Pangutana

◼ Sa unsang paagi atimanon ang galastohan sa magtatan-aw sa sirkito sa dihang moduaw ug kongregasyon?

Kasagaran, ang sak-anan ug pagkaon boluntaryong itagana sa mga igsoon sa kongregasyon nga iyang alagaran ug pasalamatan kini sa sangang buhatan. Komosta ang bahin sa transportasyon o uban pa niyang galastohan sulod sa semana? Bisan tuod ang sangang buhatan andam sa paghulip niini, daghang kongregasyon ang andam sa paghulip sa pipila o sa tanang nagasto, ug kon mao, sa kataposan sa iyang duaw, mahimong pangutan-on sa mga ansiyano ang magtatan-aw sa sirkito kon duna ba siyay nagasto nga gusto niyang pahulipan. Mahimo siyang mohatag ug listahan sa iyang mga nagasto uban sa mga resibo. Sa unsang paagi mahulipan sa kongregasyon kining mga gastoha? Kini angayng himoon pinaagi sa usa ka resolusyon, nga mahimong ipresentar ngadto sa kongregasyon sa unang Tigom sa Pag-alagad pagkahuman sa duaw. Ang maong resolusyon angayng himoon alang lamang sa salapi nga anaa na sa pondo sa kongregasyon.—Alang sa kasayoran bahin sa mga resolusyon, tan-awa ang “Pangutana” sa Pebrero 1994 nga Atong Ministeryo sa Gingharian, panid 2.

Kon ang kongregasyon walay igong pondong salapi, ang mga ansiyano dili angayng mangolektag salapi gikan sa mga indibiduwal alang niini nga katuyoan. Kon kana ang kahimtang, ang magtatan-aw sa sirkito magpadala lamang ug listahan sa iyang mga nagasto ngadto sa sangang buhatan sa kataposan sa bulan. Apan kon dunay pipila ka magmamantala nga gustong mogasa ug salapi ngadto sa magtatan-aw sa sirkito, sila makahatag niana. Kon ilang klarohon nga ang maong gasa maoy alang sa paghulip sa pipila niya ka gasto, nan iyang iiban kining kantidara gikan sa gasto nga gusto niyang pahulipan sa sangang buhatan. Ang mga gasang salapi kinahanglang dili kuhaon gikan sa pondo sa kongregasyon, kondili kadto lamang ihulip sa mga nagasto.

Kon ang mga ansiyano dili mangutana sa magtatan-aw sa sirkito bahin sa iyang mga nagasto, nan iyang hangyoon ang sangang buhatan nga hulipan ang bisan unsang nagasto nga wala mahulipi sa kongregasyon. (od, p. 49) Dili gayod angayng hangyoon sa magtatan-aw sa sirkito ang kongregasyon sa paghulip sa iyang mga nagasto, kondili maghatag lang siyag listahan sa iyang mga nagasto kon hangyoon siya sa mga ansiyano ug kon ang kongregasyon makaarang ug andam usab sa pag-ayuda.

Pasalamatan sa sangang buhatan ang pagpaluyo nga gihatag sa mga kongregasyon ngadto sa magtatan-aw sa sirkito panahon sa iyang pagduaw, nga magsilbing usa ka maayong amot alang sa tibuok-kalibotang buluhaton.—Heb. 13:16.