Nameligro ang mga Kinabuhi!

¹ Gitin-aw sa Bibliya ang kabubut-on ni Jehova “nga ang tanang matang sa mga tawo maluwas.” Apan, tinuod usab nga ang mga kalaoman sa kinabuhi sa bilyonbilyon sa yuta nagdepende sa ilang tinamdan kang Jehova nga Diyos ug sa iyang Gingharian pinaagi ni Jesu-Kristo. Ang hustong tinamdan mahimong ipasukad lamang diha sa “tukmang kahibalo sa kamatuoran.” (1 Tim. 2:​3, 4) Samtang nagpahibalo nga sa dili madugay ang yuta pagahinloan sa tanang pagkadaotan aron hatagag dalan ang bag-ong kalibotan sa pagkamatarong sa Diyos, kita usab gisugo sa pagtuman sa usa ka hinungdanong makaluwas-sa-kinabuhi nga buluhaton.​—Mat. 24:​14; 28:​19, 20; Roma 10:​13-​15.

² Nganong Dinalian Kaayo? Si Jesus nagpasidaan bahin sa “dakong kasakitan ingon nianang wala pa mahitabo sukad sa sinugdan sa kalibotan.” (Mat. 24:21) Kana nga kasakitan modangat sa sangkoanan niini sa Armageddon. (Pin. 16:16) Ang kadaghanan sa katawhan nag-atubang sa pagkalaglag kon sila mapakyas sa pagsanong sa maayong balita nga naglakip sa atong di-magtutuong mga paryente, mga silingan, mga kauban sa trabaho, mga kauban sa eskuylahan, ug mga kaila. Apan ang atong kabalaka mao ang pag-abot sa “tanang matang sa mga tawo” agig pagsundog sa Diyos, kinsa nagpasundayag sa iyang gugma alang sa tibuok kalibotan sa katawhan pinaagi sa iyang Anak, si Jesu-Kristo, ingong usa ka lukat alang sa tanan. (Juan 3:16) Kita kinahanglang masibotong manlimbasog sa pagdapit sa tanan sa pagkalagiw ngadto sa luwas nga dapit sa Diyos. Pinaagi sa bug-os nga pagtuman sa buluhatong pagsangyaw, atong malikayan ang pagkasad-an sa dugo.​—Ezeq. 33:​1-7; 1 Cor. 9:16.

³ Unsay Atong Tumong? Ang kahinungdanon sa buluhatong pagsangyaw gipasiugda sa tibuok Pulong sa Diyos. Sumala sa gipahayag ni apostol Pablo, ‘ang gugma nga iya sa Kristo nagatukmod kanato’ sa pagkinabuhi nga uyon sa mga paagi sa Diyos. (2 Cor. 5:14) Dugang pa, Ang Bantayanang Torre sagad nagpasiugda sa atong obligasyon sa pagsangyaw. Ang Atong Ministeryo sa Gingharian padayong nagtaganag pagtultol kon unsaon paghimo ang buluhatong pagsangyaw. Ang mga ansiyano nag-organisar sa buluhaton ug nagdasig kanato sa pagpakig-ambit niana. Ang kaubang mga magmamantala nagdapit kanato sa pagpakig-ambit uban nila diha sa ministeryo. Daghan kitag nadungog bahin sa pag-andam sa atong mga presentasyon, pagtanyag ug mga magasin ug ubang literatura, paghimog mga balikduaw, pagdumalag mga pagtuon sa Bibliya, ug paggamit sa tanang kahigayonan sa paghatag ug pamatuod. Kining tanan nagtabang kanato sa pagpalampos sa tumong sa pagluwas ug mga kinabuhi.​—1 Cor. 9:​22, 23; Efe. 1:13.