Sa Unsang Paagi Mapanalipdan Nimo ang Imong mga Anak?

HUMAN magtungha sa usa ka eskuylahan sa ilang dapit sulod sa katuigan, gipadayon ni Wernera ang dugang nga pagtuon duyog sa mga 3,000 ka ubang mga batan-on sa São Paulo, Brazil. Sa unang higayon, iyang naobserbahan ang kaubang mga estudyante nga namaligya ug naggamit ug mga droga. Sanglit mubo siya, wala madugay nahimo siyang biktima sa makauulaw ug peligrosong mga rituwal sa pagsubo gikan sa ubang gulanggulang nga mga estudyante.

Ang manghod ni Werner nga si Eva naproblema usab. Buot nga mohimo sa iyang kinamaayohan, nagtuon siya pag-ayo nga nasinati niya ang pisikal ug emosyonal nga kalapoy ug kalibog sa hunahuna. Sama sa ubang mga batan-on, si Werner ug Eva nagkinahanglag pisikal ug emosyonal nga panalipod. Unsang matanga sa tabang ang gikinahanglan sa imong mga anak? Sa unsang paagi maandam nimo sila alang sa hamtong nga kinabuhi? Sa pagkatinuod, unsay kaugmaon nga buot nimo alang sa imong mga anak?

Nagkinahanglan Sila ug Labaw pa kay sa Sustento

Hunahunaa sa makadiyot ang hagit nga giatubang sa mga ginikanan sa pagpanalipod sa ilang kabataan karong adlawa. Tungod sa pag-us-os sa kalidad sa kinabuhi sa pamilya ug pag-uswag sa kakabos, sa daghang nasod ang gidaghanon sa kabataan nga nagpuyo diha sa kadalanan nagausbaw. Ang pagpatrabaho sa bata maoy resulta sa kapakyasan sa pagpanalipod sa kabataan gikan sa pagpahimulos. Ang pag-abuso sa droga usab nagdaot sa daghang bata. Pananglitan, sa dihang ang usa ka Brazilianong tin-edyer nahimong giyanon sa droga, nahanaw ang kalinaw sa iyang panimalay. Gawas pa sa emosyonal nga kadaot nga naagoman sa iyang mga ginikanan, dihay pakigbisog sa paggasto aron siya maulian, ug ang way-kaluoy nga mga tigbaligyag narkotiko miadto sa ilang balay sa pagpangayog bayad.

Apan, bisan pa sa mga kapit-os sa kinabuhi daghang ginikanan ang nagpadayon sa pagpakigbisog sa pagtagana sa ilang mga anak dili lamang sa pagkaon, sapot, ug puy-anan kondili usab sa panalipod gikan sa kapintasan, pag-abuso sa droga, ug ubang mga suliran. Kini maoy hamiling paningkamot, apan igo na ba kini? Komosta ang panalipod gikan sa emosyonal ug espirituwal nga kadaot? Daghan ang nakaamgo nga ang malamposong pagkaginikanan naglakip sa pagsagubang sa mga suliran nga naglangkit sa pagpili sa kabataan sa ilang mga higala ug lulinghayaw. Bisan pa niana, sa unsang paagi ang mga ginikanan makalikay nga mahimong sobra ka mapanalipdanon o sobra ka matugoton? Gidapit ka sa pagkonsiderar sa mga tubag nga makaplagan sa sunod nga artikulo.

[Mga footnote]