Ang Atong Pagtuo Mopalihok Kanato sa Maayong mga Buhat
1 Ang pagtuo mao ang nagtukmod kang Noe, Moises, ug Rahab nga molihok. Gitukod ni Noe ang arka. Gibiyaan ni Moises ang temporaryong kahamugaway sa kinabuhi sa palasyo ni Paraon. Gitagoan ni Rahab ang mga espiya ug unya misunod sa ilang mga instruksiyon, nga maoy nakaluwas sa iyang panimalay. (Heb. 11:7, 24-26, 31) Ang atong pagtuo mopalihok kanato sa pagpatungha ug unsang maayong mga buhat karong panahona?
2 Pagsangyaw: Ang pagtuo mopalihok kanato sa pagsulti bahin sa atong kahibulongang Diyos ug sa iyang mga tagana alang sa walay-kataposang kalipay. (2 Cor. 4:13) Usahay, magpanuko tingali kitang mosangyaw. Apan kon atong ‘ibutang kanunay si Jehova sa atong atubangan,’ kita mapalig-on ug mokalma ang kahadlok. (Sal. 16:8) Dayon ang atong pagtuo motukmod kanato sa pagpaambit sa maayong balita ngadto sa mga paryente, silingan, kauban sa trabaho, kaeskuyla, ug uban pa sa matag tukmang kahigayonan.—Roma 1:14-16.
3 Panagkatigom: Ang regular nga pagtambong sa mga tigom maoy laing maayong buhat nga nagsumikad sa pagtuo. Sa unsang paagi? Kini nagpasundayag sa atong hugot nga pagtuo nga si Jesus nagauban kanato pinaagi sa balaang espiritu sa Diyos sa dihang kita motambong sa Kristohanong mga tigom. (Mat. 18:20) Kini nagbutyag sa atong tinguha nga “magpatalinghog sa ginaingon sa espiritu ngadto sa mga kongregasyon.” (Pin. 3:6) Ginatuman gayod nato ang mga instruksiyon nga atong madawat tungod kay ang atong mga mata sa pagtuo nakasabot nga ang usa nga nagtudlo kanato mao ang atong Dakong Instruktor, si Jehova.—Isa. 30:20.
4 Ang mga Pagpili nga Atong Himoon: Ang hugot gayod nga pagtuo sa mga katinuoran nga dili makita mopalihok kanato nga unahon ang espirituwal nga mga butang sa atong kinabuhi. (Heb. 11:1) Kini sagad nagpasabot nga mohimog materyal nga mga sakripisyo. Pananglitan, ang usa ka ansiyano wala modawat sa usa ka maganansiyahanong sekular nga trabaho tungod kay nagkahulogan kana nga dili na siya makatambong sa mga tigom, mahilayo sa iyang pamilya, ug moundang sa pagpayunir. Hinaot nga bug-os usab kitang mosalig diha sa pasalig sa Bibliya nga si Jehova motagana alang niadtong “magpadayon sa pagpangita pag-una sa gingharian ug sa iyang pagkamatarong.”—Mat. 6:33.
5 Ang kusganong impluwensiya nga ikahatag sa pagtuo diha sa atong kinabuhi dili kay di-mamatikdan sa uban. Sa pagkamatuod, ang atong pagtuo ginahisgotan sa tibuok yuta. (Roma 1:8) Busa, hinaot kitang tanan magpasundayag pinaagi sa atong maayong mga buhat nga ang atong pagtuo nagalihok.—Sant. 2:26.