Pakig-ambit sa Ministeryo Ingong Pamilya
1 Ang usa ka dedikadong pamilya nga bug-os nakig-ambit sa sagradong pag-alagad—uban sa amahan, inahan, ug mga anak nga nag-alagad sa Diyos nga bug-os-kalag—maoy kadayeganan sa dakong ngalan ni Jehova. Malipay kita nga makakaplag ug daghan sa maong mga pamilya diha sa mga kongregasyon sa katawhan ni Jehova sa tibuok kalibotan.
2 Siyempre, pangunang responsabilidad sa amahan ang pag-atiman sa espirituwal nga mga panginahanglan sa iyang pamilya. (1 Cor. 11:3) Kay nakigtambayayong ang iyang asawa ug mga anak, ang iyang pamilya dakog impluwensiya sa uban. (Mat. 5:16) Unsa ang pipila ka bahin diin ikapakita ang maong kooperasyon?
3 Manguna ang mga Ginikanan: Sa daghang kahimtang, ang amahan usa tingali ka ansiyano o ministeryal nga alagad. Nagkahulogan kini nga gawas pa sa mga kaayohan sa iyang pamilya, ang uban sa iyang panahon ug atensiyon kinahanglang igahin ngadto sa mga kalihokan nga iya sa kongregasyon. Ang responsabilidad sa amahan mao ang pagseguro nga nabahinbahin ang panahon nga nabatonan. Kini hayan dili kanunayng sayon tungod sa mga panginahanglan sa iyang limitadong panahon. Apan tungod kay ang iyang pamilya mao ang panguna niyang responsabilidad, kinahanglang regular niyang ieskedyul ang pipila sa iyang panahon nga makig-uban sa iyang pamilya diha sa pagtuon, pag-alagad sa kanataran, mga tigom, ug haom nga lulinghayaw. Usahay mausab ang eskedyul sa amahan tungod sa mga kahimtang, apan pagkamapuslanon kon siya makagugol ug panahon matag semana diha sa pag-alagad sa kanataran uban sa mga membro sa iyang pamilya!
4 Hinungdanon ang kooperasyon sa asawa. Makatabang siya sa iyang bana sa labing importanteng paagi pinaagi sa pagtabang sa pagbansay sa mga anak diha sa ministeryo. Ang iyang panig-ingnan sa kasibot ug debosyon makaimpluwensiya gayod sa mga anak aron motubo ang ilang pagpabili sa ministeryo. Hinumdomi kon giunsa pagbansay si Timoteo sa iyang inahan nga si Eunice ug sa iyang apohan nga babaye nga si Loida “sukad pa sa pagkamasuso” diha sa “balaang mga sinulat,” bisan pag dili magtutuo ang amahan ni Timoteo. (2 Tim. 3:14, 15) Kini gayod nagkinahanglan ug dakong pagtuo, paningkamot, ug pagsakripisyo sa kaugalingon. Apan kini gigantihan sa dihang si Timoteo mitubo sa espirituwal ug nahimong masibotong misyonaryo.—Filip. 2:19-22.
5 Adunay daghang susamang mga pananglitan karon diin ang usa ka magtutuong ginikanan mipas-an sa luwan sa espirituwal nga responsabilidad ug malamposong mibansay sa mga anak diha sa ministeryo. Tungod sa maayo kaayong panig-ingnan sa ilang inahan o amahan, daghang batan-on ang lig-ong mibarog dapig sa kamatuoran ug, sama kang Timoteo, nakapahimulos ug daghang pribilehiyo sa bug-os-panahong ministeryo.
6 Oo, gikinahanglan ang panig-ingnan sa mga ginikanan aron masilsil diha sa mga anak ang bili sa pagbaton ug maayong eskedyul sa pagpakig-ambit nga regular diha sa ministeryo. Ang mga ginikanan kinahanglang maghimo ug makanunayong senemanang eskedyul sa pag-alagad ug sundon gayod kana, aron ang mga anak mahibalo kon unsang bahina sa semana ang gigahin kanunay alang sa buluhatong pagsangyaw.
7 Ang Responsabilidad sa mga Anak: Unsa may responsabilidad sa mga anak? Bisan ang hingpit nga Anak sa Diyos, si Jesus, samtang bata pa, nagpasakop sa pagtultol ug pagtudlo sa iyang mga ginikanan. (Luc. 2:51) Busa, sa dihang hikayon sa amahan ug inahan nga ang pamilya duyog nga makig-ambit diha sa ministeryo, maoy obligasyon sa mga anak ang pagpakita sa ilang diyosnong pagkamahinalaron pinaagi sa pagkooperar sa ilang mga ginikanan.—Efe. 6:1-3.
8 Pinaagi sa duyog nga pagsimba ingong pamilya—pagtuon, pagpakig-ambit diha sa ministeryo sa kanataran, ug pagtambong sa mga tigom—molig-on ang mga bugkos sa gugma ug panaghiusa sulod sa pamilya. Ang mga ginikanan ug mga anak nagaambitay sa responsabilidad niining bahina.