Nganong Sundon ang Sukdanan sa Bibliya?

KINARAAN na ba ug mapig-oton ang panglantaw sa Bibliya bahin sa sekso? Dili. Sa kasukwahi, makatabang kini kanato nga malikayan ang:

▪ Mga sakit nga mapasa sa pagpakigsekso

▪ Dili-angayng pagmabdos

▪ Masakit nga resulta sa nabungkag nga kaminyoon

▪ Nahasol nga tanlag

▪ Ubos nga pagtamod sa kaugalingon kay mibating gipahimuslan sa uban

Ang atong Maglalalang, si Jehova nga Diyos,a buot nga kita malipay ug makabatog kaayohan sa iyang mga gasa. Ang Diyos mao “ang Usa nga nagtudlo kanimo aron ikaw makabaton ug kaayohan.” (Isaias 48:17) Ang magkinabuhi sumala sa mga lagda sa Bibliya bahin sa sekso makabatog:

▪ Pag-uyon sa Diyos

▪ Kalinaw sa hunahuna

▪ Mas lig-ong relasyon sa pamilya

▪ Maayong reputasyon

▪ Pagtahod sa kaugalingon

Apan, komosta kon sa pagkakaron wala ka magsunod sa moral nga sukdanan sa Bibliya? Posible bang mabag-o nimo ang imong pagkinabuhi? Hinumdoman pa ba sa Diyos ang imong nangaging binuhatan?

Hunahunaa kini: Ang pipila sa unang-siglong Kristohanong kongregasyon maoy kanhing mga makihilawason, mananapaw, ug homoseksuwal. Ilang gibag-o ang ilang kinabuhi, ug sila nakabatog kaayohan. (1 Corinto 6:​9-11) Karon, linibo ka indibiduwal sa tibuok kalibotan ang nagbag-o usab. Ilang gibiyaan ang mahilayong pagkinabuhi ug sila nakabatog kaayohan tungod sa pagsunod sa sukdanan sa Bibliya. Pananglitan, matikdi ang eksperyensiya ni Sarah, nga gihisgotan sa unang artikulo.

“Nahupayan Dayon Ko”

Nakita ni Sarah nga ang iyang mapatuyangong pagkinabuhi wala maghatag kaniya sa kagawasan ug katagbawan nga iyang gipangandoy. “Akong gibati nga gikubalan na ang akong tanlag,” siya miingon. “Ako nabalaka nga basig momabdos ko ug mataptag grabeng sakit. Wala gyod ko malimot nga ang Diyos naglungtad, ug nasayod ko nga ang akong pagkinabuhi nakapasakit kaniya. Gibati nako ang kahugaw, ug kana nakahasol pag-ayo sa akong hunahuna.”

Sa ngadtongadto, nagbag-o ra si Sarah. Siya nangayog tabang sa iyang ginikanan nga mga Saksi ni Jehova. Miduol sab siya sa Kristohanong mga ansiyano sa ilang kongregasyon. “Nalipay ko sa kalulot ug gugma nga gipakita sa akong ginikanan ug sa mga ansiyano,” matod ni Sarah. “Nahupayan dayon ko.”

Karon si Sarah duna nay duha ka anak. Siya miingon, “Akong gisultihan ang akong mga anak bahin sa mga desisyon nako kaniadto. Buot nakong masabtan nila kon sa unsang paagi ako naapektohan sa pagsalikway nako sa sukdanan sa Diyos. Gusto nakong tabangan sila nga maapresyar ang pisikal, mental, ug emosyonal nga kaayohan sa pagsunod sa sukdanan sa Diyos bahin sa sekso. Kombinsido ko nga ang Diyos naghatag kanatog moral nga sukdanan kay dili niya buot nga kita masakitan.”

Ikaw usab makabatog kaayohan sa pagsunod sa mahigugmaong giya sa Diyos. Ang Bibliya nagsaad: “Ang mga sugo ni Jehova matul-id, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata. . . . Sa pagtuman kanila adunay dakong ganti.”​—⁠Salmo 19:​8, 11.b

[Mga footnote]

[Blurb sa panid 8]

Ang nagsalikway sa sukdanan sa Bibliya sagad makapahinabog kasakit

[Blurb sa panid 9]

Ang nagsunod sa sukdanan sa Bibliya dunay hinlong tanlag ug mas lig-ong relasyon sa pamilya