Ilang Gituman ang Kabubut-on ni Jehova

Si Pablo Nagmadaogon Batok sa Kalisod

SI Pablo nahimutang sa malisod kaayong kahimtang. Siya ug ang 275 pang uban nagsakay sa barko nga naabtan sa paghampak sa kusog kaayong Euroaquilo​—ang kinakusgang hangin sa Mediteranyo. Ang bagyo grabe gayod kaayo nga ang adlaw dili makita maadlaw, ni ang mga bituon magabii. Masabot, ang mga pasahero nahadlok nga sila mangamatay. Apan, gihupay sila ni Pablo pinaagi sa pag-asoy sa gibutyag sa Diyos kaniya diha sa damgo: “Walay kalag ninyo nga mawala, ang sakayan lamang.”​—Buhat 27:14, 20-22.

Sa ika-14ng gabii sa bagyo, ang mga sakayanon may nadiskobrehang makakurat​—ang tubig maoy 20 na lamang ka dupang giladmon.a Wala pa kaayo makalayo, sila naghimo na usab ug pagsunda sa giladmon sa tubig. Niining higayona, ang tubig maoy 15 ka dupang giladmon. Duol na ang mamala! Apan kining maayong balita giduyogan ug butang makasubo. Kay gilambalamba panahon sa kagabhion diha sa mabawng katubigan, ang barko peligrong mabangga sa mga bato ug mabungkag. Sa pagkamaalamon, giariya sa mga sakayanon ang mga angkla. Buot itunton sa pipila kanila ang bote ug mosakay diha niana, nga mamasin nga maluwas diha sa dagat.b Apan gipugngan sila ni Pablo. Iyang gisultihan ang opisyal sa kasundalohan ug ang mga sundalo: “Gawas kon kining mga tawhana magpabilin sa sakayan, dili kamo maluwas.” Ang opisyal namati kang Pablo, ug karon ang tanang 276 ka pasahero mabalak-ong naghulat sa pagbanagbanag sa adlaw.​—Buhat 27:27-32.

Nalunod ang Barko

Sa pagkasunod buntag, ang mga pasahero sa barko nakakita ug luok nga may baybayon. Nabalikan sa paglaom, giputol sa mga sakayanon ang mga pisi sa angkla ug giisa ang pangunahang layag pabor sa hangin. Ang barko misugod sa pag-abante paingon sa baybayon​—sa walay duhaduha duyog sa mga pagsinggit sa kalipay.​—Buhat 27:39, 40.

Apan, sa kalit ang barko nasangyad sa mabaw. Mas grabe pa, gilambalambahan sa kusog nga mga balod ang ulin sa sakayan, nga nagbungkag niini. Kinahanglang mokawas ang tanang pasahero sa sakayan! (Buhat 27:41) Apan nakahatag kini ug problema. Daghan sa mga pasahero​—apil si Pablo—​mga binilanggo. Ubos sa Romanhong balaod, ang guwardiya nga magtugot sa iyang binilanggo sa pag-eskapo kinahanglang moagom ug silot nga gituyo alang sa iyang binilanggo. Kon makaeskapo ang usa ka mamumuno, pananglitan, ang mapinasagdanong guwardiya magbayad niini sa iyang kinabuhi.

Kay nahadlok nga mahitabo kini, ang mga sundalo nakahukom sa pagpatay sa tanang binilanggo. Apan, ang opisyal sa kasundalohan, kinsa mahigalaon kang Pablo, mibalda. Iyang gisugo ang tanang makamaong molangoy sa paglukso sa tubig ug sa paglangoy ngadto sa mamala. Kadtong dili makamaong molangoy kinahanglang mogabay sa mga tabla o sa ubang mga butang gikan sa sakayan. Usag usa, ang mga pasahero sa nalunod nga barko mitakas paingon sa baybay. Natuman ang giingon ni Pablo, walay kinabuhi nga nawala!​—Buhat 27:42-44.

Milagro Diha sa Malta

Ang gipangapoyng grupo nakadangat sa isla nga gitawag ug Malta. Ang mga molupyo maoy “katawhang langyawg-sinultihan,” sa literal “mga barbaro” (Grego, barʹba·ros).c Apan ang mga taga-Malta dili mga tawong luog. Sa kasukwahi, si Lucas, nga kauban ni Pablo sa panaw, nagtaho nga sila “nagpakita kanamo ug talagsaong tawhanon nga kalulot, kay sila naghaling ug kalayo ug nagdawat kanamong tanan nga matinabangon tungod sa pag-ulan ug tungod sa katugnaw.” Si Pablo mismo mitabang sa mga lumad sa Malta sa pagpanguha ug pagbutag mga kahoy diha sa kalayo.​—Buhat 28:1-3, potnot.

Sa kalit, mikulapot ang usa ka bitin sa kamot ni Pablo! Ang mga taga-isla nagtuo nga mamumuno si Pablo. Tingali sila naghunahuna nga gisilotan sa Diyos ang mga makasasala pinaagi sa pag-atake sa bahin sa ilang lawas nga mao ang instrumento sa sala. Apan tan-awa! Sa dakong kahibulong sa mga lumad, gisawilik ni Pablo ang halas sa kalayo. Sumala sa giasoy sa nakakita mismo nga si Lucas, “sila nanagdahom nga [si Pablo] manghubag o sa kalit malup-og nga patay.” Ang mga taga-isla nag-usab sa ilang hunahuna ug nagsugod sa pag-ingon nga si Pablo usa ka diyos.​—Buhat 28:3-6.

Gipalabay ni Pablo ang sunod nga tulo ka bulan sa Malta, nga niadtong tungora iyang giayo ang amahan ni Publio, ang punoan sa isla, kinsa maabiabihong midawat kang Pablo, ug sa uban nga gitakboyan ug mga sakit. Dugang pa, si Pablo nanabod ug mga binhi sa kamatuoran, nga misangpot ug daghang panalangin ngadto sa maabiabihong mga molupyo sa Malta.​—Buhat 28:7-11.

Pagtulon-an Alang Kanato

Sa pagdagan sa iyang ministeryo, si Pablo nakaatubang ug daghang problema. (2 Corinto 11:23-27) Sa ibabaw nga asoy, siya maoy usa ka binilanggo tungod sa maayong balita. Unya, giatubang pa niya ang wala dahomang mga pagsulay: kusog nga bagyo ug ang misangpot nga pagkalunod sa barko. Latas niining tanan, si Pablo nagpabiling malig-on sa iyang determinasyon nga mahimong usa ka madasigong magwawali sa maayong balita. Ingon sa naeksperyensiyahan, siya nagsulat: “Sa tanang kahimtang akong nakat-onan ang sekreto kon unsaon pagkabusog ug kon unsaon pagkagutom, kon unsaon nga magdinagaya ug kon unsaon sa pag-antos sa kawalad-on. Sa tanang butang ako adunay kusog tungod kaniya nga nagahatag ug gahom kanako.”​—Filipos 4:12, 13.

Dili gayod angay nga ang mga problema sa kinabuhi magpaluya sa atong determinasyon nga mahimong madasigong mga ministro sa matuod nga Diyos! Kon moabot ang usa ka wala dahomang pagsulay, atong itugyan ang atong palas-anon diha kang Jehova. (Salmo 55:22) Unya, kita maghulat nga mapailobon sa pagtan-aw kon sa unsang paagi iyang himoong posible alang kanato sa paglahutay sa pagsulay. Kasamtangan, kita magpadayon sa pag-alagad kaniya nga matinumanon, masaligon nga siya nagtagad kanato. (1 Corinto 10:13; 1 Pedro 5:7) Pinaagi sa pagpabiling malig-on, bisan unsa pay mahitabo, kita​—sama kang Pablo—​magmadaogon batok sa kalisod.

[Mga footnote]