Nganong Kadtong Karaang Kalibotan Nahanaw?

ANG tibuok-kalibotan nga Baha dili maoy usa ka kinaiyanhon nga kalamidad. Kadto maoy usa ka paghukom nga gikan sa Diyos. Dihay pasidaan nga gihatag, apan kini wala gayod panumbalinga. Ngano? Si Jesus miingon: “Niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan.”—Mateo 24:38, 39.

Usa ka Ugmad nga Sibilisasyon

Sa pipila ka bahin, ang wala-pay-Lunop nga sibilisasyon may mga bentaha nga wala sa atong panahon. Pananglitan, usa rag pinulongan ang tanang tawo. (Genesis 11:1) Daghan unta kaayo ang mahimo niini diha sa mga natad sa arte ug mga siyensiya nga nagkinahanglan ug kooperasyon sa daghang tawo nga dunay nagkalainlaing mga abilidad. Lain pa, ang taas nga kinabuhi nga gipahimuslan sa kadaghanang tawo niadtong panahona nagpasabot nga sila makapadayon sa pagpalambo sa ilang nakat-onan sulod sa kasiglohan.

Ang uban moingon nga dili gayod tag-as ug kinabuhi ang mga tawo niadtong panahona ug nga ang mga tuig nga gihisgotan sa mga asoy sa Bibliya sa pagkatinuod maoy mga bulan. Tinuod ba kana? Buweno, tagda ang kahimtang ni Mahalalel. Ang Bibliya nag-ingon: “Si Mahalalel nabuhi sa kan-umag-lima ka tuig. Unya siya nanganak kang Jared. . . . Ang tanang adlaw ni Mahalalel mikabat ug walo ka gatos ug kasiyamag-lima ka tuig ug siya namatay.” (Genesis 5:15-17) Kon ang usa ka tuig maoy usa ka bulan, si Mahalalel nakabaton ug anak sa dihang siya singko anyos pa lang! Dili, ang mga tawo niadtong panahona duol pa sa hingpit nga kabaskog sa unang tawo, si Adan. Sila tinuod gayod nga nabuhi sa daghang siglo. Unsay ilang nahimo?

Sa kasiglohan sa wala pa ang Lunop, ang populasyon sa yuta midaghan kaayo nga tungod niana ang anak ni Adan nga si Cain nakatukod ug siyudad, nga iyang gitawag ug Enoc. (Genesis 4:17) Sa panahong wala pay Lunop, nanungha ang nagkalainlaing mga industriya. Dihay mga panday sa “tanang matang sa himan nga tumbaga ug puthaw.” (Genesis 4:22) Segurado nga kining maong mga himan gigamit sa konstruksiyon, pagpamanday, pagpanahi, ug agrikultura. Kining mga trabahoa gihisgotan diha sa mga asoy bahin sa labing unang mga molupyo sa yuta.

Ang daghang kahibalo nga natigom makatabang unta sa sunod nga mga kaliwatan sa pagpalambo sa mga trabaho nga nagkinahanglag kahanas sama sa paggama ug mga gamit nga hinimo sa metal, pagpananom, pag-alimag mga karnero ug baka, pagsulat, ug fine arts. Si Jubal, pananglitan, mao “ang mag-uugda sa tanan niadtong nagagamit sa alpa ug sa plawta.” (Genesis 4:21) Ang sibilisasyon naugmad sa tanang natad. Bisan pa niana, ang tanan kalit nga natapos. Unsay nahitabo?

Unsay Problema?

Uban sa tanang mga kaayohan niini, ang wala-pay-Lunop nga katilingban dili maayo ug pagsugod. Ang mag-uugba niini, si Adan, maoy usa ka rebelde batok sa Diyos. Si Cain, nga magtutukod sa unang narekord nga siyudad, nagpatay sa iyang kaugalingong igsoon. Dili ikahibulong nga ang daotan kalit nga midaghan! Ang mga resulta sa depektosong panulondon nga gipasa ni Adan ngadto sa iyang mga anak nagdugangdugang.—Roma 5:12.

Ang mga butang miabot sa kinatayuktokan sa dihang si Jehova mihukom nga iyang tugotang magpadayon ang kahimtang sa 120 na lang ka tuig. (Genesis 6:3) Ang Bibliya nag-ingon: “Ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon. . . . Ang yuta napuno sa kapintasan.”—Genesis 6:5, 11.

Sa ngadtongadto, si Noe espesipikong gisultihan nga laglagon sa Diyos ang tanang unod pinaagig baha. (Genesis 6:13, 17) Bisan pag si Noe nahimong “magwawali sa pagkamatarong,” klaro kaayo nga naglisod ang mga tawo sa pagtuo nga ang tanang butang sa ilang palibot taposon. (2 Pedro 2:5) Walo ka tawo lamang ang namati sa pasidaan ug naluwas. (1 Pedro 3:20) Nganong hinungdanon kini alang kanato karong panahona?

Unsay Kahulogan Niini Alang Kanato?

Kita nagkinabuhi sa panahon nga sama sa kang Noe. Kita kanunayng makadungog ug mangilngig nga mga buhat sa terorismo, mga gubat sa pagpuo sa kaliwat, dinaghan nga pagpamatay sa mga mamumusil nga gamay ra kaayog hinungdan, ug kapintasan diha sa pamilya nga nagdaghan. Ang yuta napuno na usab sa kapintasan, ug sama sa una, ang kalibotan gipasidan-an bahin sa usa ka paghukom nga moabot. Si Jesus miingon nga siya moabot ingong tinudlong Maghuhukom sa Diyos ug maglain sa mga tawo sama sa usa ka magbalantay sa hayop nga maglain sa mga karnero gikan sa mga kanding. Kadtong makaplagan nga dili-takos, si Jesus miingon, sila “mamahawa ngadto sa walay kataposang kalaglagan.” (Mateo 25:31-33, 46) Apan, ang Bibliya nag-ingon nga niining higayona, dunay minilyon nga mangaluwas—usa ka dakong panon nga nagsimba sa bugtong matuod nga Diyos. Diha sa kalibotan nga moabot, sila makatagamtam ug dumalayong pakigdait ug kasegurohan nga wala pa sukad mahitabo.—Miqueas 4:3, 4; Pinadayag 7:9-17.

Daghan ang manamihid niining mga pulonga sa Bibliya ug sa pasidaan bahin sa pagpahamtang sa paghukom nga magpadayag nga kining mga pulonga matuod. Apan si apostol Pedro nagpatin-aw nga kining mga maduhaduhaon wala manumbaling sa mga kamatuoran. Siya nagsulat: “Sa kataposang mga adlaw adunay mangabot nga mga mabiaybiayon . . . ug magaingon: ‘Hain na man kining gisaad nga presensiya niya?’ . . . Kay, sumala sa ilang gitinguha, sila wala makamatikod niining butanga, nga dihay mga langit gikan sa kakaraanan ug usa ka yuta nga nagbarog nga lig-on gikan sa tubig ug sa taliwala sa tubig pinaagi sa pulong sa Diyos; ug pinaagi niini ang kalibotan niadtong panahona nakaagom sa kalaglagan sa dihang kini gilunopan sa tubig. Apan pinaagi sa mao gihapon nga pulong ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.”—2 Pedro 3:3-7.

Ang tibuok-kalibotan nga pasidaan bahin niining umaabot nga adlaw sa paghukom ug ang mensahe sa maayong balita bahin sa pakigdait nga mosunod madasigong ginasangyaw agig pagsunod sa matagnaong sugo ni Jesus. (Mateo 24:14) Dili angay pakamenoson kining pasidaana. Tumanon gayod sa Labing Gamhanang Diyos ang iyang pulong.

Ang Kalibotan nga Moabot

Unsay palaaboton sa katawhan, kon bahin sa umaabot nga dagkong mga hitabo? Diha sa pasiuna sa iyang iladong Wali sa Bukid, si Jesus nagsaad: “Malipayon ang mga malumog-buot, sanglit sila magapanunod sa yuta.” Dayon siya mipadayon sa pagtudlo sa iyang mga tinun-an sa pag-ampo sa Diyos: “Matuman unta ang imong kabubut-on, maingon sa langit, mao man usab sa yuta.” (Mateo 5:5; 6:10) Oo, si Jesus nagtudlo nga usa ka matahom nga umaabot ang naghulat alang sa matinumanong katawhan dinhi mismo sa yuta. Iyang gihisgotan kini ingon nga ang “paglalang-pag-usab.”—Mateo 19:28.

Busa samtang mamalandong ka sa umaabot, ayaw padala sa mga mayubiton nga magpaduhaduha kanimo sa pasidaan sa Diyos. Tinuod, ang atong palibot morag malig-on, ug ang presenteng kalibotan nagpabilin gihapon sa dugay na kaayong panahon. Bisan pa, dili kita angay mosalig niini. Ang kalibotan sa katawhan gihukman na. Nan, pamati sa panghinapos sa sulat ni apostol Pedro:

“Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova . . . Sanglit nagapaabot kamo niining mga butanga, buhata ang kutob sa inyong maarangan nga sa kataposan makaplagan kamo niya nga walay buling ug walay lama ug anaa sa pakigdait. . . . Magpadayon kamo sa pagtubo sa dili-takos nga kalulot ug sa kahibalo sa atong Ginoo ug Manluluwas nga si Jesu-Kristo.” (2 Pedro 3:11, 12, 14, 18) Busa, pagtuon gikan sa nahitabo balik sa mga adlaw ni Noe. Pakigsuod sa Diyos. Magmauswagon diha sa kahibalo bahin kang Jesu-Kristo. Ugmara ang diyosnong debosyon aron malakip sa usa sa minilyon nga mipili nga maluwas sa kataposan niining kalibotana ngadto sa makigdaitong kalibotan nga moabot.

[Hulagway sa panid 5]

Ang paggamag mga butang nga hinimo sa metal nahibaloan na sa wala pa ang Lunop

[Hulagway sa panid 7]

Usa ka matahom nga umaabot ang naghulat sa unahan