Pag-abag sa Uban sa Pagsunod sa Hustisya
1 “Ang Bato, hingpit ang iyang binuhatan, kay ang tanan niyang mga paagi maoy hustisya.” (Deut. 32:4) Kining mga pulonga sa karaang awit nagapasiugda sa usa sa lintunganayng mga hiyas ni Jehova, nga mao ang hustisya. Tungod kay nagbuhat kanato diha sa iyang larawan ug pagkamao, si Jehova hustong nagadahom kanato sa ‘pagbuhat ug hustisya sa paglakaw uban sa atong Diyos.’—Miq. 6:8; Gen. 1:26.
2 Ang atong mga panlimbasog sa pagsundog kang Jehova madayag kaayo didto sa “Balaang Hustisya” Distritong mga Kombensiyon nga naeskedyol sa Pilipinas. (Efe. 5:1) Mga linibo sa atong mga igsoon uban sa dakong kahinam nagapaabot niining “Balaang Hustisya” nga kombensiyon. Ikaw ba nakahimo na ug tinong mga kahikayan sa pagtambong sa kada sesyon?
PIPILA TALAGSAONG MGA BAHIN
3 Gikan sa Huwebes ngadto sa Domingo, ang dagayang bahin sa espirituwal nga pagkaon nga nagapasiugda sa panginahanglang ituboy ang balaang hustisya igabayang pinaagig mga pahayag sa Bibliya, mga pasundayag, mga interbiyu, ug mga drama. Dugang pa, ang programa maglakip sa mga eksperiyensiya ug impormasyon bahin sa mga kalihokan sa atong mga igsoong lalaki ug babaye nga nagaalagad diha sa misyonaryong buluhaton. Ang pipila niini nga mga misyonaryo basin makatambong sa inyong kombensiyon ug mahimong anaa sa programa. Ang ilang ehemplo sa malig-ong pagdapig sa balaang hustisya, sagad diha sa taliwala sa malisod kaayong mga kahimtang, makadasig kanato sa pagkinabuhi ug pagbuhat uyon sa balaang hustisya diha sa atong tanang mga pakiglabot.
PAGBULIG SA UBAN
4 Ikaw ba sa personal nakadapit na sa imong mga estudyante sa Bibliya sa pagtambong sa maong kombensiyon? Sila makapaniid gayod sa kalipay sa katawhan ni Jehova ug magpakombensir kanila sa katakos ni Jehova sa pagpahunong sa tanang inhustisya. Kini nga kombensiyon makahimog lisoanang punto diha sa ilang kinabuhi, nga nagapalihok kanila sa paghimog tinong pagbarog dapig sa Diyos sa hustisya.
5 Bisan tuod kita magatambong ug usa ka kombensiyon ug basin magbakasyon sulod sa maong bulan, gusto tang mentinahon ang maayong eskedyol alang sa pag-alagad sa kanataran, ug paneguroong makataho sa atong binuhatan sa pagsangyaw ngadto sa atong kongregasyon. Pangitag mga higayon nga makasulti ngadto sa uban bahin sa paglaom sa Gingharian diha sa tukmang mga okasyon.
6 Hinaot nga kita bug-os mapatuhop diha sa teokratikanhong buluhaton samtang kita magakatigom alang sa “Balaang Hustisya” nga Distritong mga Kombensiyon ug samtang kita magapakig-ambit diha sa ministeryo sa kanataran.