May-Kagawasang Pagtuman sa Kristohanong Pagpahinungod
“Kon asa gani ang espiritu ni Jehova, adunay kagawasan.”—2 CORINTO 3:17.
1. Kang kinsa ang mga Saksi ni Jehova napahinungod, ug nganong sila nagagamit ug legal nga mga ahensiya?
ANG mga Saksi ni Jehova nagtuo nga ang ilang relihiyon molungtad sa walay kataposan. Busa nagdahom sila nga mag-alagad sa Diyos “uban sa espiritu ug kamatuoran” hangtod sa kahangtoran. (Juan 4:23, 24) Isip mga linalang nga may kagawasang moral, ang maong mga Kristohanon sa walay-pagpanuko nagpahinungod kang Jehova nga Diyos ug determinado sa pagtuman niini. Sa maong katuyoan, nagsalig sila sa Pulong sa Diyos ug sa iyang balaang espiritu. Samtang sa bug-os kasingkasing sila nagapadayon diha sa ilang dalan sa Kristohanong pagpahinungod diha sa hinatag-sa-Diyos nga kagawasan, ang mga Saksi nagpakitag angayang pagtahod alang sa papel sa kagamhananong “labaw nga mga awtoridad” ug tukmang nagagamit sa legal nga mga paagi ug mga probisyon. (Roma 13:1; Santiago 1:25) Pananglitan, gigamit sa mga Saksi ang Watch Tower Society isip usa ka legal nga instrumento—usa sa daghan diha sa nagkalainlaing mga nasod—aron makaarang sila sa paghimo sa ilang buluhatong pagtabang sa isigkatawo, ilabina sa espirituwal nga mga paagi. Apan ang mga Saksi napahinungod ngadto sa Diyos, dili ngadto sa bisan unsang legal nga ahensiya, ug ang ilang pagpahinungod kang Jehova molungtad sa walay kataposan.
2. Nganong ang Watch Tower Society ug susamang legal nga mga ahensiya gipabilhan pag-ayo sa mga Saksi ni Jehova?
2 Isip mga alagad nga napahinungod ngadto sa Diyos, obligado ang mga Saksi ni Jehova nga mosugot sa mga tugon ni Jesus sa “paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila.” (Mateo 28:19, 20) Kining buluhatona magpadayon hangtod sa kataposan sa sistema sa mga butang, kay si Jesus usab miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:3, 14) Kada tuig, ang mga imprentahan sa Watch Tower Society ug susamang legal nga mga kapunongan nagtagana sa mga Saksi ni Jehova ug minilyong Bibliya, mga libro, brosyur, ug magasin aron magamit diha sa ilang tibuok-kalibotang buluhaton sa pagsangyaw. Sa ingon ang maong legal nga mga instrumento bililhon kaayo aron tabangan ang napahinungod nga mga alagad sa Diyos sa pagtuman sa ilang pagpahinungod kaniya.
3. Sa unsang diwa gigamit sa mga Saksi ni Jehova niadto ang terminong “ang Sosyedad”?
3 May mangatarongan tingali nga ang paagi sa paghisgot sa mga Saksi sa Watch Tower Society—o subsob pa nga “ang Sosyedad” lang—nagpaila nga ilang giisip kini nga dili lamang usa ka legal nga instrumento. Wala ba sila mag-isip nga kini maoy pangataposang awtoridad sa mga butang labot sa pagsimba? Ang librong Mga Saksi ni Jehova—Mga Magmamantala sa Gingharian sa Diyos nagtin-aw niining puntoha pinaagi sa pagsaysay: “Sa dihang ang The Watchtower [Hunyo 1, 1938] nagtumong sa ‘Ang Sosyedad,’ kini nagpasabot, dili lamang sa usa ka legal nga galamiton, kondili sa lawas sa dinihogang mga Kristohanon nga nagporma nianang legal nga ahensiya ug nagagamit niana.”a Busa ang ekspresyon nagpasabot sa “matinumanon ug maalamong ulipon.” (Mateo 24:45) Sa maong diwa ang mga Saksi kasagarang naggamit sa terminong “ang Sosyedad.” Siyempre, ang legal nga korporasyon ug “ang matinumanon ug maalamong ulipon” dili mabaylobaylo nga mga termino. Ang mga direktor sa Watchtower Society maoy pinili, samtang ang mga Saksi nga naglangkob sa ‘matinumanong ulipon’ maoy dinihogan sa balaang espiritu ni Jehova.
4. (a) Sa unsang paagi ang daghang Saksi nagapahayag sa ilang kaugalingon aron malikayan ang mga di-pagsinabtanay? (b) Nganong angayng kita magmatimbang kon bahin sa mga termino?
4 Aron malikayan ang mga di-pagsinabtanay, ang mga Saksi ni Jehova naningkamot nga magbantay sa paagi sa ilang pagpahayag sa kaugalingon. Inay moingon, “ang Sosyedad nagtudlo,” daghang Saksi mopalabi sa paggamit sa mga ekspresyong sama sa, “ang Bibliya nag-ingon” o, “sa akong pagsabot ang Bibliya nagtudlo.” Niining paagiha sila nagpasiugda sa personal nga desisyon nga gihimo sa matag usa ka Saksi sa pagdawat sa mga pagtulon-an sa Bibliya ug paglikay usab nga mahatag ang sayop nga impresyon nga ang mga Saksi nagsunod sa mga diktar sa usa ka relihiyosong sekta. Siyempre, ang mga sugyot bahin sa mga termino dili gayod angayng himoon nga ulohan sa panaglantugi. Kon buot sabton, ang mga termino mahinungdanon lamang sa pagsanta sa mga di-pagsinabtanay. Gikinahanglan ang Kristohanong katimbang. Ang Bibliya nagtambag kanato nga “dili makig-away bahin sa mga pulong.” (2 Timoteo 2:14, 15) Ang Kasulatan usab nagpahayag niining prinsipyoha: “Gawas kon kamo pinaagi sa dila magbungat ug pamulong nga daling masabtan, unsaon man pagkahibalo kon unsay ginapamulong?”—1 Corinto 14:9.
Tungod sa Espiritu sa Diyos Makubsan ang Panginahanglan sa mga Lagda
5. Sa unsang paagi ang 1 Corinto 10:23 pagasabton?
5 “Ang tanang butang subay sa balaod; apan dili ang tanang butang may kaayohan,” nag-ingon si apostol Pablo. Midugang siya: “Ang tanang butang subay sa balaod; apan dili ang tanang butang mopalig-on.” (1 Corinto 10:23) Si Pablo dayag wala magpasabot nga subay sa balaod ang pagbuhat sa mga butang nga tin-awng ginasaway sa Pulong sa Diyos. Kon itandi sa mga 600 ka balaod nga gihatag ngadto sa karaang Israel, diyutay ra ang tin-awng mga sugo nga nagpaigo sa Kristohanong pagkinabuhi. Busa, daghang butang ang gitugyan sa tagsatagsa ka konsensiya. Ang usa ka tawong nagpahinungod kang Jehova nagpahimulos ug kagawasan nga sangpotanan sa paggiya sa espiritu sa Diyos. Kay iyang gihimo ang kamatuoran nga iyang kaugalingon, ang usa ka Kristohanon mosunod sa iyang binansay-sa-Bibliya nga konsensiya ug mosalig sa pagtultol sa Diyos pinaagi sa balaang espiritu. Motabang kini sa napahinungod nga Kristohanon sa paghukom kon unsay “mopalig-on” ug “may kaayohan” alang sa iyang kaugalingon ug sa uban. Iyang naamgohan nga ang mga desisyong iyang himoon moapektar sa iyang personal nga relasyon uban sa Diyos, nga kang kinsa siya nagpahinungod.
6. Panahon sa Kristohanong mga tigom, sa unsang paagi makapasundayag kita nga atong gihimo ang kamatuoran nga atong kaugalingon?
6 Ang usa ka Saksi nagpasundayag nga iyang gihimo ang kamatuoran nga iyang kaugalingon pinaagi sa pagkomento panahon sa Kristohanong mga tigom. Sa sinugdan, siya mahimong mosumay sa gipahayag diha sa basahong gitun-an. Sa ngadtongadto, hinunoa, siya mouswag sa punto nga ipahayag ang mga pagtulon-an sa Bibliya diha sa iyang kaugalingong mga pulong. Sa ingon naghatag siyag ebidensiya nga iyang ginaugmad ang iyang katakos sa paghunahuna, dili yanong gisubli kon unsay gisulti sa uban. Ang paghan-ay sa mga ideya sa iyang kaugalingong mga pulong ug pagpahayag sa hustong mga pulong sa kamatuoran sa kinasingkasing nga paagi mohatag kaniyag kahimuot ug magpakita nga siya kombinsido diha sa iyang kaugalingong panghunahuna.—Ecclesiastes 12:10; itandi ang Roma 14:5b.
7. Unsang mga desisyon ang gawasnong gibuhat sa mga alagad ni Jehova?
7 Ang mga Saksi ni Jehova gipalihok sa gugma alang sa Diyos ug sa ilang isigkatawo. (Mateo 22:36-40) Tinuod, sila nahugpong tungod sa bugkos sa gugma nga sama sa kang Kristo ingong tibuok-kalibotang kapunongan sa mga igsoon. (Colosas 3:14; 1 Pedro 5:9) Apan isip tawo nga may kagawasang moral, ang matag usa sa personal nakahukom nga ipahayag ang maayong balita sa Gingharian sa Diyos, magpabiling neyutral sa politika, maglikay sa dugo, maglikay sa pila ka matang sa kalingawan, ug magsunod sa mga sukdanan sa Bibliya. Kini dili kay mga desisyon nga gipugos kanila. Kini mga desisyon nga nahilakip sa kahikayan sa usa ka pagkinabuhi nga gipiling walay pagpanuko sa umaabot nga mga Saksi sa wala pa nila himoa ang tikang sa Kristohanong pagpahinungod.
Manubag Ngadto sa Usa ka Nagamandong Lawas?
8. Unsang pangutana ang kinahanglang matin-aw?
8 Ang Bibliya tin-awng nagpakita nga ang matuod nga mga Kristohanon wala mag-alagad sa Diyos tungod kay gipugos. Kini nag-ingon: “Si Jehova mao ang Espiritu; ug kon asa gani ang espiritu ni Jehova, adunay kagawasan.” (2 Corinto 3:17) Apan sa unsang paagi kining kamatuorana ikapahiuyon sa ideya sa usa ka “matinumanon ug maalamong ulipon” uban sa Nagamandong Lawas niini?—Mateo 24:45-47.
9, 10. (a) Sa unsang paagi ang prinsipyo sa pagkaulo mapadapat diha sa Kristohanong kongregasyon? (b) Gikinahanglan ang unsa sa pagsunod sa prinsipyo sa pagkaulo sa unang-siglong Kristohanong kongregasyon?
9 Sa pagtubag niining pangutanaha, kinahanglang atong hinumdoman ang Kasulatanhong prinsipyo sa pagkaulo. (1 Corinto 11:3) Sa Efeso 5:21-24, si Kristo gipaila isip “ulo sa kongregasyon,” nga kaniya ang usa “nagapasakop.” Nasabtan sa mga Saksi ni Jehova nga ang matinumanon ug maalamong ulipon gilangkoban sa espirituwal nga mga igsoon ni Jesus. (Hebreohanon 2:10-13) Kining matinumanong ulipon nga matang gitudlo aron matagan-an ang katawhan sa Diyos ug espirituwal nga “pagkaon sa hustong panahon.” Niining panahon sa kataposan, si Kristo nagtudlo niining ulipona “ibabaw sa tanan niyang katigayonan.” Busa ang katungdanan niini angay sa pagtahod ni bisan kinsang nag-angkong Kristohanon.
10 Ang katuyoan sa pagkaulo mao ang pagtipig sa panaghiusa ug pagtino nga “ipahinabo ang tanang butang nga may kahapsay ug pinaagig kahikayan.” (1 Corinto 14:40) Aron makab-ot kini sa unang siglo, ang ubay-ubayng dinihogang mga Kristohanon gikan sa matinumanon ug maalamong ulipon nga matang gipili sa paghawas sa tibuok nga grupo. Sumala sa gipamatud-an sa sunod nga mga panghitabo, ang pagdumala nga gihimo niining unang-siglong nagamandong lawas nakabaton sa pag-uyon ug panalangin ni Jehova. Ang unang-siglong mga Kristohanon malipayong nagdawat sa kahikayan. Oo, ila gayong gidawat ug gipasalamatan ang maayong mga resulta nga gipatungha niini.—Buhat 15:1-32.
11. Sa unsang paagi pagaisipon ang Nagamandong Lawas karon?
11 Ang bili nianang kahikayana naglungtad gihapon. Sa pagkakaron, ang Nagamandong Lawas sa mga Saksi ni Jehova gilangkoban ug napulo ka dinihogang mga Kristohanon, nga ang tanan adunay mga dekadang kasinatian sa pagka-Kristohanon. Sila nagahatag ug espirituwal nga direksiyon ngadto sa mga Saksi ni Jehova, sama sa gibuhat sa unang-siglong nagamandong lawas. (Buhat 16:4) Sama sa unang mga Kristohanon, ang mga Saksi malipayong nagsalig sa hamtong nga mga igsoon sa Nagamandong Lawas alang sa binase-sa-Bibliya nga pagtultol ug giya kon bahin sa pagsimba. Bisan pag ang mga membro sa Nagamandong Lawas maoy mga ulipon ni Jehova ug ni Kristo, sama ra sa ilang isigka-Kristohanon, ang Bibliya nagpahimangno kanato: “Magmasinugtanon kamo kanilang nagapanguna taliwala kaninyo ug magmapinasakopon, kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.”—Hebreohanon 13:17.
12. Kang kinsa ang matag usa ka Kristohanon magahatag ug husay?
12 Ang katungdanan ba sa pagdumala nga gihatag sa Kasulatan ngadto sa Nagamandong Lawas nagpasabot nga ang matag usa sa mga Saksi ni Jehova kinahanglang mohatag niining husay sa iyang mga binuhatan? Dili sumala sa mga pulong ni Pablo ngadto sa mga Kristohanon sa Roma: “Nganong ikaw nagahukom sa imong igsoon? O nganong imong ginapakaubos usab ang imong igsoon? Kay kitang tanan magabarog atubangan sa lingkoranan-sa-paghukom sa Diyos . . . Ang matag usa kanato manubag alang sa iyang kaugalingon ngadto sa Diyos.”—Roma 14:10-12.
13. Nganong ang mga Saksi ni Jehova nagtaho sa ilang kalihokan sa pagsangyaw?
13 Apan, dili ba tinuod nga ang tagsatagsa ka Saksi gidahom nga motaho sa ilang kalihokan sa pagsangyaw? Oo, apan ang katuyoan niini tin-awng gisaysay diha sa usa ka basahon sa Saksi, nga nag-ingon: “Ang unang mga sumusunod ni Jesu-Kristo naikag sa mga taho sa kauswagan sa buluhatong pagsangyaw. (Marcos 6:30) Samtang nagmauswagon ang buluhaton, ang mga taho bahin sa estadistika gitigom uban sa mga asoy bahin sa talagsaong mga kasinatian niadtong nakig-ambit sa pagsangyaw sa maayong balita. . . . (Buhat 2:5-11, 41, 47; 6:7; 1:15; 4:4) . . . Pagkamakapadasig niadtong matinumanong Kristohanong mga magbubuhat sa pagkabatig mga taho bahin sa kon unsay nahimo! . . . Sa samang paagi, ang modernong-adlawng organisasyon ni Jehova naningkamot sa pagtipig ug tukmang mga rekord sa buluhaton nga ginahimo ingong katumanan sa Mateo 24:14.”
14, 15. (a) Sa unsang paagi ang 2 Corinto 1:24 mapadapat nganha sa Nagamandong Lawas? (b) Sa unsang pasukaranan nga kinahanglang himoon sa indibiduwal nga mga Kristohanon ang personal nga mga desisyon, sa pag-ila sa unsang kamatuoran?
14 Ang Nagamandong Lawas maoy mahigugmaong tagana ug panig-ingnan sa pagtuo nga angayng sundogon. (Filipos 3:17; Hebreohanon 13:7) Pinaagi sa ilang pagtapot ug pagsunod kang Kristo isip sulondan, sila makapahayag sa mga pulong ni Pablo: “Dili nga kami mao ang mga agalon sa inyong pagtuo, kundili kami mga isigkamagbubuhat alang sa inyong kangaya, kay maoy pinaagi sa inyong pagtuo nga kamo nagabarog.” (2 Corinto 1:24) Pinaagi sa pagpaniid sa mga uso, ang Nagamandong Lawas nagpaila sa mga benepisyo nga mamati sa tambag sa Bibliya, nagahatag ug mga sugyot bahin sa pagpadapat sa mga balaod ug mga prinsipyo sa Bibliya, nagpasidaan bahin sa natagong mga kapeligrohan, ug nagtaganag gikinahanglang pagpalig-on sa “isigkamagbubuhat.” Sa ingon kini nagatuman sa Kristohanong pagkapiniyalan niini, nagatabang nila sa paghupot nga padayon sa ilang kangaya, ug nagapalig-on kanila diha sa pagtuo aron sila makabarog nga malig-on.—1 Corinto 4:1, 2; Tito 1:7-9.
15 Kon ang usa ka Saksi mohimog mga desisyon nga gipasukad sa tambag sa Bibliya nga gitanyag sa Nagamandong Lawas, kana iyang gihimo nga kinabubut-on tungod kay ang iyang kaugalingong pagtuon sa Bibliya nakapatuo kaniya nga kini ang angayng buhaton. Ang kada Saksi maimpluwensiyahan sa mismong Pulong sa Diyos nga ipadapat ang maayong Kasulatanhong tambag nga gitanyag sa Nagamandong Lawas, nga bug-os nag-ila nga ang mga desisyon nga iyang himoon mag-apektar sa iyang personal nga relasyon uban sa Diyos, nga kaniya siya napahinungod.—1 Tesalonica 2:13.
Mga Estudyante ug mga Sundalo
16. Bisan tuod ang mga desisyon mahitungod sa panggawi maoy personal nga butang, nganong ang pipila napalagpot?
16 Apan kon ang mga desisyon bahin sa panggawi maoy personal nga butang, nganong ang pipila sa mga Saksi ni Jehova napalagpot? Walay usa ang mabuotbuotong magtino nga ang pagbuhat sa usa ka partikular nga sala nagkinahanglag pagpalagpot. Hinunoa, kining maong aksiyon sa Kasulatanhon giobligar lamang sa dihang ang usa ka membro sa kongregasyon sa pagkadili-mahinulsolon magabuhat sa dagkong mga sala, sama nianang gibatbat sa ikalimang kapitulo sa Unang Corinto. Busa, bisan tuod ang usa ka Kristohanon tingali mapalagpot tungod sa pagbatasan sa pakighilawas, kini mahitabo lamang kon ang indibiduwal modumili sa pagdawat sa espirituwal nga tabang sa mahigugmaong mga magbalantay. Ang mga Saksi ni Jehova dili kay mao lang ang nagahimo niining Kristohanong batasan. Ang The Encyclopedia of Religion nag-ingon: “Ang bisan unsang komunidad moangkon sa katungod nga panalipdan ang kaugalingon batok sa dili-mopahiuyong mga membro nga basin makadaot sa kaayohan sa kadaghanan. Sa usa ka relihiyosong kahimtang kining katungora subsob gipalig-on sa pagtuo nga ang silot [nga pag-ekskomunikar] moapektar sa baroganan sa usa sa atubangan sa Diyos.”
17, 18. Sa unsang paagi ang pagkaangay sa pagpalagpot ikailustrar?
17 Ang mga Saksi ni Jehova maoy mga estudyante sa Bibliya. (Josue 1:8; Salmo 1:2; Buhat 17:11) Ang programa sa edukasyon sa Bibliya nga gitagana sa Nagamandong Lawas ikatandi sa usa ka kurikulum sa eskuylahan nga gilaraw sa hunta sa edukasyon. Bisan pag ang hunta mismo dili mao ang tinubdan sa materyal nga gitudlo, kini maoy maghikay sa kurikulum, magtino sa paagi sa instruksiyon, ug magluwat sa gikinahanglang mga lagda. Kon adunay dayag nga modumili sa pagtuman sa mga kinahanglanon sa institusyon, magmugnag mga suliran alang sa isigkaestudyante, o magpakaulaw sa eskuylahan, siya ikapalagpot. Ang mga awtoridad sa tunghaan adunay katungod sa paglihok alang sa kaayohan sa mga estudyante sa katibuk-an.
18 Gawas pa sa pagkaestudyante, ang mga Saksi ni Jehova maoy mga sundalo ni Jesu-Kristo, nga gisugo nga “bugnoa ang maayong bugno sa pagtuo.” (1 Timoteo 6:12; 2 Timoteo 2:3) Natural, ang padayong panggawi nga dili angay sa Kristohanong sundalo mahimong makapahinabog dili pag-uyon sa Diyos. Ingong usa ka indibiduwal nga gihatagan ug kagawasan sa pagpili, ang Kristohanong sundalo makahukom sumala sa iyang gusto, apan kinahanglang pas-anon niya ang mga sangpotanan sa iyang desisyon. Si Pablo nangatarongan: “Walay tawo nga nagserbisyo ingong sundalo nga magpalambigit sa iyang kaugalingon sa mga kalihokang pamatigayon sa kinabuhi, aron nga mabatonan niya ang pag-uyon sa usa nga nagtala kaniya ingon nga sundalo. Dugang pa, kon ang usa makigsangka bisan diha sa mga dula, dili siya purongpurongan gawas kon siya nakapakigsangka subay sa mga lagda.” (2 Timoteo 2:4, 5) Ang hamtong nga mga Kristohanon, lakip ang mga sakop sa Nagamandong Lawas, nagpabilin sa bug-os nga pag-alagad sa ilang Pangulo, si Jesu-Kristo, nga nagasunod sa “mga lagda” aron ilang maangkon ang ganting kinabuhing walay kataposan.—Juan 17:3; Pinadayag 2:10.
19. Kay nakasusi sa mga kamatuoran bahin sa Kristohanong pagpahinungod, sa unsa kita makapaneguro?
19 Dili ba ang mga kamatuoran nagpatin-aw nga ang mga Saksi ni Jehova maoy mga alagad sa Diyos, dili mga ulipon sa mga tawo? Isip napahinungod nga mga Kristohanon nga nagpahimulos sa kagawasan nga alang niana gipagawas sila ni Kristo, ilang gitugotan nga ang espiritu sa Diyos ug iyang Pulong maoy magamando sa ilang mga kinabuhi samtang sila nag-alagad nga nahiusa uban sa ilang mga igsoon diha sa kongregasyon sa Diyos. (Salmo 133:1) Ang mga ebidensiya niini angayng magpala usab sa bisan unsang kadili-piho bahin sa tinubdan sa ilang kusog. Duyog sa salmista, sila makaawit: “Si Jehova mao ang akong kusog ug ang akong taming. Diha kaniya ang akong kasingkasing misalig, ug ako natabangan, mao nga ang akong kasingkasing naglipay, ug pinaagi sa akong awit ako siyang pagadayegon.”—Salmo 28:7.
[Mga footnote]
a Gipatik sa 1993 sa Watchtower Bible and Tract Society of New York, Inc.
Unsaon Nimo Pagtubag?
◻ Sa unsang paagi ang Watch Tower Society ug susamang legal nga mga ahensiya nagatabang sa mga Saksi ni Jehova?
◻ Sa unsang paagi ang mga Kristohanon makabatog kaayohan gikan sa papel sa Nagamandong Lawas sa mga Saksi ni Jehova?
◻ Nganong ang katawhan ni Jehova nagataho sa ilang kalihokan sa pagsangyaw?
◻ Ubos sa unsang mga kahimtang ang pagpalagpot sa usa ka napahinungod nga Kristohanon nahiangay?
[Hulagway sa panid 19]
Ang unang-siglong nagamandong lawas nagtipig sa panaghiusa kon bahin sa doktrina
[Hulagway sa panid 23]
Sa tibuok kalibotan, ang mga Saksi ni Jehova nagpahimulos sa kagawasan nga niana gipagawas sila ni Kristo