Kaniadto Kami mga Lobo—Karon Kami mga Karnero Na!
Sa dihang si Sakina ug ako gagmay pang mga batang babaye, managsilingan kami. Si Sakina dako ug lig-on ug lawas, samtang ako gamay ug niwang. Magpunay mig lalis, apan usa ka adlaw niana grabe ang among away. Sukad niadtong adlawa, nagbungolay mi. Ngadtongadto, kaming duha namalhin ug puyo ug wala na magkahibal-anay kon hain magpuyo ang usag usa.
Sa 1994, misugod ako pagtuon sa Bibliya uban sa mga Saksi ni Jehova, ug sa hinayhinay nabag-o ang akong personalidad. Upat ka tuig sa ulahi samtang nagtambong sa among espesyal nga adlaw sa asembliya sa Bujumbura, Burundi, natingala ko nga nahibalag si Sakina. Nalipay ko nga mitambong siya, apan ang among timbayahay medyo bugnaw. Sa ulahi nianang adlawa, halos dili ko makatuo sa akong nakita sa dihang namatikdan nako siya nga kauban sa mga kandidato sa bawtismo! Siya usab nabag-o pag-ayo. Dili na siya ang palaaway nga babaye nga kanunay kong gikaaway. Pagkaanindot nga makita siya nga naghatag ug publikong pamatuod sa iyang pagpahinungod sa Diyos pinaagi sa pagpabawtismo sa tubig!
Sa dihang mihaw-as na siya sa tubig, nagdali ko pagduol aron halogon siya ug mihunghong ako sa iyang dalunggan: “Nahinumdom ka kon unsa ka grabe ang atong away?” “Oo,” miingon siya, “nahinumdom ko, apan nangagi na kana. Bag-o na ang akong pagkatawo karon.”
Kaming duha nalipay nga nakakaplag sa kamatuoran sa Bibliya nga makapahiusa ug nakapabag-o sa among samag-lobo nga mga personalidad aron mahimong sama nianang sa karnero nga iya sa Dakong Magbalantay, si Jehova nga Diyos. Sa pagkatinuod, ang kamatuoran sa Bibliya makapabag-o gayod sa mga kinabuhi.