Kon Unsay Napalampos sa Atong Ministeryo
1. Unsay panglantaw ni Jehova sa atong ministeryo, ug unsay sanong sa mga tawo?
1 Ang Pulong sa Diyos nagbatbat sa mga Kristohanon ingong nagmartsa nga madaogon diha sa pag-alagad kang Jehova, nga daw anaa sa parada sa kadaogan. (2 Cor. 2:14-16) Samtang atong gisangyaw ang kahibalo bahin sa Diyos, ang atong ministeryo nahisamag humot nga insenso ngadto kang Jehova. Ang pipila ka tawo madani sa kahumot sa maayong balita; ang uban mosalikway niini. Apan ang pagsalikway sa kadaghanan wala magpasabot nga napakyas ang atong buluhaton. Tagda kon unsay napalampos sa atong ministeryo.
2. Unsay atong ikapasundayag pinaagi sa atong ministeryo?
2 Naghimaya Kang Jehova: Nangatarongan si Satanas nga ang mga tawo nag-alagad kang Jehova tungod sa hinakog nga mga katarongan. (Job 1:9-11) Pinaagi sa Kristohanong ministeryo, atong kapamatud-an nga tiunay ang atong debosyon sa Diyos. Daghang magmamantala ang padayong nagtuman sa sugo nga mosangyaw ug maghimog tinun-an bisan pa sa malisod nga personal nga mga kahimtang o pagkadili-matinagdanon sa mga tawo sa katibuk-an. Ang maong maunongong paglahutay makapalipay sa kasingkasing ni Jehova!—Prov. 27:11.
3. Nganong hinungdanon kaayo nga kita magpadayon sa pagpaila sa ngalan ug katuyoan sa Diyos?
3 Dugang pa, ang atong ministeryo hinungdanon usab sa katumanan sa katuyoan sa Diyos. Mahitungod sa umaabot nga kalaglagan sa kalibotan ni Satanas, si Jehova nag-ingon: “Ang kanasoran makaila gayod nga ako mao si Jehova.” (Ezeq. 39:7) Aron mahibalo ang kanasoran niini, ang mga alagad sa Diyos kinahanglang magpadayon sa pagmantala sa iyang ngalan ug katuyoan “ngadto sa matag nasod ug tribo ug pinulongan ug katawhan.”—Pin. 14:6, 7.
4. Sa unsang paagi ang buluhatong pagsangyaw nagsilbing basehanan sa paghukom?
4 Basehanan sa Paghukom: Ang pagsangyaw sa maayong balita nagsilbi usab nga basehanan sa paghukom. Si apostol Pablo nag-ingon nga si Kristo Jesus manimalos “kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tes. 1:8, 9) Ang mga tawo pagahukman pinasukad sa ilang sanong sa maayong balita. Ang mga alagad sa Diyos aduna gayoy ugdang nga responsabilidad! Aron dili kita mahimong sad-an sa dugo, kinahanglang dili kita modumili sa pagpahibalo sa nagaluwas-ug-kinabuhing mensahe sa Gingharian.—Buh. 20:26, 27.
5. Sa unsang paagi ang kaluoy sa Diyos gibanaag diha sa atong ministeryo?
5 Ang atong mapinadayonong paningkamot sa pagtabang sa atong mga silingan nga makabaton sa pabor sa Diyos maoy pagpahayag sa kaluoy ni Jehova. (1 Tim. 2:3, 4) Kay nahibalo nga ang kahimtang sa kinabuhi sa mga tawo kanunayng mag-usab-usab, kanunay kitang mobalik kanila ug awhagon sila sa pagpangita kang Jehova samtang may panahon pa. Sa pagbuhat niana, gibanaag nato ang “malumong kaluoy sa atong Diyos,” kinsa “wala magtinguha nga adunay malaglag apan nagtinguha nga ang tanan makakab-ot sa paghinulsol.”—Luc. 1:78; 2 Ped. 3:9.
6. Sa unsang paagi ang pagkapuliki kanunay sa pag-alagad kang Jehova makaayo kanato?
6 Makabaton Kitag Kaayohan: Ang pagkapuliki kanunay sa pag-alagad kang Jehova maoy usa ka panalipod kanato. Kini makatabang kanato sa ‘pagbutang kanunay sa hunahuna sa presensiya sa adlaw ni Jehova’ ug sa paglikay nga mahugawan sa presenteng daotang sistema sa mga butang. (2 Ped. 3:11-14; Tito 2:11, 12) Busa, hinaot nga kita “magmalig-on, dili matarog, nga kanunayng puliki diha sa buluhaton sa Ginoo,” nga nahibalo nga ang atong mga paningkamot dili makawang may kalabotan sa Kristohanong ministeryo.—1 Cor. 15:58.