Duna Ka bay Pagtuo nga Sama sa Kang Abraham?
“Sa dihang ang Anak sa tawo moabot, makaplagan ba gayod niya ang pagtuo dinhi sa yuta?”—LUCAS 18:8.
1. Nganong lisod nga huptang lig-on ang pagtuo sa usa karon?
DILI sayon ang paghupot nga lig-on sa pagtuo sa usa karon. Ang kalibotan nagpit-os sa hilabihan sa mga Kristohanon aron malinga ang ilang pagtagad gikan sa espirituwal nga mga butang. (Lucas 21:34; 1 Juan 2:15, 16) Daghan ang kinahanglang makigbisog aron makasagubang sa mga gubat, mga katalagman, mga sakit, o gutom. (Lucas 21:10, 11) Sa ubay-ubayng nasod, dunay lig-ong sekular nga kultura, ug si bisan kinsa nga magkinabuhi sumala sa ilang pagtuo giisip nga dili-makataronganon, panatiko pa gani. Dugang pa, daghang Kristohanon ang gilutos tungod sa ilang pagtuo. (Mateo 24:9) Ang pangutana ni Jesus, nga gipatungha duolan sa 2,000 ka tuig kanhi, haom gayod: “Sa dihang ang Anak sa tawo moabot, makaplagan ba gayod niya ang pagtuo dinhi sa yuta?”—Lucas 18:8.
2. (a) Nganong ang lig-on nga pagtuo hinungdanon alang sa usa ka Kristohanon? (b) Kang kansang panig-ingnan sa pagtuo ang maayong konsiderahon nato?
2 Apan, ang kamatuoran mao nga ang lig-on nga pagtuo hinungdanon aron kita molampos sa kinabuhi karon ug makadawat sa gisaad nga walay-kataposang kinabuhi sa umaabot. Nagkutlo sa mga pulong ni Jehova kang Habacuc, si apostol Pablo misulat: “‘Ang akong usa nga matarong mabuhi tungod sa pagtuo,’ ug, ‘kon siya mosibog, ang akong kalag walay kahimuot kaniya.’ . . . Kon walay pagtuo imposible sa pagpahimuot [sa Diyos] pag-ayo.” (Hebreohanon 10:38–11:6; Habacuc 2:4) Giingnan ni Pablo si Timoteo: “Bugnoa ang maayong bugno sa pagtuo, panggunit nga hugot sa kinabuhing walay-kataposan nga alang niini ikaw gitawag.” (1 Timoteo 6:12) Nan, sa unsang paagi posible nga makabaton ug dili-mabungkag nga pagtuo? Sa pagkonsiderar nianang pangutanaha, mapuslanon kon atong tagdon ang usa ka tawo nga nagkinabuhi mga 4,000 ka tuig kanhi, apan kansang pagtuo gitamod gihapon pag-ayo diha sa tulo ka dagkong mga relihiyon—Islam, Hudaismo, ug Kristiyanidad. Kanang tawhana mao si Abraham. Nganong talagsaon kaayo ang iyang pagtuo? Masundog ba nato siya karon?
Pagsugot sa Sugo sa Diyos
3, 4. Nganong gibalhin ni Tera ang iyang pamilya gikan sa Ur ngadto sa Haran?
3 Si Abraham (sa sinugdan gitawag ug Abram) unang gihisgotan nga sayo kaayo diha sa Bibliya. Sa Genesis 11:26, atong mabasa: “Si Tera . . . nanganak kang Abram, Nahor ug Haran.” Si Tera ug ang iyang pamilya nagpuyo sa Ur sa mga Caldeanhon, usa ka mauswagong siyudad sa habagatang Mesopotamia. Apan, wala sila magpabilin didto. “Gikuha ni Tera si Abram nga iyang anak ug si Lot, nga anak ni Haran, iyang apo nga lalaki, ug si Sarai [Sara] nga iyang umagad, nga asawa ni Abram nga iyang anak, ug milakaw sila uban kaniya gikan sa Ur sa mga Caldeanhon aron sa pag-adto sa yuta sa Canaan. Ngadtongadto mingdangat sila sa Haran ug mipuyo didto.” (Genesis 11:31) Gibalhin usab sa igsoong lalaki ni Abraham nga si Nahor ang iyang pamilya sa Haran. (Genesis 24:10, 15; 28:1, 2; 29:4) Apan, nganong si Tera mibalhin gikan sa mauswagong Ur ngadto sa halayong Haran?
4 Mga 2,000 ka tuig human sa panahon ni Abraham, ang matinumanong tawo nga si Esteban, nga nagsulti atubangan sa Hudiyonhong Sanhedrin, nagpatin-aw niining talagsaong pagbalhin sa pamilya ni Tera. Siya miingon: “Ang Diyos sa kahimayaan mipakita sa atong katigulangang si Abraham samtang siya didto sa Mesopotamia, sa wala pa siya magpuyo sa Haran, ug siya miingon kaniya, ‘Gumula ka gikan sa imong yuta ug gikan sa imong mga paryente ug umadto sa yuta nga akong ipakita kanimo.’ Unya siya migula gikan sa yuta sa mga Caldeanhon ug mipuyo sa Haran.” (Buhat 7:2-4) Si Tera nagpasakop sa kabubut-on ni Jehova alang kang Abraham sa dihang gibalhin niya ang iyang suod nga membro sa panimalay ngadto sa Haran.
5. Diin miadto si Abraham human mamatay ang iyang amahan? Ngano?
5 Ang pamilya ni Tera mipuyo diha sa ilang bag-ong siyudad. Katuigan sa ulahi sa dihang naghisgot si Abraham sa “akong nasod,” iyang gipasabot ang dapit sa Haran, dili sa Ur. (Genesis 24:4) Bisan pa niana, ang Haran dili mao ang permanenteng puy-anan ni Abraham. Sumala kang Esteban, “human mamatay ang amahan [ni Abraham], ang Diyos mipabalhin kaniya sa iyang pinuy-anan nganhi niining yutaa nga karon inyong ginapuy-an.” (Buhat 7:4) Misugot sa sugo ni Jehova, si Abraham, nga giubanan ni Lot, mitabok sa Eufrates ngadto sa yuta sa Canaan.a
6. Unsang saad ang gipamulong ni Jehova ngadto kang Abraham?
6 Nganong gipabalhin ni Jehova si Abraham sa Canaan? Ang katarongan may kalabotan sa mga katuyoan sa Diyos alang nianang matinumanong tawo. Miingon si Jehova kang Abraham: “Pahawa gikan sa imong nasod ug gikan sa imong mga paryente ug gikan sa balay sa imong amahan ngadto sa nasod nga akong igapakita kanimo; ug akong pagabuhaton ang usa ka dakong nasod gikan kanimo ug ikaw pagapanalanginan ko ug pagapadakoon ko ang imong ngalan; ug mahimo ikaw nga usa ka panalangin. Ug pagapanalanginan ko ang mga nagapanalangin kanimo, ug siya nga nagapanghimaraot kanimo pagatunglohon ko, ug ang tanang kabanayan sa yuta magapanalangin sa ilang kaugalingon pinaagi kanimo.” (Genesis 12:1-3) Si Abraham mahimong amahan sa usa ka dakong nasod nga makapahimulos sa panalipod ni Jehova ug makapanag-iya sa yuta sa Canaan. Usa ka kahibulongang saad! Apan si Abraham kinahanglang mohimog dagkong mga kausaban sa iyang kinabuhi aron makapanunod nianang yutaa.
7. Unsang mga kausaban ang kinahanglang andam nga buhaton ni Abraham aron makapanunod sa saad ni Jehova?
7 Sa dihang mibiya si Abraham sa Ur, gibiyaan niya ang usa ka mauswagong siyudad ug lagmit ang mga paryente sa iyang amahan—hinungdanong mga tuboran sa kasegurohan niadtong panahon sa mga patriarka. Sa dihang mibiya siya sa Haran, mibulag siya sa panimalay sa iyang amahan, lakip sa pamilya sa iyang igsoong si Nahor, ug mibalhin ngadto sa wala-hiilhing yuta. Sa Canaan wala siya mangitag kahilwas sulod sa mga kuta sa usa ka siyudad. Nganong wala man? Wala madugay human mosulod si Abraham sa yuta, si Jehova miingon kaniya: “Baktasa ang yuta sa iyang gitas-on ug sa iyang gilapdon, tungod kay igahatag ko kini kanimo.” (Genesis 13:17) Ang 75-anyos nga si Abraham ug ang iyang 65-anyos nga asawa, si Sara, misunod niini nga mga instruksiyon. “Tungod sa pagtuo siya mipuyo ingong usa ka langyaw diha sa yuta sa saad nga samag diha sa yutang langyaw, ug mipuyo sa mga tolda.”—Hebreohanon 11:9; Genesis 12:4.
Pagtuo Sama sa Kang Abraham Karon
8. Tungod sa panig-ingnan ni Abraham ug sa ubang karaang mga saksi, unsay angay natong ugmaron?
8 Si Abraham ug ang iyang pamilya ginganlan uban sa dakong “panganod sa [una-Kristohanong] mga saksi” nga gihisgotan sa Hebreohanon kapitulo 11. Tungod sa pagtuo niining unang mga alagad sa Diyos, si Pablo nagdasig sa mga Kristohanon nga ‘tangtangon ang tanang kabug-at ug ang sala [kakulang sa pagtuo] nga daling makalambod kanato.’ (Hebreohanon 12:1) Oo, ang kakulang sa pagtuo “daling makalambod kanato.” Apan sa adlaw ni Pablo ug sa atoa, ang tinuod nga mga Kristohanon nakaugmad ug lig-on nga pagtuo nga ikatandi nianang kang Abraham ug sa uban sa karaang kapanahonan. Naghisgot bahin sa iyang kaugalingon ug sa mga isigka-Kristohanon, si Pablo miingon: “Kita dili ang matang nga nagapanibog ngadto sa kalaglagan, kundili ang matang nga adunay pagtuo ngadto sa pagtipig nga buhi sa kalag.”—Hebreohanon 10:39.
9, 10. Unsay pamatuod nga daghan karon ang dunay pagtuo sama nianang kang Abraham?
9 Tinuod, ang kalibotan nausab na sukad sa panahon ni Abraham. Bisan pa niana, nag-alagad gihapon kita sa samang “Diyos ni Abraham,” ug siya dili mausab. (Buhat 3:13; Malaquias 3:6) Si Jehova takos nga simbahon karon sama sa panahon ni Abraham. (Pinadayag 4:11) Daghan ang nagpahinungod sa ilang kaugalingon nga bug-os ngadto kang Jehova ug, sama kang Abraham, naghimo ug bisan unsang mga kausaban nga gikinahanglan sa ilang kinabuhi aron tumanon ang kabubut-on sa Diyos. Sa miaging tuig, 316,092 ang naghatag ug publikong pamatuod sa ilang pahinungod pinaagi sa pagpabawtismo sa tubig “sa ngalan sa Amahan ug sa Anak ug sa balaang espiritu.”—Mateo 28:19.
10 Kadaghanan niining bag-ong mga Kristohanon dili kinahanglang mobiyahe sa lagyo langyawng mga yuta aron tumanon ang ilang pahinungod. Apan, sa espirituwal nga diwa daghan kanila ang mibiyahe ug layo kaayo. Pananglitan, sa Mauritius, si Elsie kanhing usa ka barangan. Ang tanan nahadlok kaniya. Ang usa ka espesyal payunir naghikay ug pagtuon sa Bibliya uban sa anak ni Elsie, ug kini nagbukas sa dalan alang kang Elsie sa ‘pagliso gikan sa kangitngit ngadto sa kahayag.’ (Buhat 26:18) Tungod sa interes sa iyang anak, si Elsie miuyon sa pagtuon sa Akong Basahon sa mga Estorya sa Bibliya. Ang iyang pagtuon gihimo katulo sa usa ka semana tungod kay nagkinahanglan siya ug kanunayng pagdasig. Ang iyang mga buhat sa okulto wala maghatag kaniyag kalipay, ug daghan siyag personal nga mga suliran. Apan, ngadtongadto, natapos niya ang dugay nga biyahe gikan sa demonismo ngadto sa matuod nga pagsimba. Sa dihang ang mga tawo mangabot sa pagpangita sa iyang serbisyo, iyang isaysay nga si Jehova lamang ang makapanalipod kanila gikan sa daotan. Karon si Elsie maoy usa ka bawtismadong Saksi, ug 14 ka tawo gikan sa iyang pamilya ug mga kaila ang midawat sa kamatuoran.
11. Unsang mga pagpasibo ang andam nga himoon niadtong nagpahinungod sa ilang kaugalingon ngadto kang Jehova?
11 Kadaghanan niadtong kinsa nagpahinungod sa ilang kaugalingon sa miaging tuig aron sa pag-alagad sa Diyos dili na kinahanglang mohimo sa maong dagkong kausaban. Apan ang tanan nausab gikan sa pagkapatay sa espirituwal ngadto sa pagkabuhi sa espirituwal. (Efeso 2:1) Bisan tuod anaa pa sa kalibotan sa pisikal, sila dili na bahin niana. (Juan 17:15, 16) Susama sa dinihogang mga Kristohanon, kansang “pagkalungsoranon nagalungtad sa mga langit,” sila sama sa “mga langyaw ug mga temporaryong pumoluyo.” (Filipos 3:20; 1 Pedro 2:11) Ilang gipahiuyon ang ilang kinabuhi sa mga sukdanan sa Diyos, nga gipalihok labaw sa tanan sa gugma sa Diyos ug gugma sa silingan. (Mateo 22:37-39) Dili sila mangagpas sa mahakogon, materyalistikanhong mga tumong o mobati sa panginahanglan alang sa personal nga katagbawan niining kalibotana. Hinunoa, ilang gitutok ang ilang mga mata sa gisaad nga ‘bag-ong mga langit ug bag-ong yuta diin magapuyo ang pagkamatarong.’—2 Pedro 3:13; 2 Corinto 4:18.
12. Unsang kalihokan nga gitaho sa miaging tuig ang naghatag ug pamatuod nga panahon sa iyang presensiya si Jesus nakakaplag ug “pagtuo dinhi sa yuta”?
12 Sa dihang mibalhin si Abraham sa Canaan, siya ug ang iyang pamilya nag-inusara didto nga si Jehova lamang ang nagpaluyo ug nanalipod kanila. Apan, kining 316,092 ka bag-ong bawtismadong mga Kristohanon wala gayod mag-inusara. Tinuod, si Jehova nagapaluyo ug nanalipod kanila pinaagi sa iyang espiritu, sama sa iyang gihimo kang Abraham. (Proverbio 18:10) Apan, dugang pa, siya nagapaluyo kanila pinaagi sa madasigon, internasyonal nga “nasod” nga mas daghag molupyo kay sa pipila ka sekular nga mga nasod karon. (Isaias 66:8) Sa miaging tuig, ang kinatas-ang ihap nga 5,888,650 ka molupyo sa maong nasod naghatag ug pamatuod sa ilang aktibong pagtuo pinaagi sa pagpakigsulti sa ilang mga silingan mahitungod sa mga saad sa Diyos. (Marcos 13:10) Sila migugol sa talagsaong gidaghanon nga 1,186,666,708 ka oras niining buluhatona, nga nagtinguha sa pagpangitag mga interesado. Ingong resulta, 4,302,852 ka panagtuon sa Bibliya ang gidumala sa uban nga buot mag-ugmad sa pagtuo. Ingong dugang pasundayag sa ilang kasibot, 698,781 niini nga “nasod” ang nakig-ambit sa payunir nga pag-alagad, sa bug-os-panahon o kaha sulod sa usa ka bulan o kapin pa. (Ang mga detalye sa kalihokan sa mga Saksi ni Jehova sa miaging tuig makaplagan sa mga panid 12 hangtod 15.) Kining talagsaong talaan maoy positibo, buhing tubag sa pangutana ni Jesus, “Sa dihang ang Anak sa tawo moabot, makaplagan ba gayod niya ang pagtuo dinhi sa yuta?”
Matinumanon Bisan pa sa mga Pagsulay
13, 14. Batbata ang pipila ka kalisdanan nga nasagubang ni Abraham ug sa iyang pamilya sa Canaan.
13 Ang mga butang kasagarang malisod alang kang Abraham ug sa iyang panimalay sa Canaan. Sa labing menos usa ka okasyon, dihay grabeng kanihit sa pagkaon nga nagpapahawa kaniya gikan sa Canaan ngadto sa Ehipto. Dugang pa, ang magmamando sa Ehipto ug ang magmamando sa Gerar (duol sa Gaza) misulay sa pagkuha sa asawa ni Abraham, si Sara, alang sa ilang kaugalingon. (Genesis 12:10-20; 20:1-18) Dihay panagbangi usab tali sa mga magbalantay sa kahayopan ni Abraham ug sa mga magbalantay sa kahayopan ni Lot, ug kini nagpahinabog panagbulag sa duha ka panimalay. Sa kawalay-kahakog, gipapili ug una ni Abraham si Lot sa yuta, ug si Lot mipili nga mopuyo sa Distrito sa Jordan, nga daw sama sa Eden sa katabunok ug kaanindot niini.—Genesis 13:5-13.
14 Unya, si Lot nalangkit sa usa ka gubat tali sa hari sa halayong Elam ug sa iyang mga alyado ug sa mga hari sa lima ka siyudad sa Ubos nga Patag sa Siddim. Ang langyawng mga hari nagparot sa lokal nga mga hari ug mikuha ug daghang inagaw, lakip kang Lot ug sa iyang mga manggad. Sa dihang nadunggan ni Abraham ang nahitabo, walay-kokahadlok niyang gigukod ang langyawng mga hari ug nakahimo sa pagbawi kang Lot ug sa iyang panimalay, maingon man sa mga manggad sa lokal nga mga hari. (Genesis 14:1-16) Bisan pa niana, dili kadto mao ang kinalisdang kasinatian ni Lot sa Canaan. Tungod sa pipila ka katarongan mipuyo siya sa Sodoma, bisan pa sa imoral nga dungog sa maong siyudad.b (2 Pedro 2:6-8) Sa dihang gipasidan-an sa duha ka manulonda nga ang siyudad laglagon, si Lot mikalagiw uban sa iyang asawa ug mga anak nga babaye. Hinunoa, ang asawa ni Lot wala manumbaling sa espesipikong mga instruksiyon sa mga manulonda ug, ingong resulta, nahilubong sa asin. Napaubos ang kahimtang ni Lot ngadto sa pagkinabuhi sa usa ka yugto sa panahon diha sa usa ka langob sa Zoar uban sa iyang duha ka anak nga babaye. (Genesis 19:1-30) Kini nga mga hitabo lagmit nga naghasol pag-ayo kang Abraham, ilabina nga si Lot miadto sa Canaan ingong bahin sa panimalay ni Abraham.
15. Bisan pa sa mga suliran nga giatubang ni Abraham samtang nagpuyo diha sa mga tolda sa usa ka langyawng yuta, unsang negatibong panghunahuna ang dayag nga gilikayan niya?
15 Naghunahuna ba si Abraham nga siya ug si Lot nagpabilin na lang unta sa kasegurohan sa Ur uban sa mga paryente sa iyang amahan o sa Haran uban sa iyang igsoon nga si Nahor? Nangandoy ba siya nga makapuyo unta siya sa kahilwas diha sa usa ka kinutaang siyudad inay magpuyo diha sa mga tolda? Siya ba, kaha, nagduhaduha sa kaalam sa mga sakripisyo nga iyang gihimo sa pagkahimong latagaw diha sa usa ka langyawng yuta? Mahitungod kang Abraham ug sa iyang panimalay, si apostol Pablo miingon: “Kon sila sa pagkatinuod nagpadayon pa sa paghinumdom niadtong dapita nga ilang gigikanan, sila may kahigayonan unta sa pagpamalik.” (Hebreohanon 11:15) Bisan pa niana, wala sila mamalik. Sanglit wala mapaluya sa mga kalisdanan, nagpabilin sila diin buot ni Jehova nga magpabilin sila.
Pag-agwanta Karon
16, 17. (a) Unsang mga kalisdanan ang giatubang sa daghang Kristohanon karon? (b) Unsang positibong tinamdan ang nabatonan sa mga Kristohanon? Ngano?
16 Ang susamang pag-agwanta makita diha sa mga Kristohanon karon. Bisan tuod ang pag-alagad sa Diyos maoy tuboran sa dakong kangaya alang kanila, ang kinabuhi dili sayon alang sa tinuod nga mga Kristohanon niining kataposang mga adlaw. Bisan tuod nagkinabuhi sila diha sa usa ka espirituwal nga paraiso, sila nag-antos sa mao gihapong kalisod sa ekonomiya nga giantos sa ilang mga silingan. (Isaias 11:6-9) Daghan ang nahimong inosenteng mga biktima sa mga gubat sa mga nasod, ug ang uban nag-ilaid sa tumang kakabos nga dili nila sayop. Dugang pa, nagaagwanta sila sa mga suliran sa pagkadili-popular nga minoriya. Sa daghang nasod sila nagasangyaw sa maayong balita atubangan sa hilabihang kawalay-pagtagad. Diha sa uban sila nag-antos sa malimbongong mga pag-atake niadtong ‘naghimog kasamok pinaagi sa balaod’ ug “naghukom nga daotan bisan sa dugo sa usa nga inosente.” (Salmo 94:20, 21) Bisan sa mga yuta diin ang mga Kristohanon wala mailalom sa pag-atake ug diin sila gidayeg sa pipila tungod sa ilang taas nga mga sukdanan, sila mahunahunaon nga malahi sa ilang kaubanan sa eskuylahan ug kaubanan sa trabaho—morag susama kang Abraham, kinsa nagpuyo diha sa mga tolda samtang ang kadaghanang tawo palibot niya nanagpuyo sa mga siyudad. Oo, dili sayon ang pagpuyo diha sa kalibotan apan “dili bahin” niana.—Juan 17:14.
17 Nan, gibasolan ba nato ang atong pagpahinungod sa Diyos? Nangandoy ba kita nga nagpabilin kita sa kalibotan, sama sa uban? Gikaguol ba nato ang mga sakripisyo nga atong nahimo diha sa pag-alagad kang Jehova? Wala gayod! Inay mawili, atong giila nga ang bisan unsa nga ato tingaling gisakripisyo walay tinuod nga bili kon itandi sa mga panalangin nga napahimuslan karon ug niadtong mapahimuslan sa umaabot. (Lucas 9:62; Filipos 3:8) Gawas pa, malipayon ba ang mga tawo sa kalibotan? Ang tinuod mao, daghan kanila ang nangitag mga tubag nga ato nang nabatonan. Sila nag-antos tungod sa dili pagsunod sa giya nga atong gisunod gikan sa Diyos pinaagi sa mga panid sa Bibliya. (Salmo 119:105) Ug daghan kanila nangandoy sa matang sa Kristohanong panag-ubanay ug makapahimuot nga pakighugoyhugoy nga atong napahimuslan uban sa mga isigkamagtutuo.—Salmo 133:1; Colosas 3:14.
18. Unsa ang mahimong moresulta kon ang mga Kristohanon magpakita ug kaisog nga sama nianang kang Abraham?
18 Tinuod, kita usahay kinahanglang magmaisogon sama kang Abraham sa dihang iyang gigukod ang mga mamimihag ni Lot. Apan kon kita magmaisogon, si Jehova magapanalangin sa sangpotanan. Pananglitan, sa Amihanang Irlandia ang mga pagdumot nahimong dulot sa bukog ingong resulta sa sektaryan nga kapintas, ug nagkinahanglag kaisog aron mahimong neyutral. Apan, ang matinumanong mga Kristohanon misunod sa mga pulong ni Jehova kang Josue: “Magmaisogon ug magmalig-on. Ayaw kahadlok o kalisang, kay si Jehova nga imong Diyos magauban kanimo bisan asa ikaw moadto.” (Josue 1:9; Salmo 27:14) Latas sa katuigan tungod sa ilang walay-kokahadlok nga pagbarog nakaangkon sila ug pagtahod, ug karon sila gawasnong makasangyaw diha sa tanang komunidad sa maong yuta.
19. Asa man malipayng maanaa ang mga Kristohanon, ug unsang sangpotanan ang ilang masaligong gidahom kon sundon nila ang pagtultol ni Jehova?
19 Dili gayod kita kinahanglang magduhaduha bisag unsang kahimtang ang atong giatubang, kon kita mosunod sa pagtultol ni Jehova, ang kataposang sangpotanan maoy alang sa iyang kahimayaan ug sa atong layog-abot nga kaayohan. Bisan pa sa mga suliran ug mga sakripisyo, walay laing dapit nga buot natong maanaa kita gawas sa pag-alagad kang Jehova, nga nagapahimulos sa pakighugoyhugoy uban sa atong Kristohanong mga igsoon ug nagalantaw sa unahan nga masaligon ngadto sa walay kataposang umaabot nga gisaad sa Diyos.
[Mga footnote]
a Lagmit, gisagop ni Abraham ang iyang pag-umangkong lalaki nga si Lot sa dihang ang amahan ni Lot, nga igsoon ni Abraham, namatay.—Genesis 11:27, 28; 12:5.
b Ang uban nagsugyot nga si Lot mipuyo sa usa ka siyudad aron makabaton ug mas dakong kasegurohan human mahimong bahin sa inagaw sa upat ka hari.
Nahinumdom Ka Ba?
◻ Nganong kinahanglanon ang lig-ong pagtuo?
◻ Sa unsang paagi gipakita ni Abraham nga duna siyay lig-on nga pagtuo?
◻ Sa unsang paagi ang pagpahinungod giduyogan sa mga kausaban sa kinabuhi sa usa?
◻ Nganong malipay kita sa pag-alagad sa Diyos bisan pa sa mga suliran nga ato tingaling atubangon?
[Mga hulagway sa panid 7]
Si Abraham andam nga mohimog dagkong mga kausaban sa iyang kinabuhi aron makapanunod sa saad
[Mga hulagway sa panid 9]
Ang pamatuod nagpakita nga si Jesus nakakaplag ug “pagtuo dinhi sa yuta” panahon sa iyang presensiya