Hinungdanon ba Kon Unsang Relihiyona ang Imong Pilion?

KADAGHANAN kanato gustog daghang kapilian sa dihang mamalit kita. Kon lainlain ang matang sa prutas ug utanon diha sa merkado, makapili kitag mga prutas ug utanon nga kinaham nato ug maayo alang sa atong pamilya. Kon ang usa ka tindahan namaligyag barato nga sinina nga lainlain ug estilo ug kolor, kita makapili nianang bagay kanato. Sa atong kinabuhi, usahay pilion nato ang usa ka butang tungod kay mao kanay atong gusto. Ang uban atong pilion tungod kay makahatag kanag kaayohan kanato, pananglitan, pilion nato ang sustansiyadong pagkaon o maayong mga higala. Komosta man kon bahin sa pagpilig relihiyon? Mopili ba kita base sa atong gusto o base sa kon unsay makaayo kanato?

Daghan kaayong relihiyon ang kapilian. Daghang nasod karon ang naghatag ug kagawasan sa relihiyon, ug ang mga tawo nag-anam na ka gawasnon sa pagbiya sa relihiyon sa ilang mga ginikanan. Gipakita sa usa ka surbi sa Tinipong Bansa nga 80 porsiyento sa mga Amerikano “nagtuo nga dili kay usa ra ka relihiyon ang dalan sa kaluwasan.” Sumala sa mao gihapong surbi, “usa sa matag lima nga gisurbi miingon nga mibalhin siyag relihiyon sa dihang hamtong na siya.” Ang usa ka surbi sa Brazil nagpakita nga duolan sa un-kuwarto sa tanang Braziliano mibalhin ug relihiyon.

Kaniadto, lantugian gayod sa mga tawo ang mga doktrina nga nakapalahi sa usa ka relihiyon sa lain. Karon ang komon nga panglantaw mao, ‘Dili hinungdanon kon unsang relihiyona ang imong pilion.’ Apan hinungdanon ba kon unsang relihiyona ang imong pilion? Makaapektar ba kanimo ang imong pagpilig relihiyon?

Maingon nga ang maalamong mamalitay magpakisusi bahin sa gigikanan sa gibaligyang mga produkto, maalamon usab nga mangutana ka, ‘Sa unsang paagi nagsugod ang lainlaing mga relihiyon, ug ngano?’ Ang Bibliya naghatag sa tubag.

Sa Unsang Paagi Nagsugod ang mga Relihiyon?

Sa karaang Israel, si Haring Jeroboam nagtukod ug bag-ong relihiyon halos usa ka libo ka tuig sa wala pa moanhi si Jesus sa yuta. Si Jeroboam mao ang unang hari sa mibulag nga amihanang gingharian sa Israel. Nag-atubang siyag malisod nga buluhaton—ang paghiusa sa katawhan aron molampos ang iyang mga tumong. “Ang hari nakigsabot ug naghimo ug duha ka bulawan nga nating baka ug miingon sa katawhan: ‘Hago na kaayo nga kamo motungas sa Jerusalem. Ania ang inyong Diyos, Oh Israel, nga nagpagawas kaninyo gikan sa yuta sa Ehipto.’” (1 Hari 12:28) Tin-aw nga gustong gamiton sa hari ang relihiyon aron motalikod ang mga tawo sa Jerusalem, diin sila nagsimba kaniadto. Ang relihiyon nga gitukod ni Jeroboam milungtad ug pipila ka siglo ug miresulta sa pagkalaglag sa milyonmilyong tawo sa dihang gilaglag sa Diyos sa ngadtongadto ang apostatang nasod sa Israel. Ang relihiyon nga gitukod ni Jeroboam gilaraw alang sa politikal nga mga tumong. Ang pipila ka relihiyon sa Estado nga naglungtad hangtod karon gitukod usab aron palig-onon ang politikal nga gahom.

Gibutyag ni apostol Pablo ang laing motibo sa mga tawo kon nganong nagtukod silag bag-ong relihiyon sa dihang siya misulti: “Ako nahibalo nga sa akong pagbiya ang malupigong mga lobo mosulod sa inyong taliwala ug dili magtagad sa panon uban ang kalumo, ug gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.” (Buhat 20:29, 30) Ang garbosong mga lider sagad nga magtukod ug mga sekta aron mainila. Ang mga relihiyon nga nangangkong Kristohanon nabahinbahin sa daghang sekta.

Kinsay Buot Pahimut-an sa mga Relihiyon?

Sa pagsunod sa gusto sa kadaghanan, ang pipila natukmod sa pagtukod ug bag-ong relihiyon. Pananglitan, ang magasing Economist nagtaho bahin sa gitawag nga dagkong mga relihiyon sa Tinipong Bansa. Ang maong artikulo nag-ingon nga nagkadaghan ang mianib niining mga relihiyona tungod kay kini “gipasukad sa mga prinsipyo sa malamposong mga negosyo: ang mga kustomer patumanan sa gusto.” Ang uban niining mga relihiyona “naghimo sa ilang relihiyosong mga seremonyas nga makalingaw pinaagi sa paglakip ug mga video, drama, ug modernong musika.” Ang pipila ka mga lider niining mga relihiyona nangangkon nga sila nagtudlo sa ilang mga membro nga mahimong “dato, himsog ug walay mga kabalaka.” Bisan tuod gisaway ang maong mga relihiyon kay nalangkit kini sa industriya sa kalingawan o “sa kalihokan sa pagpauswag sa kaugalingon,” matod pa sa maong magasin, “igo ra silang nagtuman sa gusto sa ilang mga membro.” Ang maong taho mihinapos: “Ang pagsagol sa negosyo ug relihiyon nagmalamposon gayod.”

Bisan tuod ang ubang mga relihiyon dili kaayo mailhan nga negosyo, ang mga relihiyon nga “nagtuman sa gusto” sa mga tawo magpahinumdom kanato sa pasidaan nga gihatag ni apostol Pablo. Siya misulat: “Aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran, samtang sila moliso ngadto sa bakak nga mga sugilanon.”—2 Timoteo 4:3, 4.

Sanglit daghang relihiyon ang mitungha tungod sa tinguha nga makahupot ug politikal nga gahom, mahimong inila ug dinawat sa kadaghanan imbes pahimut-an ang Diyos, dili ikatingala nga ang relihiyon nalangkit usab sa daotang mga buhat sama sa pag-abuso sa mga bata, pagpanikas, gubat, o terorismo. Kasagaran, ang relihiyon usa ka panglimbong. Unsay imong buhaton aron dili ka malimbongan?

[Blurb sa panid 4]

Daghang relihiyon ang mitungha tungod sa tinguha nga makahupot ug politikal nga gahom, mahimong inila ug dinawat sa kadaghanan imbes pahimut-an ang Diyos