Malamposong Pagpakig-ambit Diha sa Atong Nagaluwas-Kinabuhing Ministeryo
1 Gipahiangay ni apostol Pablo ang iyang presentasyon sa maayong balita aron iyang ‘maluwas sa bisan unsa mang paagi ang pipila.’ (1 Cor. 9:19-23) Sa susama, kita mas magmalamposon diha sa atong ministeryo kon kita alisto sa pag-ila sa mga interes sa tagbalay ug andam sa pagpahiangay sa atong panaghisgot sumala sa iyang mga panginahanglan.
2 Human ipailaila ang imong kaugalingon, mahimo nimong sugdan pinaagi sa imong kaugalingong mga pulong nga sama niini:
◼“Daghang tawo nawad-ag paglaom sa dayag nga kawalay-katakos sa mga kagamhanan sa kalibotan sa pagtaganag mosaler nga mga solusyon sa mga problema sa atong mga panahon. Sa imong hunahuna aduna ba ing usa ka kagamhanan nga igong makaatiman sa atong tanang panginahanglan? [Tugoting motubag.] Nahibalo ka ba nga kita adunay kasaligang saad bahin sa usa ka kagamhanan nga tinong mowagtang sa tanang problema nga atong giatubang?” Paminawa pag-ayo ang tubag sa tagbalay. Depende sa iyang isulti, mag-andam ug usa sa pipila ka lainlaing presentasyon.
3 Kon ang mga komento sa tagbalay nagpaila nga siya nag-angkon nga usa ka Kristohanon, mahimo dayon natong suknaon kon siya ba nag-ampo sa “Amahan Namo.” Kon siya motubag nga apirmatibo, mahimo natong basahon ang modelong pag-ampo ngadto sa punto nga kini nag-ingon, “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mat. 6:9, 10) Kini nagpamatuod nga moabot ra ang adlaw nga ang kabubut-on ni Jehova pagatumanon dinhi sa yuta. Mahimong himoon dayon ang pagpunting ngadto sa haom nga artikulo diha sa Ang Bantayanang Torre o Pagmata! o sa panid 12 sa Unsay Gikinahanglan sa Diyos Kanato?
4 Kon ang tagbalay nagpakitang tagbaw sa iyang kahimtang sa kinabuhi, mahimo nimong isukna ang pangutana:
◼“Nganong kinahanglang sa tininuod atong pagatagdon ang giingon sa Bibliya bahin sa kaugmaon sa kagamhanan?” Dayon atong magamit ang impormasyon nga makaplagan diha sa librong Nangatarongan sa mga panid 87 ug 88 (p. 154-5 sa Ingles), nga hisgotan sa mubo ang usa o dugang pa sa walo ka katarongan nga gitagana diha niana. Kon ang tagbalay magpakitag interes, gamita ang tract nga Kini Bang Kalibotana Molungtad?, nga magsugod sa unang parapo diha sa panid 2.
5 Ang imong unang pagduaw dili bug-os magmalamposon kon dili nimo pahinamon ang tagbalay alang sa ikaduhang pagduaw. Busa, tinoa ang pagsuknag makapainteres nga pangutana ug mosaad nga tubagon kana sa imong pagbalik.
6 Gikan sa materyal sa ibabaw, pilia kon unsa ang imong gibating hayahayng isulti. Ipasibo kini nga mga sugyot aron mohaom sa imong teritoryo. Sinatia ang mga brosyur, tract, ug mga artikulo sa magasin nga imong gamiton aron dali nimong ikapahiangay ang imong pakighisgot sumala sa mga panginahanglan sa tagbalay. Hinaot nga kitang tanan makugihong mangandam sa atong mga presentasyon “tungod ug alang sa maayong balita” ug sa ingon malamposong makapakig-ambit niining nagaluwas-kinabuhing ministeryo.—1 Cor. 9:23.