Abanteng Pagplano—Alang sa Unsa?
1 Kitang tanan mamalandong sa atong mga plano alang sa umaabot. Silang may yutan-ong paglaom naglantaw sa unahan nga mabuhing walay kataposan sa matarong nga bag-ong kalibotan sa Diyos. Apan adunay mga impluwensiya nga makasakmit sa atong kinasingkasing nga paglaom. Ang tim-os nga paningkamot gikinahanglan aron kanunayng nakasentro ang atong mga kinabuhi diha sa mga kalihokan nga nalangkit sa Gingharian sa Diyos ug aron dili mapatipas sa matentalong mga tinguha sa unod.—1 Juan 2:15-17.
2 Dili gayod makasabot ang kalibotan sa mga tinguha sa mga tawong espirituwal. (1 Cor. 2:14) Samtang ang uban sa katawhan nanlimbasog nga makab-ot ang kabantog, gahom, o bahandi, kita nagapangagpas sa espirituwal nga mga bahandi. (Mat. 6:19-21) Kon sulayan ta sa pagpasibo sa atong panghunahuna sumala sa panglantaw sa kalibotan bahin sa umaabot, makab-ot ba gayod nato ang atong espirituwal nga mga tumong? Ang kalibotanong mga butang sa di madugay magpalinga sa atong mga kasingkasing. Sa unsang paagi atong mapugngan kini?
3 “Isul-ob ang Ginoong Jesu-Kristo”: Ang usa ka paagi sa pagtino kon kita ba nagtukod sa atong umaabot pinaagi sa pagsentro sa intereses sa Gingharian maoy sa pagsusi sa atong panaghisgot. Kita ba kanunay naghisgot bahin sa materyal nga mga butang ug kalibotanong mga intereses? Kon mao, kinahanglang tagdon nato kon ang ato bang kasingkasing wala na magsentro diha sa espirituwal nga mga butang. Gikinahanglan tingali nato nga hatagag mas dakong pagpasiugda ang ‘pagsul-ob sa Ginoong Jesu-Kristo inay kay sa paglaraw daan alang sa mga tinguha sa unod.’—Roma 13:14.
4 Ang mga batan-on mahimong ‘magsul-ob kang Kristo’ pinaagi sa abanteng pagplano alang sa adlaw sa dihang sila mosulod sa bug-os-panahong ministeryo. Usa ka batan-on nga buot magregular payunir gipadako diha sa usa ka kultura diin ang naglabi nga kostumbre mao nga kinahanglan ang mga batan-ong lalaki mahimong sapian. Busa, siya nalangkit pag-ayo sa negosyo hangtod sa punto nga rutina na lamang ang iyang pagtambong sa mga tigom ug pagpakig-ambit diha sa ministeryo. Sa dihang siya misugod sa pagsalig sa mga pulong ni Jesus nga makaplagan sa Mateo 6:33 ug pagbiya sa iyang makapuol nga rutina, siya misulod sa karera sa bug-os-panahong pag-alagad. Karon, uban sa maayong tanlag, siya nag-alagad kang Jehova, sumala sa iyang giingon, ‘hangtod sa iyang bug-os nga katakos.’
5 Ang Bibliya nag-ingon nga maalamon ang pagplano sa umaabot. (Prov. 21:5) Hinaot kitang tanan mobuhat sa ingon nga naglabi sa hunahuna ang kabubut-on sa Diyos.—Efe. 5:15-17.