“Gikan sa Baba sa mga Bata”
SA DIHANG si Samuel bata pa, siya lig-ong mibarog dapig sa matarong nga mga prinsipyo bisan pa sa tumang-kadaotan sa mga anak sa Hataas nga Saserdoteng si Eli. (1 Samuel 2:22; 3:1) Sa mga adlaw ni Eliseo, usa ka batang Israelinhong bihag sa Syria mihatag ug maisogong pagpamatuod ngadto sa iyang agalong babaye. (2 Hari 5:2-4) Sa dihang si Jesus 12 anyos, siya maisogong misulti ngadto sa mga magtutudlo sa Israel, nga nagsuknag mga pangutana ug naghatag ug mga tubag nga nakapahibulong sa mga tumatan-aw. (Lucas 2:46-48) Sa tibuok kasaysayan si Jehova matinumanong gialagaran sa iyang batan-ong mga magsisimba.
Ang mga batan-on ba karong adlawa nagapakita sa samang matinumanong espiritu? Oo, gayod! Ang mga taho gikan sa mga sangang buhatan sa Watch Tower Society nagpakita nga daghan, daghang magtutuong mga batan-on ang “kinabubut-ong nagtanyag sa ilang kaugalingon” diha sa pag-alagad kang Jehova. (Salmo 110:3) Ang maayong mga resulta sa ilang mga paningkamot nagadasig sa tanang Kristohanon, batan-on ug tigulang, nga “dili moundang sa pagbuhat kon unsay maayo.”—Galacia 6:9.
Ang usa ka maayong panig-ingnan mao si Ayumi, usa ka batang Haponesa nga nahimong usa ka magmamantala sa dihang siya unom ka tuig ang edad ug naghimong iyang tumong nga mosangyaw sa tanan diha sa iyang klase. Nakakuha siyag pagtugot sa pagpahimutang ug daghang publikasyon diha sa librarya sa lawak-klasehanan, nga nag-andam sa iyang kaugalingon sa pagtubag sa bisan unsang mga pangutana nga mahimong ipangutana sa iyang mga kauban sa eskuylahan. Halos ang tanan niyang mga klasmet maingon man ang magtutudlo nasinati sa mga publikasyon. Sulod sa iyang unom ka tuig sa elementarya, si Ayumi mihikay ug 13 ka pagtuon sa Bibliya. Siya nabawtismohan samtang diha sa kuwarto-grado, ug usa sa iyang mga higala nga iyang gitun-an nabawtismohan sa pagkasiksto-grado. Dugang pa, ang inahan ug ang duha ka magulang nga mga babaye niining maong estudyante sa Bibliya nagtuon usab ug nabawtismohan.
Usa ka Pamatuod ang Maayong Panggawi
“Padayong-hupti ang inyong panggawi nga maayo taliwala sa mga nasod,” matud ni apostol Pedro, ug ang batan-ong mga Kristohanon sinserong nagadawat niining sugoa. (1 Pedro 2:12) Ingong resulta, ang ilang maayong panggawi subsob nga nagahatag ug maayong pamatuod. Sa Aprikanhong nasod sa Cameroon, may usa ka tawo nga mitambong sa ikaduhang higayon sa usa ka miting sa kongregasyon sa mga Saksi ni Jehova ug nakalingkod tupad sa usa ka sayes anyos nga batang babaye. Sa dihang gidapit sa mamumulong ang mamiminaw sa pagpangita sa usa ka teksto sa Bibliya, ang tawo nakamatikod nga dali rang nakaplagan sa batang babaye ang bersikulo diha sa iyang kaugalingong Bibliya ug gisundan pag-ayo ang pagbasa. Ang tinamdan sa batang babaye nakapadani pag-ayo kaniya nga sa pagkatapos sa miting, siya miduol sa mamumulong ug miingon: “Kining batang babaye nakatukmod kanako nga magtuon sa Bibliya uban kaninyo.”
Sa Habagatang Aprika adunay usa ka eskuylahan diin 25 ka estudyante ang mga anak sa mga Saksi ni Jehova. Ang ilang maayong panggawi miresulta sa maayong kadungganan alang sa mga Saksi ni Jehova. Usa ka magtutudlo misugid ngadto sa usa ka ginikanang Saksi nga dili niya masabtan kon sa unsang paagi nabansay pag-ayo sa mga Saksi ang ilang mga anak, ilabina nga ang iyang kaugalingong simbahan napamatud-ang walay katakos sa pagtabang sa mga bata. Usa ka bag-ong magtutudlo miabag diha sa eskuylahan ug nakamatikod dayon sa maayong panggawi sa mga batang Saksi. Gipangutana niya ang usa sa mga batang lalaki nga Saksi kon unsay iyang buhaton aron mahimong usa sa mga Saksi ni Jehova. Ang batang lalaki misaysay nga kinahanglang magtuon siya sa Bibliya, ug iyang gihikay nga halingon sa iyang mga ginikanan ang interes.
Sa Costa Rica, si Rigoberto nakaila sa kamatuoran sa dihang duha ka klasmet migamit sa Bibliya sa pagtubag sa iyang mga pangutana mahitungod sa Trinidad, sa kalag, ug impiyernong kalayo. Ang ilang giingon adunay positibong impluwensiya diha kaniya dili lamang tungod sa ilang katakos sa paggamit sa Kasulatan kondili tungod usab kay ang ilang ekselenteng panggawi lahi kaayo sa iyang nakita sa mga iglesya sa Kakristiyanohan. Bisan pa sa pagsupak sa pamilya, si Rigoberto nagauswag pag-ayo diha sa iyang pagtuon sa Bibliya.
Sa Espanya duha ka Saksi ni Jehova—usa kanila nuybe anyos—miduaw sa usa ka lalaki nga ginganlag Onofre. Bisan tuod ang hamtong nga Saksi mao ang kanunayng nagsulti, ang batan-ong Saksi hilom nga nagbasa sa mga Kasulatan samtang ang hamtong nga Saksi nagbasa sa makusog ug nagkutlo sa pipila ka mga teksto sa Bibliya nga nahinumdoman. Nadani si Onofre. Siya mihukom nga buot niyang magtuon sa Bibiya sa samang dapit diin kadtong batang lalaki nakakat-on sa paggamit pag-ayo sa Kasulatan. Busa, sayo sa misunod nga Dominggo sa buntag, miadto siya sa Kingdom Hall. Kinahanglang maghulat siya sa gawas hangtod sa palis, sa pag-abot sa mga Saksi alang sa ilang miting. Sukad niadto, siya miuswag pag-ayo ug di pa dugay nagpasimbolo sa iyang pagpahinungod pinaagi sa bawtismo sa tubig.
Epektibong Batan-ong mga Saksi
Oo, si Jehova nagagamit sa mga batan-on maingon man sa mga hamtong sa pag-abot sa mga mapainubsanog kasingkasing. Ang ingon dugang pa natong makita sa usa ka kasinatian gikan sa Hungaria. Didto, usa ka nars sa ospital nakamatikod nga kon ang mga bisita moduaw sa usa ka diyes-anyos nga pasyente, dad-an nila siya ug mga balasahon maingon man pagkaon. Naikag, siya nahibulong kon unsang basahona ang makapainteres sa maong batang babaye ug nakakaplag nga kadto mao ang Bibliya. Ang nars nakigsulti kaniya ug miingon sa ulahi: “Sukad sa unang gutlo, siya sa pagkatinuod nagtudlo kanako.” Sa dihang ang batan-ong babaye migawas sa ospital, gidapit niya ang nars sa pagtambong sa kombensiyon, apan ang nars mibalibad. Apan, sa ulahi siya miuyon nga motambong sa “Putling Pinulongan” Distritong Kombensiyon. Sa wala madugay human niadto, siya misugod sa pagtuon sa Bibliya, ug usa ka tuig sa ulahi siya nabawtismohan—kining tanan ingong resulta sa paggamit sa usa ka batang babaye sa iyang panahon didto sa ospital sa pagbasa sa literatura sa Bibliya.
Si Ana Ruth, sa El Salvador, diha sa iyang ikaduhang tuig sa hayskul. Nabatasan niya ang pagbilin ug literatura sa Bibliya diha sa iyang lamesa aron mabasa sa uban kon buot nila. Kay nakamatikod nga ang literatura nawala ug unya mipatim-aw paglabay sa pila ka panahon, si Ana Ruth nakadiskobre nga ang usa ka kauban sa eskuylahan, si Evelyn, nagbasa niana. Tapos sa pila ka panahon, si Evelyn midawat sa usa ka pagtuon ug misugod sa pagtambong sa mga miting sa kongregasyon. Ngadtongadto, siya nabawtismohan, ug karon siya nag-alagad ingong usa ka regular nga oksilyare payunir. Si Ana Ruth usa ka regular payunir.
Sa Panama usa ka igsoong babaye ang misugod pagtuon uban sa usa ka babaye kansang bana misugod sa pagsupak sa kamatuoran sa punto nga ang pagtuon halos nahunong. Apan, sa hinayhinay ang tinamdan sa bana nausab. Pila ka panahon sa ulahi, ang iyang magulang nga lalaki, nga usa ka Saksi, mihangyo kaniya sa pag-instalar ug alarma sa kawatan diha sa iyang balay. Samtang giinstalar niya ang alarma, ang iyang nuybe-anyos nga pag-umangkong babaye mipauli nga masulob-on kaayo. Gipangutana niya siya kon unsay nahitabo, ug siya miingon nga siya ug ang iyang magulang nga babaye milakaw aron magdumala ug usa ka pagtuon sa Bibliya apan ang tawo wala diha sa balay, busa wala siya makahimog bisan unsa alang kang Jehova niadtong adlawa. Ang iyang uyoan miingon: “Nganong dili ko nimo sangyawan? Niana may mahimo ka alang kang Jehova.” Ang iyang pag-umangkon malipayong mikuha sa iyang Bibliya, ug ang usa ka pagtuon nasugdan.
Ang iyang inahan (bayaw sa lalaki) naminaw. Naghunahuna siya nga ang tanan maoy pagpakaaron-ingnon lamang, apan matag panahon nga ang tawo moadto sa iyang balay, iyang hangyoon ang iyang pag-umangkong babaye nga magtuon sa Bibliya. Sa dihang nakita sa inahan nga ang iyang bayaw nga lalaki seryoso ug adunay pila ka lisod nga mga pangutana, siya mihukom nga magdumala mismo sa pagtuon nga presente ang iyang anak babaye. Siya misugod sa pagtuon kaduha sa usa ka semana ug daling miuswag. Sa kataposan, siya midangat sa punto nga nagpahinungod ug nabawtismohan sa asembliya duyog sa iyang asawa—tungod sa maayong tinamdan sa iyang batan-ong pag-umangkong babaye.
Ang Kaisog sa mga Batan-on Naghatag ug Maayong Pamatuod
Ang Bibliya nag-ingon: “Magmaisogon ug lig-ona ang imong kasingkasing. Oo, maglaom kang Jehova.” (Salmo 27:14) Kining mga pulonga mapadapat sa tanang mga alagad sa Diyos, ug ang mga batan-on maingon man ang mga hamtong nagpadapat niini sulod sa miaging tuig. Sa Australia, sa dihang ang usa ka singko-anyos nga batang babaye mitungha sa usa ka bag-ong eskuylahan, ang iyang inahan miadto sa magtutudlo sa pagsaysay sa mga pagtulon-an sa mga Saksi ni Jehova. Ang magtutudlo miingon: “Nasayod na ako kon unsay inyong gituohan. Gisaysay na sa imong anak babaye ang tanan kanako.” Kining batang babaye wala maulaw sa pagduol sa iyang magtutudlo nga nag-inusara aron isaysay ang iyang relihiyosong mga pagtulon-an.
Ang singko-anyos nga si Andrea sa Romania nagpakita usab ug kaisog. Sa dihang ang iyang inahan mibiya sa Ortodoksong pagtuo aron mahimong usa ka Saksi, ang iyang mga silingan midumili sa pagpaminaw kaniya. Usa ka adlaw diha sa Pagtuon sa Libro sa Kongregasyon, si Andrea nakadungog nga gipasiugda sa magtatan-aw sa pag-alagad ang panginahanglan sa pagsangyaw sa mga silingan sa usa. Seryoso niya kining gihunahuna, ug sa dihang siya mipauli siya misulti sa iyang inahan: “Inigbiya nimo sa trabaho, ako mangandam, butangan ug literatura ang akong bag sama sa imong gibuhat, Mama, ug ako mag-ampo kang Jehova nga tabangan ako sa pagpahayag sa kamatuoran sa mga silingan.”
Sa misunod nga adlaw gituman ni Andrea ang iyang gisaad. Dayon, nangaresgar, iyang gipislit ang timbre sa pultahan sa usa ka silingan. Sa dihang ang silingan miabli sa pultahan, kining batang babaye miingon: “Ako nasayod nga sukad nga ang akong inahan nahimong usa ka Saksi, wala nimo siya magustohi. Naningkamot siya sa pagpakigsulti kanimo sulod sa pila ka panahon, apan dili nimo gustong maminaw kaniya. Kini nakapaguol kaniya, apan buot nakong masayod ka nga kami nahigugma kanimo.” Unya, si Andrea mipadayon sa paghatag ug maayong pagpamatuod. Sa usa ka adlaw, siya nakapanagtag ug unom ka libro, unom ka magasin, upat ka pulyeto, ug upat ka tract. Sukad niadto, siya regular na sa pagsangyaw sa kanataran.
Sa Rwanda ang atong mga igsoon kinahanglang magpakita ug dakong kaisog tungod sa kasamok didto. Sa usa ka higayon usa ka pamilya sa mga Saksi gibutang sa usa ka lawak diin ang mga sundalo nag-andam sa pagpatay kanila. Ang pamilya nangayog pagtugot nga mag-ampo una. Kini gitugot, ug ang tanan gawas sa anak babaye, si Deborah, hilom nga miampo. Sumala sa usa ka taho, si Deborah miampo ug kusog: “Jehova, ning semanaha si Papa ug ako nakapahimutang ug lima ka magasin. Unsaon namo pagbalik sa maong mga tawo aron sa pagtudlo kanila sa kamatuoran ug pagtabang kanila nga makabaton ug kinabuhi? Gawas pa, unsaon na nako pagkahimong magmamantala karon? Buot nakong mabawtismohan na aron moalagad kanimo.” Sa pagkadungog niini, usa ka sundalo miingon: “Dili kami makapatay kaninyo tungod niining batang babaye.” Si Deborah mitubag: “Salamat.” Naluwas ang pamilya.
Sa dihang si Jesus mihimo sa iyang madaogong pagsulod sa Jerusalem sa talitapos na ang iyang kinabuhi sa yuta, siya giabiabi sa usa ka dako, nag-abibang mga panon. Ang mga panon nalangkoban sa mga bata maingon man sa mga hamtong. Sumala sa talaan, ang mga batang lalaki “nanagpaninggit diha sa templo ug nag-ingon: ‘Luwasa, kami nagaampo, ang Anak ni David!’” Sa dihang ang pangulong mga saserdote ug ang mga eskriba misupak niini, si Jesus mitubag: “Wala ba gayod ninyo mabasahi kini, ‘Gikan sa baba sa mga bata ug mga masuso ikaw nagtagana ug pagdayeg’?”—Mateo 21:15, 16.
Dili ba kulbahinam ang pagkakita nga bisan karong adlawa matuod ang mga pulong ni Jesus? “Gikan sa baba sa mga bata ug mga masuso”—ug, mahimong dugangan namo, mga tin-edyer ug batan-ong mga lalaki ug mga babaye—si Jehova nagtaganag pagdayeg. Sa pagkatinuod, maylabot sa pagdayeg kang Jehova, walay bata kaayo sa pagbuhat niana.—Joel 2:28, 29.