Agaka ang mga Ginatun-an sa Bibliya Ngadto sa Organisasyon
1 Ang mga ginatun-an sa Bibliya kinahanglang masinati sa organisasyon ni Jehova. Kinahanglan nilang mapabilhan nga ang pagkahimong bahin nianang organisasyona hinungdanon sa ilang kaluwasan. (Pin. 7:9, 10, 15) Busa, angay natong sugdan dayon sa pag-agak ang atong mga ginatun-an sa Bibliya ngadto sa organisasyon sa dihang masugdan na ang pagtuon sa Bibliya.
2 Tabangi ang imong mga ginatun-an sa Bibliya nga masinati sa daghang bahin sa organisasyon ni Jehova, nga magpakita kanila nga gisunod niini ang sumbanan sa unang-siglong mga Kristohanon. Sa unsang paagi kini himoon?
3 Gamita ang Brosyur nga Mga Saksi ni Jehova: Ang brosyur nga nag-ulohang Mga Saksi ni Jehova—Kinsa Sila? Unsay Ilang Gituohan? adunay malangkobon nga impormasyon bahin sa organisasyon ni Jehova ug sa iyang mga Saksi. Dinhi sa Pilipinas mabatonan kini diha sa lima ka pinulongan maingon man sa Iningles. Migahin ka bag pipila ka minuto kada semana aron magamit kining brosyura sa pag-ugmad sa pagpabili sa imong ginatun-an alang sa organisasyon? Gihatagan ba nimog kopya ang imong ginatun-an sa Bibliya? Nagdala ka bag kopya sa dihang moadto ka sa imong ginatun-an sa Bibliya?
4 Ang mga panid 6 ngadto sa 11 sa maong brosyur naghisgot sa kasaysayan ug pag-uswag sa katawhan sa Diyos sa modernong panahon. Ang mga panid 12 ug 13 naghatag ug mubong sumaryo sa atong mga pagtulon-an. Ang mga panid 25 ug 26 nagpakita sa tibuok-kalibotang gilapdon sa maong organisasyon, samtang ang mga panid 27 ngadto sa 30 naghisgot sa mga pangutana nga kasagarang gisukna sa interesadong mga tawo.
5 Walay laing mas maayong paagi sa pagpasinati sa imong ginatun-an uban sa organisasyon kay sa pagdapit kaniya nga motambong sa mga tigom. Sa dili pa nimo siya dapiton, buot mo tingaling sublion uban niya ang unang pangutana diha sa panid 30 sa brosyur. O, kon moduaw ang magtatan-aw sa sirkito nianang semanaha, buot mo tingaling sublion ang unang parapo ubos sa ulohang “Ilang Tibuok-Kalibotang Organisasyon ug Buluhaton” diha sa panid 25. Kon dapiton mo ang imong ginatun-an ngadto sa kombensiyon o asembliya, o mobisita sa Bethel, makaplagan mong ang impormasyon sa mga panid 10 ug 11 makatabang ug dugang sa iyang pagpaabot niana.
6 Pinaagi sa paggamit sa espesipikong mga punto gikan sa brosyur nga Mga Saksi ni Jehova sa dihang motungha ang kahigayonan ug mga panginahanglan, makaarang ka sa pagtabang sa imong ginatun-an nga mapabilhan ang organisasyon ug buot moduyog niana. Samtang himoon mo kini, paneguroa nga ikaw, “nga nagatudlo sa uban,” naghatag ug maayong panig-ingnan sa pagpakitag pagpabili sa organisasyon ni Jehova. (Roma 2:21) Sa paghimo niana, matabangan nimo ang uban sa pagduyog sa “usa ka panon” nga gitultolan ni Jesus ngadto sa kinabuhing walay kataposan.—Juan 10:16.