Maghatag Kadayeganan ang Maayong Panggawi

ANG mantalaang La Gazzetta del Mezzogiorno sa Italya midayeg sa mga Saksi ni Jehova sa pagpatik sa artikulong “Matera​—Siyudad sa Talagsaong Puloy-anang mga Langob.” Kini nga artikulo migawas sa Hulyo 8, 1997, nga isyu sa magasing Pagmata!, nga adunay halapad nga sirkulasyon diha sa daghang pinulongan. Ang Pagmata! sa pagkakaron gihubad ngadto sa 81 ka pinulongan ug adunay sirkulasyon nga kapin sa 19 ka milyong kopya sa tibuok kalibotan. Ang mantalaan nagkomento nga ang Pagmata! mao ang nanghawod sa ting-init “mahitungod sa paghatag ug publisidad aron ipasiugda ang makasaysayanhon ug artistikanhong kabilin sa siyudad [sa Matera].”

Ang mantalaan midayeg sa mga Saksi may kalabotan sa “Pagtuo sa Pulong sa Diyos” Distritong Kombensiyon nga gihimo sa Matera sa 1997. Ang artikulo nag-ingon nga nahimo sa mga Saksi nga “matigom ang 4,000 ka tawo ngadto sa XXI Settembre Stadium [sa siyudad] sa tungatunga sa ting-init ug ilalom sa makapagbang adlaw; ilang giatiman ang pagpanghinlo, pagpintura pag-usab, ug paninugdang pagpauswag niini nga sentro sa esports (partikular ang mga pasilidad sa kasilyas) nga bug-os walay bayad, sila mismo ang nag-abaga sa gasto sa pagpalit sa gikinahanglang materyales.”

Ang mga Saksi ni Jehova nanlimbasog nga mahimong maayong mga silingan. (Mateo 22:​37-39) Sila usab mosunod sa Kasulatanhong tambag: “Padayong-hupti ang inyong panggawi nga maayo taliwala sa mga nasod, aron nga . . . sila ingong resulta sa inyong maayong mga buhat nga niini sila mga saksing-nakakita magahimaya sa Diyos sa adlaw sa iyang pagsusi.”​—1 Pedro 2:12.