Tinuod nga Kauswagan Diha sa Bag-ong Kalibotan sa Diyos

SI, David,a usa ka Kristohanong bana ug amahan, mibalhin sa Tinipong Bansa, nga masaligon nga maayo ang iyang gibuhat. Bisan tuod dili niya gustong biyaan ang iyang asawa ug mga anak, siya nagtuo nga seguradong mahamugaway ang ilang pamuyo kon mas dako ang iyang kita. Busa iyang gidawat ang imbitasyon sa iyang mga paryente sa New York ug sa wala madugay siya nakakitag trabaho didto.

Apan paglabay sa panahon, ang malaomong panglantaw ni David nagakaawop. Halos wala na siyay panahon alang sa espirituwal nga mga kalihokan. Dihay panahon nga halos nawad-an na siyag pagtuo sa Diyos. Sa ulahi nahigmata siya sa tinuod niyang kahimtang sa dihang natental siya sa pagpakasala. Tungod kay iyang gisentro ang iyang pagtagad sa materyal nga kauswagan, siya inanayng napahilayo gikan sa tanang butang nga hinungdanon gayod kaniya. Kinahanglang mohimo siyag mga kausaban.

Sama kang David, daghan ang manglalin gikan sa kabos nga mga nasod kada tuig, nga naglaom nga moasenso ang ilang pagkabutang. Apan, sagad kaayo nga ilang naagoman ang grabeng espirituwal nga kadaot. Ang pipila nangutana, ‘Posible ba nga ang usa ka Kristohanon makapangagpas ug materyal nga mga bahandi ug sa samang higayon mahimong bahandianon usab ngadto sa Diyos?’ Ang popular nga mga magsusulat ug mga lider sa relihiyon nag-ingon nga posible kini. Apan sama sa nakat-onan ni David ug sa uban, malisdan ka sa pagkab-ot ug usa ka butang kon dili isakripisyo ang lain.—Lucas 18:24.

Ang Salapi Dili Daotan

Tinuod, ang salapi giimbento sa tawo. Sama sa ubang mga imbento, kini dili daotan. Sa pagkatinuod, kini maoy usa lamang ka galamiton nga ikapalit sa baligya ug ikabayad sa serbisyo. Busa, kon gamiton sa hustong paagi, kini mapuslanon. Pananglitan, ang Bibliya nag-ingon nga “ang salapi usa ka panalipod,” ilabina batok sa mga suliran nga nalangkit sa kakabos. (Ecclesiastes 7:12) Alang sa pipila, morag “ang salapi ang solusyon sa tanang problema.”—Ecclesiastes 10:19, New International Version).

Gisaway sa Kasulatan ang pagkatapolan ug gidasig ang pagkakugihan. Kinahanglan natong tagan-an ang atong pamilya, ug kon aduna kitay sobra, kita adunay “ikahatag sa nanginahanglan.” (Efeso 4:28; 1 Timoteo 5:8) Dugang pa, imbes ipasiugda ang paghikaw sa kaugalingon, ang Bibliya nagdasig kanato sa pagpahimulos sa atong mga nabatonan. Kita gisultihan sa “pagkuha sa [atong] bahin” ug sa pagpahimulos sa mga bunga sa atong mga kahago. (Ecclesiastes 5:18-20) Sa pagkatinuod, adunay ubay-ubayng pananglitan diha sa Bibliya sa matinumanong mga lalaki ug mga babaye nga adunahan.

Matinumanong mga Lalaki nga Adunahan

Si Abraham, nga usa ka matinumanong alagad sa Diyos, nakabaton ug dakong panon sa kahayopan, daghang plata ug bulawan, ug gatosan ka sulugoon. (Genesis 12:5; 13:2, 6, 7) Ang matarong nga si Job daghan usab ug katigayonan—kahayopan, mga sulugoon, bulawan, ug plata. (Job 1:3; 42:11, 12) Kadtong mga tawhana bahandianon bisan sa mga sukdanan karon, apan sila bahandianon usab ngadto sa Diyos.

Gitawag ni apostol Pablo si Abraham nga “amahan sa tanan nga nagbatog pagtuo.” Si Abraham wala magtinihik ni sobrang nagpabili sa iyang mga nabatonan. (Roma 4:11; Genesis 13:9; 18:1-8) Sa susama, ang Diyos mismo naghubit kang Job ingong “walay-ikasaway ug matul-id.” (Job 1:8) Siya andam gayong motabang sa mga kabos ug mga sinakit. (Job 29:12-16) Sila si Abraham ug Job misalig sa Diyos inay kay sa ilang mga bahandi.—Genesis 14:22-24; Job 1:21, 22; Roma 4:9-12.

Si Haring Solomon maoy laing pananglitan. Ingong manununod sa trono sa Diyos sa Jerusalem, si Solomon wala lamang hatagi sa Diyos ug kaalam kondili gihatagan usab siya ug daghang bahandi ug kahimayaan. (1 Hari 3:4-14) Siya nagmatinumanon halos sa tibuok niyang kinabuhi. Apan, sa dihang natigulang na siya, ang “kasingkasing [ni Solomon] wala mabug-os uban kang Jehova.” (1 Hari 11:1-8) Sa pagkatinuod, ang iyang makapasubong kasinatian nag-ilustrar sa pipila ka komon nga mga lit-ag sa materyal nga kauswagan. Tagda ang pipila niini.

Mga Lit-ag sa Materyal nga Kauswagan

Ang kinadak-ang kapeligrohan mao ang pagkahimong mahigugmaon sa salapi ug sa kon unsay mapalit niini. Diha sa pipila ka tawo, ang bahandi magpatunghag pangandoy nga dili gayod matagbaw. Sa sayong bahin sa iyang pagmando, si Solomon nakamatikod niini nga kiling diha sa ubang mga tawo. Siya misulat: “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi. Kini usab kakawangan.” (Ecclesiastes 5:10) Sa ulahi, sila si Jesus ug Pablo nagpasidaan sa mga Kristohanon bahin niining malimbongong gugma.—Marcos 4:18, 19; 2 Timoteo 3:2.

Sa dihang ang salapi mao na ang atong pangunang gikaikagan imbes gamiton lamang kini sa pagpalampos sa usa ka butang, kita dali nang mahaylo sa pagbuhat ug daotan, lakip na ang pagpamakak, pagpangawat, ug pagbudhi. Si Judas Iscariote, nga usa sa mga apostol ni Kristo, nagbudhi sa iyang agalon baylo sa 30 ka buok salapi. (Marcos 14:11; Juan 12:6) Tungod sa ilang naghingaping gugma sa salapi, ang pipila nagsimba pa gani niini inay kay sa Diyos. (1 Timoteo 6:10) Busa ang mga Kristohanon kinahanglang magmatinud-anon kon unsa gayoy ilang motibo sa pagpangitag dugang salapi.—Hebreohanon 13:5.

Ang pagpangagpas ug bahandi magpatungha usab ug mga kapeligrohan nga dili dayon mamatikdan. Una, ang kadagaya sa bahandi lagmit magdasig sa usa sa pagsalig-sa-kaugalingon. Gilakbitan kini ni Jesus sa dihang iyang gihisgotan ang “malimbongong gahom sa mga bahandi.” (Mateo 13:22) Ang magsusulat sa Bibliya nga si Santiago nagpasidaan usab sa mga Kristohanon nga dili kalimtan ang Diyos bisan sa dihang maghimog mga plano sa pagpatigayon. (Santiago 4:13-16) Tungod kay ang salapi morag mohatag man kanato ug usa ka sukod sa kagawasan, alang niadtong nakabaton niana, anaa kanunay ang kapeligrohan nga mosalig sa ilang salapi inay kay sa Diyos.—Proverbio 30:7-9; Buhat 8:18-24.

Ikaduha, sama sa naamgohan ni David, nga gihisgotan ganina, ang pagpangagpas sa bahandi sagad makakuha sa dakong bahin sa panahon ug kusog sa usa ka tawo nga kini inanayng magpahilayo kaniya gikan sa espirituwal nga mga kalihokan. (Lucas 12:13-21) Alang sa mga adunahan, anaa usab ang padayong tentasyon sa paggamit sa ilang nabatonan sa panguna alang sa mga kalingawan o personal nga mga kalihokan.

Posible kaha nga ang pagkadaot sa espirituwalidad ni Solomon sa usa ka sukod nahitabo tungod sa iyang pagtugot sa maluhong pagkinabuhi nga makahabol sa iyang panghunahuna? (Lucas 21:34) Nahibalo siya sa klarong pagdili sa Diyos sa pagpakigminyo sa mga molupyo sa langyawng mga nasod. Bisan pa niana, siya sa ngadtongadto nakabaton ug mga usa ka libo ka asawa ug mga puyopuyo. (Deuteronomio 7:3) Maikagon sa pagpahimuot sa iyang langyaw nga mga asawa, iyang gisulayan ang usa ka matang sa panagsagol sa pagtuo aron pahimut-an sila. Sumala sa gihisgotan ganina, ang kasingkasing ni Solomon inanay nga napahilayo kang Jehova.

Tin-aw nga gipakita niining maong mga pananglitan nga tinuod ang tambag ni Jesus: “Dili kamo mahimong ulipon sa Diyos ug sa Bahandi.” (Mateo 6:24) Nan, sa unsang paagi masagubang sa usa ka Kristohanon ang kalisod sa panginabuhi nga naagoman karon sa kadaghanan? Mas hinungdanon, may paglaom ba nga mabatonan ang mas maayong kinabuhi sa umaabot?

Tinuod nga Kauswagan Haduol Na

Dili sama sa mga patriarkang si Abraham ug Job ug sa nasod sa Israel, ang mga sumusunod ni Jesus gisugo sa “paghimog mga tinun-an sa katawhan sa tanang kanasoran.” (Mateo 28:19, 20) Ang pagtuman nianang sugoa nagkinahanglag panahon ug paghago nga mahimo untang gamiton diha sa sekular nga mga kalihokan. Busa, ang yawi sa kalamposan mao ang pagtuman sa gisugo ni Jesus kanato: “Nan, magpadayon sa pagpangita pag-una sa gingharian [sa Diyos] ug sa iyang pagkamatarong, ug kining tanang ubang mga butang igadugang ra kaninyo.”—Mateo 6:33.

Human nga halos mawala ang iyang pamilya ug ang iyang espirituwalidad, sa kataposan si David misubay pag-usab sa hustong dalan. Ingon sa gisaad ni Jesus, sa dihang giuna pag-usab ni David sa iyang kinabuhi ang pagtuon sa Bibliya, pag-ampo, ug ang ministeryo, ang ubang mga butang miarang-arang usab. Ang iyang relasyon sa iyang asawa ug mga anak inanayng napasig-uli. Mao man usab ang iyang kalipay ug katagbawan. Nagkugi gihapon siya. Wala siya madato. Apan, gikan sa iyang masakit nga kasinatian, iyang nakat-onan ang pipila ka hinungdanong mga leksiyon.

Si David nakahukom nga dili maalamon ang pagbalhin sa Tinipong Bansa, ug siya determinado nga dili na gayod tugotan nga ang salapi maoy moimpluwensiya sa iyang mga desisyon. Iya nang nahibaloan karon nga ang labing bililhong mga butang sa kinabuhi—usa ka mahigugmaong pamilya, maayong mga higala, ug usa ka relasyon sa Diyos—dili mapalit sa salapi. (Proverbio 17:17; 24:27; Isaias 55:1, 2) Sa pagkatinuod, ang maayong moral mas bililhon kay sa materyal nga mga bahandi. (Proverbio 19:1; 22:1) Duyog sa iyang pamilya, si David determinado nga unahon ang mas hinungdanong mga butang.—Filipos 1:10.

Ang mga paningkamot sa tawo sa pagtukod ug usa ka mauswagon apan maayog-moral nga katilingban kanunayng napakyas. Apan, ang Diyos nagsaad nga ang iyang Gingharian motagana ug daghang materyal ug espirituwal nga mga butang nga atong gikinahanglan aron magkinabuhing malipayon. (Salmo 72:16; Isaias 65:21-23) Si Jesus nagtudlo nga aron tinuod nga magmalipayon kita kinahanglang magmahunahunaon una sa atong espirituwal nga panginahanglan. (Mateo 5:3) Busa kita man adunahan o kabos sa materyal, ang pag-una sa espirituwal nga mga butang karon mao ang kinamaayohang paagi nga kita makapangandam alang sa bag-ong kalibotan sa Diyos nga haduol na. (1 Timoteo 6:17-19) Kanang kalibotana maoy usa unya ka katilingban nga mauswagon sa materyal ug espirituwal.

[Footnote]

[Mga hulagway sa panid 5]

Si Job misalig sa Diyos, dili sa iyang mga bahandi

[Mga hulagway sa panid 7]

Ang labing bililhong mga butang sa kinabuhi dili mapalit sa salapi