Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • km 12/99 p. 3-4
  • Maalamong Gamita ang Atong Literatura

Walay video nga available.

Sorry, dunay problema sa pag-load sa video

  • Maalamong Gamita ang Atong Literatura
  • Atong Ministeryo sa Gingharian—1999
Atong Ministeryo sa Gingharian—1999
km 12/99 p. 3-4

Maalamong Gamita ang Atong Literatura

1 Sulod sa Septiyembre ug Oktubre niining tuiga, ang espesyal nga mga miting gipahigayon sa tibuok Pilipinas uban sa mga ansiyano ug ministeryal nga mga alagad sa paghisgot sa bag-ong kahikayan alang sa gipayanong pag-apod-apod sa literatura nga moepekto sa Enero 10, 2000. Sunod niining mga mitinga, human sa Pagtuon sa Bantayanang Torre alang sa semana sa Nobyembre 1, usa ka sulat ang gibasa sa tanang kongregasyon aron hisgotan ang mga pangutana maylabot niining bag-ong kahikayan. Dayon, sulod sa semana sa Nobyembre 8, usa ka espesyal nga Tigom sa Pag-alagad ang gihimo sa tanang kongregasyon aron ipakita kon sa unsang paagi ang atong pagsangyaw nga buluhaton dumalahon ilalom sa bag-ong kahikayan. Kami makaseguro nga ang tanan andam na karon sa pagsugod niining kahikayana sa Enero 10, human gilayon sa atong kataposang distritong kombensiyon.

2 Sanglit kita motanyag sa atong literatura ug mga magasin nga walay tinong kantidad ngadto sa publiko, hinungdanon kaayo nga atong gamiton ang kaalam sa pag-apod-apod sa atong mga publikasyon. Padayon natong palihokon ang interes pinaagi sa paggamit ug usa sa mga introduksiyon gikan sa librong Nangatarongan. Kon walay interes nga gipakita, wala kinahanglana nga itanyag ang literatura. Dili nato buot usikan ang bisan unsang literatura pinaagig pagtanyag niana ngadto kanilang walay interes. Apan kon ang interes gipakita ug ang tagbalay mouyon nga basahon ang literatura, mahimo kining itanyag. Buot natong gamiton nga maalamon ang atong literatura.

3 Ang mosunod mao ang pipila ka komento nga tingali imong himoon human nga ipakita ang literatura: “Kon malipay ka sa pagbasa niining publikasyona, ako malipay sa pagbilin niini kanimo.” Lagmit ang tagbalay mangutana: “Pilay kantidad niana?” Ikaw makatubag: “Kami wala malangkit sa usa ka komersiyal nga buluhaton. Dili namo ginabaligya kini nga literatura. Ang buluhaton nga among ginahimo boluntaryong ginabuhat diha sa 233 ka nasod sa tibuok kalibotan aron tabangan ang mga tawo nga makakat-on sa dalan ngadto sa kinabuhing walay kataposan. Kon buot nimong mohatag ug donasyon alang niining buluhatona, ako malipay sa pagdawat niana.”

4 Sa pipila ka kaso, ang ulohan bahin sa mga donasyon alang sa atong tibuok-kalibotang buluhaton tingali dili haom nga hisgotan. Pananglitan, usa ka interesadong tagbalay hayan mosukna: “Ihatag ba nimo kana nga libre?” Kita mahimong motubag: “Kon buot nimong mobasa sa publikasyon ug buot makabaton niini, oo, imong mabatonan. Sa sunod semana gusto kong mobalik aron hisgotan ang atong naestoryahan ug isugid kanimo ang dugang pa bahin sa among tibuok-kalibotang buluhaton.” Sa sunod nga duaw ang tagbalay mahimong pahibaloon kon sa unsang paagi ang atong buluhaton gisuportahan sa panalapi.

5 O ang tagbalay mahimong dihadiha modawat sa literatura ug moingon, “Salamat.” Ikaw makasanong pinaagig pag-ingon: “Walay sapayan. Ako nasayod nga ikaw malipay niana. Daghan ang nahibulong kon sa unsang paagi kining buluhatona gisuportahan sa panalapi, sanglit ginabuhat namo kini sa tibuok kalibotan. Daghan nga midawat sa among mga publikasyon nagpahayag ug apresasyon tungod sa ilang nakat-onan ug boluntaryong mihatag ug gamayng donasyon aron ikapadayon ang dugang pag-apod-apod. Kon himoon kana sa mga tawo, kami malipay sa pagdawat niana.”

6 Dayag nga ang atong tuyo maoy dili sa pag-apod-apod sa literatura ngadto ni bisan kinsa na lang. Buot nato nga ang literatura makatabang sa sinserong mga tawo sa pagkat-on ug dugang bahin sa mga katuyoan ni Jehova. Maoy pag-usik-usik nga ibilin ang literatura sa mga tawo nga dili mopabili sa espirituwal nga mga butang. (Heb. 12:16) Unsaon nato pagkahibalo kon ang interes gipakita? Kon ang tawo buot nga makighinabi kanimo, maayo kini nga timailhan. Kon siya maminaw gayod sa dihang mosulti ka, o mopahayag sa iyang opinyon, o mosuknag pangutana, kana nagapakitag interes. Kon siya mosulti kanimo sa mabination, matinahurong paagi, nagabutyag kinig mabinationg tinamdan. Ang pagsunod samtang ginabasa mo ang Bibliya nagapasabot ug pagtahod sa Pulong sa Diyos. Sa dihang imong mapanid-an ang maong mga ebidensiya sa tim-os nga interes, lagmit ang maong tawo mobasa ug mopabili sa literatura nga iyang madawat.

7 Ang bisan unsang mga amot nga madawat gikan sa publiko kinahanglang ibutang diha sa contribution box didto sa Kingdom Hall nga gimarkahag “Contributions for the Society’s Worldwide Work.​—Matthew 24:14.” Atong gipabilhan ang maong mga amot, apan sa pagkatinuod, ang maong mga amot gikan sa publiko dili igo sa paghulip sa tanang galastohan nga nalangkit. Nan, kinsa karon ang may pangunang responsabilidad sa pagsuportar sa tibuok-kalibotang buluhaton, nga naglakip sa paggama, pagpadala, ug pag-apod-apod sa literatura ug mga magasin? Mao ang katawhan ni Jehova mismo ang nagapaluyo sa tibuok-kalibotang buluhaton. Busa, sugod sa Enero, kitang tanan kinahanglang magmahunahunaon ug magmasistematiko sa pag-amot. Daghan ang mopalabi sa pag-amot sa panahon sa ilang pagkuhag literatura ug mga magasin gikan sa counter sa Kingdom Hall, sanglit niining paagiha sila mapahinumdoman nga ang literatura naggastog salapi sa paggama ug sa aktuwal maoy bahin sa tibuok-kalibotang kalihokan sa pagsangyaw.

8 Samtang ang mga amot kanunayng boluntaryo, kining kahikayana motugot sa indibiduwal nga panlimbasog ug matanlagong pagtagad aron mahulipan ang mga galastohan sa gitultolan-sa-espiritu nga organisasyon ni Jehova. Karon ang matag usa kanato adunay dugang moral nga responsabilidad ug pribilehiyo sa pagpasidungog kang Jehova uban sa atong bililhong mga butang. (Prov. 3:9) Kon sa unsang paagi kita mosanong sa mga pagtultol sa espiritu ni Jehova samtang kita mohatag sa atong mga amot mopabanaag sa atong dugang pagkaamgo nga si Jehova nag-isip kanato nga kasaligan.​—1 Cor. 4:​1, 2.

9 Kini nga kausaban sa atong paagi sa pagsangyaw nagtaganag dugang pamatuod ngadto sa mga tawo nga ‘kita dili mga nagasuroyng-tigbaligya sa pulong sa Diyos.’ (2 Cor. 2:17) Kini nagpamatuod usab nga kita lahi gayod ug bulag gikan sa kalibotan.​—Juan 17:14.

10 Kita masaligon nga silang moapresyar sa bililhong kamatuoran sa Pulong sa Diyos ug sa kahinungdanon sa mga tagana sa Sosyedad, nga naglakip sa paggama sa atong mga publikasyon, padayong mapalihok nga kinasingkasing sa pag-amot nga madagayaon alang niining buluhatona hangtod gayod sa kataposan niining sistemaha. (2 Cor. 9:​6-14) Kita makasalig sa bug-os kang Jehova, kay nahibalo nga siya “makahimo sa pagbuhat ug labaw pa sa labihan kamadagayaon nga lapaw sa tanang butang nga atong ginapangayo o ginahunahuna.” (Efe. 3:20) Apan, aron makadawat sa bug-os nga panalangin ni Jehova, paneguroon nato nga atong gibuhat ang atong bahin pinaagi sa maalamong paggamit sa atong literatura ug pinaagi sa ‘pagdala sa tanang ikapulo ngadto sa balay-tipiganan.’ (Mal. 3:10) Hinaot nga panalanginan ni Jehova ang atong hiniusang mga panikaysikay sa pagbuhat niini sa umaabot nga tuig.

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa