Pagpabili sa mga Tagana ni Jehova
1 Si Jehova naghimog tagana aron tagbawon ang atong espirituwal nga mga panginahanglan pinaagi sa matinumanong “ulipon.” (Mat. 24:45-47) Daghan sa maong mga tagana naglakip sa mga libro, Bibliya, tomo, video, audiocassette, ug mga computer disc alang sa pagpanukiduki sa Bibliya. Sa pagkatinuod kita makaingon nga kita dagayang gitagan-an sa atong mga kinahanglanon sa espirituwal nga paagi!
2 Kining maong mga tagana gipatungha pinaagig dako kaayong gastong salapi. Kining mga gastoha giatiman pinaagi sa tibuok-kalibotang panag-igsoonay. Tinuod kini ilabina human ipatuman ang kahikayan sa donasyon sa tuig 2000, sanglit karon ang pagtapal niining mga gastoha bug-os nga nagdepende sa boluntaryong mga amot. Ang maong mahigugmaong kahikayan nagpaarang sa tanang kaigsoonan sa pagbaton sa ilang gikinahanglan alang sa mga tigom ug sa pag-alagad sa kanataran bisan pag ang uban limitado kaayo sa materyal nga mga kahinguhaan.
3 Kon sa Unsang Paagi Kita Makatabang: Makasanong kita sa tambag ni Pablo nga magpaambit sa uban “sumala sa ilang mga panginahanglan.” (Roma 12:13) Sa dihang mohatag kita ug mga amot ngadto sa tibuok-kalibotang buluhaton, kita deretsong nagpaambit sa atong nabatonan ngadto sa mga igsoon sa tibuok kalibotan. Nga naghunahuna bahin niini, daghan ang nakahukom nga “magagahin” aron may ikaamot kada semana o kada bulan, sama ra sa ilang gihimo alang sa mga galastohan sa Kingdom Hall. (1 Cor. 16:2) Sa paghimo niini, ilang gipakita nga sila nagaila nga ang maong mga salapi dili lamang gamiton alang sa paggamag literatura kondili alang sa tanang bahin sa tibuok-kalibotang buluhaton. Busa ang atong mga amot dili gayod isipon ingong pasig-uli sa gasto lamang sa literatura, kondili ingong atong amot ngadto sa enterong tibuok-kalibotang buluhaton.
4 Mahimong “Mahinatagon sa Inyong Amot”: Kining mga pulonga sa 2 Corinto 9:13 nagpakita sa hustong espiritu nga angayng batonan. Kadtong nakabaton ug daghan mahinangop sa paghatag ug mas pa kay sa uban aron matabangan kadtong may diyutay ra, busa adunay “pag-angay-angay.” (2 Cor. 8:14, 15) Pinaagi sa pag-amot sa tanan, kabos man o adunahan, kutob sa ilang maarangan ngadto sa tibuok-kalibotang buluhaton, si Jehova nagsaad sa pagbubo sa “panalangin hangtod nga wala nay panginahanglan.” (Mal. 3:10) Hinaot ang matag usa kanato mapamatud-ang takos sa maong panalangin pinaagi sa indibiduwal nga pagpakita sa atong pagpabili sa tanang dagayang mga tagana ni Jehova!