Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Agosto 30, 2004. Dumalahon sa magtatan-aw sa tunghaan ang 30–minutos nga repaso pinasukad sa materyal nga gikobrehan diha sa mga asaynment alang sa mga semana sa Hulyo 5 hangtod sa Agosto 30, 2004. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, pp. 36-7.]
MGA HIYAS SA PAGPANULTI
1. Sa unsang paagi atong ikapatin-aw ang katarongan sa atong paglaom “uban ang kalumo sa buot ug halawom nga pagtahod”? (1 Ped. 3:15) [be p. 192 mga par. 2-4] Sa dihang kita nagapakigbahin diha sa ministeryo, dili gayod maalamon ang pagbutyag sa mga depekto sa punto-debista sa tagbalay sa paagi nga siya maulawan. Mas maayong pangutan-on ang tagbalay kon nganong kana ang iyang pagbati ug dayon mangatarongan kaniya pinasukad sa Kasulatan. Sa dihang mopakigpulong gikan sa plataporma, inay grabeng sawayon o pakamenoson ang mamiminaw, angay natong tukbilon ang ilang gugma alang sa Diyos ug ang ilang tinguha sa pag-alagad kaniya.
2. Nganong hinungdanon ang pagsulti uban ang kombiksiyon? (Roma 8:38, 39; 1 Tes. 1:5; 1 Ped. 5:12) [be p. 194] Masabtan sa uban nga hugot natong gituohan ang atong ginasulti. Ang atong kombiksiyon magpadayag nga kita dunay hinungdanon kaayong butang nga ipaambit, ug kini makatabang sa pagdani sa uban nga seryosong tagdon ang atong ginasulti ug molihok pinasukad niana.
3. Sa unsang paagi ikapakita ang kombiksiyon? [be p. 195 par. 3–p. 196 par. 4] Ang mga pulong nga atong gamiton dakog ikatabang sa pagpahayag sa atong kombiksiyon. (Hab. 2:3; Juan 5:19, 24, 25; Roma 8:38; 14:14; 1 Tim. 2:7) Kon kita bug-os nga kombinsido nga ang atong ginasulti maoy tinuod ug bililhon sa atong mamiminaw, nan ang mga ekspresyon sa atong nawong, atong mga kompas, ug mga lihok sa atong lawas magpakita niana.
4. Unsa ang taktika, nganong hinungdanon kini, ug sa unsang paagi atong mabalanse kining hiyasa uban sa kalig-on? (Roma 12:18) [be p. 197] Ang taktika mao ang katakos sa pagpakiglabot sa mga tawo nga dili makapasilo nga way-hinungdan. Kon kita mataktikanhon, ang mga tawo makiling sa pagpaminaw sa maayong balita uban sa bukas nga hunahuna. Atong mabalanse ang taktika uban sa kalig-on pinaagi sa paghinumdom nga bisag giunsa pa pagpresentar sa mensahe sa Bibliya, ang pipila ka tawo mayugot gayod niana. (1 Ped. 2:7, 8)
5. Sa dili pa mosulti, unsay angayng tagdon sa usa ka mataktikanhong tawo? (Prov. 25:11; Juan 16:12) [be p. 199] Ang pagkamataktikanhon sagad naglangkit sa pagtino sa hustong panahon sa pagsulti. Tingali dili kita mouyon sa tanang isulti sa laing tawo, apan dili kinahanglang lalison ang matag di-kasulatanhong hunahuna nga iyang ipahayag. Hinunoa, isipa kana ingong kahigayonan aron matugkad nimo ang panghunahuna sa tawo. Kon posible, dayega ang uban tungod sa ilang relihiyosong kasibot. (Buh. 17:22)
ASAYNMENT NUM. 1
6. Sa unsang paagi ang atong mga pagpakig-estorya ug mga batasan sa pagtuon sa Bibliya mahimong magpaila sa gilapdon sa atong pag-uswag diha sa kamatuoran? [be p. 74 par. 3–p. 75 par. 2] Kadtong “magsul-ob sa bag-ong pagkatawo” dili mogamit ug malimbongon, malaw-ay, o di-makapadasig nga sinultihan kondili, hinunoa, ‘mohatag ug kaayohan sa ilang mga mamiminaw.’ (Efe. 4:24, 25, 29) Kadtong nakasabot pag-ayo sa kamatuoran dili maggamit sa panahon alang sa espirituwal nga mga obligasyon aron mangagpas sa bag-ong mga ideya, mga kawsa, o mga paagi sa lulinghayaw nga gipasiugda sa kalibotan. (Efe. 3:18; 4:14) Ang paagi nga kita nakiglabot sa ubang mga tawo mahimong ilhanan usab sa atong espirituwal nga pag-uswag. (Efe. 4:32)
7. Unsay buot ipasabot sa ‘pagpalit sa nahiangay nga panahon alang sa inyong kaugalingon,’ ug sa unsang paagi atong mahimo kana? (Efe. 5:16) [w02 11/15 p. 23] Kini naglangkit sa ‘pagpalit’ sa panahon gikan sa dili kaayo hinungdanong mga kalihokan ug sa paggamit niana sa mas mapuslanong paagi. Pinaagi sa pagpamenos sa panahon nga gigugol sa pagtan-awg telebisyon, pagsuhid sa Internet, pagbasag sekular nga mga basahon, o sobrang paglingawlingaw, kita mas daghag panahong magamit alang sa “mas hinungdanong mga butang.” (Filip. 1:9, 10) Kining mga butanga naglakip sa personal nga pagtuon sa Bibliya, nga makaamot sa atong espirituwal nga pagtubo ug sa mas suod nga relasyon uban kang Jehova. (Sal. 1:1-3)
8. Sa unsang paagi gipatin-aw sa Kasulatan nga ang tanang tawo maoy managsama atubangan sa Diyos, ug sa unsang paagi kini makaapektar sa atong ministeryo? [w02 1/1 pp. 5, 7] Ang Buhat 17:26 nag-ingon: “Gihimo [sa Diyos] gikan sa usa ka tawo ang tanang nasod sa katawhan.” Ang Maglalalang wala magpihig pinasukad sa kahimtang diha sa katilingban. (Job 34:19) Diha sa kamatayon, ang tanang tawo managsama. (Sal. 49:10; Eccl. 9:5, 10) Ang tanang magpasundayag ug pagtuo kang Jesu-Kristo adunay kahigayonan nga makadawat ug kinabuhing walay kataposan. (Juan 3:16) Kining tanan angayng magtukmod kanato sa pagdala sa maayong balita ngadto sa “tanang matang sa mga tawo” nga walay pagpihigpihig. (1 Tim. 2:4)
9. Unsa ang kahulogan sa talagsaong ngalan sa Maglalalang, nga Jehova? [w02 1/15 p. 5] Ang ngalan sa Diyos sa literal nagkahulogang “Iyang Gipahinabo nga Mamao.” Kini nagpaila nga iyang pamatud-an nga mamao bisan unsa pay gikinahanglan aron matuman ang iyang katuyoan. (Ex. 3:14) Kini makita diha nagkadaiyang mga titulo nga gihuptan ni Jehova. (Maghu. 11:27; Sal. 23:1; 65:2; 73:28; 89:26; Isa. 8:13; 30:20; 40:28; 41:14) Ang bugtong matuod nga Diyos lamang ang hustong makahupot sa ngalang Jehova, tungod kay siya lamang ang seguradong makatuman sa iyang katuyoan. (Isa. 55:10, 11)
10. Unsay nakapahimo sa halad ni Abel “nga mas labaw ug bili” kay sa kang Cain, ug unsang leksiyon ang atong makat-onan gikan niini maylabot sa atong “halad sa pagdayeg”? (Heb. 11:4; 13:15) [w02 1/15 p. 21 mga par. 6-8] Bisan tuod giila ni Cain ug Abel ang ilang makasasalang kahimtang ug gitinguha ang pag-uyon sa Diyos, ang halad ni Abel maoy tinukmod sa pagtuo. Lagmit wala kaayo pamalandonga ni Cain ang iyang halad ug basta na lang mihalad niini ngadto sa Diyos. Aron ang atong “halad sa pagdayeg” diha sa ministeryo mahimong bililhon sa Diyos, kini kinahanglang usa ka pagpahayag sa gugma ug pagtuo ug dili pormalismo lamang. (Roma 10:10)
SENEMANANG PAGBASA SA BIBLIYA
11. Sa unsang paagi ang Levitico 18:3 motabang kanato nga dili mabatonan ang tinuis nga pag-ila sa kalainan tali sa husto ug sayop? (Efe. 4:17-19) [w02 2/1 p. 29] Kita dili angayng molakaw sama sa mga nasod, nga nagkahulogang dili nato tugotan nga ang atong pinasukad-sa-Bibliya nga tanlag madaot sa tinuis nga pag-ila sa kalibotan sa kalainan tali sa husto ug sayop.
12. Unsa ang matagnaong gihulagwayan sa “duha ka tinapay” nga gihalad sa hataas nga saserdote ingong “halad-nga-tinabyog” panahon sa Pista sa mga Semana (Pentekostes)? (Lev. 23:15-17) [w98 3/1 p. 13 par. 21] Ang duha ka tinapayng may lebadura maoy ginama gikan sa unang bunga sa ani sa trigo. Kining maong mga tinapay naghulagway sa 144,000 ka dili-hingpit nga mga tawo nga ‘gipalit ni Jesus alang sa Diyos’ aron sa pag-alagad ingong “usa ka gingharian ug mga saserdote . . . magamando ingong mga hari ibabaw sa yuta.” (Pin. 5:9, 10; 14:1, 3) Ang kamatuoran nga kining langitnong mga magmamando naggikan sa duha ka hut-ong sa makasasalang katawhan, mga Hudiyo ug mga Hentil, mahimong naghulagway usab sa duha ka tinapay nga may lebadura.
13. Diha sa kaso sa pagpanapaw sama nianang gihisgotan diha sa Numeros kapitulo 5, sa unsang diwa ‘mokuyos ang balat-ang’ sa sad-an nga babaye? (Num. 5:27) [w84-E 4/15 p. 29] Dayag nga ang “balat-ang” gigamit dinhi ingong kapuling termino alang sa mga organo sa pagsanay. Ang maong mga organo mikuyos, nga nagpaimposible sa pagsabak. Kini kaharmonya sa kamatuoran nga kon inosente ang babaye, ang iyang bana makapasamkon kaniya.
14. Nganong si Miriam ug Aaron misulti batok kang Moises tungod sa iyang Cusihanong asawa? (Num. 12:1) Si Miriam nagtinguhag dugang nga kabantog ug awtoridad. Lagmit siya sobrang nabalaka nga makunhoran ang iyang pagkainila gumikan sa usa ka gituohan nga kakompetensiya. Giaghat ni Miriam si Aaron sa pagduyog kaniya sa iyang pagsaway kang Moises tungod sa pagpangasawa ug usa ka Cusihanon ug sa paghagit sa iyang talagsaong posisyon atubangan sa Diyos. Tungod niini, gisilotan ni Jehova si Miriam ug Aaron, apan ang kamatuoran nga si Miriam lang ang gisanla mahimong magsugyot nga siya mao ang naghulhog. [7, w02 10/15 p. 29; w84-E 4/15 p. 29-30]
15. Unsa ang “basahon sa Mga Gubat ni Jehova”? (Num. 21:14) Kini mao ang kasaligang rekord sa kasaysayan bahin sa mga gubat sa katawhan ni Jehova. Kini lagmit nagsugod sa malamposong pagpakig-away ni Abraham batok sa upat ka hari nga nagbihag kang Lot ug sa iyang pamilya. (Gen. 14:1-16) Kini mahimong naundan usab sa militaryong mga away nga wala marekord diha sa Bibliya. [9, cl p. 64; w90 7/1 p. 20, 23; it-1-E p. 355]