Gipetsahan Pag-usab sa Eskolar ang Manuskrito sa Bibliya

Sumala kang Carsten Peter Thiede, usa ka Aleman nga eksperto sa pagtuon sa papiro, adunay lig-ong ebidensiya nga ang tulo ka tipik nga papiro sa Ebanghelyo ni Mateo (nailhan ingong ang Papirong Magdalen) gisulat sa unang siglo.

Human itandi ang mga tipik (nga naundan ug mga bahin sa Mateo kapitulo 26) uban sa usa ka karaang sulat sa negosyo nga nakaplagan sa Ehipto, namatikdan ni Thiede nga ang Ehiptohanong dokumento kaamgid sa “Papirong Magdalen nga halos pareho gayod—sa kinatibuk-ang panagway ug sa porma ug pagkasulat sa tagsatagsa ka titik.” Si Thiede ug ang kaubang awtor nga si Matthew D’Ancona mihinapos diha sa ilang librong Eyewitness to Jesus​—Amazing New Manuscript Evidence About the Origin of the Gospels nga ang kaamgiran tali sa duha ka dokumento nagpaila nga kini gisulat sa halos samang panahon. Kanus-a? Ang dokumento sa negosyo gipetsahan “‘Sa tuig 12 ni Nero nga Ginoo, Epeiph 30’—nga, sumala sa atong kalendaryo, maoy Hulyo 24, 66 [K.P.].”

“Kini nga pagpetsa, kon tukma, hinungdanon kaayo,” matod ni Propesor Philip W. Comfort, diha sa usa ka artikulong gipatik sa Tyndale Bulletin, “tungod kay nagbutang kini sa usa ka manuskrito sa Ebanghelyo ni Mateo sulod sa samang siglo nga kini gisulat.” Maghimo usab kini sa Papirong Magdalen nga labing karaang mga tipik sa Ebanghelyo nga naglungtad.

[Hulagway sa panid 29]

The Magdalen Papyrus, gipakita sa aktuwal nga gidak-on

[Credit Line]

Sa pagtugot sa President and Fellows of Magdalen College, Oxford