” may “dakong debosyon sa usa ka tawo, ideya, o butang.” Ang tinuod, ang mga membro sa bisan unsang relihiyosong grupo nga malig-ong mosunod sa tawhanong mga pangulo ug ilang mga ideya nameligro nga mahimong mga ulipon sa mga tawo. Ang usa ka malig-ong masinundanon-sa-pangulo nga relasyon motultol ngadto sa dili maayong emosyonal ug espirituwal nga pagsalig. Ang kapeligrohan tingalig mosamot kon ang tawo gimatuto nianang sektaryanhong kahimtang gikan sa pagkabata.

Kadtong may ingon niana nga mga kabalaka bahin sa relihiyon nagkinahanglag kasaligang impormasyon. Ang uban tingalig giingnan nga ang mga Saksi ni Jehova sakop sa usa ka relihiyosong organisasyon nga nag-ulipon sa mga membro niini, nagpakitag awtoritaryanhong pagmando ibabaw kanila, nagkuto nga dili makataronganon sa ilang kagawasan, ug naghimo kanilang dili magpahiuyon sa katilingban sa katibuk-an.

Ang mga Saksi ni Jehova nasayod nga kining maong mga kabalaka wala kinahanglana. Busa, sila nagdapit kanimo sa pagsusi alang sa imong kaugalingon. Human sa mainampingong pagtagad, paghimog imong kaugalingong mga konklusyon. Ang mga Saksi ba mga alagad sa Diyos, ingon sa ilang pangangkon, o sa pagkatinuod mga ulipon sa mga tawo? Unsay tinubdan sa ilang kalig-on? Ang duha ka artikulo sa mga panid 12-23 motagana sa makapatagbawng mga tubag sa maong mga pangutana.

[Mga footnote]