Sa Unsang Paagi Atong Matabangan ang Di-Saksing mga Kapikas?
1 Daghang alagad ni Jehova ang naminyo ngadto sa mga indibiduwal nga mahigalaon sa mga Saksi ug sa kongregasyon apan dili gustong mahimong mga alagad sa Diyos. Usa ka banang di-Saksi miangkon: “Ang ideya sa pag-adto sa balay ug balay maoy usa ka dakong babag alang kanako.” Ang uban tingali may di-kasulatanhong mga batasan nga kinahanglan nilang buntogon, o mobati silang dili gayod makahimo sa puliking teokratikanhong eskedyul nga ginahimo sa ilang kapikas. Sa unsang paagi ato silang matabangan?
2 Ipakitang Personal nga Interes: Ang pagpakitag personal nga interes sa uban ug pag-ila sa ilang mga gikabalak-an mahimong magbukas sa kahigayonan alang kanila sa pagsanong sa kamatuoran sa Bibliya. (Filip. 2:4) Kadtong dili samag tinuohan kanhi sa ilang kapikas sagad maghisgot sa mahigugmaong interes nga gipakita sa uban. “Si José, usa ka ansiyano sa kongregasyon, nagpakitag linain nga pagtagad kanako,” matod sa bana sa gikutlo ganina. “Ako nagtuo nga ang iyang pagdasig sa kataposan ang nagpasugod kanako sa seryosong pagtuon.” Ang lain pang bana nahinumdom nga ang mga igsoong mibisita kaniya naningkamot sa pagpakig-estorya kaniya bahin sa iyang mga gikaikagan. “Nagsugod ako sa paglantaw sa pagtuo [sa akong asawa] gikan sa bug-os lahing panglantaw,” siya miingon. “Ang iyang mga higala intelihente kaayong mga tawo nga makasulti bahin sa nagkalainlaing mga ulohan.”—1 Cor. 9:20-23.
3 Ihatag ang Praktikal nga Tabang: Ang di-Saksing mga kapikas mahimong makadayeg usab sa malulotong tabang nga gihatag kanila. (Prov. 3:27; Gal. 6:10) Sa dihang naaberiya ang sakyanan sa usa ka di-magtutuong bana, usa ka batan-ong Saksing lalaki mitabang kaniya. “Kana nakapadani kaayo kanako,” siya miingon. Ang laing igsoong lalaki migahin sa enterong adlaw sa pagtabang sa di-magtutuong bana sa usa ka igsoong babaye sa pagkoral sa iyang propiedad. Samtang nagtrabaho ug nag-estoryahanay, ilang naugmad ang panaghigalaay. Duha ka semana sa ulahi, ang maong tawo miduol sa maong igsoong lalaki ug miingon: “Panahon nang mohimog mga kausaban sa akong kinabuhi. Mahimo ba nimo akong tun-an sa Bibliya?” Siya mihimog kusog nga pag-uswag ug karon usa na ka bawtismadong Saksi.
4 Samtang padayon kitang mangita sa mga takos diha sa atong teritoryo, padayon natong tabangan kadtong mga kapikas sa atong mga isigkamagtutuo.—1 Tim. 2:1-4.