Among mga Magbabasa Nangutana
Nalunopan ba Gayod ang Tibuok Yuta sa Adlaw ni Noe?
Ang Lunop sa adlaw ni Noe nahitabo kapin sa 4,000 ka tuig kanhi. Busa walay usa sa nakasaksi sa maong panghitabo ang makasugilon kanato karon bahin niana. Apan, adunay sinulat nga asoy bahin sa maong katalagman, nga nag-ingon nga gisanapan sa tubig bisan ang kinatas-ang bukid nianang panahona.
Ang maong basahon sa kasaysayan nag-ingon: “Ang lunop nagpadayon sulod sa kap-atan ka adlaw diha sa yuta . . . Ug ang mga tubig misanap sa yuta sa hilabihan gayod nga niana ang tanang hatag-as nga mga bukid ilalom sa tibuok kalangitan natabonan. Hangtod sa napulog-lima ka maniko [mga 22 ka piye] nga ang mga tubig misanap kanila ug ang kabukiran natabonan.”—Genesis 7:17-20.
Tingali ang uban naghunahuna nga ang sugilanon bahin sa tibuok-yutang Lunop maoy usa lamang ka tumotumo o kaha paghinobra. Sayop kana nga pagtuo. Sa pagkatinuod, dako gihapong bahin sa yuta ang gisanapan sa tubig bisan karon. Ang dagat naglangkob ug mga 71 porsiyento sa nawong sa yuta. Busa, anaa gihapon ang tubig sa lunop. Ug kon mahilis ang dagkong mga yelo ug ang yelo sa North Pole ug South Pole, ang tubig sa dagat motaas ug masanapan ang mga siyudad sama sa New York ug Tokyo.
Ang mga geologo nga nagtuon sa dagway sa yuta sa amihanan-kasadpang Amerika nagtuo nga mokabat ug 100 ka dagkong mga baha ang nahitabo kaniadto sa maong dapit. Ang usa kono niana miabot ug 600 metros ang gitas-on sa tubig, ug mibul-og sa gikusgon nga 105 kilometros kada oras—usa ka baha diin ang gidaghanon sa tubig mikabat ug 2,000 kilometro kubiko ug ang gibug-aton niini mikabat ug duha ka trilyong tonelada. Susama usab niini ang resulta sa mga pagtuon nga gihimo sa ubang mga siyentipiko, mao nga ang pipila kanila nagtuo nga posibleng nahitabo ang usa ka tibuok-yutang lunop.
Apan, alang niadtong nagtuo nga ang Bibliya Pulong sa Diyos, ang tibuok-yutang lunop tinuod gayod nga nahitabo. Si Jesus miingon sa Diyos: “Ang imong pulong maoy kamatuoran.” (Juan 17:17) Si apostol Pablo misulat nga kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:3, 4) Makatudlo kaha si Pablo sa mga sumusunod ni Kristo sa kamatuoran bahin sa Diyos ug sa iyang katuyoan kon ang Pulong sa Diyos naundan pa ug mga tumotumo?
Si Jesus nagtuo gayod nga nahitabo ang tibuok-yutang Lunop. Sa iyang gibantog nga tagna bahin sa iyang presensiya ug sa kataposan sa sistema sa mga butang, iyang gitandi ang mga panghitabo niana sa mga panghitabo sa adlaw ni Noe. (Mateo 24:37-39) Si apostol Pedro misulat usab bahin sa lunop sa adlaw ni Noe: “Pinaagi niini ang kalibotan niadtong panahona nakaagom sa kalaglagan sa dihang kini gilunopan sa tubig.”—2 Pedro 3:6.
Kon dili pa tinuod ang asoy bahin kang Noe ug sa tibuok-yutang lunop, nan dili katuohan ang mga pasidaan ni Pedro ug Jesus alang niadtong nagkinabuhi sa kataposang mga adlaw. Imbes magsilbing pasidaan, kana makapalibog hinuon sa usa ug makapawala sa iyang kahigayonan nga maluwas sa kasakitan nga mas dako pa kay sa Lunop sa adlaw ni Noe.—2 Pedro 3:1-7.
Sa paghisgot bahin sa iyang padayong pagpakitag kaluoy sa iyang katawhan, ang Diyos miingon: “Ingon nga ako nanumpa nga ang katubigan ni Noe dili na moagi sa yuta, ako nanumpa usab nga dili na ako masuko kanimo ni magbadlong kanimo.” Segurado kita nga ang Lunop misanap sa tibuok yuta sa adlaw ni Noe. Busa makaseguro usab kita nga pakitaan sa Diyos ug mahigugmaong-kalulot kadtong nagasalig kaniya.—Isaias 54:9.