Adunay Buhing mga Mutya sa Namibia!

ANG Namibia nangawankawan hapit 1,500 kilometros ubay sa habagatan-kasadpang baybayon sa Aprika. Ang tibuok baybayon sa isla maoy mga bukidbukid sa balas, batoong mga bungtod, ug dakong kapatagan sa graba. Nasagol sa mga bato sa batoong mga baybayon sa Namibia mao ang mga mutya sa tanang mahanduraw nga kolor. Bisan ang mga brilyante makita usahay didto. Apan ang nasod adunay usa ka butang nga mas bililhon kay sa niining mga batoha. Ang Namibia dunay buhing mga mutya​—ang mga tawo sa daghang nasodnong mga pundok niini.

Ang kinaunahang mga molupyo sa Namibia nagsultig usa ka pamilya sa mga pinulongan nga gitawag ug Khoisan. Ang ilang sinultihan nailhan sa linagitik nga mga tingog niini. Lakip sa mga nagsultig Khoisan karon mao ang itom-ug-panit nga Damara, ang putig-panit nga mga tawo nga turotoy nga gitawag ug Nama, ug ang iladong mga Nitibo nga mga mangangayam. Daghang itom nga mga tribo miabot usab sa Namibia sa dili pa dugayng mga siglo. Kini sila giklasipikar ngadto sa tulo ka nasodnong mga pundok: ang Ovambo (ang kinadak-ang etnikong pundok sa Namibia), ang Herero, ug ang Kavango. Ang mga Uropanhon nagsugod sa pagpuyo sa Namibia panahon sa ika-19ng siglo. Daghan pang lalin ang nangabot human nga may nadiskobrehang mga brilyante sa mga balas sa desyerto.

Ang mga molupyo sa Namibia bililhon tungod kay sila maoy bahin sa kalibotan sa katawhan nga alang kanila gihatag sa Diyos ang iyang Anak, sa ingon nagbukas sa dalan ngadto sa kinabuhing walay kataposan. (Juan 3:16) Ginatos sa mga taga-Namibia nga gikan sa daghang tribo misanong na sa mensahe sa kaluwasan. Nahisama sila sa buhing mga mutya tungod kay sila apil sa “tilinguhaong mga butang sa tanang kanasoran” nga karon ginatigom ngadto sa balay ni Jehova sa pagsimba.​—Hageo 2:7.

Espirituwal nga Pagmina Gisugdan

Sa 1928 gisugdan ang pagmina sa espirituwal nga mga mutya sa Namibia. Nianang tuiga ang sangang buhatan sa Watch Tower Society sa Habagatang Aprika nagpadalag 50,000 ka buok nga literatura sa Bibliya ngadto sa mga tawo nga nakatag sa tibuok nasod. Sa pagkasunod tuig usa ka dinihogang Kristohanon nga gikan sa Habagatang Aprika nga ginganlag Lenie Theron nagsubayg-balik sa interes nga gipakita. Upat ka bulan nga iyang gitadlas ang dakong nasod nga nag-inusara, nga nakapahimutang ug kapin sa 6,000 ka giya sa pagtuon sa Bibliya sa Aprikaan, Iningles, ug Aleman. Kining tanang pagpangabudlay wala gayod makawang.

Pananglitan, palandonga si Bernhard Baade, usa ka Alemang minero. Sa 1929 siya nagdawat ug suplay sa mga itlog gikan sa usa ka mag-uuma kinsa nagputos sa matag itlog diha sa panid sa usa ka publikasyon sa Watch Tower. Maikagong gibasa ni Bernhard ang matag panid, nga nahibulong kon kinsay nagsulat sa libro. Sa kataposan iyang nadawat ang kataposang panid, nga naghatag sa Aleman nga adres sa Watch Tower Society. Si Bernhard nagpadalag sulat nga nangayog dugang literatura ug nahimong unang taga-Namibia nga mibarog sa kamatuoran.

Bug-os-Panahong mga Mamumuo Miabot

Sa 1950, upat ka misyonaryo nga gibansay sa Watchtower Bible School of Gilead miabot sa Namibia. Ang gidaghanon sa mga misyonaryo misaka ngadto sa walo sa pagka-1953. Kini nag-apil kang Dick ug Coralie Waldron, Australianong magtiayon nga nag-alagad gihapon didto nga matinumanon. Daghang ubang bug-os-panahong mga magmamantala sa Gingharian nga taga-Habagatang Aprika ug sa gawas sa nasod nakabahin usab sa pagmina sa espirituwal nga mga mutya sa Aprika. Ang ubang mga misyonaryo, maingon man usab ang mga graduwado sa Ministerial Training School, gipadala ngadto sa Namibia.

Laing butang nga nakatabang sa espirituwal nga pag-uswag sa Namibia mao ang paghubad ug pagpatik sa literatura sa Bibliya ngadto sa dagkong lokal nga mga pinulongan, sama sa Herero, Kwangali, Kwanyama, Nama/​Damara, ug Ndonga. Sukad sa 1990, usa ka maanindot nga opisina sa paghubad ug puy-anan alang sa bug-os-panahong boluntaryong mga mamumuo naglihok diha sa kaulohan, sa Windhoek. Si Karen Deppisch, kinsa nakigduyog uban sa iyang bana sa bug-os-panahong buluhaton sa pag-ebanghelyo sa nagkalainlaing bahin sa Namibia, miingon: “Daghan ang makurat sa dihang tanyagan namo sila ug literatura sa ilang kaugalingong pinulongan, ilabina kay diyutay lamang kaayong libro sa bisan unsang matang ang mapalit nianang partikular nga pinulongan.”

Pagpasinaw sa mga Mutya

Ang ubang literal nga mga mutya sa Namibia napasinaw tungod sa paglihok sa mga balod ug balas sa daghan na kaayong milenyong panahon. Apan, siyempre, kining kinaiyanhong mga proseso dili makapatunghag buhing mga mutya. Nagkinahanglag paningkamot alang sa dili-hingpit nga mga tawo sa ‘paghukas sa daang pagkatawo’ ug sa pagsul-ob sa ilang kaugalingon ug bag-o samag-Kristo nga personalidad. (Efeso 4:20-24) Pananglitan, ang pagsimba sa patayng mga katigulangan maoy usa ka tradisyon nga lisod makuha taliwala sa daghang tribo sa Namibia. Kadtong dili mohimo sa mga buhat sa pagsimba sa katigulangan sagad lutoson sa mga sakop sa pamilya ug mga silingan. Sa dihang ang mga tawo makakat-on gikan sa Bibliya nga ang patay “dili mahibalo sa bisan unsa,” sila makaatubang ug pagsulay. (Ecclesiastes 9:5) Sa unsang paagi?

Usa ka Saksi nga Herero miingon: “Dako kaayong hagit ang pagkahimong masinugtanon sa kamatuoran. Akong gidawat ang pagtuon sa Bibliya uban sa mga Saksi ni Jehova, apan dugay nakong gipadapat ang mga butang nga akong nakat-onan. Sa sinugdan, gisulayan una nako kon dili ba ako mameligro kon dili nako himoon ang tradisyonal nga mga patuotuo. Pananglitan, magmaneho ako nga moagi sa pipila ka dapit sa Namibia nga dili mohunong aron sa pagbutang ug bato diha sa usa ka lubnganan o sa pag-isa sa akong kalo agig pagtahod sa mga patay. Sa ngadtongadto, nakombinsir ako nga walay mahitabo kanako tungod sa dili pagsimba sa patayng mga katigulangan. Pagkadako sa akong kalipay nga gipanalanginan ni Jehova ang akong mga paningkamot sa pagtabang sa akong pamilya ug sa ubang mga interesado sa pagkakat-on sa kamatuoran!”

Ang Panginahanglag Espirituwal nga mga Minero

Sa wala pa moabot ang mga misyonaryo sa 1950, dihay usa lamang ka magmamantala sa maayong balita sa Namibia. Ang gidaghanon anam-anam nga misaka ngadto sa kinatas-ang ihap nga 995. Bisan pa, dihay daghan pa kaayong buluhatong pagahimoon. Sa pagkatinuod, ang ubang mga dapit halos wala pa gayod kasangyawi. Ikaw ba anaa sa posisyon sa pag-alagad diin dako ang panginahanglag madasigong mga magmamantala sa Gingharian? Nan, palihog, sulod ngadto sa Namibia ug tabangi kami sa pagpangita ug sa pagpasinaw ug dugang pang espirituwal nga mga mutya.​—Itandi sa Buhat 16:9.

[Mapa/​Mga hulagway sa panid 26]

(Alang sa aktuwal nga pagkahan-ay, tan-awa ang publikasyon)

APRIKA

NAMIBIA

[Mga hulagway]

Ang Namibia maoy nasod sa maanindot nga mga mutya

[Credit Lines]

Mga mapa: Mountain High Maps® Copyright © 1997 Digital Wisdom, Inc.; Mga brilyante: Courtesy Namdek Diamond Corporation

[Mga hulagway sa panid 26]

Ang maayong balita ginawali ngadto sa tanang etnikong pundok sa Namibia

[Hulagway sa panid 28]

Makaalagad ka ba sa dapit nga mas dako ang panginahanglan alang sa mga magmamantala sa Gingharian?