Pangutana

▪ Unsa ang tukmang paggamit sa mga terminong “brother” ug “sister”?

Sa dihang gamiton diha sa literal nga kahulogan, ang mga terminong “brother” ug “sister” nagapunting ngadto sa mga indibiduwal kinsa managsamag mga ginikanan. Kining kinaiyanhong relasyon kasagaran nagamugnag usa ka mainitong kalabotan.

Gitudloan kita ni Jesus sa pagtawag kang Jehova diha sa pag-ampo sama sa “Amahan Namo.” Kini nagapasabot nga ingong mga Kristohanon, kitang tanan maoy bahin sa usa ka suod pamilyahanong gambalay. Busa giingnan ni Jesus ang iyang mga sumusunod: “Tanan kamo mga igsoon.”—Mat. 6:9; 23:8.

Tungod sa atong suod espirituwal nga kalabotan sulod sa panimalay sa Diyos, ginatawag nato ang usag usa ingong “Brother” ug “Sister,” ilabina diha sa mga tigom sa kongregasyon. Sulod niining mga tigoma, ang usa nga nagadumala nagaila sa bawtismadong mga indibiduwal pinaagig paggamit sa ekspresyong “brother” o “sister” nga sundan sa apilyedo sa maong tawo.

Unsa na man kon ang di-bawtismadong tawo buot nga moambit diha sa mga tigom? Sa dihang ang usa ka tawo nagpakig-uban nga dugaydugay na ug nagapadulong na sa pagpahinungod, nga nagaisip sa iyang kaugalingon nga mahimong usa sa mga Saksi ni Jehova, wala man ing pagsupak sa pagtawag kaniyang “Brother”o “Sister.” Kini ilabinang tukma kon ang indibiduwal nahimo nang usa ka di-bawtismadong magmamantala.

Sa laing bahin, ang interesadong mga tawo kinsa bag-o pa lamang nagsugod sa pagtambong ug mga tigom wala pa makahimo sa mga lakang nga nagapaila kanila ingong bahin sa panimalay sa Diyos. Kining maong mga indibiduwal dili pagatawgon ingong “Brother” o “Sister,” sanglit ang espirituwal nga relasyon sa pamilya sa Diyos wala man magalungtad sa ilang kahimtang. Busa sa panahon sa mga tigom, tawgon nato sila sa mas pormal nga paagi, nga nagagamit sa tukmang titulo sama sa “Mr.” Duyog ang ilang apilyedo.

Ang paggamit sa ekspresyong “brother” ug “sister” diha sa atong mga tigom nagabutyag sa usa ka bugkos nga mas suod kay sa bisan unsang gibutyag pinaagig paggamit sa unang mga ngalan. Kini nagapahinumdom kanato sa bulahan kaayong relasyon nga atong ginatagamtam ingong espirituwal nga pamilya ubos sa usa ka Amahan, si Jehova nga Diyos.—Efe. 2:19; 1 Ped. 3:8.