Pagplano nga Abante!

¹ Ang organisasyon ni Jehova nagtaganag usa ka regular nga programa sa teokratikanhong mga kalihokan nga gidisenyo sa pagtagbaw sa atong espirituwal nga mga panginahanglan. Ang pagpabili mopalihok kanato sa bug-os nga pagpahimulos sa tanang butang nga gihikay, sama sa mga duaw sa nagapanawng magtatan-aw, mga asembliya ug mga kombensiyon, ug ubang espesyal nga mga kalihokang giplano sa lokal. (Mat. 5:3) Ugaling, ang uban napakyas sa pagdawat sa kaayohan sa daghan niining espirituwal nga mga tagana tungod sa ubang mga plano nga ilang gihimo. Unsay pagabuhaton aron mapugngan kini? Sa unsang paagi kita makaseguro nga ang di-teokratikanhong mga kalihokan dili magtabon sa “mas hinungdanong mga butang”?​—Filip. 1:​10.

² Ang Maalamong Pagplano Hinungdanon: Ang Proverbio 21:5 nagpahimangno: “Ang mga plano sa usa ka kugihan tinong alang sa kaayohan, apan ang tanan nga madalidalion motultol gayod sa kawalad-on.” Aron makuha ang espirituwal nga “kaayohan,” kinahanglan kitang makugihong magplano nga abante, nga ibutang kanunay sa hunahuna ang teokratikanhong mga kalihokan nga nahikay na. Kita kinahanglang mag-eskedyul sa atong personal nga mga kalihokan sa usa ka panahon sa dihang dili kini makabalda sa atong pagkahimong presente aron makaanig espirituwal nga mga panalangin. Kon kita dinalidaling maghimog mga plano sa pagbuhat sa mga butang nga buot natong buhaton sa personal, nga wala hunahunaa ang umaabot nga teokratikanhong mga kalihokan, malagmit nga kita mag-antos sa espirituwal nga “kawalad-on.”

³ Ayawg Sipyata! Ang tanan kanato mohimog mga plano alang sa umaabot, nga maglakip sa mga bakasyon, mga panaw sa negosyo, mga duaw sa mga paryente, ug uban pa. Sa dili ka pa mopahinayak sa imong kaugalingon o bug-oson ang imong mga plano, konsultaha ang eskedyul sa umaabot espirituwal nga mga kalihokan. Kon imong makaplagan nga ang magtatan-aw sa sirkito taliabot o nga ang asembliya gieskedyul sa samang panahon nga ikaw tingali molakaw, paghimog matinuorong panlimbasog sa paghikay pag-usab sa imong mga kalihokan aron nga ikaw makaambit. Kita gipahibalo man nga abante pag-ayo mahitungod sa dagkong mga kalihokan nga naeskedyul alang sa umaabot. Ang mga ansiyano sa inyong kongregasyon makasugilon kanimo kon unsay giplano sa lokal.

⁴ Pinaagig pagpanglantaw daan ug pagplano nga abante alang sa mas hinungdanong mga butang, kita mahimong “mapuno sa matarong nga bunga, . . . sa himaya ug kadayeganan sa Diyos.”​—Filip. 1:​11.