Atong Bahandi Diha sa Kulonong mga Sudlanan

“Kami nagbaton niini nga bahandi diha sa mga kulonong sudlanan, aron ang gahom nga labaw sa kasarangan mamahimong iya sa Diyos ug dili gikan sa among kaugalingon.”​—2 CORINTO 4:7.

1. Sa unsang paagi angayng magdasig kanato ang panig-ingnan ni Jesus?

SAMTANG ginaumol ni Jehova dinhi sa yuta, si Jesus nakasinati mismo sa mga kahuyangan sa tawo. Angay gayod nga magdasig kanato ang iyang panig-ingnan sa paghupot sa integridad! Ang apostol nagtug-an kanato: “Sa pagkatinuod, nganhi niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.” (1 Pedro 2:21) Pinaagi sa pagpasakop sa maong pag-umol, si Jesus nagmadaogon batok sa kalibotan. Gipalig-on usab niya ang iyang mga apostol aron mahimong mga mananaog. (Buhat 4:13, 31; 9:27, 28; 14:3; 19:8) Ug pagkadakong pagdasig ang iyang gihatag sa konklusyon sa iyang kataposang pakigpulong ngadto kanila! Siya miingon: “Akong giingon kining mga butanga kaninyo aron nga pinaagi kanako kamo makabatog kalinaw. Sa kalibotan kamo adunay kasakitan, apan magmaisogon! Gidaog ko na ang kalibotan.”​—Juan 16:33.

2. Kasukwahi sa pagkabuta sa kalibotan, unsang banwag ang atong nabatonan?

² Sa susama, human itandi ang pagkabuta nga gipahinabo sa “diyos niining sistema sa mga butang” uban sa “banwag sa mahimayaong maayong balita,” si apostol Pablo miingon bahin sa atong bililhong ministeryo: “Kami nagbaton niini nga bahandi diha sa mga kulonong sudlanan, aron ang gahom nga labaw sa kasarangan mamahimong iya sa Diyos ug dili gikan sa among kaugalingon. Kami ginapiit sa tanang paagi, apan dili hagip-ot nga dili na makalihok; kami nalibog, apan dili bug-os nga walay kalingkawasan; kami ginalutos, apan wala biyaing nag-ungaw sa kapildihan; kami nangatumba, apan wala malaglag.” (2 Corinto 4:4, 7-9) Bisan tuod kita huyang nga “mga kulonong sudlanan,” ang Diyos nag-umol kanato pinaagi sa iyang espiritu aron kita bug-os nga magmadaogon batok sa kalibotan ni Satanas.​—Roma 8:35-39; 1 Corinto 15:57.

Pag-umol sa Karaang Israel

3. Giunsa paghubit ni Isaias ang pag-umol sa Hudiyohanong nasod?

³ Si Jehova nag-umol dili lamang sa mga indibiduwal kondili sa tibuok mga nasod. Pananglitan, sa dihang ang karaang Israel nagpasakop sa pag-umol ni Jehova, kini miuswag. Apan sa kataposan gipagahi niini ang kaugalingon ngadto sa dalan sa pagkamasinupakon. Ingong resulta, ang Mag-uumol sa Israel nagpahinabog “kaalaotan” ibabaw niana. (Isaias 45:9) Sa ikawalong siglo W.K.P., namulong si Isaias kang Jehova bahin sa dayag nga pagkamakasasala sa Israel, nga nag-ingon: “Oh Jehova, ikaw mao ang among Amahan. Kami mao ang yutang kulonon, ug ikaw mao ang among Magkukulon; ug kaming tanan mao ang mga buhat sa imong kamot. . . . Ang matag usa sa among tilinguhaong mga butang nahimong kalaglagan.” (Isaias 64:8-11) Ang Israel naumol ngadto sa usa ka sudlanan nga haom lamang alang sa kalaglagan.

4. Unsang ilustrasyon ang gidula ni Jeremias?

⁴ Usa ka siglo sa ulahi, samtang nagkaduol ang adlaw sa paghukom, giingnan ni Jehova si Jeremias nga mokuha ug bodigos ug ikuyog ang pipila ka tigulang nga lalaki sa Jerusalem ngadto sa Walog sa Hinnom, nga nagsugo kaniya: “Buk-on mo ang bodigos sa atubangan sa mga tawo nga kauban nimo. Ug moingon ka kanila, ‘Mao kini ang giingon ni Jehova sa mga panon: “Sa samang paagi dugmokon ko kini nga katawhan ug kining siyudara sama sa usa nga nagadugmok sa kulon sa magkukulon aron dili na kini matibuok pag-usab.”’”​—Jeremias 19:10, 11.

5. Unsa ka malukpanon ang paghukom ni Jehova sa Israel?

⁵ Sa 607 W.K.P., si Nabukodonosor naglaglag sa Jerusalem uban sa templo niini ug nagbihag sa naluwas nga mga Hudiyo ngadto sa Babilonya. Apan human sa 70 ka tuig nga pagkadestiyero, ang mahinulsolong mga Hudiyo nakabalik aron sa pagtukod pag-usab sa Jerusalem ug sa templo niini. (Jeremias 25:11) Ugaling, sa unang siglo K.P., ang nasod mitalikod na usab sa Dakong Magkukulon, ug sa kataposan nagpakaulaw sa paghimo sa kinagrabehang krimen nga mao ang pagpatay sa Anak sa Diyos. Sa 70 K.P., gigamit sa Diyos ang Romanhong Gahom sa Kalibotan ingong iyang tiglaglag sa pagpapha sa Hudiyohanong sistema sa mga butang, nga nagdugmok sa Jerusalem ug sa templo niini. Dili na gayod umolon sa kamot ni Jehova ang nasod sa Israel uban sa “pagkabalaan ug katahom.”a

Pag-umol sa Usa ka Espirituwal nga Nasod

6, 7. (a) Giunsa paghubit ni Pablo ang pag-umol sa espirituwal nga Israel? (b) Unsa ang bug-os nga gidaghanon sa “mga sudlanan sa kaluoy,” ug sa unsang paagi kini gilangkoban?

⁶ Ang mga Hudiyo nga midawat kang Jesus giumol ingong patukoranang mga membro sa usa ka bag-ong nasod, ang espirituwal nga “Israel sa Diyos.” (Galacia 6:16) Nan, haom ang mga pulong ni Pablo: “Unsa? Dili ba ang magkukulon adunay awtoridad ibabaw sa yutang-kulonon sa paghimo gikan sa mao rang minasa ug usa ka sudlanan alang sa gamit nga dungganon, ug lain alang sa gamit nga makauulaw? . . . ang Diyos, bisan pag may pagbuot nga ipasundayag ang iyang kapungot ug ipaila ang iyang gahom, nagtugot uban ang dagayang hataas-nga-pailob sa mga sudlanan sa kapungot nga gihimong angay sa kalaglagan, aron iyang ikapaila ang bahandi sa iyang himaya nganha sa mga sudlanan sa kaluoy, nga iyang giandam nang daan alang sa himaya.”​—Roma 9:21-23.

⁷ Ang nabanhawng Jesus sa ulahi nagpahibalo nga kining “mga sudlanan sa kaluoy” may gidaghanon nga 144,000. (Pinadayag 7:4; 14:1) Sanglit ang kinaiyanhong Israel wala makatagana sa bug-os nga gidaghanon, gipaabot ni Jehova ang iyang kaluoy ngadto sa katawhan sa kanasoran. (Roma 11:25, 26) Ang bag-ong natukod nga Kristohanong kongregasyon kusog nga miuswag. Sulod sa 30 ka tuig ang maayong balita “gikawali diha sa tibuok kalalangan ilalom sa langit.” (Colosas 1:23) Nagkinahanglan kini ug pagpailalom sa daghang nagkatag nga lokal nga mga kongregasyon sa hustong pagdumala.

8. Kinsay naglangkob sa unang nagamandong lawas, ug sa unsang paagi naugmad kining maong lawas?

⁸ Giandam ni Jesus ang 12 ka apostol nga mahimong unang nagamandong lawas, nga nagbansay kanila maingon man sa uban alang sa ministeryo. (Lucas 8:1; 9:1, 2; 10:1, 2) Sa Pentekostes 33 K.P., ang Kristohanong kongregasyon natukod, ug paglabay sa panahon ang nagamandong lawas niini gidugangan aron sa pag-apil sa “mga apostol ug mga tigulang sa Jerusalem.” Latas sa taastaas nga yugto, ang igsoon ni Jesus sa inahan nga si Santiago, bisan tuod dili apostol, daw nag-alagad ingong tsirman. (Buhat 12:17; 15:2, 6, 13; 21:18) Sumala sa historyanong si Eusebius, ang mga apostol nahimong pangunang mga tumong sa paglutos ug nagkatibulaag ngadto sa ubang mga teritoryo. Sa ingon ang kalangkoban sa nagamandong lawas gipasibo niana.

9. Unsang makapasubong kaugmaran ang gitagna ni Jesus nga mahitabo?

⁹ Sa hinapos sa unang siglo, ‘ang kaaway, ang Yawa,’ nagsugod sa ‘pagpugas ug mga bunglayon’ taliwala sa samag-trigo nga mga manununod sa “gingharian sa mga langit.” Nagtagna si Jesus nga kining makapasubong kaugmaran tugotan hangtod sa ting-ani sa “katiklopan sa sistema sa mga butang.” Unya, sa makausa pa, ‘ang mga mga matarong mosidlak ingon ka madan-agon sa adlaw diha sa gingharian sa ilang Amahan.’ (Mateo 13:24, 25, 37-43) Kanus-a man kana mahitabo?

Pag-umol sa Israel sa Diyos Karon

10, 11. (a) Sa unsang paagi ginahimo ang modernong-adlaw nga paghulma sa Israel sa Diyos? (b) Unsang magkasumpaking mga pagtulon-an ang makaplagan diha sa Kakristiyanohan ug taliwala sa matinud-anong mga Estudyante sa Bibliya?

¹⁰ Sa 1870, si Charles Taze Russell nagtukod ug usa ka grupo sa pagtuon sa Bibliya sa Pitts­burgh, Pennsylvania, T.B.A. Sa 1879 nagsugod siya sa pagpatik sa binulan nga magasing nailhan karon nga Ang Bantayanang Torre. Kini nga mga Estudyante sa Bibliya, ingon sa pagtawag kanila, sa wala madugay nakasabot nga ang Kakristiyanohan misagop sa dili-kasulatanhong paganong mga pagtulon-an, sama sa pagkadili-mamatay sa kalag, impiyerno nga kalayo, purgatoryo, usa ka Trinitaryan nga diyos, ug pagbawtismo sa masuso.

¹¹ Apan, labi pang hinungdanon, kining mga mahigugmaon sa kamatuoran sa Bibliya nagpasig-uli sa pasukaranang mga pagtulon-an sa Bibliya, sama sa pagpalit pag-usab pinaagi sa halad lukat ug pagkabanhaw ni Jesus ngadto sa walay-kataposang kinabuhi diha sa usa ka malinawong paraisong yuta ubos sa Gingharian sa Diyos. Labaw sa tanan, gipasiugda ang haduol na nga pagbindikar kang Jehova nga Diyos ingong Soberanong Ginoo sa uniberso. Ang mga Estudyante sa Bibliya nagtuo nga ang Pag-ampo sa Ginoo hapit nang tubagon: “Amahan namo sa mga langit, balaana ang imong ngalan. Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Sila ginaumol sa balaang espiritu sa Diyos ngadto sa usa ka tibuok-kalibotang katilingban sa mahigugmaon-sa-pakigdait nga mga Kristohanon.

12. Sa unsang paagi nasabtan sa mga Estudyante sa Bibliya ang usa ka hinungdanong petsa?

¹² Ang matukiong pagtuon sa Daniel kapitulo 4 ug sa ubang mga tagna nagkombinsir sa mga Estudyante sa Bibliya nga ang presensiya ni Jesus ingong Mesiyanikong Hari haduol na gayod. Ilang nasabtan nga ang 1914 mao ang petsa nga matapos ang “tinudlong mga panahon sa kanasoran.” (Lucas 21:24; Ezequiel 21:26, 27) Tulin nga gipakaylap sa mga Estudyante sa Bibliya ang ilang kalihokan, nga nagtukod ug mga klase sa Bibliya (sa ulahi gitawag ug mga kongregasyon) sa tibuok Tinipong Bansa. Sa sinugdanan sa siglo, ang ilang edukasyonal nga buluhaton sa Bibliya mikaylap ngadto sa Uropa ug Australasia. Gikinahanglan ang maayong pag-organisar.

13. Unsang legal nga kahimtang ang nabatonan sa mga Estudyante sa Bibliya, ug unsang talagsaong pag-alagad ang gihimo sa unang presidente sa Sosyedad?

¹³ Aron hatagag legal nga kahimtang ang mga Estudyante sa Bibliya, ang Zion’s Watch Tower Tract Society gihimong korporasyon niadtong 1884 sa Tinipong Bansa, nga ang mga hedkuwarter didto sa Pittsburgh, Pennsylvania. Ang mga direktor niini nag-alagad ingong sentral nga Nagamandong Lawas, nga nagadumala sa tibuok-globong pagsangyaw sa Gingharian sa Diyos. Ang unang presidente sa Sosyedad, si Charles T. Russell, misulat ug unom ka tomo sa Studies in the Scriptures ug mihimog lagyong mga biyahe aron sa pagsangyaw. Giamot usab niya ngadto sa tibuok-kalibotang buluhaton sa Gingharian ang dakong kantidad sa salapi nga iyang natigom una pa siya magsugod sa iyang mga pagtuon sa Bibliya. Sa 1916, samtang nagpadayon ang Dakong Gubat sa Uropa, ang lapoy nga Brader Russell namatay panahon sa usa ka panaw sa pagsangyaw. Gihatag niya ang tanan niyang nabatonan aron sa pagpakaylap sa pagpamatuod bahin sa Gingharian sa Diyos.

14. Giunsa ni J. F. Rutherford ‘pagpakigbugno ang maayong bugno’? (2 Timoteo 4:7)

¹⁴ Si Joseph F. Rutherford, kinsa temporaryong nahimong huwes sa Missouri, nahimong sunod nga presidente. Ingong resulta sa iyang walay-kokahadlok nga pagpaluyo sa kamatuoran sa Bibliya, ang klero sa Kakristiyanohan nakig-abin sa mga politiko sa “pagmugnag kasamok pinaagi sa balaod.” Sa Hunyo 21, 1918, si Brader Rutherford ug pito pa ka pangunang mga Estudyante sa Bibliya gibilanggo, uban ang daghang sentensiya nga 10 o 20 ka tuig nga dungang gipahamtang. Ang mga Estudyante sa Bibliya nakigbisog. (Salmo 94:20; Filipos 1:7) Sa pag-apelar, gibuhian sila sa Marso 26, 1919, ug sa ulahi bug-os nga naabsuwelto sa bakak nga sumbong nga sedisyon.b Kining maong kasinatian nag-umol kanila nga mahimong lig-ong mga tigpaluyo sa kamatuoran. Uban sa tabang ni Jehova, ilang gihimo ang tanang paagi aron magmadaogon sa espirituwal nga pakigbugno aron imantala ang maayong balita bisan pa sa pagsupak sa Dakong Babilonya. Kana nga pakigbugno nagpadayon hangtod niining tuig 1999.​—Itandi ang Mateo, kapitulo 23; Juan 8:38-47.

15. Nganong ang tuig 1931 hinungdanon sa kasaysayan?

¹⁵ Panahon sa katuigang 1920 ug 1930, ang dinihogang Israel sa Diyos padayong nagpaumol ubos sa pagtultol sa Dakong Magkukulon. Ang matagnaong kahayag gikan sa Kasulatan midan-ag, nga naghatag ug pasidungog kang Jehova ug nasentro diha sa Mesiyanikong Gingharian ni Jesus. Sa 1931 ang mga Estudyante sa Bibliya nagmaya sa pagdawat sa bag-ong ngalan, mga Saksi ni Jehova.​—Isaias 43:10-12; Mateo 6:9, 10; 24:14.

16 ug kahon sa panid 19. Kanus-a nakompleto ang bug-os nga gidaghanon sa 144,000, ug unsay pamatuod niini?

¹⁶ Sa katuigang 1930 ang gidaghanon “niadtong gitawag ug gipili ug matinumanon,” ang 144,000, morag nakompleto na. (Pinadayag 17:14; tan-awa ang kahon sa panid 19.) Wala kita mahibalo kon pila sa mga dinihogan ang natigom sa unang siglo ug gikan sa taliwala sa “mga bunglayon” panahon sa mangiob nga mga kasiglohan sa dakong apostasya sa Kakristiyanohan. Apan sa 1935 dihay gidaghanon nga 52,465 ka magmamantala sa tibuok kalibotan, gikan sa kinatas-ang ihap nga 56,153, nga nagpakita sa ilang langitnong paglaom pinaagi sa pag-ambit sa mga emblema sa Memoryal. Unsa unya ang dangatan sa daghan nga pagatigomon pa?

“Tan-awa! Usa ka Dakong Panon”

17. Unsang makasaysayanhong kaugmaran ang nahitabo sa 1935?

¹⁷ Sa kombensiyon nga gihimo gikan sa Mayo 30 ngadto sa Hunyo 3, 1935, sa Washington, D.C., T.B.A., si Brader Rutherford nagpahayag sa hinungdanong pakigpulong nga nag-ulohang “Ang Dakong Pundok.”c Kining grupoha, “nga walay tawong makaihap,” motungha sa dihang hapit nang matapos ang pagtimre sa 144,000 sa espirituwal nga Israel. Sila usab magpasundayag ug pagtuo sa makalukat nga gahom sa “dugo sa Kordero,” si Jesus, ug maghatag ug sagradong pag-alagad diha sa kahikayan sa templo ni Jehova alang sa pagsimba. Ingong grupo, sila ‘managpakagawas gikan sa dakong kasakitan’ nga buhi, aron makapanunod sa yutan-ong Paraiso diin “wala na unyay kamatayon.” Sulod sa ubay-ubayng katuigan una pa sa maong kombensiyon, kining grupoha gitawag nga mga Jonadab.​—Pinadayag 7:9-17; 21:4; Jeremias 35:10.

18. Sa unsang mga paagi hinungdanon ang tuig 1938?

¹⁸ Ang tuig 1938 maoy hinungdanon sa tin-awng pag-ila sa duha ka matang. Ang Marso 15 ug Abril 1, 1938, nga mga isyu sa The Watchtower nagpresentar sa duha-ka-bahin nga pagtuon sa “Iyang Panon” ug nagtin-aw sa relatibong mga dapit sa dinihogang mga nahibilin ug sa ilang mga kauban, ang dakong panon. Dayon ang Hunyo 1 ug Hunyo 15 nga mga isyu may tun-anang mga artikulo bahin sa “Organisasyon,” nga gipasikad sa Isaias 60:17. Ang tanang kongregasyon giawhag sa paghangyo sa Nagamandong Lawas sa pagtudlo ug lokal nga mga alagad, sa ingon nagpahinabo ug gipauswag, gibaod-sa-Diyos, nga teokratikanhong kahikayan. Gibuhat kana sa mga kongregasyon.

19 ug potnot. Unsang mga kamatuoran ang nagpalig-on nga ang katibuk-ang pagtawag sa “ubang mga karnero” nagapadayon karon sulod na sa kapin sa 60 ka tuig?

¹⁹ Ang taho sa 1939 nga Yearbook of Jehovah’s Witnesses nag-ingon: “Ang dinihogang mga sumusunod ni Kristo Jesus nga ania karon sa yuta diyutay na lang, ug dili na gayod mouswag ang ilang gidaghanon. Kini ginganlan diha sa Kasulatan ingong ‘mga nahibilin’ sa kaliwat sa Zion, ang organisasyon sa Diyos. (Pin. 12:17) Ang Ginoo nagatigom karon ngadto kaniya sa iyang ‘ubang mga karnero,’ nga maglangkob sa ‘dakong pundok’. (Juan 10:16) Kadtong ginatigom karon maoy mga kaubanan sa nahibilin, nga nakigtambayayongay sa mga nahibilin. Sukad niining panahona kadtong naglangkob sa ‘ubang mga karnero’ modaghan hangtod nga ang ‘dakong pundok’ natigom na.” Ang dinihogang mga nahibilin ginaumol aron moatiman sa pagtigom sa dakong panon. Sila usab kinahanglang umolon karon.d

20. Unsang organisasyonal nga mga kausaban ang naugmad sukad sa 1942?

²⁰ Sa Enero 1942, sa dihang ang Gubat sa Kalibotan II anaa sa kinapungkayan niini, si Joseph Rutherford namatay ug gipulihan ni Nathan Knorr ingong presidente. Ang ikatulong presidente sa Sosyedad mabinationg mahinumdoman tungod sa pagtukod sa teokratikanhong mga tunghaan diha sa mga kongregasyon ug sa Tunghaang Gilead aron sa pagbansay sa mga misyonaryo. Sa tinuig nga miting sa Sosyedad sa 1944, iyang gipahibalo nga ang karta sa Sosyedad girebisar aron nga ang pagpamembro ipasikad, dili sa materyal nga mga amot, kondili sa espirituwalidad. Sulod sa misunod nga 30 ka tuig, ang gidaghanon sa mga mamumuo sa kanataran miuswag gikan sa 156,299 ngadto sa 2,179,256 sa tibuok kalibotan. Sulod sa 1971-75 gikinahanglan ang dugang organisasyonal nga mga kausaban. Dili na ang usa ka tawo nga nag-alagad ingong presidente ang bug-os nga magdumala sa buluhaton sa Gingharian sa tibuok yuta. Ang Nagamandong Lawas, nga dunay nagpulipuli nga tsirman, gidugangan aron mahimong 18 ka dinihogang mga membro, nga halos katunga kanila sa pagkakaron nakatapos na sa ilang yutan-ong kurso.

21. Unsay nagpakuwalipikar sa mga membro sa gamayng panon alang sa Gingharian?

²¹ Ang nahibiling mga membro sa gamayng panon ginaumol latas sa daghang dekada sa mga pagsulay. Sila nagmaisogon, sanglit tatawng nakadawat ‘sa pamatuod sa espiritu.’ Giingnan sila ni Jesus: “Kamo mao ang mga mitapot kanako diha sa akong mga pagsulay; ug ako nagahimo ug kasabotan uban kaninyo, maingon nga ang akong Amahan naghimo ug kasabotan uban kanako, alang sa usa ka gingharian, aron nga kamo mangaon ug manginom sa akong lamesa diha sa akong gingharian, ug molingkod sa mga trono aron sa paghukom sa napulog-duha ka tribo sa Israel.”​—Roma 8:16, 17; Lucas 12:32; 22:28-30.

22, 23. Sa unsang paagi ginaumol ang gamayng panon ug ang ubang mga karnero?

²² Samtang mius-os ang gidaghanon sa dinihogan-sa-espiritu nga mga nahibilin sa yuta, ang hamtong nga mga igsoon nga sakop sa dakong panon gitugyanan sa espirituwal nga pagdumala sa halos tanang kongregasyon sa tibuok kalibotan. Ug sa dihang ang kataposang tigulang nga mga dinihogang saksi makatapos na sa ilang yutan-ong kurso, ang prinsipenhong sa·rimʹ sa ubang mga karnero nianang panahona maayo nang pagkabansay sa pagtuman sa administratibong mga katungdanan ingong pangulo nga matang sa yuta.​—Ezequiel 44:3; Isaias 32:1.

²³ Ang gamayng panon ug ang ubang mga karnero padayong ginaumol aron mahimong mga sudlanan alang sa gamit nga dungganon. (Juan 10:14-16) Kon kaha ang atong paglaom nahasandig sa “bag-ong mga langit” o sa “usa ka bag-ong yuta,” hinaot nga tibuok-kasingkasing kitang mosanong sa pagdapit ni Jehova: “Managlipay, kamong katawhan, ug managmaya sa walay kataposan tungod sa akong gilalang. Kay ania karon gihimo ko ang [langitnong] Jerusalem nga usa ka hinungdan sa pagmaya ug ang iyang katawhan nga usa ka hinungdan sa kalipay.” (Isaias 65:17, 18) Hinaot nga kitang huyang nga mga tawo kanunayng mag-alagad nga mapainubsanon, nga ginaumol sa “gahom nga labaw sa kasarangan”​—ang gahom sa Diyos nga balaang espiritu!​—2 Corinto 4:7; Juan 16:13.

[Mga footnote]

Nahinumdom Ka Ba?

◻ Sa pagpailalom sa pag-umol sa iyang Amahan, sa unsang paagi si Jesus atong Panig-ingnan?

◻ Unsang pag-umol ang nahitabo sa karaang Israel?

◻ Sa unsang paagi “ang Israel sa Diyos” ginaumol hangtod karon?

◻ Sa unsang katuyoan nga ginaumol ang “ubang mga karnero”?

[Kahon sa panid 18]

Dugang Pag-umol sa Kakristiyanohan

Usa ka balita sa Prensa Asosyada gikan sa Atenas, Gresya, nagtaho ug ingon niini bahin sa di pa dugayng gitudlo nga pangulo sa Gregong Ortodoksong Iglesya: “Angayan unta siyang mahimong mensahero sa pakigdait. Apan ang lider sa Gregong Ortodoksong Iglesya morag usa ka heneral nga nangandam sa pagpakiggubat.

“‘Kami andam, kon gikinahanglan, sa pag-ula ug dugo ug pagsakripisyo. Kami, ingong iglesya, nag-ampo alang sa pakigdait . . . Apan among bendisyonan ang sagradong mga hinagiban kon gikinahanglan kini sa panahon,” si Arsobispo Christodoulos miingon di pa dugay panahon sa pangilin sa Pagpasaka sa Birhen, nga gisaulog usab ingong adlaw sa armadong puwersa sa Gresya.”

[Kahon sa panid 19]

“Wala Nay Idugang!”

Sa graduwasyon sa Gilead sa 1970, giingnan ni Frederick Franz, nga bise-presidente kaniadto sa Watch Tower Society, ang mga estudyante bahin sa posibilidad nga sila, ang tanan sakop sa ubang mga karnero nga dunay yutan-ong mga paglaom, mahimong magbawtismo sa usa ka tawo nga mag-angkon tingaling sakop sa dinihogang mga nahibilin. Mahitabo ba kini? Aw, gisaysay niya nga si Juan Bawtista sakop sa ubang mga karnero, ug gibawtismohan niya si Jesus ug ang ubang mga apostol. Dayon nangutana siya kon duna pa bay pagtawag alang sa pagpanigom sa dugang pang mga nahibilin. “Wala, wala nay idugang!” siya miingon. “Ang maong pagtawag natapos niadtong 1931-35! Wala nay idugang. Nan, kinsa ang pipila ka bag-ong nakig-uban nga nakig-ambit sa mga emblema sa Memoryal? Kon sakop sila sa mga nahibilin, sila maoy mga kapuli! Sila maoy, dili mga dugang sa grupo sa mga dinihogan, kondili mga kapuli niadtong tingali nangahulog.”

[Hulagway sa panid 15]

Gipabilhan gayod nato ang atong bahandi sa pag-alagad!

[Hulagway sa panid 16]

Ang karaang Israel nahimong sudlanan nga angayan lamang sa kalaglagan