Paghupot sa Atong Gingharianong Panaghiusa
1 Unsa man ang Gingharianong panaghiusa, ug unsaon man nato paghupot kana? Ang Gingharian sa Diyos mao ang tema sa tibuok Bibliya. Kanang Ginghariana maoy tinuod nga kagamhanan, nga may gahom ug awtoridad. Mao kana ang tema sa pagwali ni Jesus. (Mat. 4:17) Ang pagpabiling suod sa organisasyon ni Jehova, pagtuman sa buluhatong pagwali, ug pagpabiling nahimulag sa kalibotan makapahimo natong maghupot sa atong Gingharianong panaghiusa. Pinaagi sa atong linihokan ug sinultihan, atong gipakita nga kita dapig sa Gingharian.—Juan 18:37.
2 Sukad sa 1914, ang Gingharian nahimong usa ka katinuoran alang sa minilyon nga mga ginsakupan. Ang panaghiusa nga gipasundayag niining maong mga sakop sa Gingharian maoy dakong kasukwahi sa usa ka nabahin nga kalibotan. Kinahanglang himoon natong tinuod ang Gingharian sa atong mga kinabuhi kon himoon man kining usa ka nagpahiusang puwersa. Unsa ang nakapahimo niining tinuod nganhi kanato?
3 Sama sa ubang mga kagamhanan, ang Gingharian may usa ka hugpong sa mga balaod. Apan, kini napalahi tungod kay ang mga balaod niini makaplagan diha sa Bibliya. Ang personal nga pagtuon sa Bibliya ug sa mga basahon gikan sa “matinumanon ug mabuot nga ulipon” magatabang kanato sa pagpadapat sa mga balaod sa Diyos sa atong matag adlaw nga mga kinabuhi. (Mat. 24:45) Samtang buhaton nato kini, nagakauswag ang pagkatinuod sa Gingharian nganhi kanato, nga mas magpasuod kanato, nga maghimo natong usa ka nahiusang pamilya sa mga magsisimba ubos sa pagmando ni Jesus.
4 Panaghiusa Pinaagi sa Gingharianong Pagwali: Ang atong pagwali sa Gingharian “uban ang panag-uyon” nagahiusa kanato samtang nagapaningkamot kita sa “paghimaya” kang Jehova. (Roma 15:5, 6) Ang masibotong pagpakig-ambit uban sa atong isigka-magbubuhat sa tibuok yuta nagapalig-on sa atong pagtuo ug nagatugot sa espiritu ni Jehova sa paglihok pinaagi kanato sa pagpalampos sa iyang kabubut-on. Ang “daghang buhaton diha sa buluhaton sa Ginoo” nagahimo kanatong “malig-on, dili-matarog.”—1 Cor. 15:58.
5 Sa daghang kayutaan, si Satanas nagasulay sa pagbungkag sa atong panaghiusa pinaagi sa pagbalda sa atong buluhatong pagwali. Siya nagagamit sa tanang paagi nga anaa kaniya sa pagpatunghag panaglalis ug pagmugnag di-pagsinabtanay, sa pagsulay sa paghimog kabingkilan ug panag-away. (Prov. 6:19; Gal. 5:19-21, 26) Buot niya nga ilangkit kita sa mga panagsumpakiay sa kalibotan ug pagdapig sa politikanhon ug sosyal nga mga gumonhap. (Sant. 3:14-16) Ang Kasulatan nagaawhag kanato sa pagsukol sa iyang impluwensiya; kay kondili, siya magalamoy kanato ingon sa iyang tukbonon. (1 Ped. 5:8, 9) Ang katinuoran sa paglaom sa Gingharian kinahanglang dili tugotan nga mahanaw gikan sa atong mga kasingkasing ug mga hunahuna.
6 Kon ang kalisdanan motungha, ilabina kon kini nagalangkit sa atong mga igsoon, kinahanglang ipasundayag nato ang mga bunga sa espiritu aron mahuptan ang kalinaw. Ang kalibotanong mga taras, sama sa garbo, ug kasina, makapabahinbahin ug kinahanglang buntogon. (Efe. 4:1-3; Col. 3:5-10, 12-14) Ang Gingharian usa gayod ka katinuoran sa atong mga kinabuhi! Apan angay kitang magtukaw aron huptan kana nianang paagiha.—Efe. 6:11, 13.
7 Ang katinuoran sa atong kahibulongang paglaom sa Gingharian nagahiusa kanato diha sa usa ka espiritu sa pagkausa nga dili gayod matapos.—Sal. 133:1.