Mga Ginikanan—Bansaya ang Inyong mga Anak sa Pagsangyaw
1 Ang atong mga kongregasyon napanalanginan uban ang daghang kabataan nga may sinserong tinguha sa pag-alagad sa Diyos. (Eccl. 12:1) Sila lakip taliwala kanilang gidapit ni Jehova nga makig-ambit sa pagdayeg kaniya. (Sal. 148:12-14) Busa, ang adlaw-adlawng pagbansay nga ihatag sa mga ginikanan sa ilang mga anak kinahanglang maglakip sa instruksiyon kon unsaon sa pagpakig-ambit sa buluhatong pagsangyaw sa Gingharian.—Deut. 6:6, 7.
2 Bansaya ang mga Anak Diha sa Mauswagong mga Paagi: Ang mga anak takos nga bansayon sa labing sayong pangedaron sa pag-uban sa ilang mga ginikanan diha sa ministeryo. Sa dili pa mosangyaw, andama ang inyong mga anak sa pagpakig-ambit sa presentasyon. Tinoa daan kon unsay inyong dahomon nga ilang buhaton diha sa pultahan. Ang bata pa kaayong mga anak makahatag ug mga tract ug mga handbill ug makadapit sa mga tawo ngadto sa Kingdom Hall. Kadtong maayong mobasa mahimong mobasa ug mga kasulatan diha sa pultahan. Sila makatanyag ug mga magasin, nga maggamit ug mubo nga presentasyon. Samtang sila makakuhag kasinatian, bansaya sila sa paggamit sa Bibliya diha sa ilang mga presentasyon. Daghang kabataan ang nakasugod ug kaugalingon nilang mga ruta sa magasin ug regular nga nagabalikduaw. Labing maayo alang sa usa ka bata nga mouban sa hamtong inay kay ipauban sa laing batan-on. Ikapatin-aw sa hamtong nga ang bata ginabansay diha sa ministeryo.
3 Usa ka batang babaye nangayog tabang sa mga ansiyano aron mokuwalipikar siya ingong magmamantala sa Gingharian. Bisan tuod singko anyos lamang siya niadtong panahona ug dili makamaong mobasa, iyang mapresentar ang mensahe nga epektibo diha sa mga pultahan. Gisag-ulo niya kon asa makita ang mga kasulatan, gipakli ngadto niana, gihangyo ang tagbalay nga basahon kana, ug dayon iyang gipatin-aw.
4 Pinaagi sa panig-ingnan sa mga ginikanan, ang mga bata angayng tudloan usab sa kahinungdanon sa pagbaton ug maayong eskedyul alang sa regular nga pagpakig-ambit diha sa ministeryo. Ang mga ginikanan kinahanglang magtukod ug makanunayong senemana nga rutina alang sa pag-alagad ug sundon kana, aron ang mga anak mahibalo kon unsang bahina sa semana ang kanunayng igahin sa buluhatong pagsangyaw.
5 Kon ang mga anak ginabansay gikan sa linghod nga pangedaron aron malipay diha sa ministeryo, sila matukmod sa pagkab-ot sa mas dagkong mga pribilehiyo sa umaabot, tingali lakip ang payunir nga pag-alagad. (1 Cor. 15:58) Ang tanan kanato angayng magdasig sa kabataan diha sa atong taliwala sa paghimog maayong pag-uswag ingong mga magdadayeg kang Jehova.