Pangutana

◼ Sa unsang paagi atong atimanon ang mga asaynment sa kongregasyon?

Ang hapsay nga paglihok sa usa ka kongregasyon sa katawhan ni Jehova maoy resulta sa hiniusang paningkamot. (1 Cor. 14:​33, 40) Hunahunaa kon unsay nalangkit sa usa lang ka tigom sa kongregasyon. Gawas pa sa programa mismo, dunay daghang kalihokan sa dili pa ug human sa tigom samtang ang mga igsoong lalaki ug babaye nag-atiman sa nagkalainlaing mga asaynment. Ang ubang mga buluhaton ginahimo nga dili makita sa uban hinungdanon usab. Sa unsang paagi ang matag usa kanato makapaluyo ning maong kahikayan?

Itanyag ang imong kaugalingon. Adunay daghang buluhaton alang niadtong andam motabang. (Sal. 110:3) Ipakita ang kabalaka alang sa mga masakiton ug mga tigulang. Tabang sa pagpanghinlo sa Kingdom Hall. Kita makahimog mapuslanong mga buluhaton bisag dili hangyoon. Kita kinahanglang matinguhaon lamang sa pagtabang.

Pag-alagad nga makasaranganon. Ang makasaranganong mga tawo malipay sa pag-alagad sa uban. (Luc. 9:48) Ang pagkamakasaranganon mopugong kanato sa pagdawat ug dugang responsabilidad nga dili gayod nato madumala. Dugang pa, ang pagkamakasaranganon mopugong kanato sa pag-abuso sa atong awtoridad.​—Prov. 11:2.

Mahimong kasaligan. Si Moises gidasig sa pagpilig “kasaligan nga mga lalaki” sa pagdumala sa mga katungdanan sa karaang Israel. (Ex. 18:21) Gikinahanglan gihapon karon ang maong hiyas. Atimana pag-ayo ang matag asaynment nga imong madawat. (Luc. 16:10) Kon dili ka makatuman sa usa ka asaynment, paneguroa nga mahimo ang haom nga mga kahikayan aron madumala kini sa lain kon wala ka.

Ihatag ang imong kinamaayohan. Giawhag ang mga Kristohanon sa pagbuhat nga bug-os-kalag bisan sa sekular nga mga butang. (Col. 3:22-24) Adunay mas dakong katarongan sa paghimo niana sa dihang nagbuhat aron sa pagpalambo sa matuod nga pagsimba. Bisan tuod ang buluhaton morag ubos ra tan-awon, mapuslanon kini ngadto sa kongregasyon kon kini maayong pagkabuhat.

Ang matag asaynment maghatag kanato ug kahigayonan sa pagpakita sa atong gugma kang Jehova ug sa atong mga igsoon. (Mat. 22:37-39) Hinaot matinumanon natong atimanon ang bisan unsang buluhaton nga gitugyan kanato.