Gasa nga Walay Sama

ANG barkobarkong tahal nga gikuptan ni Jordan ordinaryo ra kaayo. Pero bililhon kaayo kini kaniya. “Gihatag kini ni Lolo Russell nga higala sa among pamilya sa bata pa ko,” miingon si Jordan. Dihang namatay si Russell, nahibaloan ni Jordan nga dakog natabang si Russell sa iyang apohan ug sa iyang ginikanan sa panahong naglisod sila. “Karon nga daghan na kog nahibaloan bahin kang Lolo Russell,” si Jordan miingon, “mas napabilhan nako kining gamayng gasa.”

Sama sa gipakita sa kasinatian ni Jordan, ang usa ka regalo tingali ordinaryo ra para sa uban. Pero sa mapasalamatong tawo nga nakadawat, kini bililhon o dili matumbasan ug kuwarta. Ang Bibliya naghisgot ug usa ka bililhon kaayong gasa pinaagi niini nga mga pulong: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”​—Juan 3:16.

Usa ka gasa nga makahatag sa nakadawat ug kinabuhing walay kataposan! Duna pa bay makalabaw niana? Bisag wala pabilhi sa uban ang maong gasa, bililhon kana sa tinuod nga mga Kristohanon. (Salmo 49:8; 1 Pedro 1:18, 19) Apan nganong gihatag sa Diyos ang iyang Anak ingong gasa alang sa katawhan?

Si apostol Pablo miingon: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo.” (Roma 5:12) Ang unang tawo, si Adan, nakasala pinaagi sa tinuyong pagsupak sa Diyos ug busa siya gisilotan ug kamatayon. Tungod niya, ang tanan niyang kaliwat mamatay.

“Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Aron makalingkawas ang katawhan sa kamatayon, gipadala sa Diyos ang iyang Anak, si Jesu-Kristo, sa yuta aron ihalad ang iyang hingpit nga kinabuhi. Tungod niana nga sakripisyo, nga gitawag ug “lukat,” ang tanang magpakitag pagtuo kang Jesus makabatog kinabuhing walay kataposan.​—Roma 3:24.

Kon bahin sa mga panalangin nga ihatag sa Diyos sa iyang mga magsisimba pinaagi kang Jesu-Kristo, si Pablo miingon: “Salamat sa Diyos tungod sa iyang dili-mahubit nga walay bayad nga gasa.” (2 Corinto 9:15) Ang lukat kahibulongan kaayo nga dili nato kana mahubit sa paagi nga bug-os natong masabtan. Pero sa tanang maayong mga gasa sa Diyos, nganong talagsaon ang lukat? Nganong walay sama niini nga gasa?a Ug unsay atong himoon aron ipakita nga kita nagpabili niana? Gidapit ka namo nga basahon ang mga tubag sa Bibliya niini nga mga pangutana sa sunod nga duha ka artikulo.