Usa ka Dili-Hikalimtang Hitabo sa Pransiya

“DILI KAMI BUOT SA LUGAR NGA JEHOVA!” nag-ingon ang mga poster nga gipasundayag palibot sa lungsod. “Maghiusa Kita Batok sa Proyekto sa Jehova” miawhag ang usa ka grupo sa mga magsusupak. Literal nga gatosan ka artikulo diha sa pamantalaan ang nagpaalinggat sa publiko sa maong isyu. Ang mga petisyon gipirmahan, ug ang kapin sa tunga sa milyong tract nga naghisgot sa proyekto mibaha sa lokal nga mga buson. Unsa man kining proyektoha nga nakapatugaw sa malinawong lungsod sa Louviers, sa amihanan-kasadpang Pransiya? Ang giplanong konstruksiyon sa usa ka bag-ong sangang buhatan ug puy-anan sa mga Saksi ni Jehova.

Si Jehova ang Nagpalambo Niana

Ang kalihokan sa mga Saksi ni Jehova sa Pransiya nagsugod balik niadtong kataposan sa ika-19ng siglo. Ang unang pondohanan sa literatura sa Bibliya giablihan niadtong 1905 sa Beauvène, habagatang Pransiya, ug pagka-1919, usa ka gamayng buhatan ang naglihok sa Paris. Usa ka sangang buhatan ang opisyal nga giablihan sa siyudad sa 1930, ug pagkasunod tuig ang kawani sa buhatan mipuyo sa usa ka puy-anang Bethel nga nahimutang sa Enghien-les-Bains, amihanan sa Paris. Human sa Gubat Kalibotan II, ang pamilyang Bethel mibalhin sa Paris, ug sa 1959 ang sangang buhatan gibalhin ngadto sa lima-ka-andanang tinukod sa Boulogne-​Billancourt, sa kasadpang utlanan sa kaulohan.

Tungod sa pag-uswag sa pagsangyaw sa Gingharian nga buluhaton, sa 1973 ang imprentahan ug ang mga pasilidad sa shipping gibalhin sa Louviers, 100 ka kilometros kasadpan sa Paris, samtang ang mga opisina nagpabilin sa Boulogne-​Billancourt. Hinunoa, tungod sa pag-uswag sa gidaghanon sa mga magmamantala sa Pransiya dili na paigo ang mga pasilidad sa Louviers, bisan pa sa gihimong mga ekstensiyon sa 1978 ug 1985. Busa nadesisyonan nga padak-an ug usahon ang tibuok pamilyang Bethel sa usa ka dapit. Kini nga proyekto wala magustohi sa tanan, ingon sa gihisgotan sa sinugdan. Bisan pa sa maong pagsupak, usa ka luna ang nakaplagan nga usa ka kilometro ug tunga lang gikan sa imprentahanan. Unom ka tuig sa hagong trabaho ang misunod, ug sa kataposan, human sa 23 ka tuig nga panagbulag ug dapit, ang tibuok pamilyang Bethel nahiusa sa Louviers sa Agosto 1996.

Busa maoy uban sa dakong kangaya nga ang malipayong panon sa 1,187, nga nag-apil sa 300 ka membro sa pamilyang Bethel sa Pransiya, ug 329 ka delegado gikan sa 42 ka ubang mga sanga, nagtigom sa Sabado, Nobyembre 15, 1997, sa pagpatalinghog sa pagpahinungod nga pakigpulong nga gihatag ni Igsoong Lloyd Barry, membro sa Nagamandong Lawas. Hinunoa, bisan pa sa kamatuoran nga kining maong pagpahinungod gipahigayon sa panahon nga adunay pagsupak ug dugay, mapanamastamasong kampanya sa media batok sa mga Saksi ni Jehova sa tibuok Pransiya, gibati nga ang tanang Saksi sa Pransiya kinahanglang makigbahin sa pagsaulog niining maong kadaogan. Ingong resulta, sa Dominggo, Nobyembre 16, usa ka espesyal nga tigom nga may temang “Pabilin Diha sa Gugma ni Kristo” ang giorganisar sa Villepinte Exhibition Center, amihanan lang sa Pransiya. Ang tanang Saksi ni Jehova sa Pransiya kauban sa nagsultig-Pranses nga mga Saksi sa Belgium ug Switzerland gidapit, maingon man usab ang mga kongregasyon sa Britanya, Alemanya, Luxembourg, ug sa Netherlands.

Usa ka Halandomong Panagkatigom

Ang mga pagpangandam alang sa panagkatigom gisugdan unom ka bulan nga abante. Dayon, duha na lang ka semana sa dili pa ang pagpahinungod, ang mga drayber sa trak sa Pransiya nagwelga, nag-ali sa pangunang mga dalan ug sa mga suplay sa pangtubil. Ang mga lingkoranan ug ubang kagamitan ikahatod kaha sa hustong panahon? Ang mga babag kaha sa dalan magpugong sa mga igsoon sa pag-abot? Sa kalipay sa tanan, sulod sa usa ka semana ang welga natapos, ug ang mga dalan maagian na usab. Sa Biyernes sa gabii antes ang hinapos sa semana sa pagpahinungod, 38 ka trak ang naghatod ug 84,000 ka lingkoranan ngadto sa duha ka haluag nga mga lawak nga giabangan alang sa okasyon. Kapin sa 800 ka igsoong lalaki ug babaye ang nagtrabaho sa tibuok gabii hangtod sa alas nuybe imedya sa Sabado sa buntag sa pag-instalar sa mga lingkoranan, plataporma, kahimanan sa sound, ug unom ka higanteng mga video screen.

Sa alas 6:​00 s.b. sa Dominggo, ang mga pultahan giablihan, ug ang mga tawo misugod sa pagpanulod. Ang total nga 17 ka espesyal nga giabangang mga tren nagdala sa kapin sa 13,000 ka Saksi ngadto sa kaulohan. Kapin sa duha ka gatos ka lokal nga mga igsoong lalaki ug babaye ang diha sa mga estasyon sa tren sa pag-abiabi sa mga biyahedor ug sa pagkuyog kanila nga ginurupo ngadto sa dapit sa kombensiyon. Usa ka igsoong babaye miingon nga kining mahigugmaong kahikayan naghatag kanila ug “usa ka pagbati sa kasegurohan ug kalipay.”

Ang uban miadto sa Paris pinaagig ayroplano o pinaagig kotse. Ang kadaghanan, hinunoa, miabot sakay sa 953 ka bus, samtang ang mga Saksi gikan sa Paris migamit sa publikong transportasyon sa pagbiyahe padulong sa Exhibition Center. Daghan ang nagbiyahe sa tibuok gabii o migikan sa ilang balay sa sayo kaayong kabuntagon, apan dayag ang ilang kahinam sa pagtambong niining tigoma. Madasigong pag-abiabi ug mainitong mga halog ang nagtimaan sa paghiusa pag-usab sa mga higala nga sa katuigan wala na magkita. Ang mabulokong nasodnong mga sinina naghatag sa mangayaong panon ug timaan sa pagkainternasyonal. Walay duhaduha, usa ka butang talagsaon ang nagakamulo.

Sa panahong gisugdan ang programa, sa alas 10:​00 s.b., wala nay lingkoranang bakante, apan gatosan pa ka tawo ang nangabot matag minuto. Bisag asa ka motan-aw, imong makita ang daghang mapahiyomong mga nawong. Linibo ang nagpabiling nanagbarog o nanglingkod sa sementadong salog. Sa pagpasundayag sa espiritu sa tema sa asembliya, daghang batan-on sa pagkamahigugmaon nanindog aron makalingkod ang mga tigulang. “Pagkamalipayon namo nga ihatag ang among mga lingkoranan ngadto sa mga igsoong lalaki ug babaye nga dili namo kaila, apan among gimahal pag-ayo!” misulat ang usa ka magtiayon. Daghan ang nagpasundayag ug maayong nagasakripisyo-sa-kaugalingong tinamdan: “Nagtindog kami sa tibuok adlaw duol sa mga lingkoranan nga gitabangan namog pahimutang sa tibuok nga gabii sa Biyernes. Apan ang pagkapresente lamang nagpatugob kanamo sa pagpasalamat kang Jehova.”

Luyo sa kakapoy ug pagkadili-haruhay, ang mga delegado naminaw pag-ayo sa mga taho gikan sa ubang mga nasod ug sa mga pakigpulong ni Lloyd Barry ug Daniel Sydlik, kinsa usa usab ka membro sa Nagamandong Lawas. Gisaysay ni Igsoong Barry ang ulohang “Si Jehova Magpadagaya sa Bug-os nga Gahom,” ug gidetalye niya pagpasiugda kon sa unsang paagi si Jehova nagpanalangin sa iyang katawhan ug pag-uswag bisan pa sa nagkalainlaing mga pagsulay. Ang pakigpulong ni Igsoong Sydlik nag-ulohang “Malipayon ang Katawhan Kansang Diyos Mao si Jehova!” Ang duha ka pakigpulong ilabinang tukma sa panahon tungod sa pagsupak nga kasamtangang giatubang sa mga Saksi ni Jehova sa Pransiya. Gipakita ni Igsoong Sydlik nga ang tinuod nga kalipay wala magdepende sa panggawas nga mga hinungdan kondili sa atong relasyon kang Jehova ug sa atong tinamdan sa kinabuhi. Ang iyang pangutana sa mga mamiminaw nga, “Kamo ba malipayon?” gitubag sa makabungog nga palakpak.

Usa ka igsoong babaye kinsa “nawad-ag kangaya” misulat human niadto: “Dihadiha akong naamgohan nga ang kalipay mahimo kong mabatonan. Gitumong nako ang akong mga paningkamot sa sayop nga dalan, ug pinaagi niini nga pakigpulong, gipakita ni Jehova kanako kon unsaon nako sa pagbag-o.” Laing igsoong lalaki mipahayag: “Karon buot kong makigbisog aron lipayon ang kasingkasing ni Jehova. Dili ko buot nga tugotan ang bisan unsa sa pagkuha sa kalipay nga gibati na nako sa kahiladman.”

Samtang ang tigom hapit nang matapos, uban sa dakong kadasig nga ang tsirman nagpahibalo sa mitambong: 95,888​—ang kinadak-ang panagkatigom sukad sa mga Saksi ni Jehova sa Pransiya!

Human sa panapos nga awit, nga giawit sa daghan uban ang mga luha sa kalipay sa ilang mga mata, ug sa panapos nga pag-ampo, ang mga igsoon misugod pagbiyahe balik sa ilang pinuy-anan uban ang nagsagol nga mga pagbati. Ang mainit, mahigalaong palibot sa panagkatigom dayag kaayo. Daghang positibong komento bahin sa tinamdan sa mga delegado ang gisulti sa mga drayber sa bus. Sila usab nakadayeg sa pagkaorganisado nga nagpaarang sa tanang 953 ka bus sa pagbiya sa Exhibition Center sulod sa duha ka oras nga wala maghuot ang trapiko! Ang panggawi sa mga delegado gidayeg pag-ayo sa mga empleyado sa tren ug publikong sakyanan. Daghang maayong panaghisgot ang misangpot, ug gihatag ang maayong pagpamatuod.

“Usa ka Lunhawng Dapit sa Desyerto”

Nag-awhag si apostol Pablo sa kaubang mga Kristohanon: “Tagdon nato ang usag usa aron sa pagpasibot sa paghigugma ug sa maayong mga buhat, . . . nga magdinasigay sa usag usa, ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:​24, 25) Tino, kining espesyal nga tigom maoy tuboran sa dakong pagdasig sa tanan, “usa ka lunhawng dapit sa desyerto” ingon sa paghubit sa usa ka igsoong babaye. “Mibiya kami nga nalagsik, nadasig, napalig-on, ug mas determinado kay sukad masukad sa pagmaya diha sa pag-alagad kang Jehova,” misulat ang mga igsoon gikan sa sangang buhatan sa Togo. “Kadtong nasubo mipauli sa balay nga malipayon,” miingon ang usa ka magtatan-aw sa sirkito. “Ang mga igsoon napalihok ug napalig-on,” miingon ang lain. “Wala pa kami mobati sukad nga suod kaayo sa organisasyon ni Jehova,” usa ka magtiayon naaghat sa pagsulat.

“Ang akong tiil nagatindog sa dapit nga patag; sa nagkatigom nga mga panon magadayeg ako kang Jehova,” nagsulti ang salmista. (Salmo 26:12) Ang maong Kristohanong mga panagkatigom nagpaarang sa tanan sa pagbaton pag-usab ug espirituwal nga kalig-on atubangan sa mga babag. “Bisan unsa pay mga kasakitan,” nag-ingon ang usa ka igsoong babaye, “kining talagsaong mga panahon dulot nga nasilsil sa among mga kasingkasing ug kanunayng anaa sa paghupay kanamo.” Sa susama, ang nagapanawng magtatan-aw misulat: “Sa dihang ang lisod nga mga panahon motungha, ang paghinumdom niining pasiuna sa Paraiso motabang kanamo sa pagsagubang niini.”

“Ipahinungod kang Jehova, Oh kamong kabanayan sa katawhan, ipahinungod ngadto kang Jehova ang himaya ug kusog,” nag-awhag ang Salmo 96:7. Sa walay duhaduha, ang pagpahinungod sa bag-ong mga pasilidad sa sangang buhatan sa Pransiya maoy malanog nga kadaogan alang kang Jehova. Siya lamang ang makahatag ug kalamposan sa proyekto atubangan sa maong determinado ug kaylap nga pagsupak. Ang mga Saksi ni Jehova sa Pransiya mas determinado kay sukad masukad sa ‘pagpabilin diha sa gugma ni Kristo’ ug sa ‘pagpalamdag sa ilang kahayag.’ (Juan 15:​9; Mateo 5:16) Ang tanang mitambong sa programa sa pagpahinungod bug-os nga nakigbahin sa pagbati sa salmista: “Gikan kang Jehova kini nahitabo; kini kahibulongan sa atong mga mata.”​—Salmo 118:23.

[Hulagway sa panid 26]

Lloyd Barry

[Hulagway sa panid 26]

Daniel Sydlik

[Hulagway sa panid 26]

95,888 ang mitambong sa espesyal nga programa sa Villepinte Exhibition Center

[Mga hulagway sa panid 28]

Linibo sa mga mamiminaw ang nanagtindog o kaha nanglingkod sa salog aron maminaw